Aİ rəsmilərinin ardıcıl səfərləri də bunu təsdiqləyir
Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallasın Azərbaycana səfəri ölkəmizlə Avropa İttifaqı arasında münasibətlərin yeni mərhələyə qədəm qoyduğunu göstərən mühüm siyasi hadisə kimi qiymətləndirilə bilər. Son dövrlərdə Aİ rəsmilərinin Azərbaycana intensivləşən səfərləri də təsadüfi deyil və bu, ölkəmizin regional və beynəlxalq müstəvidə artan strateji əhəmiyyətinin göstəricisidir.
Milli Məclisin deputatı Sevinc Hüseynova qəzetimizə açıqlamasında deyib ki, xüsusilə Vətən müharibəsindən sonra bu münasibətlər artıq emosional ritorikadan və epizodik siyasi yanaşmalardan uzaqlaşaraq, davamlı qarşılıqlı maraqların və rasional seçimlərin müəyyən etdiyi praqmatik tərəfdaşlıq modelinə çevrilməkdədir. Avropa Parlamenti və AŞPA kimi bəzi siyasi platformalarda zaman-zaman müşahidə olunan qərəzli ritorikaya baxmayaraq, Avropa İttifaqı ilə Azərbaycan dövləti arasında institusional dialoqun fasiləsiz davam etməsi bu münasibətlərin artıq sistem xarakteri aldığını göstərir. "Bu, eyni zamanda onu sübut edir ki, Azərbaycan-Avropa İttifaqı əməkdaşlığı ayrı-ayrı siyasi mövqelərin təsirindən daha çox, uzunmüddətli geosiyasi maraqlar və strateji zərurətlər üzərində qurulur. Kaya Kallasın regiona səfəri və Ermənistanla təmaslardan dərhal sonra Bakıya gəlməsi də məhz bu kontekstdə xüsusi diqqət çəkir. Prezident İlham Əliyevlə keçirilən görüşdə səsləndirilən fikirlər və daha əvvəl Avropa İttifaqı Şurasının prezidenti Antonio Koştanın Bakıya səfəri zamanı qəbul olunmuş birgə bəyanat bu münasibətlərin artıq strateji xarakter daşıdığını təsdiqləyir. Bu səfər həm də onu göstərir ki, Avropa İttifaqı regionda formalaşan yeni geosiyasi reallıqları nəzərə almağa və Azərbaycanı Cənubi Qafqazın əsas siyasi və iqtisadi aktoru kimi qəbul etməyə məcburdur. Çünki hazırkı mərhələdə regionda təhlükəsizlik, enerji təminatı, nəqliyyat marşrutları və kommunikasiya layihələri ilə bağlı istənilən ciddi təşəbbüs Azərbaycanın iştirakı olmadan real nəticə verə bilməz", - deyə o əlavə edib.
Deputat qeyd edib ki, Azərbaycan bu gün Cənubi Qafqazda sabitliyin, təhlükəsizliyin və etibarlı tərəfdaşlığın əsas təminatçılarından biri kimi çıxış edir. Xüsusilə enerji təhlükəsizliyi, nəqliyyat-kommunikasiya marşrutları, "yaşıl enerji" layihələri və Orta dəhlizin inkişafı fonunda Avropanın Azərbaycana marağı daha da artıb. Mövcud geosiyasi reallıqlar göstərir ki, Avropa İttifaqı regionda uzunmüddətli və etibarlı əməkdaşlıq üçün Azərbaycana xüsusi önəm verir. S.Hüseynova vurğulayıb ki, Prezident İlham Əliyev tərəfindən həyata keçirilən balanslaşdırılmış, praqmatik və milli maraqlara əsaslanan xarici siyasət nəticəsində Azərbaycan həm Şərq, həm də Qərb üçün etibarlı tərəfdaş statusunu möhkəmləndirib. Bu gün ölkəmiz yalnız enerji ixrac edən dövlət deyil, eyni zamanda mühüm siyasi dialoq və əməkdaşlıq platforması kimi qəbul olunur: "Aİ rəsmilərinin ardıcıl səfərləri bir daha göstərir ki, Azərbaycanla münasibətlərin inkişafı Avropa üçün strateji zərurətə çevrilib. Bu səfərlər həm siyasi dialoqun genişlənməsi, həm iqtisadi əlaqələrin dərinləşməsi, həm də regionda sülh və təhlükəsizlik məsələlərində Azərbaycanın rolunun daha yaxından qiymətləndirilməsi baxımından mühüm əhəmiyyət daşıyır. Bütün bunlar onu deməyə əsas verir ki, Azərbaycanın beynəlxalq nüfuzu və geosiyasi çəkisi davamlı şəkildə artır və ölkəmiz regionun gələcəyini müəyyən edən əsas aktorlardan biri kimi mövqeyini daha da gücləndirir".
Əsmər QARDAŞXANOVA,
"Azərbaycan"
