Avropa Parlamentinin Azərbaycana qarşı qərəzli davranışı göstərir ki, bu qurum ölkəmizə münasibətdə obyektiv və ədalətli mövqe nümayiş etdirməkdən uzaqdır. Prezident İlham Əliyev də bəyan edib ki, Avropa Parlamenti sülh prosesinə dəstək vermək əvəzinə, ona qarşı sabotajla məşğul olur. Bu bəyanatdan sonra Avropa Parlamentinin sədri Roberta Metsolanın cəfəng açıqlaması bu reallığı bir daha təsdiqlədi.
Milli Məclisin deputatı Könül Nurullayeva qəzetimizə açıqlamasında deyib ki, AP-nin Azərbaycanla bağlı qətnamələri həmişə siyasi qərəz və böhtan üzərində qurulub. Bu yanaşma da göstərir ki, Avropa Parlamenti regiondakı proseslərə obyektiv hüquqi prinsiplərdən deyil, destruktiv maraqlar prizmasından yanaşır. "Xüsusilə Azərbaycanın ərazi bütövlüyü məsələsində illərlə nümayiş etdirilən susqunluq, sonrakı mərhələlərdə Bakıya qarşı böhtan dolu qətnamələrin qəbul edilməsi Avropa Parlamentinin əsl simasını ortaya qoyur. Bu xüsusda Metsolanın açıqlaması qərəzli siyasətin davam etdirilməsi niyyətini təsdiqləyir. Əgər bir qurum tənqidlərdən nəticə çıxarmaq, regionun həssas siyasi reallıqlarını nəzərə almaq əvəzinə, əvvəlki pozucu fəaliyyətə sadiqliyini bəyan edirsə, bu, artıq qərəzin göstəricisidir" - deyə o əlavə edib.
Deputat qeyd edib ki, Azərbaycan xarici siyasətdə müstəqil və prinsipial mövqe nümayiş etdirir. Rəsmi Bakı açıq şəkildə bildirir ki, münasibətlər yalnız qarşılıqlı hörmət və suverenliyə ehtiram əsasında inkişaf edə bilər. Bu baxımdan Avropa Parlamentinin davamlı şəkildə siyasi təzyiq alətinə çevrilən qətnamələri tərəfdaşlıq ruhuna ziddir. Digər tərəfdən, enerji təhlükəsizliyi, nəqliyyat layihələri və regional sabitlik məsələlərində Azərbaycanın Avropa üçün strateji əhəmiyyəti artmaqdadır. Belə bir şəraitdə münasibətlərin emosional və qərəzli siyasi ritorika üzərində qurulması Avropanın maraqlarına xidmət etmir.
K.Nurullayeva bildirib ki, Avropa Parlamenti obyektiv tərəfdaş olmaq istəmir və Azərbaycana qarşı qərəzli siyasətini davam etdirmək niyyətindədir: "R.Metsolanın açıqlaması bunu bir daha sübut edir. Azərbaycan isə öz milli maraqlarını qətiyyətlə müdafiə edən, xarici təzyiqlər qarşısında geri çəkilməyən dövlətdir. Heç bir qüvvə Azərbaycanla diktə dili ilə danışa bilməz".
Əsmər QARDAŞXANOVA,
"Azərbaycan"
