Müasir müstəqil Azərbaycan dövlətinin qurucusu, Ümummilli
Lider Heydər Əliyevin anadan olmasının 103-cü ildönümünü qeyd edirik. Dahi şəxsiyyətin
şah əsəri olan müstəqil, güclü Azərbaycan onun siyasi kursunun layiqli
davamçısı Prezident İlham Əliyevin rəhbərliyi ilə zəfərlərə imza ataraq
regionda yaratdığı yeni reallıqlarla dünya ictimaiyyətinin diqqət mərkəzindədir.
Bu gün harada yaşamasından asılı olmayaraq hər bir azərbaycanlı
tarixi Zəfərimizin, ərazi bütövlüyümüzün, suverenliyimizin tam bərpasının
yaratdığı yeni reallıqlardan sonsuz qürur hissi keçirir. Fəxarət hissi ilə deyə
bilərik ki, Ümummilli Lider Heydər Əliyevin ruhu şaddır. Çünki bugünkü Azərbaycan
dahi şəxsiyyətin görmək istədiyi Azərbaycandır. Xalqımızın 30 il davam edən
torpaq həsrətinə son qoyulmuşdur. Artıq keçmiş məcburi köçkünlər mərhələ-mərhələ
doğma yurd-yuvalarına qayıdırlar. Dövlət başçısı, Müzəffər Ali Baş Komandan
İlham Əliyevin böyük qürur hissi ilə qeyd etdiyi kimi, biz bu gün Ağdamdayıq,
Füzulidəyik, Laçındayıq, Cəbrayıldayıq, Zəngilandayıq, Qubadlıdayıq, Kəlbəcərdəyik,
Şuşadayıq, Hadrutdayıq, Xocalıdayıq, Ağdərədəyik, Əsgərandayıq, Xankəndidəyik!
Azad Qarabağ və azad Şərqi Zəngəzur hazırda Azərbaycanın təkmil
dirçəliş modelini, şəhərsalmanın müasir təcrübəsini dünyaya təqdim edir. Qalib
Azərbaycan dünya hərb tarixində ilkə imza ataraq müharibədən dərhal sonra azad
edilmiş ərazilərimizdə genişmiqyaslı bərpa-quruculuq işlərinə başladı. Tarixi Zəfərimizdən
ötən beş ildən artıq dövrdə görülən işlərin miqyası hazırda sakinlərinə
qovuşmuş azad şəhər, kənd və qəsəbələrin timsalında özünün aydın ifadəsini
tapır. İndi Füzuli, Laçın, Cəbrayıl, Kəlbəcər, Ağdam, Şuşa, Xocalı, Xankəndi,
Xocavənd şəhərlərinin sakinləri sevincli günlərini yaşayırlar. "Böyük
qayıdış" proqramı uğurla icra edilir. 80 000-dən artıq insan öz həyatını
yenidən qurmaq, doğma yurdlarına qovuşmaq, təhsil almaq və işləmək məqsədilə
Qarabağ və Şərqi Zəngəzur bölgələrinə qayıtmışdır. Hədəf "Böyük
qayıdış" proqramının birinci mərhələsinin başa çatacağı cari ilin sonunadək
140 min keçmiş məcburi köçkünün azad edilmiş torpaqlara qayıdışını təmin etməkdir.
Bu yazıya uğurlarımızın zirvəsində dayanan tarixi Zəfərimizlə,
ərazi bütövlüyümüzün və suverenliyimizin tam bərpası ilə başlamağımız səbəbsiz
deyil. O səbəbdən ki, 44 günlük Vətən müharibəsində qazandığımız tarixi Zəfərin
təməlində düşünülmüş siyasət və Lider amili dayanır. Hər bir ölkənin
inkişafında bu iki amilin rolu inkaredilməzdir. 1991-1993-cü illərin reallıqları bunun əyani surətdə təsdiqidir.
Azərbaycan həmin dövrün iqtidarının yarıtmaz siyasəti, idarəçilik qabiliyyətinin
yoxluğu ucbatından müstəqilliyini itirmək təhlükəsi ilə üz-üzə qalmışdı. Belə bir son dərəcə çətin vəziyyətdə dövlətini,
xalqını canından artıq sevən Ümummilli Lider Heydər Əliyevin hakimiyyətə
qayıdışı ilə Azərbaycanın xoşbəxt gələcəyinin təməli qoyuldu. Bugünkü uğurların
təməli məhz 1993-2003-cü illərdə qoyulub. Xalqını zamanın mürəkkəb
tarixi-siyasi sınaqlarından uğurla çıxaran və ardıcıl mübarizə apararaq onu
uzun illər həsrətində olduğu müstəqilliyinə qovuşduran qüdrətli şəxsiyyət Heydər
Əliyevin hakimiyyətinin hər iki dövrü Vətənə, dövlətə, xalqa xidmət nümunəsidir.
Ulu Öndər Heydər Əliyev bütün mənalı həyatı boyu azərbaycanlı olması ilə fəxr
edərək hər kəsə Vətəni sevməyi öyrətdi. Onun artıq aforizmə çevrilmiş "Hər
bir insan üçün onun milli mənsubiyyəti onun qürur mənbəyidir. Mən həmişə fəxr
etmişəm, bu gün də fəxr edirəm ki, mən azərbaycanlıyam!" çağırışı bu gün
harada yaşamasından asılı olmayaraq hər bir azərbaycanlının həyat
amalıdır. Azərbaycan xalqı yeni əsrə və
yeni minilliyə məhz dahi şəxsiyyət Heydər Əliyev zəkasının işığında qədəm
qoymuşdur. Bu gün Ümummilli Liderin layiqli davamçısı müdrik Prezident, Silahlı
Qüvvələrimizin Müzəffər Ali Baş Komandanı cənab İlham Əliyevin rəhbərliyi ilə
davamlı yüksəliş yolunda inamla irəliləyən müasir müstəqil Azərbaycan Ulu Öndər
Heydər Əliyevin həyat amalının təntənəsidir.
Dahi şəxsiyyət Heydər Əliyevin Azərbaycan dövləti, xalqı
qarşısındakı xidmətlərinin miqyası ölçüyəgəlməzdir. Onun fəaliyyətinin hər sahəsi,
istiqaməti bir tədqiqat mövzusudur. Azərbaycanın dünyaya günəş kimi doğmasını
qarşıya əsas hədəf kimi qoyan Ümummilli Lider Heydər Əliyev respublikamıza rəhbərliyinin birinci dövründə özünün qeyri-adi idarəçilik bacarığı, polad
iradəsi və yüksək vətənpərvərliyi sayəsində, uzaqgörən və məqsədyönlü qərarları
ilə çox qısa müddətdə sosial-iqtisadi, elmi-texniki və mədəni sahələrin
inkişafında böyük sıçrayışa nail olmuşdur. 1969-cu il iyulun 14-də Ulu Öndər
Heydər Əliyev Azərbaycan Kommunist Partiyası Mərkəzi Komitəsinin birinci katibi
seçildikdən sonra tariximizin gedişi və
həyatımızın ahəngi köklü surətdə dəyişdi, azadlıq və müstəqillik duyğuları
milli düşüncəmizdə üstünlük təşkil etməyə başladı. Dahi Liderin respublikamıza rəhbərliyinin
birinci dövrü, yəni 1969-1982-ci illər
Azərbaycanın quruculuq salnaməsinin ən parlaq səhifələridir. Ulu Öndərin xalqın
yaradıcılıq enerjisini bir məqsədə yönəltməklə tarixi yaddaşın bərpası istiqamətində
atdığı qətiyyətli addımlar o dövrdə milli ruhun canlanmasına xidmət göstərmiş,
xalqımızın özünüdərkini və soykökünə qayıdışını təmin etmiş, müstəqil dövlət
quruculuğuna aparan yolun təməl daşına çevrilmişdir. Ümummilli Lider xalqımızın əsrlər boyu formalaşan milli dəyərləri,
ictimai-siyasi şüuru və dövlətçilik təfəkkürü üzərində güclü dövlət modeli
yaratmışdır. Onun zəngin həyat yolu və müstəsna fəaliyyətinin bütün mərhələləri
bir-birini tamamlamış, öz xalqına sıx bağlılığın, milli dövlətçilik məfkurəsinə
sadiqliyin canlı təcəssümü olmuşdur.
Ötən əsrin 90-cı illərində Azərbaycan Ermənistanın hərbi təcavüzü,
xarici təzyiqlər və daxili çəkişmələr üzündən dünyanın siyasi xəritəsindən
silinmək və dövlətçiliyini itirmək təhlükəsi ilə qarşılaşdı. Taleyimizin həll olunduğu belə bir ağır
zamanda xalqın təkidli çağırışına səs
verərək yenidən hakimiyyətə qayıdan Ulu Öndər Heydər Əliyev doğma Vətənin
xilası naminə misilsiz fədakarlıq nümayiş etdirdi, ölkəmizi ictimai-siyasi pərakəndəliyin
və anarxiyanın məngənəsindən qurtardı, bütün sahələrdə müşahidə olunan dərin tənəzzülün
qarşısını aldı, yenidən qurduğu və hər cür qəsdlərdən qoruduğu Azərbaycan dövlətinin dayanıqlı inkişaf
yolunu müəyyən etdi. Xalqımızı vahid amal ətrafında birləşdirən azərbaycançılıq
ideologiyasının formalaşdırılması, ana dilinin dövlət qayğısı ilə əhatə
olunması, ictimai-siyasi, elmi və mədəni fikir tariximizin əlamətdar hadisələrinin
müntəzəm qeyd edilməsi ənənəsinin yaradılması, Azərbaycanın çoxəsrlik mənəvi-mədəni
irsə sahib qədim diyar və sivilizasiyaların qovşağında yerləşən tolerantlıq məkanı
kimi geniş şöhrət qazanması Ümummilli Lider Heydər Əliyevin mükəmməl quruculuq
proqramının tərkib hissələri olmuşdur. O, Azərbaycanın müasir simasının,
xalqımızın zəngin dəyərlərinin dünyada tanıdılmasında və ölkəmizin beynəlxalq
münasibətlər sistemində layiqli mövqe qazanmasında müstəsna rol oynadı.
Ümummilli Liderimizin hakimiyyətinin hər iki dövründə gənc nəslin
milli-mənəvi dəyərlərimizə hörmət və sədaqət, vətənpərvərlik ruhunda
formalaşması, ictimai-siyasi həyatda fəal iştirakının təmin edilməsi əsas hədəflər
sırasında idi. Dahi şəxsiyyət Azərbaycanın gələcəyinin indiki və gələcək nəsillərə
nəyi və necə öyrətməyimizdən asılı olduğunu önə çəkərək bu çağırışı da edirdi
ki, gənclərimiz tariximizi, dilimizi, milli-mənəvi dəyərlərimizi, ədəbiyyatımızı
yaxşı bilməli, inkişaf etdirməli və təbliğ etməlidirlər. Dahi rəhbər gənclərin təhsilini xüsusilə diqqətdə
saxlayırdı. Onun hələ hakimiyyətinin birinci dövründə Azərbaycanın müstəqil gələcəyini
düşünərək atdığı mühüm addımlardan biri gənclərin keçmiş ittifaqın ən nüfuzlu
ali məktəblərində təhsil almağa göndərilməsi oldu. Bu həm gənclərin elmin sirlərinə
dərindən yiyələnmələrinə, həm də Azərbaycanın keçmiş SSRİ məkanında təbliğinə
xidmət edirdi. Ümummilli Lider bildirirdi ki, bizim məqsədimiz gənc nəslə təhsil
verib onları gələcəyə hazırlamaqdır. Amma bununla yanaşı, ən böyük məqsədimiz
Azərbaycan vətəndaşını, müstəqil Azərbaycan cəmiyyətinin ləyaqətli üzvünü
hazırlamaqdır. Hər bir insan gərək dövlətinə,
ənənələrinə, xalqına sadiq vətəndaş olsun. Ulu Öndər həmçinin bu çağırışı da
edirdi ki, cəmiyyət təhsilsiz inkişaf edə bilməz. Keçmiş SSRİ dövründə Ulu Öndər
Heydər Əliyev milli kimliyin qorunmasına, ana dilində təhsilin inkişafına böyük
sərmayə yatırırdı. Onun təşəbbüsü ilə dünya klassiklərinin və elmi ədəbiyyatın
Azərbaycan dilinə tərcüməsi, Azərbaycan dilində günün tələblərinə uyğun bədii və
elmi əsərlərin nəşri, Konstitusiyada Azərbaycan dilinin dövlət dili statusu
alması azərbaycançılıq ideologiyasının inkişafına və təbliğinə xidmət edən
mühüm addımlar oldu. Ulu Öndər milli dilimizin xilaskarı kimi tarixdə silinməz
imzasını qoydu.
Ümummilli Lider Heydər Əliyev gəncləri Azərbaycan cəmiyyətinin
inkişafında mühüm rol oynayan əsas qüvvə kimi görür və buna görə də onlarla
bağlı bir çox mühüm islahat həyata keçirirdi. Dahi şəxsiyyətin təşəbbüsü ilə gənclər
forumlarının keçirilməsi onların ictimai-siyasi fəallıqlarının artırılmasında,
milli ruhda, vətənpərvərlik ruhunda tərbiyə olunmalarında əhəmiyyətli rol
oynadı. Gənclərə həmişə böyük ümidlə baxan, onlara qayğı göstərən Ulu Öndər
Heydər Əliyevin fərmanı ilə 1997-ci ildən başlayaraq hər ilin 2 fevral tarixi
ölkəmizdə Azərbaycan Gəncləri Günü kimi qeyd olunur.
Bu gün Azərbaycanda yüksək intellektual səviyyəyə, vətənpərvərlik
ruhuna, milli düşüncəyə malik, ölkənin ictimai-siyasi həyatında rolu artan gənclər
ordusu formalaşıb. "Gənclər milli ruhda, vətənpərvərlik ruhunda, ənənəvi dəyərlər
əsasında tərbiyə almalıdırlar. Bax, belə gənclər ölkəmizi gələcəyə inamla
aparacaq. Hesab edirəm ki, bugünkü gənclərin mütləq əksəriyyəti bu meyarlara
cavab verir - bilikli, savadlı, Vətənə bağlı, vətənpərvər və dünyaya açıq. Elə
olmalıdır ki, Azərbaycanın dövlət müstəqilliyi güclənsin" sözləri ilə gənclərə
böyük inamını ifadə edən Prezident İlham Əliyev bildirir ki, ən çıxılmaz vəziyyətdə
belə gənclər qətiyyətli olmalıdırlar. Hazırda Prezident İlham Əliyevin müdrik
tövsiyələrini əməli fəaliyyətləri ilə yerinə yetirən gənclərimiz zəngin mədəni
irsimizin qorunub saxlanması və təbliğində mühüm addımlar atırlar. Onlar elmi
nailiyyətləri, aparılan islahatlarda fəallıqları, özəl sahələrdə qazandıqları
uğurları ilə güclü intellektual potensiala malik olduqlarını Vətənə xidmətlərində
bildirir, dünyada mövcud olan ən müasir texnologiyalar əsasında yeniliklərə
imza atmaqda fərqlənirlər. Bu mühüm məqamı da xüsusi qeyd etməliyik ki, 2020-ci
ilin 44 günlük Vətən müharibəsində Zəfər tarixini yazan gənclərimiz Ulu Öndər
Heydər Əliyevin idarəçilik məktəbindən bəhrələnən, onun layiqli davamçısı
Prezident, Müzəffər Ali Baş Komandan İlham Əliyevin yetişdirdiyi gənclərdir. O
gənclər ki illərdir torpaqlarımızı düşmən tapdağından azad etmək, Xankəndidə,
Şuşada, Xocalıda, ümumilikdə işğal altında olan bütün torpaqlarımızda Azərbaycan
bayrağını ucaltmaq üçün Müzəffər Ali Baş Komandandan hücum əmrini gözləyirdilər.
Dövlət başçısı İlham Əliyevin əmrinə əsasən başlanan Vətən müharibəsinə qoşulan
gənclərin sayı-hesabı yox idi. Silahlı Qüvvələrimizin müxtəlif təyinatlı hissələrində
xidmət edən əsgər və zabitlərimizlə birgə düşməni məğlub edən könüllü gənclərimiz
ana Vətənin çağırışına sədaqətli oğul kimi səs verərək Mübarizlərin, Poladların
davamçıları oldular. Şəhidlik zirvəsinə ucalaraq sübut etdilər ki, torpaq əgər
uğrunda ölən varsa, Vətəndir.
Bu bir danılmaz həqiqətdir ki, Ulu Öndər Heydər Əliyevin həyat
yolu hər birimiz üçün vətənpərvərlik məktəbidir. "Xalqımız böyük xalqdır.
Böyük tarixə, böyük mədəniyyətə malikdir. Bu mədəniyyətimizi, onun qədimliyini,
dünya miqyasında böyük şöhrətə malik olduğunu hər kəsə nə qədər dərindən anlada
bilsək, bir o qədər də xalqımızda vətənpərvərlik, vətəndaşlıq hissini, azərbaycançılığı
yüksəldərik" söyləyən Ümummilli Lider Azərbaycanı hər zaman zirvələrdə
görmək istəyirdi və buna nail oldu. Bu gün dünya ictimaiyyəti zəngin tarixə
malik olan Azərbaycan xalqının timsalında yenilməzliyin, məğrurluğun nümunəsini
görür. Müstəqil və suveren dövlətə sahib olmaq, milli-mənəvi dəyərlərə, həmrəylik,
humanizm, ədalət və qanunun aliliyi prinsiplərinə əsaslanan inkişaf etmiş cəmiyyət
qurmaq yüzilliklər boyu Azərbaycan xalqının ən böyük arzusu olmuşdur. Tarixin
müxtəlif mərhələlərində kənar müdaxilələrə, üzləşdiyi məhrumiyyətlərə
baxmayaraq, xalqımız milli kimliyini, mübarizə ruhunu qoruyub saxladı, öz
ideallarına həmişə sadiq qaldı və XX əsrin sonlarında dövlət müstəqilliyini bərpa
etdi.
Azərbaycan müxtəlif mədəniyyətləri, dinləri bir araya gətirən,
onlar arasında körpü rolunu oynayan ölkədir. Bu gün Azərbaycanın tolerantlığı,
multikultural dəyərlərin inkişafına verdiyi töhfələr beynəlxalq səviyyədə təqdir
edilir. Son 22 ildən artıq dövrdə Heydər Əliyev siyasətini bütün sahələrdə
uğurla davam etdirən Prezident İlham Əliyev çıxışlarında bu reallığı xüsusi
qeyd edir ki, azərbaycançılıq ideologiyası, azərbaycançılıq prinsipləri Azərbaycanda
çoxdan bərqərar olub. Ulu Öndər Heydər Əliyevin bizə qoyduğu dəyərli
miraslardan biri də məhz azərbaycançılıq məfkurəsidir. Biz - onun davamçıları
isə bu müsbət meyilləri öz tərəfimizdən daha da gücləndiririk. Azərbaycanda
yaşayan bütün xalqlar vahid, mehriban ailə kimi yaşayır. Bizim birliyimizi
pozmaq istəyənlər nə qədər cəhd göstərsələr də, buna nail ola bilməyiblər və
heç vaxt nail ola bilməyəcəklər.
Bu gün xarici ölkələrdə yaşayan soydaşlarımızla mövcud əlaqələri
gücləndirmək, onları ideoloji-siyasi məsələlərdə dəstəkləmək və ümummilli məqsəd
üçün səfərbər etmək Azərbaycanın xarici siyasətində ən önəmli prioritet istiqamətlərdəndir. Ümummilli Liderin təşəbbüsü ilə 2001-ci ildə
Dünya Azərbaycanlılarının I Qurultayının keçirilməsi diaspor quruculuğu
prosesində mühüm mərhələnin başlanğıcı oldu. Son 5 ildən artıq dövrün mühüm
reallıqlarından biri məhz 30 ildən sonra dünya azərbaycanlılarının Şuşada bir
araya gələrək VII Zəfər Qurultayını keçirmələri oldu. Azad Şuşadan birliyimizi,
həmrəyliyimizi dünyaya bəyan etməkdən böyük xoşbəxtlik ola bilməzdi və dünya azərbaycanlıları
bu müqəddəs arzularına çatdılar. Qarabağın incisi, Azərbaycanın mədəniyyət
beşiyi azad Şuşadan bütün dünyaya sonsuz qürur hissi və fəxrlə bəyan edildi ki,
bu torpaqların sahibi bizik və burada əbədi olacağıq. Müzəffər Ali Baş Komandan
İlham Əliyevin rəhbərliyi ilə Vətən müharibəsində qazandığımız tarixi Zəfər,
2023-cü ilin sentyabrında həyata keçirilən birgünlük lokal antiterror tədbirləri nəticəsində
suverenliyimizin tam bərpası, Azərbaycan bayrağının Şuşada, Xankəndidə,
bütövlükdə azad Qarabağda və azad Şərqi Zəngəzurda dalğalanması
birliyimizin, həmrəylimizin nə qədər
önəmli amil olduğunu bir daha təsdiqlədi.
Bu gün qalib Azərbaycan yeni dövrün hədəflərinin
reallaşdırılması yolunda inamla addımlayır. Yeni dövrün reallıqları fonunda
2024-cü ilin fevralında keçirilən prezident seçkilərində inamlı qələbə qazanan
cənab İlham Əliyev andiçmə mərasimində hədəfləri açıqlayarkən bu çağırışı
xüsusi vurğuladı ki, biz elə bir gənc nəsil yetişdirməliyik ki, onlar da daim
bizim kimi milli ənənələrə, milli-mənəvi dəyərlərə sadiq olsunlar, onların
beyinləri saf olsun. Kimsə onların beyinlərini zəhərləmək istəyəndə uğura nail
olmasın və burada, əlbəttə ki, ilk növbədə ailə tərbiyəsi ön plana çıxır. Xoşbəxtlikdən
Azərbaycan ailəsi sağlam ailədir, ənənələr, milli dəyərlər üzərində qurulan ailədir.
Ailə tərbiyəsi hər bir gənc üçün, hər bir uşaq üçün əsas tərbiyədir. İkinci
yerdə məktəb tərbiyəsidir və belə müzəffər gənclərimizin yetişdirilməsində Azərbaycan
məktəbinin çox böyük rolu vardır. Məktəblərdə uşaqlara aşılanan dəyərlər, müstəqilliklə
bağlı, milli ləyaqətlə bağlı, əsrlər boyu bizə qarşı edilən ədalətsizliklə, - təkcə
son 30 il ərzində yox, - torpaqlarımızın müxtəlif dövrlərdə əlimizdən alınması
ilə bağlı və bizim qəhrəmanlıq tariximizlə bağlı uşaqlara verilən tərbiyə və
biliklər çox böyük önəm daşıyır. Bütövlükdə milli-mənəvi dəyərlərə gəldikdə,
bu, bizim cəmiyyətimizin əsasıdır və bu, sarsılmaz varlıqdır, sarsılmaz dəyərdir
və bunu sarsılmaz etmək bizim əlimizdədir. Çünki burada hər hansı bir kənar
qüvvə öz çirkin niyyətlərinə çatsa, o zaman bizim ciddi problemlərimiz olacaq.
"Ona görə gənclərimizin milli ruhda tərbiyə edilməsi, ənənəvi dəyərlər əsasında
tərbiyə edilməsi, dırnaqarası mütərəqqi və yad dəyərlərin tamamilə cəmiyyətimizdən
silinməsi - bu vəzifə bizim hamımızın qarşısında durur, hər bir ailə qarşısında
durur və dövlət qarşısında durur. Burada, əlbəttə ki, dövlət siyasəti də
aparılır və aparılacaq. Eyni zamanda dediyim kimi, bütün cəmiyyət burada həmrəy
olmalıdır və biz bu həmrəyliyi görürük. Bu seçkilərdə göstərilən həmrəylik cəmiyyətimizi
bir qaya kimi möhkəmləndirir və belə olan halda heç bir kənar qüvvə bizə qarşı
heç bir məkrli plan həyata keçirə bilməz" deyən dövlət başçımız bu məsələyə
xüsusi diqqət yetirir.
Göründüyü kimi, azərbaycançılıq ideologiyasının daha da möhkəmlənməsi,
öz əhatə dairəsini genişləndirməsi, milli məfkurə kimi hər bir soydaşımızın
baxışlarında özünə yer tutması bütün dövrlər üçün öz aktuallığını qoruyan əsas
hədəflərdəndir. Azərbaycançılıq ideologiyasının təbliğində dahi şəxsiyyətin
adını daşıyan Heydər Əliyev Fondunun xidmətləri misilsizdir. Azərbaycanın
Birinci vitse-prezidenti, Heydər Əliyev Fondunun prezidenti Mehriban xanım
Əliyevanın çoxşaxəli fəaliyyətində azərbaycançılıq ideologiyasının təbliğinə
yönələn layihələr xüsusi yer tutur. Bu layihələr bütün dünyada mədəni sərvətlərimizin
zənginliyini nümayiş etdirir, mədəniyyət diplomatiyasının gücü ilə ölkəmizin
beynəlxalq nüfuzuna xidmət edir. Həyata keçirilən qlobal təşəbbüslər sayəsində
Azərbaycan bu gün bütün dünyada mədəniyyətlərarası dialoqun mərkəzi,
multikulturalizm məkanı kimi tanınır. Heydər Əliyev Fondu hazırkı dövrün əsas
çağırışı olan "Böyük qayıdış" proqramının uğurlu icrasına töhfələri
ilə də diqqətdədir. Belə ki, fond Qarabağ ərazisində ermənilər tərəfindən
dağıdılan, Azərbaycan xalqının milli sərvəti olan dini abidələrin, məscidlərin
bərpası üzrə layihəni uğurla həyata keçirir. Tarixi Zəfərimizdən sonra Heydər
Əliyev Fondunun təşkilatçılığı ilə Şuşada, Cıdır düzündə "Xarıbülbül"
Musiqi Festivalı ənənəsinin bərpası, "Qarabağın mədəni irsi" adlı nəşrlər
toplusunun hazırlanması və sair kimi mühüm addımlar Azərbaycan xalqının mənəvi,
tarixi, mədəni irsinin təşviqinə və qorunmasına dəyərli töhfələrdir. Fondun təşəbbüsü
və təşkilatçılığı ilə Ümummilli Lider Heydər Əliyevin dövlətimiz, xalqımız
qarşısındakı xidmətlərini özündə əks etdirən çoxsaylı kitablar dərc olunub və
olunmaqdadır. Heydər Əliyev Fondunun vitse-prezidenti Leyla Əliyevanın təşəbbüsü
ilə 2008-ci ildən fəaliyyətə başlayan "Xocalıya ədalət!" beynəlxalq təbliğat-təşviqat
kampaniyası XX əsrin ən dəhşətli faciəsinin soyqırımı kimi tanıdılmasında, həqiqətlərimizin
dünya ictimaiyyətinə çatdırılmasında əhəmiyyətli rol oynayır.
Təbii ki, Ulu Öndər Heydər Əliyevin Azərbaycan dövləti və
xalqı qarşısındakı misilsiz xidmətlərini, azərbaycançılıq məfkurəsinin təşəkkül
tapması və ümummilli ideologiyaya çevrilməsi istiqamətində titanik fəaliyyətlərini
bir yazıda tam əhatə etmək mümkün deyil. Müasir müstəqil Azərbaycan Ulu Öndərin
indiki və gələcək nəsillərə əmanəti, zəngin və çoxşaxəli irsi isə xalqımızın
milli sərvətidir. Bu müqəddəs mirası qoruyub saxlamaq hər bir azərbaycanlının şərəfli
vəzifəsidir. Sonda Ümummilli Lider Heydər Əliyevin qeyd etdiyi bu fikri bir
daha xatırlatmağı özümüzə borc bilirik: "Nə qədər ki Azərbaycan var, mən də
varam. Mən isə Azərbaycanda əbədi olacağam!"
Aynur SOFİYEVA,
YAP İdarə Heyətinin üzvü, Ailə, Qadın və Uşaq Problemləri
üzrə Dövlət Komitəsinin sədr müavini
