Revanşistlər erməni xalqını yenidən keçmişə sürükləmək istəyirlər
Növbəti parlament seçkiləri yaxınlaşdıqca Ermənistanda vəziyyət gərgin xarakter alır. Seçkilərdə qalib gəlmək üçün revanşist qüvvələr yalançı vədlər verməklə xalqı öz tərəflərinə çəkmək istəyirlər. İrəvandakı son hadisələr göstərir ki, onların vədlərinə aldanıb arxalarınca gedən qüvvələr az da olsa, hələ var. Bu qüvvələrin əksəriyyəti "dənizdən-dənizə böyük Ermənistan" xəyalları ilə yaşayanlardır.
Revanşistlərin önündə gedən Ermənistanın keçmiş prezidentləri Robert Koçaryan və Serj Sarkisyandır. Cütlük adlandırılan bu revanşistlər "Qarabağ klanı" pərdəsi altında yenidən hakimiyyətə qayıtmaq və işğalçılıq ideyalarını canlandırmaq məqsədilə fəaliyyətlərini genişləndirməyə, seçicilərin səs çoxluğunu qazanmağa çalışırlar. Amma müşahidəçilərin rəylərinə görə, onların seçkilərdə qalib gəlmək şansları xeyli aşağıdır. Çünki əhalinin əksəriyyət hissəsi Ermənistana dinclik, əmin-amanlıq gətirməyə çalışan Paşinyanın partiyasına səs verməyə hazırlaşır. Bu səbəbdən Nikol Paşinyanla sabiq prezidentlər arasında qarşıdurma yeni fazaya daxil olub.
Ermənistandakı siyasi vəziyyətin gərginləşməsi Avropa İttifaqının da diqqətindən yayınmır. Avropa İttifaqının diplomatiya rəhbəri Kaya Kallas "Facebook" sosial şəbəkəsində yazıb: "Ermənistan mürəkkəb seçkiqabağı vəziyyətlə üzləşib və bu vəziyyət hibrid təhdidlərlə xarakterizə olunur".
Ermənistanda siyasi gərginliyi artıran səbəblərdən biri də son günlər cəmiyyəti hiddətləndirən rüşvət məsələsidir. Verilən məlumatlara görə, rusiyalı iş adamı Samvel Karapetyanın rəhbərlik etdiyi "Güclü Ermənistan" partiyasının adından seçkiqabağı rüşvətin verilməsi və alınması ilə bağlı cinayət işi çərçivəsində aprelin 29-da saxlanılan beş nəfərdən üçü barəsində həbs qətimkan tədbiri seçilib. Ermənistanın Antikorrupsiya Komitəsi aprelin 29-da "Güclü Ermənistan" partiyasının adından fəaliyyət göstərən beş nəfəri gizli şəkildə rüşvət verməkdə şübhəli bilərək saxlayıb. Seçki öncəsi rüşvətin verilməsi və alınması ilə bağlı cinayət işi çərçivəsində Samvel Karapetyanın "Güclü Ermənistan" partiyasının 14 üzvü saxlanılıb. Təbiidir ki, bu faktlar seçkilərin demokratik keçirilməsinin üzərinə kölgə salır.
Ermənistanda daxili siyasi vəziyyəti gərginləşdirən digər səbəb cəmiyyətdə revanşist qüvvələrin çıxışlarının artmasıdır. Öz millətinin düşməni olan, erməni xalqını uçuruma sürükləyən revanşist qüvvələrin başında dayanan və qan qoxulu ideyalar yayan Robert Koçaryan-Serj Sarkisyan cütlüyü hansı yolla olursa-olsun, hakimiyyətə gəlməyə can atırlar. Ermənistandakı radikal müxalifət və revanşist qruplar xüsusən Azərbaycanla sülh müqaviləsinin imzalanması məsələsini süni surətdə qabardaraq və bunu xalqa başqa yöndən izah edərək gərginliyi artırmağa çalışırlar. Revanşistlər çirkin məqsədlərinə çatmaq üçün müxtəlif xarakterli təxribatlar törədir, İrəvanda kütləvi aksiyalar keçirirlər. Revanşist qüvvələr bu addımları ilə erməni xalqını gələcəyə yox, keçmişə sürükləyirlər.
Ermənistanın baş naziri Nikol Paşinyan parlamentdəki çıxışında xalqa çağırış edib. Bildirib ki, biz Ermənistanı geosiyasi tələdən çıxartdıq: "Onu elə yerə apardıq ki, Ermənistan üçün bütün istiqamətlərdə perspektivlər açılıb və Ermənistan xalqı öz suveren iradəsi ilə hansı inkişaf vizyonunu mənimsəyə biləcəyinə qərar verə bilər. Ermənistan xalqı seçkilərdə sülhü müdafiə etməlidir. Onların sülhə səs verəcəyinə bir an belə şübhə etmirəm. Və bu, bütün şəhidlərin xatirəsinə və onların bütün keçmişinə ən böyük ehtiramdır".
Təbiidir ki, erməni xalqı müharibə tərəfdarı olan revanşistləri, rüşvət yolu ilə hakimiyyətə gəlmək istəyənləri deyil, N.Paşinyanın çıxışında dediklərini dəstəkləyən partiyaya səs verib sülh və əmin-amanlığı üstün tutacaq, revanşistlərin hakimiyyətə gələn yollarını seçimləri ilə kəsəcək.
Vahid MƏHƏRRƏMOV,
"Azərbaycan"
