Azərbaycan Respublikasının Qanunu

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 1-ci və 20-ci bəndlərini rəhbər tutaraq qərara alır:

Maddə 1. "Sahibkarlıq sahəsində aparılan yoxlamaların dayandırılması haqqında" Azərbaycan Respublikası Qanununun (Azərbaycan Respublikasının Qanunvericilik Toplusu, 2015, № 10, maddə 1109 (Cild I); 2024, № 2, maddə 138, № 4, maddə 365; 2025, № 2, maddə 106; 2026, № 2, maddə 106) 2.1-ci maddəsinin birinci cümləsinə birinci halda "təhlükəsizliyinə" sözündən sonra ", həmçinin balıqçılıq sahəsində" sözləri əlavə edilsin.

Maddə 2. "Ətraf mühitə təsirin qiymətləndirilməsi haqqında" Azərbaycan Respublikasının Qanununa (Azərbaycan Respublikasının Qanunvericilik Toplusu, 2018, № 7 (I kitab), maddə 1397 (Cild I) Əlavə - "Ətraf mühitə təsirin qiymətləndirilməsi tələb olunan fəaliyyət növlərinin Siyahısı"nda aşağıdakı dəyişikliklər edilsin:

2.1.  27-ci maddə aşağıdakı redaksiyada verilsin:

"27. Kənd təsərrüfatı məhsullarının istehsalı üzrə aşağıdakı ixtisaslaşmış müəssisələrin (təsərrüfatların) layihələndirilməsi:

27.1. heyvandarlıq müəssisələri - yaşından asılı olmayaraq təsərrüfatda mövcud bütün heyvanlar daxil olmaqla 5 baş xırdabuynuzlu heyvan 1 baş iribuynuzlu heyvana, digər dırnaqlı heyvanların (at, dəvə, donuz və s.) hər 1 başı isə 1 baş iribuynuzlu heyvana ekvivalent hesab olunmaqla, layihə üzrə heyvan saxlama tutumu 1000 baş iribuynuzlu heyvan ekvivalentinə bərabər və ya ondan çox olduqda;

27.2. quşçuluq müəssisələri - yaşından asılı olmayaraq təsərrüfatda mövcud bütün quşlar daxil olmaqla (inkubasiya mərhələsində olanlar istisna edilməklə) 1 baş dəvəquşu 25 baş toyuğa, 1 baş hindquşu və ya qaz 5 baş toyuğa, 8 baş bildirçin 1 baş toyuğa, digər quş növlərinin hər 1 başı isə 1 baş toyuğa ekvivalent hesab olunmaqla, layihə üzrə quş saxlamatutumu 40 000 baş toyuq ekvivalentinə bərabər və ya ondan çox olduqda;

27.3. balıqçılıq infrastrukturu (o cümlədən akvakultura təsərrüfatları) - balıqçılıq obyektlərinin illik istehsal həcmi 500 ton və ya daha çox olduqda;

27.4. aqroparklar - bu Əlavənin 27.1-27.3-cü maddələrində nəzərdə tutulan fəaliyyət növlərinin hər biri üzrə və həmin fəaliyyət növləri üçün müəyyən edilmiş hədlərə bərabər və ya ondan çox olduqda.";

2.2. 34-cü maddə ləğv edilsin.

İlham ƏLİYEV, 

Azərbaycan Respublikasının Prezidenti

Bakı şəhəri, 13 oktyabr 2026-cı il

Azərbaycan Respublikası Prezidentinin Sərəncamı

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

Sahib Cəlil oğlu Rzayev Azərbaycan Respublikası ədliyyə nazirinin müavini - Penitensiar xidmətin rəisi təyin edilsin.

İlham ƏLİYEV,

Azərbaycan Respublikasının Prezidenti

Bakı şəhəri, 27 oktyabr 2026-cı il

Azərbaycan Respublikası Prezidentinin Sərəncamı

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

Mirsaleh Miradil oğlu Seyidov Azərbaycan Respublikası ədliyyə nazirinin müavini - Penitensiar xidmətin rəisi vəzifəsindən azad edilsin.

İlham ƏLİYEV,

Azərbaycan Respublikasının Prezidenti

Bakı şəhəri, 27 oktyabr 2026-cı il

№ 346

Azərbaycan Respublikası Nazirlər Kabinetinin QƏRARI

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, “Birləşmiş Millətlər Təşkilatının İqlim Dəyişmələri üzrə Çərçivə Konvensiyası ilə bağlı Tərəflərin 21-ci Konfransında qəbul olunmuş Paris Sazişinin təsdiq edilməsi haqqında” Azərbaycan Respublikasının 2016-cı il 28 oktyabr tarixli 362-VQ nömrəli Qanununa uyğun olaraq, İqlim Dəyişmələri üzrə Dövlət Komissiyasının vəsatətini nəzərə alaraq, Paris Sazişinin 4-cü maddəsinə əsasən uzunmüddətli aşağıkarbonlu inkişafın təmin edilməsi məqsədilə Azərbaycan Respublikasının Nazirlər Kabineti qərara alır:

1. “Azərbaycanın Uzunmüddətli Aşağıkarbonlu İnkişaf Strategiyası” (bundan sonra – Strategiya) təsdiq edilsin (əlavə olunur).

2. Strategiyada qeyd olunan “xalis sıfır emissiya” hədəfinə nail olunması məqsədilə:

2.1. Azərbaycan Respublikasının İqtisadiyyat Nazirliyi ölkə iqtisadiyyatının sahələri üzrə dekarbonlaşma tədbirlərinin müvafiq dövlət proqramları və strategiyalarına, milli fəaliyyət planlarına və digər sənədlərə inteqrasiyasını aidiyyəti qurumlarla əlaqələndirməklə təmin etsin;

2.2. Azərbaycan Respublikasının Maliyyə Nazirliyi bu Qərarın 3-cü hissəsi nəzərə alınmaqla, müvafiq dekarbonlaşma tədbirlərinin maliyyələşdirilməsini təmin etsin.

3. Bu Qərarın 1-ci hissəsi ilə təsdiq edilmiş Strategiyada nəzərdə tutulmuş 2060-cı ilədək “xalis sıfır emissiya” hədəfinə (şərtli hədəfə) nail olunmasının əlavə maliyyə resurslarının (beynəlxalq əməkdaşlıq və maliyyə dəstəyi, texnologiyaların ötürülməsi, güzəştli kreditlər, özəl sektor investisiyaları) cəlb edilməsindən asılı olacağı nəzərə alınsın.

4. Azərbaycan Respublikasının Ekologiya və Təbii Sərvətlər Nazirliyi:

4.1. Strategiyanı BMT-nin İqlim Dəyişmələri üzrə Çərçivə Konvensiyasının Katibliyinə təqdim etsin;

4.2. aidiyyəti qurumlarla birlikdə Strategiyanın məqsədləri və hədəfləri barədə ictimaiyyətin məlumatlandırılmasını, onun təbliğini, habelə elmi müəssisə və təşkilatların, vətəndaş cəmiyyəti institutlarının iştirakı ilə ictimai təqdimatının keçirilməsini təmin etsin;

4.3. Strategiyanın icrasına dair monitorinqi həyata keçirsin və onun nəticələrini iki ildən bir İqlim Dəyişmələri üzrə Dövlət Komissiyasına təqdim etsin.

Əli Əsədov,

Azərbaycan Respublikasının Baş naziri

Bakı şəhəri, “ 21 ” “ oktyabr ” 2026-cı il

№ 347

Azərbaycan Respublikası Nazirlər Kabinetinin QƏRARI

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, Azərbaycan Respublikasının Nazirlər Kabineti qərara alır:

“Azərbaycan Respublikası Müdafiə Sənayesi Nazirliyinin kollegiyasının tərkibi haqqında” Azərbaycan Respublikası Nazirlər Kabinetinin 2007-ci il 5 iyun tarixli 90 nömrəli Qərarının (Azərbaycan Respublikasının Qanunvericilik Toplusu, 2007, № 6, maddə 695 (Cild I) 1-ci hissəsi aşağıdakı redaksiyada verilsin:

“1. Azərbaycan Respublikası Müdafiə Sənayesi Nazirliyinin kollegiya üzvlərinin sayı 11 (on bir) nəfərdən ibarət müəyyənləşdirilsin və aşağıdakı tərkibdə təsdiq edilsin:

Kollegiyanın sədri

Azərbaycan Respublikasının müdafiə sənayesi naziri

Kollegiyanın üzvləri:

Azərbaycan Respublikası müdafiə sənayesi nazirinin müavinləri

Azərbaycan Respublikası Müdafiə Sənayesi Nazirliyi Aparatının rəhbəri

Azərbaycan Respublikası Müdafiə Sənayesi Nazirliyi Aparatının Hüquq şöbəsinin müdiri

Azərbaycan Respublikası Müdafiə Sənayesi Nazirliyi Aparatının Maliyyə və hesabatlılıq şöbəsinin müdiri

Azərbaycan Respublikası Müdafiə Sənayesi Nazirliyi Aparatının Beynəlxalq strateji əməkdaşlıq şöbəsinin müdiri

Azərbaycan Respublikası Müdafiə Sənayesi Nazirliyi Aparatının Sənayenin tənzimlənməsi şöbəsinin müdiri

Azərbaycan Respublikası Müdafiə Sənayesi Nazirliyi Aparatının İnsan resurslarının idarə edilməsi şöbəsinin müdiri

Azərbaycan Respublikası Müdafiə Sənayesi Nazirliyinin tabeliyində “Müdafiə Sənayesi Tədqiqat və İnnovasiya Mərkəzi” publik hüquqi şəxsin İdarə Heyətinin sədri.”.

Əli Əsədov,

Azərbaycan Respublikasının Baş naziri

Bakı şəhəri, “ 21 ” “ oktyabr ” 2026-cı il

№ 354

Azərbaycan Respublikası Nazirlər Kabinetinin QƏRARI

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, “Əhalinin icbari tibbi sığortası sahəsində idarəetmənin təkmilləşdirilməsi ilə bağlı bir sıra tədbirlər haqqında” Azərbaycan Respublikası Prezidentinin 2026-cı il 19 mart tarixli 631 nömrəli Fərmanının icrasını təmin etmək məqsədilə Azərbaycan Respublikasının Nazirlər Kabineti qərara alır:

1. Azərbaycan Respublikası Nazirlər Kabinetinin 2008-ci il 29 fevral tarixli 59 nömrəli Qərarı (Azərbaycan Respublikasının Qanunvericilik Toplusu, 2008, № 2, maddə 134 (Cild I); 2024, № 1, maddə 81, № 5 (II kitab), maddə 594, № 9, maddə 1067, № 11, maddə 1246; 2025, № 5, maddə 504, № 12 (II kitab), maddələr 1216, 1219, 1257; 2026, № 1, maddə 84) ilə təsdiq edilmiş “Hərbi-həkim ekspertizası haqqında Əsasnamə”də aşağıdakı dəyişikliklər edilsin:

1.1. 1.4-cü bəndin “c” yarımbəndində “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin;

1.2. 2.3-cü bənddən, 2.4-cü bəndin ikinci abzasından, 2.6-cı və 2-1.1-ci bəndlərdən ismin müvafiq hallarında “, İcbari Tibbi Sığorta üzrə Dövlət Agentliyi” sözləri çıxarılsın;

1.3. 2-1.20-ci bənddə “2 (iki)” sözləri “3 (üç)” sözləri ilə əvəz edilsin və həmin bənddən “, İcbari Tibbi Sığorta üzrə Dövlət Agentliyinin 1 (bir)” sözləri çıxarılsın.

2. Azərbaycan Respublikası Nazirlər Kabinetinin 2010-cu il 29 oktyabr tarixli 192 nömrəli Qərarı (Azərbaycan Respublikasının Qanunvericilik Toplusu, 2010, № 10, maddə 919 (Cild I) ilə təsdiq edilmiş “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə əlavə sığorta ödənişi məbləğinin hesablanması Qaydası”nın 2.1-ci bəndində “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin.

3. Azərbaycan Respublikası Nazirlər Kabinetinin 2016-cı il 14 iyun tarixli 229 nömrəli Qərarı (Azərbaycan Respublikasının Qanunvericilik Toplusu, 2016, № 6, maddə 1206 (Cild I); 2024, № 5 (II kitab), maddə 592, № 11, maddə 1246; 2025, № 12 (II kitab), maddə 1257; 2026, № 7 (II kitab), maddə 757) ilə təsdiq edilmiş 1 nömrəli əlavə – “Azərbaycan Respublikası vətəndaşlarının müddətli həqiqi hərbi xidmətə çağırışı üzrə Mərkəzi Çağırış Komissiyasının tərkibi”nin “Komissiyanın üzvləri:” hissəsinin on üçüncü abzası ləğv edilsin.

4. “Azərbaycan Respublikası Əmək və Əhalinin Sosial Müdafiəsi Nazirliyinin kollegiyasının tərkibi haqqında” Azərbaycan Respublikası Nazirlər Kabinetinin

2018-ci il 28 avqust tarixli 359 nömrəli Qərarının (Azərbaycan Respublikasının Qanunvericilik Toplusu, 2018, № 8, maddə 1810 (Cild I); 2024, № 5 (II kitab), maddə 578; Azərbaycan Respublikası Nazirlər Kabinetinin 2026-cı il 8 sentyabr tarixli 271 nömrəli Qərarı) 1-ci hissəsinin “Kollegiyanın üzvləri” bölməsinin altıncı abzasında “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin.

5. “Yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin əməkhaqlarına müddətli əlavənin müəyyən edilməsi barədə” Azərbaycan Respublikası Nazirlər Kabinetinin 2020-ci il 25 mart tarixli 112 nömrəli Qərarının (Azərbaycan Respublikasının Qanunvericilik Toplusu, 2020, № 3, maddə 373 (Cild I); 2024, № 4, maddə 451, № 7, maddə 900, № 10, maddə 1169; 2025, № 2, maddə 182, № 4 (II kitab), maddə 412, № 7, maddə 721, № 10, maddə 983; 2026, № 1, maddə 83, № 5 (II kitab), maddə 469) 4-cü hissəsində “İcbari Tibbi Sığorta üzrə Dövlət Agentliyi” sözləri “Azərbaycan Respublikasının Əmək və Əhalinin Sosial Müdafiəsi Nazirliyi” sözləri ilə əvəz edilsin.

6. “Koronavirus (COVID-19) pandemiyası dövründə Azərbaycan Respublikasında uçuşların və hava nəqliyyatı ilə sərnişin daşımalarının təşkili üzrə müvəqqəti Qaydalar”ın təsdiq edilməsi barədə” Azərbaycan Respublikası Nazirlər Kabinetinin 2020-ci il 11 iyun tarixli 199 nömrəli Qərarının (Azərbaycan Respublikasının Qanunvericilik Toplusu, 2020, № 6, maddə 789 (Cild I); 2024, № 11, maddə 1246; 2025, № 10, maddə 972) 2-ci hissəsində “İcbari Tibbi Sığorta üzrə Dövlət Agentliyi” sözləri “Əmək və Əhalinin Sosial Müdafiəsi Nazirliyi” sözləri ilə əvəz edilsin.

7. Azərbaycan Respublikası Nazirlər Kabinetinin 2020-ci il 23 iyun tarixli 213 nömrəli Qərarı (Azərbaycan Respublikasının Qanunvericilik Toplusu, 2020, № 6, maddə 803 (Cild I); 2024, № 2, maddə 235, № 10, maddə 1164; 2025, № 2, maddə 181; Azərbaycan Respublikası Nazirlər Kabinetinin 2026-cı il 30 sentyabr tarixli 315 nömrəli Qərarı) ilə təsdiq edilmiş “Gənclər arasında ailənin və nikahın əhəmiyyəti, onun qorunması və möhkəmləndirilməsi məqsədilə erkən evliliyin və qohumlar arasında nikahın mənfi nəticələrinə dair maarifləndirmə Qaydası”nda aşağıdakı dəyişikliklər edilsin:

7.1. 1.2.10-cu yarımbənd ləğv edilsin;

7.2. 6.1.5-ci yarımbəndin 1-ci abzasına “çətin” sözündən əvvəl “gənclərin, o cümlədən” sözləri əlavə edilsin.

8. “Yeni növ koronavirus (COVID-19) infeksiyası ilə mübarizə sahəsində əlavə tədbirlər haqqında” Azərbaycan Respublikası Nazirlər Kabinetinin 2020-ci il 30 iyun tarixli 231 nömrəli Qərarında (Azərbaycan Respublikasının Qanunvericilik Toplusu, 2020, № 6, maddə 821 (Cild I) aşağıdakı dəyişikliklər edilsin:

8.1. 2-ci hissədə “İcbari Tibbi Sığorta üzrə Dövlət Agentliyi” sözləri “Azərbaycan Respublikasının Əmək və Əhalinin Sosial Müdafiəsi Nazirliyi və” sözləri ilə əvəz edilsin;

8.2. 3-cü hissədə “və İcbari Tibbi Sığorta üzrə Dövlət Agentliyi” sözləri

“, Azərbaycan Respublikasının Əmək və Əhalinin Sosial Müdafiəsi Nazirliyi və” sözləri ilə əvəz edilsin.

9. “Bakı şəhər Baş Səhiyyə İdarəsinin tabeliyində yaradılmış xüsusi ambulator tibb məntəqələrində yeni növ koronavirus (COVID-19) infeksiyasına yoluxmuş xəstələrə ambulator-poliklinik yardım göstərən tibb işçilərinin əməkhaqlarına müddətli əlavənin müəyyən edilməsi barədə” Azərbaycan Respublikası Nazirlər Kabinetinin 2020-ci il 23 iyul tarixli 262 nömrəli Qərarının (Azərbaycan Respublikasının Qanunvericilik Toplusu, 2020, № 7, maddə 992 (Cild I); 2024, № 1, maddə 92, № 4, maddə 459, № 7, maddə 901, № 10, maddə 1172; 2025, № 2, maddə 183, № 4 (II kitab), maddə 413, № 7, maddə 724, № 10, maddə 984; 2026, № 1, maddə 89, № 5 (II kitab), maddə 455, № 7 (II kitab), maddə 746; Azərbaycan Respublikası Nazirlər Kabinetinin 2026-cı il 15 oktyabr tarixli 338 nömrəli Qərarı) 3-cü hissəsində “və İcbari Tibbi Sığorta üzrə Dövlət Agentliyi” sözləri “, Azərbaycan Respublikasının Əmək və Əhalinin Sosial Müdafiəsi Nazirliyi və” sözləri ilə əvəz edilsin.

10. Azərbaycan Respublikası Nazirlər Kabinetinin 2020-ci il 10 sentyabr tarixli 332 nömrəli Qərarı (Azərbaycan Respublikasının Qanunvericilik Toplusu, 2020, № 9, maddə 1205 (Cild I) ilə təsdiq edilmiş “Xüsusi karantin rejimi dövründə Azərbaycan Respublikasında fəaliyyət göstərən təhsil müəssisələrində tədris və təlim-tərbiyə prosesinin təşkilinin müvəqqəti Qaydaları”nın 3.6-cı bəndində “İcbari Tibbi Sığorta üzrə Dövlət Agentliyinin” sözləri “Azərbaycan Respublikası Əmək və Əhalinin Sosial Müdafiəsi Nazirliyinin” sözləri ilə əvəz edilsin.

11. Azərbaycan Respublikası Nazirlər Kabinetinin 2020-ci il 2 dekabr tarixli 479 nömrəli Qərarı (Azərbaycan Respublikasının Qanunvericilik Toplusu, 2020, № 12 (V kitab), maddə 1583 (Cild I) ilə təsdiq edilmiş “Doğum və ölüm faktını təsdiq edən sənədlər üzrə məlumatların, habelə vətəndaşların dəfni ilə bağlı məlumatların Elektron Hökumət İnformasiya Sistemi vasitəsilə ötürüləcəyi aidiyyəti dövlət informasiya ehtiyatlarının və sistemlərinin Siyahısı”nın 1-ci hissəsindən “və Azərbaycan Respublikasının İcbari Tibbi Sığorta üzrə Dövlət Agentliyi” sözləri çıxarılsın.

12. “Azərbaycan Respublikasının ərazi bütövlüyü uğrunda aparılan hərbi əməliyyatlar zamanı xəsarət (yaralanma, travma, kontuziya) almış hərbi qulluqçuların tibbi-sosial ekspertizası ilə bağlı bəzi məsələlər barədə” Azərbaycan Respublikası Nazirlər Kabinetinin 2021-ci il 13 yanvar tarixli 7 nömrəli Qərarında (Azərbaycan Respublikasının Qanunvericilik Toplusu, 2021, № 1, maddə 90 (Cild I) aşağıdakı dəyişikliklər edilsin:

12.1. 1-ci hissənin “Komissiyanın üzvləri” bölməsi üzrə:

12.1.1. dördüncü abzas ləğv edilsin;

12.1.2. altıncı abzasda “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin;

12.2. 3-cü hissədə “, Azərbaycan Respublikasının Səhiyyə Nazirliyi və İcbari Tibbi Sığorta üzrə Dövlət Agentliyi” sözləri “və Azərbaycan Respublikasının Səhiyyə Nazirliyi” sözləri ilə əvəz edilsin.

13. “Azərbaycan Respublikasının ərazi bütövlüyü uğrunda aparılan hərbi əməliyyatlarda iştirak etmiş hərbi qulluqçulara və şəhid ailələrinə psixoloji yardımla bağlı bəzi məsələlər barədə” Azərbaycan Respublikası Nazirlər Kabinetinin 2021-ci il 13 yanvar tarixli 8 nömrəli Qərarında (Azərbaycan Respublikasının Qanunvericilik Toplusu, 2021, № 1, maddə 91 (Cild I) aşağıdakı dəyişikliklər edilsin:

13.1. 1-ci hissənin “Komissiyanın üzvləri” bölməsi üzrə:

13.1.1. beşinci abzas ləğv edilsin;

13.1.2. yeddinci abzasda “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin;

13.2. 3-cü hissədə “, Azərbaycan Respublikasının Müdafiə Nazirliyi və İcbari Tibbi Sığorta üzrə Dövlət Agentliyi” sözləri “və Azərbaycan Respublikasının Müdafiə Nazirliyi” sözləri ilə əvəz edilsin.

14. “Şəhid ailələri üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzlərində xidmət göstərən dövlət orqanlarının fəaliyyətinin təşkilinə dair Əlaqələndirmə Komissiyasının yaradılması barədə” Azərbaycan Respublikası Nazirlər Kabinetinin 2021-ci il 2 oktyabr tarixli 289 nömrəli Qərarının (Azərbaycan Respublikasının Qanunvericilik Toplusu, 2021, № 10, maddə 1158 (Cild I) 1-ci hissəsinin “Komissiyanın üzvləri:” bölməsinin beşinci abzası ləğv edilsin.

15. Azərbaycan Respublikası Nazirlər Kabinetinin 2021-ci il 27 noyabr tarixli 371 nömrəli Qərarı (Azərbaycan Respublikasının Qanunvericilik Toplusu, 2021, № 11, maddə 1293 (Cild I) ilə təsdiq edilmiş 1 nömrəli əlavə - “COVID-19 xəstəliyinə qarşı peyvənd olunmanı, peyvəndləməyə əks göstərişi, neqativ PZR test nəticəsini əks etdirən və COVID-19 xəstəliyinə yoluxmuş şəxslərin sağalaraq immunitetə malik olmalarını təsdiq edən sertifikatların tanınması Qaydası”nda aşağıdakı dəyişikliklər edilsin:

15.1. 5.6-cı bənddə “İcbari Tibbi Sığorta üzrə Dövlət Agentliyinin” sözləri “Azərbaycan Respublikası Əmək və Əhalinin Sosial Müdafiəsi Nazirliyinin” sözləri ilə əvəz edilsin;

15.2. 5.7-ci bənddən “İcbari Tibbi Sığorta üzrə Dövlət Agentliyi” sözləri çıxarılsın;

15.3. 7.1-ci bənddən “İcbari Tibbi Sığorta üzrə Dövlət Agentliyi” sözləri çıxarılsın və həmin bəndə “Daxili İşlər Nazirliyini,” sözlərindən sonra “Azərbaycan Respublikasının Əmək və Əhalinin Sosial Müdafiəsi Nazirliyini,” sözləri əlavə edilsin.

16. Azərbaycan Respublikası Nazirlər Kabinetinin 2022-ci il 15 sentyabr tarixli 350 nömrəli Qərarı (Azərbaycan Respublikasının Qanunvericilik Toplusu, 2022, № 9, maddə 1084 (Cild I); 2024, № 2, maddə 229, № 4, maddələr 448, 469, № 7, maddələr 895, 915, № 8, maddə 996, № 12 (I kitab), maddə 1326 (II kitab), maddə 1428; 2025, № 3, maddələr 273, 294, № 7, maddə 707, № 9, maddə 854, № 12 (II kitab), maddə 1257; 2026, № 4, maddə 380, № 5 (II kitab), maddə 474, № 7 (II kitab), maddə 754; Azərbaycan Respublikası Nazirlər Kabinetinin 2026-cı il 9 sentyabr tarixli 278 nömrəli Qərarı) ilə təsdiq edilmiş “Azərbaycan Respublikasının dövlət orqanları, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslər, dövlət adından yaradılan publik hüquqi şəxslər və komissiyalar üçün müəyyən edilmiş vahid indekslərin Siyahısı”nın 11-ci hissəsinin on birinci abzası ləğv edilsin.

17. “Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin vahid elektron informasiya sistemi haqqında Əsasnamə”nin təsdiq edilməsi barədə” Azərbaycan Respublikası Nazirlər Kabinetinin 2026-cı il 2 mart tarixli 59 nömrəli Qərarında (Azərbaycan Respublikasının Qanunvericilik Toplusu, 2026, № 3, maddə 261) aşağıdakı dəyişikliklər edilsin:

17.1. 5-ci hissədən “İcbari Tibbi Sığorta üzrə Dövlət Agentliyinə,” sözləri çıxarılsın;

17.2. həmin Qərarla təsdiq edilmiş “Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin vahid elektron informasiya sistemi haqqında Əsasnamə”nin 3.2.5-ci yarımbəndində “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin.

18. Azərbaycan Respublikası Nazirlər Kabinetinin 2026-cı il 21 may tarixli 158 nömrəli Qərarı (Azərbaycan Respublikasının Qanunvericilik Toplusu, 2026, № 5

(II kitab), maddə 482) ilə təsdiq edilmiş “İstehsalatda bədbəxt hadisələr və peşə xəstəlikləri nəticəsində zərər çəkmiş sığorta olunanın peşə əmək qabiliyyətinin itirilməsi dərəcəsinin müəyyən edilməsi Qaydası”nda aşağıdakı dəyişikliklər edilsin:

18.1. 1.2-ci bənddə “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin;

18.2. həmin Qaydanın 6-9 nömrəli əlavələrinin adlarında “Dövlət Tibbi-Sosial Ekspertiza və Reabilitasiya” sözləri “Dövlət Tibbi Sığorta və Ekspertiza” sözləri ilə əvəz edilsin.

Əli Əsədov,

Azərbaycan Respublikasının Baş naziri

Bakı şəhəri, “ 23 ” “ oktyabr ” 2026-cı il

№ 355

Azərbaycan Respublikası Nazirlər Kabinetinin QƏRARI

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, “Xüsusi mühafizə olunan təbiət əraziləri və obyektləri haqqında” Azərbaycan Respublikasının Qanununda dəyişikliklər edilməsi barədə” Azərbaycan Respublikasının 2014-cü il 4 aprel tarixli 924-IVQD nömrəli Qanununun tətbiqi haqqında” Azərbaycan Respublikası Prezidentinin 2014-cü il 15 may tarixli 166 nömrəli Fərmanının 1.4.2-ci yarımbəndinin icrasını təmin etmək məqsədilə Azərbaycan Respublikasının Nazirlər Kabineti qərara alır:

1. Azərbaycan Respublikası Axar-Baxar Milli Parkının sanitariya-mühafizə zonası əlavə olunmuş xəritədə göstərilən 11292,91 hektar sahədə təsdiq edilsin.

2. Azərbaycan Respublikası İlisu Milli Parkının sanitariya-mühafizə zonası əlavə olunmuş xəritədə göstərilən 10108,00 hektar sahədə təsdiq edilsin.

Əli Əsədov,

Azərbaycan Respublikasının Baş naziri

Bakı şəhəri, “ 26 ” “ oktyabr ” 2026-cı il

№ 356

Azərbaycan Respublikası Nazirlər Kabinetinin QƏRARI

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, “2029-cu ildə Azərbaycan Respublikasında əhalinin siyahıyaalınmasının keçirilməsi haqqında” Azərbaycan Respublikası Prezidentinin 2026-cı il 7 iyul tarixli 714 nömrəli Fərmanının 3.3-cü bəndinin icrasını təmin etmək məqsədilə Azərbaycan Respublikasının Nazirlər Kabineti qərara alır:

1. “Əhalinin siyahıyaalınmasına hazırlıq və onun keçirilməsi üzrə siyahıyaalma qrupunun işçilərinin aylıq vəzifə maaşlarının cədvəli” təsdiq edilsin (əlavə olunur).

2. Azərbaycan Respublikasının Maliyyə Nazirliyi bu Qərardan irəli gələn məsələləri həll etsin.

Əli Əsədov,

Azərbaycan Respublikasının Baş naziri

Bakı şəhəri, “ 26 ” “ oktyabr ” 2026-cı il

Azərbaycanla Türkiyə arasında qardaşlıq bağları o qədər möhkəm və tarixi əhəmiyyətə malikdir ki, istənilən siyasi və diplomatik məsələlərin çərçivəsindən kənara çıxır və keçici proseslərlə məhdudlaşdırıla bilməz.

AZƏRTAC xəbər verir ki, bunu Türkiyənin aparıcı siyasi qüvvələrindən biri olan Milliyyətçi Hərəkat Partiyasının (MHP) lideri Dövlət Baxçalının Türk Dövlətləri Təşkilatının (TDT) Ankarada keçiriləcək Zirvə görüşü və təşkilata üzv ölkələrin müstəqilliklərinin 35-ci ildönümü ilə əlaqədar bəyanatında bildirilib.

Onun sözlərinə görə, Türkiyə ilə Azərbaycan arasında qardaşlıq sarsılmazdır, nəsildən-nəslə ötürülür, hər iki xalqın iradəsi və birgə mübarizə tarixinin səhifələri ilə möhkəmlənib. “Eyni fikirləri Türk dünyasının bütün qardaş dövlətləri haqqında da söyləmək olar”, – deyə o bildirib və “qarşılıqlı anlaşılmazlıqların dərinləşməsinə” yol verilməməsinin vacibliyini vurğulayıb.

“Aramızda nifaq toxumu səpilməsinə imkan verməməliyik. Heç bir fikir ayrılığı uzunmüddətli uzaqlaşmaya səbəb olmamalıdır. Qardaşlıq bağlarımız qarşılıqlı hörmətə və ortaq gələcəyimizə inama əsaslanır. Türk dünyasının hər bir sakini tarixi yaxınlığımızın qorunmasına töhfə verməli, fikir ayrılıqlarından çəkinməli və gələcəyimizi zəiflədə biləcək hərəkətlərə yol verməməlidir”, – deyə siyasətçi bildirib.

MHP lideri gələcək nəsillərə “güclü Türk dünyası” miras qoymağa çağırıb.

‎ Oktyabrın 27-də Qafqaz Müsəlmanları İdarəsinin (QMİ) sədri, şeyxülislam Allahşükür Paşazadənin Bakıda keçirilən “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumunun iştirakçıları ilə görüşü olub.

‎ AZƏRTAC xəbər verir ki, tədbirdə çıxış edən QMİ sədri Allahşükür Paşazadə Azərbaycanın dinlərarası və mədəniyyətlərarası dialoqun inkişafında oynadığı mühüm rolu vurğulayıb. ‎O bildirib ki, Azərbaycan dini-mədəni müxtəlifliyin harmoniyasına və məzhəblərarası anlaşmaya əsaslanan cəmiyyətin mümkünlüyünü öz nümunəsində bütün dünyaya nümayiş etdirir.

‎ Şeyxülislam qeyd edib ki, Ulu Öndər Heydər Əliyevin əsasını qoyduğu milli və dini tolerantlıq ənənələri Prezident İlham Əliyevin təşəbbüsləri ilə uğurla davam və inkişaf etdirilir. ‎Bildirilib ki, "Bakı Prosesi" və mütəmadi keçirilən Ümumdünya Mədəniyyətlərarası Dialoq forumları Azərbaycanın sivilizasiyalararası əməkdaşlığa verdiyi mühüm töhfələrdəndir.

‎ Qafqaz Müsəlmanları İdarəsinin beynəlxalq fəaliyyəti çərçivəsində dinlərarası və məzhəblərarası dialoqun, əməkdaşlığın gücləndirilməsinə töhfə verdiyi, beynəlxalq təşkilatlarla əlaqələrin bu istiqamətdə xüsusi əhəmiyyət daşıdığı diqqətə çatdırılıb.

‎ Şeyxülislam əminliyini ifadə edib ki, VII Ümumdünya Mədəniyyətlərarası Dialoq Forumu qlobal çağırışların həllinə, dünyada sülhün, əmin-amanlığın və mədəniyyətlərarası harmoniyanın möhkəmlənməsinə öz töhfəsini verəcək.

‎ Ölkəmizdə səfərdə olan BMT-nin Baş katibinin müavini, Sivilizasiyalar Alyansının ali nümayəndəsi, təşkilatın İslamofobiya ilə mübarizə üzrə xüsusi elçisi Migel Anxel Moratinos çıxışında dinlərarası dialoqun və qarşılıqlı anlaşmanın vacibliyini bir daha önə çəkərək, müasir dünyada baş verən münaqişələrin həllində hər kəsin məsuliyyət daşıdığını qeyd edib. O, xüsusilə dini liderlərin qlobal sülhün bərqərar olunmasında və zorakılıqların qarşısının alınmasında daha fəal rol oynamalı olduğunu vurğulayıb.

‎ BMT rəsmisi çıxışı zamanı dünyada sülhün və əməkdaşlığın təmin olunması üçün bütün dövlətlərin və beynəlxalq təşkilatların birgə səy göstərməsinin vacibliyini qeyd edib. Xüsusilə gənc nəsillərin tolerantlıq ruhunda yetişdirilməsinin gələcəkdə qarşıdurmaların qarşısını almaqda əsas rol oynayacağını bildirib.

‎ Tədbirdə çıxış edən Müsəlman Ağsaqqalları Şurasının baş katibi Məhəmməd Əbdülsalam şeyxülislam Allahşükür Paşazadənin regionda və dünyada sülhün, eləcə də dialoqun möhkəmləndirilməsində xidmətlərini yüksək qiymətləndirib. O, Qafqaz Müsəlmanları İdarəsinin bölgədə sülh və birgəyaşayış mədəniyyətinin təşviqində mühüm rol oynadığını vurğulayıb. ‎Baş katib çıxışı zamanı dini liderlərin qlobal miqyasda həmrəylik nümayiş etdirməsinin və qarşılıqlı anlaşmanın vacibliyini diqqətə çatdırıb.

‎ Sonra iştirakçılar üçün ziyafət təşkil olunub.

“Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumu çərçivəsində “Sivilizasiya diplomatiyası və strateji uzaqgörənlik - gərginlikləri öncədən görmək, sülhə inklüziv yollar qurmaq” mövzusunda plenar iclas keçirilib.

AZƏRTAC xəbər verir ki, tədbir ICESCO-nun və Beynəlxalq Münasibətlərin Təhlili və Multikulturalizm Mərkəzinin tərəfdaşlığı ilə təşkil olunub.

İclasda çıxış edənlər bildiriblər ki, dünyada heç bir anlayış fəlsəfi əsaslar olmadan mövcud ola bilməz. Fəlsəfə hər zaman ümumbəşəri dəyərlərdən bəhs edir və insanları birləşdirən, onları vahid edən ortaq dəyərlərin mövcudluğunu önə çıxarır.

Eyni zamanda, vurğulanıb ki, insanları birləşdirən ortaq dəyərlər möhkəmləndirilməli, müharibə və qarşıdurmaların yerini qardaşlıq, qarşılıqlı hörmət və anlaşma tutmalıdır.

Bildirilib ki, Bakıda keçirilən beynəlxalq dialoq platformaları, o cümlədən Ümumdünya Mədəniyyətlərarası Dialoq Forumu müxtəlif səslərin bir araya gətirilməsinin və fərqli baxışlar arasında əlaqələrin qurulmasının əhəmiyyətini nümayiş etdirir.

Çıxışçılar xüsusilə gənclərin səsinin eşidilməsinin vacibliyini vurğulayıblar. Qeyd olunub ki, onlar sosial həyatlarının böyük hissəsini rəqəmsal mühitdə yaşayırlar və burada yanlış məlumat saniyələr ərzində sərhədləri aşa bilir. Amma gənclər təkcə manipulyasiyanın hədəfi deyillər, həm də onu tanımaq, ona qarşı çıxmaq və yeni əlaqələr qurmaq baxımından ən güclü tərəfdaşlarımız ola bilərlər.

Tədbirdə sivilizasiyalararası dialoqun inkişafı, gərginliklərin əvvəlcədən müəyyənləşdirilməsi və inklüziv yanaşmalar əsasında sülhün təşviqi məsələləri ətrafında müzakirələr aparılıb.

‎ Azərbaycan dini-mədəni müxtəlifliyin harmoniyasına və məzhəblərarası anlaşmaya əsaslanan cəmiyyətin mümkünlüyünü öz nümunəsində bütün dünyaya nümayiş etdirir.

‎ AZƏRTAC xəbər verir ki, bunu Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə Bakıda keçirilən “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumunun iştirakçıları ilə görüşündə deyib.

‎ O qeyd edib ki, Azərbaycan Prezidenti İlham Əliyevin təşəbbüsü ilə həyata keçirilən Bakı Prosesi və Ümumdünya Mədəniyyətlərarası Dialoq Forumları sivilizasiyalararası əməkdaşlığın inkişafına mühüm töhfə verir. ‎Ulu Öndər Heydər Əliyevin əsasını qoyduğu milli və dini tolerantlıq ənənələri bu gün uğurla davam etdirilir və inkişaf etdirilir. ‎Müxtəlif mədəniyyətlərin bir arada olması, bir-birindən bəhrələnməsi Uca Yaradanın lütfü və istəyidir. Xalqların bir-birini tanıması, öyrənməsi və qarşılıqlı anlaşma şəraitində yaşaması bəşəri dəyərlərin əsasını təşkil edir.

‎ "Azərbaycanın dinlərarası dialoq və məzhəblərarası anlaşma sahəsindəki təcrübəsi beynəlxalq səviyyədə əməkdaşlığın gücləndirilməsi baxımından mühüm əhəmiyyət daşıyır. ‎Əminəm ki, VII Ümumdünya Mədəniyyətlərarası Dialoq Forumu dünyada sülhün, əmin-amanlığın və mədəniyyətlərarası harmoniyanın möhkəmlənməsinə öz layiqli töhfəsini verəcək", - deyə şeyxülislam vurğulayıb.

Azərbaycan Cüdo Federasiyasından AZƏRTAC-a bildirilib ki, Abşeron Olimpiya Kompleksində təşkil olunan turnirdə 34 klub və idman cəmiyyətindən 200 cüdoçu (162 oğlan, 38 qız) 13 çəki dərəcəsində qüvvəsini sınayıb.

Yekun nəticələrə əsasən, komanda hesabında "Judo Club 2012" (3-1-5) I, "Neftçi" İK (2-3-3) II, "Azəri-Cüdo" İKİB (2-0-1) isə III yeri tutub. Komandalara müvafiq kuboklar təqdim olunub.

Qeyd edək ki, yarışın keçirilməsində məqsəd kvotalar əsasında ölkə birinciliyində iştirak edəcək idmançıları müəyyənləşdirmək olub.

Mükafatçıları təqdim edirik:

Qızlar

-48 kiloqram

1. Fatimə Abdullayeva (Azəri-Cüdo İKİB)

2. Xədicə Abdullayeva (Bakı şəhəri 13 nömrəli İOEUGİM)

3. Məxfirə Hüseynova (Bakı şəhəri 13 nömrəli İOEUGİM)

-52 kiloqram

1. Nərmin Ağamirzəzadə (RKİM)

2. Xədicə Namazlı (Neftçi İK)

3. Leyla Əliyeva (Judo Club 2012)

3. Gülay Haqverdiyeva (Neftçi İK)

-57 kiloqram

1. Tövsiyyə Babayeva (Qəbələ Bakı)

2. Qızılgül Əkbərova (AHİTA)

3. Yasəmən Əkbəri (RKİM)

3. Şəfiqə Əhmədova (Neftçi İK)

-63 kiloqram

1. Zəhra Hüseynzadə (Xəzri İK)

2. Leyla Məcidova (Bakı şəhəri 13 nömrəli İOEUGİM)

3. Əsma Manaflı (Judo Club 2012)

3. İlahə Əzizzadə (Neftçi İK)

-70 kiloqram

1. Lalə Pənahova (Bakı şəhəri 13 nömrəli İOEUGİM)

2. Mələk Bayramlı (DİN İC)

3. Şəbnəm Əhmədova (Günəşli İK)

-78 kiloqram

1. Zemfira Əliyeva (Spartak Wrestle Zone)

2. Zəhra İbadova (Neftçi İK)

Oğlanlar

-60 kiloqram

1. Bahadır Feyzullayev (Neftçi İK)

2. Mirxaliq İskəndərov (Neftçi İK)

3. Rüstəm Qasımzadə (Kano PİK)

3. Ömər Zamanlı (Atilla İK)

-66 kiloqram

1. Kənan Məmmədov (Neftçi İK)

2. İsmayıl Əlipənahov (RKİM)

3. Sənan Piriyev (Kanokan-TT İK)

3. Ümüd Qurbanov (Judo Club 2012)

-73 kiloqram

1. Sadiq İsgəndərli (Judo Club 2012)

2. Nihad Yəhyayev (Judo Club 2012)

3. Kənan Rəhimov (Qəbələ Bakı)

3. Yusuf Nəzər (Bakı şəhəri 1 nömrəli RİOEUGİM)

-81 kiloqram

1. Əhməd Mehdiyev (Atilla İK)

2. Amin Mehdiyev (Bakı şəhəri 13 nömrəli İOEUGİM)

3. Ayxan Ələkbərov (Azəri-Cüdo İKİB)

3. Cahandar Haqverdiyev (Atilla İK)

-90 kiloqram

1. Hüseyn Səfərov (Sərhədçi İM)

2. Osman Səlimov (Atilla İK)

3. Amir Xəzriyev (Bakı şəhəri 13 nömrəli İOEUGİM)

3. Qəzənfər Kazımlı (Bakı şəhəri 13 nömrəli İOEUGİM)

-100 kiloqram

1. Tunar Fərzəliyev (Judo Club 2012)

2. Raul İmanov (Spartak Wrestle Zone)

3. Fərid İsmayılov (Judo Club 2012)

+100 kiloqram

1. Cavidan Məsimov (Azəri-Cüdo İKİB)

2. Əli Vəliyev (Arifoğlu İK)

3. Elşən Fərzəliyev (Judo Club 2012)

3. Ömər Hacılı (Bakı şəhəri 1 nömrəli RİOEUGİM)

Ağciyər xərçəngi əməliyyatı keçirən Roma Papası Levin noyabr ayında Cənubi Amerikaya planlaşdırılan səfəri nəzərdə tutulduğu kimi baş tutacaq.

“BBC” xəbər verir ki, Vatikanın açıqlamasına görə, 71 yaşlı Papa oktyabrın 13-də Roma şəhərində uğurlu cərrahi əməliyyat keçirərək sağ ağciyərinin aşağı hissəsindən şişdən azad edilib. Oktyabrın 17-də xəstəxanadan evə buraxılan Papanın səhhətinin qənaətbəxş olduğu və səfərə heç bir tibbi maneənin olmadığı bildirilib.

Roma Papası noyabrın 6-17-də Uruqvay, Argentina və Peruya səfər edəcək, 10 şəhərdə olacaq və yerli sakinlərlə görüşəcək. Həkimlərin tövsiyəsi ilə o, yalnız oktyabrın 27-nə planlaşdırılan Assizi səfərini ləğv edib. Papa özü isə bu səfəri böyük sevinc və həvəslə gözlədiyini qeyd edib.

Təhminə VERDİYEVA,

“Azərbaycan”

AZƏRTAC xəbər verir ki, Azərbaycan Respublikasının Prezidenti İlham Əliyev tədbirdə iştirak edib.

Əvvəlcə birgə foto çəkdirildi.

Azərbaycan dövlətinin başçısı Forumun açılış mərasimində çıxış etdi.

-Sabahınız xeyir, xanımlar və cənablar.

Mən VII Forumun bütün iştirakçılarını salamlayıram. Bütün qonaqlarımıza xüsusi salamlar olsun. Azərbaycana xoş gəlmisiniz.

Qeydiyyatdan keçmiş 2000-dən artıq iştirakçı, 100-dən artıq ölkədən gəlmiş 500-dən çox qonağımız var. Əslində bu rəqəmlər göstərir ki, ötən 15 il ərzində Ümumdünya Mədəniyyətlərarası Dialoq Forumu mədəniyyətlərarası münasibətləri və digər əlaqədar məsələləri həll etmək üçün olduqca səmərəli və əhatəli platformalardan birinə çevrilmişdir. Çünki ənənəvi olaraq, biz forumlarda qlobal gündəlikdə duran təxirəsalınmaz məsələlər haqqında danışırıq. Bizim təşəbbüsümüzlə hələ 2011-ci ildə təşkil olunmuş ilk forumu çox yaxşı xatırlayıram. Biz həmin təşəbbüsə dəstək vermiş, həmçinin bu illər ərzində bizimlə olmuş tərəfdaşlarımıza və ilk növbədə, BMT-nin Sivilizasiyalar Alyansına çox minnətdarıq. Həmin vaxtdan etibarən xeyli dəyişikliklər baş vermişdir.

Təbii ki, iki ildən bir keçirilən hər Forum zamanı biz hamımızı narahat edən məsələlər haqqında söhbət edirik. Əlbəttə, mədəniyyətlərarası və dinlərarası münasibətlərə aid məsələlər gündəliyimizdə birinci yer tutur. Azərbaycan tarixən hər zaman mədəniyyətlərin çox olduğu ölkə olub.

Biz Avropa ilə Asiya arasında yerləşirik. Əsrlər boyu Azərbaycan Asiya ilə Avropa arasında mədəniyyət körpüsü olub. Multikulturalizm ənənələri, dini və etnik dözümlülük xalqımızın əsrlər boyu yaşatdığı meyarlar olub və biz onları yüksək dəyərləndiririk. Azərbaycanın uğurlu və sabit inkişafının təməlində dayanan əsas səbəblərdən biri isə cəmiyyətimizdəki ahəngdarlıqdır. Bütün etnik qrupların, dinlərin nümayəndələrinin Konstitusiyamıza uyğun olaraq, nəinki bərabər hüquqları var, onlar, həmçinin bir ailə kimi yaşayırlar. Biz həmrəylik, qarşılıqlı hörmət və anlaşmanın ən yüksək səviyyəsini həqiqətən hiss edirik. Hamımız milli ideyalar ətrafında birləşirik. Onlardan biri azərbaycançılıqdır. O, Azərbaycandakı bütün xalqları bir araya gətirir. Bu birlik müstəqillik tariximizin ən ağır vaxtlarında özünü göstərib. Ermənistanın hərbi təcavüzü və işğalı, həmçinin İkinci Qarabağ müharibəsi zamanı bütün etnik və dini qrupların nümayəndələri özünəməxsusluğumuzu qorumaq, ədaləti müdafiə etmək və ərazi bütövlüyümüzü bərpa etmək üçün Qələbəmizin rəmzi olan “Dəmir yumruq” kimi vuruşdular.

Beləliklə, birliyin bu cür böyük təzahürü bir daha cəmiyyətimizin durumunu göstərir. Bir daha deyirəm ki, əgər bizdə - Azərbaycanda yaşayan bütün xalqlar arasında qarşılıqlı hörmət, əhatəliliyin real platforması olmasaydı, biz heç zaman uğur qazana bilməzdik. Çox fərəhlənirik ki, həmin dəyərləri əsrlər boyu qoruyub saxlaya bilmişik.

Azərbaycan əsrlər boyu öz dövlətçiliyindən məhrum olmuşdur, baxmayaraq ki, bizim əvvəlki əsrlərdə dövlətçiliyin çox böyük ənənələri var. Lakin son iki əsrdə biz müstəqil olmamışıq. Bununla belə, yaşadığımız sistemdən asılı olmayaraq, dəyərlərimizi, dilimizi, ənənələrimizi, həyat tərzimizi qoruyub saxlaya bilmişik. Hamınız bilirsiniz ki, biz fərqli sistemlərdə yaşamışıq.

Bununla belə, yaşadığımız həmin sistemlərin heç biri bizim milli hisslərimizi, əzmimizi poza bilmədi. Ona görə də Azərbaycan müstəqilliyini bərpa etdiyi zaman biz öz taleyimizin sahibinə çevrildik. Yeri gəlmişkən, bu ay müstəqilliyimizin bərpasının 35-ci ildönümünü qeyd etdik. Bu gün qonaqların Bakıda və Azərbaycanın digər yerlərində öz gözləri ilə gördükləri işlər, əsasən, müstəqillik illərində icra edilmişdir.

Biz öz taleyimizi özümüz həll etməyə başladıq və sonra isə bütün dünyaya nəyə qadir olduğumuzu göstərdik. Həmçinin mühüm nailiyyətlərdən biri ondan ibarətdir ki, müstəqillik illərində biz nəinki öz ənənələrimizi, öz həyat tərzimizi qoruyub saxladıq, o cümlədən onları gücləndirdik. Bu gün Azərbaycan cəmiyyəti bütün məsələlərdə birliyini nümayiş etdirir.

Bir neçə dəfə qeyd etdiyim kimi, bizim Azərbaycanda hər hansı daxili risklərimiz yoxdur. Bütün potensial risklər hüdudlarımızın kənarından gəlir. İdeoloji risklər isə fiziki risklər qədər təhlükəlidir. Buna görə biz hər zaman ayıq-sayıq olmalıyıq, özünəməxsusluğumuzun, dövlətçiliyimizin, müstəqilliyimizin və həyat tərzimizin qorunmasına çox sadiq olmalıyıq. Müstəqilliyin bu 35 ili ərzində ölkədə fərqli dövrlər olub, lakin biz hər zaman inanmışıq ki, öz məqsədlərimizə nail olacağıq. Həmin illərin əksər hissəsində əsas məqsədimiz ərazi bütövlüyümüzün bərpası, Azərbaycanın Ermənistan tərəfindən işğal olunmuş torpaqlarının azad edilməsi olub. Çoxlarınız bildiyi kimi, uzun illər ərzində aparılan danışıqlar heç bir nəticə vermədi. Əslində, danışıqlar forması elə qurulmuşdu ki, münaqişə həll olunmasın, əksinə dondurulsun. Görünür, əsas güclər bunun üzərində konsensusa gəlmişdilər, lakin onlar Azərbaycan xalqının nə düşündüyünü, Azərbaycan hökumətinin nəyi planlaşdırdığını səhv hesablamışdılar.

Biz əraziləri işğal altında olan ölkə kimi, ən elementar insan hüquqları daim pozulan xalq kimi əbədi yaşamalı deyildik. Biz danışıqlarda bütün səmimiyyətimizlə və ümidlə iştirak edirdik. Lakin bu prosesin heç bir nəticə vermədiyini gördükdə, özünümüdafiə hüququ da daxil olmaqla, BMT Nizamnaməsində, o cümlədən onun 51-ci maddəsində təsbit edilmiş qanuni hüququmuza əsaslanaraq məsələni həll etdik.

Biz özümüzü müdafiə etdik. Biz düşməni məğlub etdik. Biz 30 il Ermənistanın işğalı altında olmuş torpaqlarımızı azad etdik. Biz ədaləti bərpa etdik. Biz öz ləyaqətimizi və beynəlxalq hüququ bərpa etdik. BMT Təhlükəsizlik Şurasının 1993-cü ildə qəbul etdiyi, Ermənistan qoşunlarının ərazilərimizdən dərhal, qeyd-şərtsiz və tam çıxarılmasını tələb edən, lakin 30 il kağız üzərində qalan qətnamələrini təkbaşına icra etdik.

2020-ci ildə baş vermiş İkinci Qarabağ müharibəsi və 2023-cü ildə keçirilmiş antiterror əməliyyatı işğala son qoydu. Biz beynəlxalq hüququn normalarına uyğun olaraq ərazi bütövlüyümüzü və suverenliyimizi tam bərpa etdik.

Bundan sonra Ermənistana sülh təklif etdik. Bu da misli görünməmiş bir haldır. Müharibələrin tarixinə nəzər salsaq, yəqin ki, son qanlı toqquşmadan iki il belə keçməmiş ölkələrin sülhə nail olması nümunəsinə rast gəlmərik.

Ötən ilin yayında paraflanmış sülh sazişinin layihəsini də biz hazırlamışdıq. Ermənistanla sülh sazişinin təşəbbüskarı biz olmuşuq. Çünki biz sonsuz müharibələr istəmirdik və qisas almaq niyyətində deyildik. Hərçənd hesab edirəm ki, emosiyalar da nəzərə alınmalıdır. Mən həmişə deyirəm ki, biz qisasımızı döyüş meydanında aldıq və bundan irəli getməməliyik. Əks təqdirdə bu, sonsuz müharibəyə çevrilər.

Bu gün demək olar ki, hər il yeni müharibələrin başladığını gördükdə anlayırıq ki, müharibəyə son qoymaq çox çətindir. Müharibəyə başlamaq çox asandır, onu bitirmək isə çox çətindir. Qələbə qazanmaq da çox çətindir. Ona görə də hesab edirəm ki, Azərbaycanın təcrübəsi, - ədalətli müharibədə Qələbə qazanmağımız, məğlub tərəfin kapitulyasiya etməsi, bundan sonra isə irəli getməyərək dayanmaq, - lazım olan məqamda dayanmağımız və sülh təklif etməyimiz mühüm əhəmiyyət daşıyır.

Hesab edirəm ki, hazırda müharibə aparan və yəqin ki, ona necə son qoyacaqlarını bilməyən tərəflər bu təcrübəni öyrənməlidirlər. Fikrimcə, yaratdığımız presedentlərdən hansılarının bəzi münaqişələrin həllində istifadə oluna biləcəyini müəyyənləşdirmək baxımından təcrübəmiz çox dəyərli olacaqdır.

Bəli, doğrudur, bütün münaqişələr bir-birindən fərqlənir. Lakin onların hamısının kökündə eyni amillər dayanır. Bunlar ambisiyalar, təcavüz və üstünlük hissidir. Bu, həm də hücum etdiyin insanlara qarşı törətdiyin əməllərə görə cəzalandırılmayacağına əminlik hissidir. Təəssüf ki, bəzən bu vəziyyət sonsuza qədər davam edir. Bizim vəziyyətimizdə bu, 30 il sürdü, lakin biz buna son qoyduq. Qeyd etdiyim kimi, hər şeyi beynəlxalq hüquqa uyğun şəkildə etdik.

Nəzərə alınmalı olan digər bir məsələ beynəlxalq təşkilatların qərarlarının icra mexanizmidir. Hazırda bir çoxları Birləşmiş Millətlər Təşkilatında islahatlardan danışır. Təfərrüatlara çox varmaq istəmirəm, lakin hesab edirəm ki, mühüm məsələlərdən biri BMT Təhlükəsizlik Şurasının qətnamələrinin icra mexanizmi olmalıdır. Qeyd etdiyim kimi, biz 30 il bu vəziyyətlə üzləşmişik. BMT Təhlükəsizlik Şurası Azərbaycan torpaqlarının azad olunmasını tələb edən dörd qətnamə qəbul etmişdi. Onlar icra olunmadı. Onların icrasını təmin edən mexanizm yox idi. Ermənistana qarşı heç bir sanksiya tətbiq edilmədi.

İndi isə ətrafımıza baxanda hər yerdə sanksiyalar görürük. Azərbaycandan şimala və cənuba baxdıqda yüzlərlə sanksiyanın tətbiq olunduğunu görürsünüz. Lakin Ermənistana qarşı sanksiya tətbiq edilmədi. Bu isə ikili standartlar məsələsidir. Bu, ikili standartlardan başqa bir şey deyil. Biz siyasətdə ikili standartlara qarşı həmişə mübarizə aparmışıq və bundan sonra da mübarizə aparacağıq. Bu, xarici siyasətimizin mühüm istiqamətlərindən biridir. Çünki biz ikili standartlardan əziyyət çəkmişik və hələ də onların təsiri ilə üzləşirik. Əlbəttə, indiki vəziyyətimizlə bağlı “əziyyət çəkmək” ifadəsi bəlkə də çox sərt səslənir. Əslində, biz artıq əziyyət çəkmirik. Çünki istədiyimizə nail olmuşuq və öz torpağımızda azad yaşayırıq. Bununla belə, beynəlxalq siyasətdə ikili standartlar siyasəti tamamilə aradan qaldırılmalıdır. Cəmiyyətimiz ikili standartları qətiyyətlə rədd edir.

Bu, təkcə, məsələn, müxtəlif müharibə və münaqişələrə yanaşmada özünü göstərmir. Qeyd etdiyim kimi, Ermənistan beynəlxalq səviyyədə tanınmış ərazimizin təxminən 20 faizini işğal etmiş, etnik təmizləmə siyasəti aparmış, nəticədə bir milyon azərbaycanlı öz tarixi torpaqlarından didərgin salınmış, dini və tarixi abidələrimiz, o cümlədən Qarabağda 65 məscid dağıdılmışdır. Lakin Ermənistana qarşı nə sanksiya tətbiq olunmuş, nə də o, cəzalandırılmışdır. Bax, ikili standart budur.

Amma ikili standartlar təkcə bununla məhdudlaşmır. İkili standart həm də kiminsə sənə necə yaşamağı öyrətmək istəməsidir. Halbuki bunu etməzdən əvvəl güzgüyə baxıb özündən soruşmalısan: sənin kiməsə ağıl öyrətməyə, müstəqil bir ölkəyə necə yaşamalı olduğunu, nə etməli və nə etməməli olduğunu diktə etməyə mənəvi haqqın varmı?

Biz heç vaxt bunu etmirik. Biz diqqətimizi öz daxili işlərimizə yönəldirik. Başqa ölkələrdə baş verənlər isə həmin ölkələrin xalqlarının işidir. Bu, bizim işimiz deyil. Biz də özümüzə qarşı eyni münasibəti gözləyirik və buna nail oluruq.

Hər hansı hörmətsizlik əlaməti, əsassız üstünlük hissinin istənilən təzahürü, həmçinin kiminsə bizə nə isə diktə edə biləcəyi barədə əsassız düşüncələr tərəfimizdən müqavimətlə və çox qətiyyətli mövqe ilə qarşılanıb, bundan sonra da belə olacaqdır. Hesab edirəm ki, beynəlxalq ictimaiyyət beynəlxalq davranışın bu əsas qaydaları üzərində razılığa gələrsə, münaqişələrin və problemlərin sayı azalacaq, qarşılıqlı fəaliyyət isə genişlənəcəkdir.

Ən azından biz məsələyə belə yanaşırıq. Bundan əlavə, sizdə daha dolğun təsəvvür yaratmaq üçün onu da demək istəyirəm ki, Azərbaycanda bu 35 il ərzində əldə olunan bütün nailiyyətlər Azərbaycan xalqının öz zəhməti sayəsində mümkün olmuşdur. Biz heç bir beynəlxalq yardım almamışıq. Dağıntılardan, işğaldan, geniş yayılmış yoxsulluqdan tərəqqiyə, inkişafa və uğurlara doğru yol keçmişik.

Bu gün Azərbaycanın xarici siyasətinə, iqtisadi göstəricilərinə, qlobal enerji və nəqliyyat bazarlarındakı roluna nəzər salsanız, ölkəmizin rolunun son dərəcə sürətlə artdığını görərsiniz. Bir çox hallarda Azərbaycan qeyri-sabit regionda sabitliyin dayağı kimi qəbul edilir. Eyni zamanda, müstəqil siyasətimiz ölkəmizə böyük hörmət qazandırmışdır. Diqqətinizə sadəcə bir neçə faktı çatdırmaq istərdim.

Beynəlxalq təmaslarımız onu göstərir ki, biz həqiqətən də özümüzü beynəlxalq birliyin etibarlı və hörmətli bir üzvü kimi təqdim edə bilmişik. Bizim artıq iki super güclə strateji tərəfdaşlıq münasibətlərimiz var. 2025-ci ildə Azərbaycan və Çin arasında hərtərəfli strateji tərəfdaşlıq Bəyannaməsi imzalanmışdır. Çinlə bəyannamə aprel ayında imzalanmışdır, eyni zamanda, 2025-ci ilin avqustunda Amerika Birləşmiş Ştatları ilə Strateji Xartiya imzalanmışdır. Beləliklə Azərbaycanın iki super güclə strateji tərəfdaşlıq formatı var. Avropa İttifaqının 10 üzv dövləti ilə bizim strateji tərəfdaşlıq bəyannaməmiz və ya sazişimiz var.

Gələn il İslam Əməkdaşlıq Təşkilatının Zirvə Görüşünə ev sahibliyi edəcəyik və biz demək olar ki, 60 ölkəni birləşdirən bu mötəbər beynəlxalq təsisata sədrlik edəcəyik. Bunu siyasətimizə, dinimizə, ənənələrimizə və dəyərlərimizə olan münasibətin, hörmətin əlaməti kimi qəbul edirik. 2028-ci ildə biz Avropa Siyasi Birliyinin Zirvə Görüşünə ev sahibliyi edəcəyik. Bu format artıq dörd ildir ki, mövcuddur və Zirvə görüşlərinin keçirilməsinə yalnız 2022-ci ildən başlanılıb. Beləliklə 2028-ci ildə Zirvə Görüşü Bakıda keçiriləcəkdir. Avropa Siyasi Birliyində 50-dən çox ölkə var. Beləliklə bir şəhərdə, bir ölkədə bu iki mötəbər qlobal tədbir keçiriləcək. Bu da bizə göstərilən hörməti nümayiş etdirir və bir daha bunun aparıcı qüvvəsi bu günlərdə müzakirə etdiyimiz mövzudur: mədəniyyətlərarası dialoq.

Azərbaycan cəmiyyəti, multikulturalizm üzrə, divarların yox körpülərin qurulması üzrə dövlət siyasəti, həqiqətən də bu mühüm hadisələrə gətirib çıxardı. Bu ay biz AQEM Zirvə Görüşünə ev sahibliyi etdik. Bu Asiyada Qarşılıqlı Fəaliyyət və Etimad Tədbirləri üzrə Müşavirədir. Bu təşkilat demək olar ki, 30 ölkəni birləşdirir və bizim AQEM-də sədrliyimiz yekdilliklə daha iki il uzadılmışdır. Ötən il Azərbaycan Mərkəzi Asiya Məşvərət Formatının tamhüquqlu üzvü kimi dəvət olunmuşdur. Bu format Mərkəzi Asiya ölkələrini birləşdirir. Azərbaycan coğrafi cəhətdən Mərkəzi Asiyada deyil, Qafqazda yerləşir, lakin bizim müxtəlif aspektlər üzrə rolumuzun tanınmasının və eyni zamanda, bizə göstərilən hörmətin əlaməti olaraq biz buraya dəvət olunduq. Beləliklə, təkcə bütün bu faktlar həqiqətən bizim oynadığımız rolu və bizdə olan beynəlxalq potensialı nümayiş etdirir.

Əlbəttə ki, müharibələrin sonlandırılması ilə bağlı təcrübəmiz, hesab edirəm ki, diqqətlə nəzərdən keçirilməlidir. Bu mənzərəyə iqtisadi fəaliyyətimizi, təqribən ÜDM-in 5 faizindən bir az artıq olan çox aşağı xarici borcumuzu, - hansı ki, ən aşağı səviyyədədir, yəqin ki, dünyada olan ən aşağı borclardandır, - qlobal enerji bazarında enerjinin beynəlxalq bazarlara etibarlı təchizatçısı kimi rolumuzu, bağlantılarda, xüsusilə indi nəqliyyatda bağlantıların beynəlxalq gündəmdə ən əsas məsələlərdən biri olduğunu nəzərə alaraq oynadığımız rolu əlavə edə bilərik. Burada xəritəyə baxsanız görərsiniz ki, Azərbaycandan yan keçmək çox çətindir. Xüsusilə xəritəyə infrastrukturu, sərmayələri, müasir infrastrukturu, üstəgəl siyasi infrastrukturu əlavə etdikdə. Çünki bağlantı istiqamətində hər hansı bir rola malik olmaq üçün sizin qonşularınızla və qonşularınızın qonşuları ilə yaxşı münasibətləriniz olmalıdır və bu da baş verdi. Beləliklə bizim iqtisadi potensialımız, fəal xarici siyasətimiz, inklüziv cəmiyyətimiz, multikulturalizm və mədəniyyətlərarası dialoq üzrə ənənələrimiz - bütün bunlar bizə nikbin baxmaq üçün bir sinerji yaradır.

Lakin buna baxmayaraq, biz proqnozlaşdırılması çətin olan dünyada yaşayırıq. Harada ki, artıq qeyd etdiyim kimi münaqişələr başlayır və heç vaxt bitmir. Buna görə, sözsüz ki, biz həmişə potensial risklərə qarşı çox diqqətli olmalıyıq və özümüzü istənilən potensial mürəkkəbliklərdən qorumalıyıq. Əminəm ki, bu və bir çox digər mühüm məsələlər Forumda geniş müzakirə olunacaq.

Bütün iştirakçılara, xüsusilə Bakıya gəldikləri üçün əcnəbi qonaqlara bir daha minnətdarlığımı ifadə edirəm. Bu forumlar iki ildən bir keçirilir və yeganə istisna COVID pandemiyası zamanı olmuşdur, onda müəyyən fasilə yaranmışdır. Lakin indi fəaliyyətimizi yenidən davam etdiririk. Sonuncu - 2024-cü ildə keçirilən Forumu xatırlayıram. O zaman biz qlobal gündəlikdə olan mühüm məsələləri müzakirə etdik. Lakin bu iki il ərzində biz nə qədər çox məsələnin müsbət və mənfi istiqamətdə dəyişdiyini görürük. Mənfilər arasında bizim yaxınlığımızda baş verən yeni müharibələrdir. Müsbətlər arasında Ermənistanla sülhdür, hansı ki, keçən ilin avqust ayında paraflanmışdır və onun paraflandığı yer də çox rəmzi məna daşıyır. O, Vaşinqtonda, Ağ Evdə ABŞ Prezidenti Donald Trampın iştirakı ilə paraflanmışdır. Ermənistanın və Azərbaycanın xarici işlər nazirləri öz imzalarını atmışdılar, - sülh sazişinə yox, - lakin sənəd Amerika Birləşmiş Ştatlarının Prezidentinin iştirakı ilə paraflanmışdır və üçtərəfli Bəyannamə də imzalanmışdır. Amerika Prezidenti onu şahid qismində imzalamışdır. Beləliklə biz, nəinki ədaləti bərpa etməyə, ərazilərimizi işğaldan azad etməyə, Cənubi Qafqazda müstəqil Cənubi Qafqaz ölkələrinin tarixində heç vaxt mövcud olmayan tamamilə yeni vəziyyət yaratmağa nail olduq, eyni zamanda, Ağ Evdə bunu möhürlədik.

Sizə Bakıda yaxşı vaxt keçirməyi arzulayıram. Bir daha bizimlə bir yerdə olduğunuz üçün təşəkkür edirəm və Foruma uğurlar arzulayıram. Diqqətinizə görə təşəkkür edirəm.

x x x

Tədbir digər çıxışlarla davam edib.

BMT Baş katibinin müavini, Sivilizasiyalar Alyansının ali nümayəndəsi, BMT-nin İslamofobiya ilə mübarizə üzrə xüsusi elçisi Migel Anxel Moratinos çıxış edərək dedi: “Zati-aliləri cənab İlham Əliyev, həmişəki kimi ilhamverici öhdəliklər, ideyalar, baxışınıza görə çox sağ olun. Təşəkkür edirik ki, Siz bizi bu çox vacib Foruma dəvət etdiniz. Xanım Leyla Əliyevaya da təşəkkürümü bildirmək istəyirəm.

Hörmətli din xadimləri, zati-aliləri, mötəbər qonaqlar, əziz dostlar. Yenidən Bakıda olmaq mənim üçün böyük məmnuniyyətdir. Ümumdünya Mədəniyyətlərarası Dialoq Forumu çərçivəsində bizi yenidən bir araya gətirdiklərinə görə Zati-aliləri Prezident İlham Əliyevə və Azərbaycan Hökumətinə səmimi təşəkkürümü bildirirəm. BMT Sivilizasiyalar Alyansı UNESCO, ICESCO və BMT-nin Turizm Təşkilatı ilə birlikdə bu mühüm platformaya dəstək vermək istiqamətində Mədəniyyət Nazirliyi ilə uzunmüddətli tərəfdaşlığı davam etdirməkdən qürur duyur. Bu VII Forum 2011-ci ildə burada keçirilən ilk Ümumdünya Forumunun 15 illik yubileyinə təsadüf edir".

Migel Anxel Moratinos Qubada Beynəlxalq Gənclər Forumunun təşkil olunduğunu da bildirdi: "Qubada başlayan tədbir bu gün və sabah Heydər Əliyev Mərkəzində davam etdiriləcəkdir. Bu onu göstərir ki, mədəniyyətlərarası dialoq necə müzakirə mövzusu ola, eyni zamanda, müxtəlif mədəniyyətlərə və dinlərə mənsub xalqları necə birləşdirə bilər".

O, “Bakı Prosesi”nin əməkdaşlığa verdiyi töhfələri vurğulayaraq dedi: "2008-ci ildə “Bakı Prosesi” müxtəlif ölkələrin hökumətlərinin, vətəndaş cəmiyyətlərinin, beynəlxalq təşkilatların nümayəndələrini və gəncləri bir araya gətirmişdi. O vaxt irəli sürülən təkliflər artıq yeni tərəfdaşlıqlara çevrilmişdi. Bu da bizim yeni fəlsəfəmizdir və Azərbaycan tərəfindən sülhün yayılması fəlsəfəsidir. Azərbaycan öz əlini bütün regionda mədəniyyətlərarası əməkdaşlığı inkişaf etdirməyə uzadıb. Bu da VII Forumun əsas mövzularından biridir".

x x x

İslam Əməkdaşlıq Təşkilatının Baş katibi İsmayıl Ould Şeyx Əhməd Azərbaycanın mədəniyyətlərarası dialoqa verdiyi töhfələrə görə Prezident İlham Əliyevə minnətdarlığını ifadə edərək dedi: “Mənim üçün çox sevindirici haldır ki, bu gün sizlərlə birgə bu gözəl Bakı şəhərində VII Ümumdünya Mədəniyyətlərarası Dialoq Forumunda iştirak edirəm. Mən, ilk növbədə, cənab Prezident İlham Əliyevə qonaqpərvərliyə və yüksək səviyyədə təşkilatçılığa görə öz təşəkkürümü bildirmək istəyirəm. Parçalanan dünyada körpülərin salınması məsələsi əlbəttə ki, olduqca önəmlidir. Təbii ki, bu, dünyada sülhün daha da mükəmməl şəkildə təmin edilməsinə töhfəsini verir və buna görə göstərdiyi səylər üçün Azərbaycana təşəkkürümü bildirirəm.

Hörmətli Prezident və hörmətli iştirakçılar, qeyd etmək istəyirəm ki, Bakı Forumu dünyanın müxtəlif bölgələrindən insanları bir araya gətirib. Biz əlbəttə ki, dünya səviyyəsində sülhün, təhlükəsizliyin, əmin-amanlığın təmin olunması üçün əlimizdən gələni edirik və etməliyik. Həqiqətən Azərbaycanda islami dəyərlər və dinlərarası birgəyaşayış olduqca yüksək səviyyədədir. Cənab Prezident, Azərbaycanın mədəniyyətlərarası dialoqa verdiyi töhfələrə görə İslam Əməkdaşlıq Təşkilatı adından Sizə bir daha təşəkkürümü bildirirəm".

x x x

BMT-nin Terrorçuluqla Mübarizə İdarəsinin Baş katibinin müavini vəzifəsini icra edən Aleksandr Zuyev VII Ümumdünya Mədəniyyətlərarası Dialoq Forumunun açılışında iştirakından məmnunluğunu ifadə etdi. O, “Bakı Prosesi” vasitəsilə dialoqun təşviqinə verdiyi töhfəyə görə Prezident İlham Əliyevə və Azərbaycan Hökumətinə minnətdarlığını bildirərək dedi: “VII Ümumdünya Mədəniyyətlərarası Dialoq Forumunda Sizə qoşulmaq mənim üçün böyük şərəfdir. Çox sevinirəm ki, yenidən bu önəmli Forumda çıxış edirəm. Gözəl qonaqpərvərliyə, eyni zamanda, “Bakı Prosesi” çərçivəsində dialoqun təşviqinə və göstərilən səylərə görə şəxsən Zati-aliləri cənab Prezident İlham Əliyevə və Azərbaycan Hökumətinə minnətdaram”.

Aleksandr Zuyev dini və mədəniyyət abidələrinin terror hücumlarından qorunmasının vacibliyinə diqqət çəkdi, Azərbaycanın dini irsə və dinlərarası dialoqa verdiyi əhəmiyyəti vurğulayaraq bildirdi: “BMT-nin qlobal proqramı dini və mədəni obyektləri qorumağa kömək edir. Çünki bu təhlükələr çox vaxt icmalardan kənara çıxır, cəmiyyətlərdə qorxu və ayrı-seçkilik yaradır. Ona görə də bu obyektlərin mühafizəsi birgəyaşayış arzusunu və imkanlarını qoruyub saxlamaq üçün böyük əhəmiyyət daşıyır. Azərbaycanın dini irsə və dinlərarası dialoqa verdiyi önəmi nəzərə alsaq, bu fəaliyyət bu ölkə üçün xüsusilə aktualdır. Terrorçuluqla Mübarizə İdarəsi və Azərbaycan Respublikası arasında daha yaxın əməkdaşlığın gücləndirilməsinə çalışırıq”.

x x x

İslam Dünyası Təhsil, Elm və Mədəniyyət Təşkilatının (ICESCO) Baş direktoru Səlim bin Məhəmməd əl-Malik “Bakı Prosesi”nin əhəmiyyətini vurğulayaraq dedi: "Prezident İlham Əliyevin “Bakı Prosesi”nə davamlı dəstəyi mədəniyyətlərarası dialoq üçün beynəlxalq miqyasda uzunömürlü bir platforma yaradıb. Bu Forum bizi qarşımızda duran öhdəliyi konkret qərarlara çevirməyə, insan ləyaqətinin qorunmasını təmin edən addımlar atmağa çağırır”.

Səlim bin Məhəmməd əl-Malik Azərbaycanın müxtəlif ölkələrdə təhsilin inkişafına verdiyi dəstəkdən də danışdı. O qeyd etdi: “Azərbaycanın dəstəyi bizə imkan verir ki, Suriyada 100-dən çox məktəbi bərpa edək və 10 yeni məktəb tikə bilək. Heydər Əliyev Fondu vasitəsilə biz Burkina-Fasoda və Nigerdə qızların təhsilini dəstəkləyirik”.

ICESCO-nun Baş direktoru qurumun texniki missiyalarının Qarabağa və Şərqi Zəngəzura səfərini, işğal nəticəsində orada dağıntıların qeydə alındığını xatırlatdı. O, Heydər Əliyev Fondunun dəstəyi ilə təsis olunmuş ICESCO-Azərbaycan Natəvan Mədəni İrs Mükafatının əhəmiyyətindən də danışaraq bildirdi: “ICESCO-nun Qarabağa və Şərqi Zəngəzura iki texniki missiyası işğal nəticəsində mirasın dağıdılmasının şahidi oldu”.

Cənab Prezident, Azərbaycana təşəkkür edirəm ki, bu platformanı yaşadırsınız və dəstəkləyirsiniz. Bu dialoqun müvəffəqiyyəti məhz bununla ölçülür”.

x x x

Dünya Turizm Təşkilatının Baş katibi xanım Şeyxa Əl Nuveys Azərbaycanın aralarında ciddi fikir ayrılıqları olan ölkələrin nümayəndələrini Bakıda təşkil olunan AQEM Sammitində bir araya gətirməsinə diqqət çəkərək vurğuladı: “Mən cənab İlham Əliyevlə görüşəndə o, müxtəlif ölkələrin nümayəndələrinin eyni masa arxasında bir araya gətirilməsinə toxundu və AQEM Sammiti barədə də danışdı. Qeyd etdi ki, AQEM Asiyada etimadın yaradılması üçün çox vacib platformadır. Əlbəttə ki, razılıq kifayət etmir və ona görə Birgə Bəyannamə də qəbul olundu. Fərqlər var, əlbəttə ki, onlar qalır, amma buna baxmayaraq, ölkələr tərəfindən birlikdə addım atılmışdı. Zati-aliləri cənab Prezident, “Bakı Prosesi” vasitəsilə Azərbaycan həmin o təmkin tələb edən işi, ölkələri, mədəniyyətləri bir araya gətirməyi dəstəklədi. Sizə səmimi-qəlbdən təşəkkürümüzü bildirmək istəyirik ki, bizim üçün görüşməyə, dinləməyə imkan yaratdınız, yer verdiniz. Ümumi əsaslar formalaşdı. Əməkdaşlıq bax, buradan başlayır".

x x x

UNESCO-nun Baş direktorunun müavini Asa Regner rəhbərlik etdiyi təşkilatla Azərbaycanın əməkdaşlığının vacibliyini vurğulayaraq dedi: “Bu gün gözəl Bakı şəhərində bu Forumda iştirak etmək mənim üçün şərəfdir. Mən Prezident İlham Əliyevə təşəkkürümü bildirmək istəyirəm. VII Ümumdünya Mədəniyyətlərarası Dialoq Forumuna ev sahibliyinizə və Azərbaycanın uzun illər ərzində UNESCO ilə apardığı əməkdaşlığa görə minnətdaram”.

O, Bakıda yeni mədəniyyətlərarası rəqəmsal imkanlar təşəbbüsünü təqdim etdiklərini xatırladaraq bildirdi ki, bu, tənqidi düşüncəni, mədəni maarifləndirməni rəqəmsal təhsilə gətirəcək. Bundan başqa, biz sülh vasitəsilə gənclərin cəlb edilməsinə də dəstək göstəririk.

Asa Regner UNESCO-nun bu Forumun mədəniyyətlərarası dialoq platformasına çevrilməsi üçün Azərbaycanla birgə səy göstərdiyini qeyd edərək vurğuladı: “UNESCO əlindən gələni etdi ki, bu Forum mədəniyyətlərarası platformaya çevrilsin. Biz Azərbaycanla və digər ölkələrlə birlikdə buna nail olmağa çalışdıq. Bu gün bu dialoqu konkret tədbirə, hərəkətə çevirmək üçün qarşımızda fürsət var. Bu, bir iddiadır, biz bunu insanlar üçün edirik. UNESCO Azərbaycanla, bütün tərəfdaşlarla işi davam etdirir ki, mədəniyyətlərarası dialoq praktikada sülh və bütün dünyada xalqlar, insanlar üçün yaxşı zəmin olsun”.

Hormonal göz damcılarının nəzarətsiz istifadəsi qlaukomanın yaranmasına gətirib çıxara bilər. “News.ru”nun məlumatına görə, bu barədə rusiyalı həkim-oftalmoloq Vladlena Azima bildirib.

Onun sözlərinə görə, mütəxəssislə məsləhətləşmədən yalnız tərkibində konservant olmayan göz yaşı əvəzedicilərindən istifadə etməyə icazə verilir.

“Kortikosteroid tərkibli damcıların həkim nəzarəti olmadan uzunmüddətli istifadəsi təhlükəlidir. Onlar göz içi təzyiqini artıra və insanın tərləmiş şüşə arxasından baxırmış kimi gördüyü büllurun bulanması (katarakta) ilə nəticələnə bilər. Həmçinin immun müdafiəsini zəiflətdiyi üçün infeksiyalar bu cür damcıların fonunda daha ağır keçir. Hormonal damcılar istifadəyə başlandıqdan iki-altı həftə sonra gözdə təzyiqi artıra bilər. Dəqiq müddət preparatdan asılıdır. Bu zaman pasiyent heç nə hiss etmir. Yüksək təzyiq isə bu müddət ərzində görmə sinirini tədricən zədələyir və qlaukoma inkişaf edir”, - deyə Azima xəbərdarlıq edib.

O vurğulayıb ki, hormonal damcıların yaratdığı fəsadları həmişə tam şəkildə aradan qaldırmaq mümkün olmur. Həkimin sözlərinə görə, kataraktanı əməliyyatla müalicə etmək olar. bulanıq büllur süni büllurla əvəz olunur və müdaxilədən sonra vəziyyət çox vaxt yaxşılaşır, hətta bəzən xəstə eynəksiz də keçinə bilir. Lakin mütəxəssis xəbərdarlıq edib ki, qlaukoma səbəbindən itirilmiş görməni artıq geri qaytarmaq qeyri-mümkündür.

“Həkim təyinatı olmadan yalnız konservantsız nəmləndirici damcılardan (göz yaşı əvəzedicilərindən) istifadə etmək olar. Gözə toz düşərsə, onu antiseptik damcılarla yumaq mümkündür. Damardaraldıcı vasitələrdən isə yalnız arabir – məsələn, yuxusuz qaldıqda və səhər yaxşı görünmək lazım gəldikdə istifadə etmək olar. Əgər onlara tez-tez müraciət olunarsa, təsir bitən kimi gözlər daha da qızarır və əl yenidən flakona uzanır”, - deyə Azima sözlərini yekunlaşdırıb.

Yasəmən MUSAYEVA,

“Azərbaycan”

Oktyabrın 27-də Azərbaycanın xarici işlər naziri Ceyhun Bayramov Dünya Turizm Təşkilatının Baş katibi Şeyxa Əl Nuveys ilə görüşüb.

Xarici İşlər Nazirliyindən AZƏRTAC-a bildirilib ki, görüşdə Azərbaycan ilə Dünya Turizm Təşkilatı arasında əməkdaşlığın mövcud vəziyyəti və inkişaf perspektivləri, ölkəmizin zəngin turizm potensialının beynəlxalq səviyyədə təşviqi, turizm sahəsində yeni əməkdaşlıq imkanları, eləcə də ölkəmizin beynəlxalq turizm platformalarında iştirakının genişləndirilməsi məsələləri müzakirə olunub.

Nazir Ceyhun Bayramov Baş katibi sözügedən vəzifəyə seçilməsi münasibətilə bir daha təbrik edib və ona uğurlar arzulayıb. O, Azərbaycanın beynəlxalq turizm əlaqələrinin inkişafına xüsusi əhəmiyyət verdiyini qeyd edib. Ölkəmizin əlverişli coğrafi mövqeyi, zəngin tarixi-mədəni irsi, müxtəlif təbii landşaftları, müasir infrastrukturu və qonaqpərvərlik ənənələrinin Azərbaycanın regional və beynəlxalq turizm məkanında cəlbediciliyini artırdığı vurğulanıb.

Azərbaycanın turizm potensialının müxtəlifliyi diqqətə çatdırılaraq, ölkədə mədəni irs, şəhər, ekoturizm, kənd, dağ, sağlamlıq, qış və işgüzar turizm istiqamətlərinin inkişafı üçün mövcud imkanlar qeyd edilib.

Ölkəmizin zəngin mətbəx mədəniyyətinin və milli kulinariya ənənələrinin ölkənin turizm imkanlarının beynəlxalq səviyyədə təşviqində mühüm rol oynadığı görüş zamanı bildirilib. Qastronomik turizmin Azərbaycanın mədəni irsinin, milli adət-ənənələrinin və qonaqpərvərlik mədəniyyətinin tanıdılmasına verdiyi töhfələr qeyd olunub.

Azərbaycanın turizm sahəsində həyata keçirdiyi proqramlar və təşəbbüslər, turizm infrastrukturunun təkmilləşdirilməsi, beynəlxalq nəqliyyat və bağlantı imkanlarının genişləndirilməsi, həmçinin ölkənin müxtəlif turizm məhsullarının xarici bazarlarda tanıdılması istiqamətində görülən işlər barədə məlumat verilib.

Görüş zamanı işğaldan azad edilmiş ərazilərin zəngin tarixi-mədəni irsi və turizm potensialı da diqqət mərkəzində olub. Həmin ərazilərdə aparılan bərpa və yenidənqurma işləri, müasir infrastrukturun yaradılması, mədəni və dini irsin qorunması, eləcə də yeni turizm istiqamətlərinin formalaşdırılması barədə məlumat verilib.

Baş katib Şeyxa Əl Nuveys ölkəmizin təşkilatda fəal üzvlüyünə görə təşəkkür edib, təşkilatın bir sıra planıarı və prioritetləri barədə geniş məlumat təqdim edib.

Görüşdə, həmçinin digər qarşılıqlı maraq doğuran sahələr ətrafında fikir mübadiləsi aparılıb.

Oktyabrın 27-də Bakıda İslam Əməkdaşlıq Təşkilatına (İƏT) üzv dövlətlərin korrupsiyaya qarşı mübarizə aparan hüquq-mühafizə orqanlarının nümayəndələrinin hazırlıq iclası keçirilib.

Bu barədə AZƏRTAC-a Baş Prokurorluğun mətbuat xidmətindən məlumat verilib.

Bildirilib ki, Azərbaycan Baş Prokurorluğunun ev sahibliyi etdiyi tədbir İƏT-ə üzv dövlətlər arasında korrupsiyaya qarşı mübarizə sahəsində əməkdaşlığın gücləndirilməsi, qabaqcıl təcrübə mübadiləsinin genişləndirilməsi və hüquq-mühafizə orqanları arasında qarşılıqlı fəaliyyətin inkişaf etdirilməsi baxımından mühüm əhəmiyyət kəsb edir.

Habelə sözügedən tədbir oktyabrın 28-də Bakı şəhərində keçiriləcək İƏT-ə üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü yüksəksəviyyəli görüşünə hazırlıq məqsədi daşıyır.

“Qurani-Kərim”dən ayələrin oxunması ilə başlayan iclasda Qətər Dövlətinin nümayəndəsi, əvvəlki hazırlıq görüşünə sədrlik etmiş tərəfin təmsilçisi, Azərbaycan Respublikası Baş prokurorunun müavini Heydər Məmmədov və İƏT-in Baş katibinin müavini çıxış ediblər.

İƏT-ə üzv dövlətlər tərəfindən Katibliyə təqdim edilmiş layihə və bəyanatların hazırlıq iclasında müzakirə olunaraq razılaşdırılması və qəbul edilmək üçün üzv dövlətlərin korrupsiyaya qarşı mübarizə üzrə hüquq-mühafizə orqanları rəhbərlərinin üçüncü yüksəksəviyyəli görüşünə təqdim edilməsi ilə əlaqədar olaraq, Qətərin nümayəndəsi tərəfindən Azərbaycanın Baş prokurorunun müavini Heydər Məmmədova hazırlıq iclasına sədrlik etməsinin rəmzi ifadəsi təqdim edilib.

Heydər Məmmədov çıxışında korrupsiyaya qarşı mübarizənin hüququn aliliyinin təmin edilməsi, dövlət idarəçiliyində şəffaflığın artırılması və ictimai etimadın möhkəmləndirilməsi baxımından əhəmiyyətini vurğulayıb. O, Azərbaycan Prezidenti İlham Əliyevin rəhbərliyi ilə ölkəmizdə həyata keçirilən institusional islahatların, müasir idarəetmə prinsiplərinin tətbiqinin və korrupsiyaya qarşı mübarizə mexanizmlərinin təkmilləşdirilməsinin ardıcıl dövlət siyasətinin mühüm istiqamətlərindən olduğunu bildirib.

Baş prokurorun müavini, həmçinin bu sahədə beynəlxalq əməkdaşlığın genişləndirilməsinin, qabaqcıl təcrübənin öyrənilməsinin və hüquq-mühafizə orqanları arasında əlaqələndirilmiş fəaliyyətin gücləndirilməsinin vacibliyini qeyd edib. O, Azərbaycanın İƏT ilə əlaqələrinin inkişafına və təşkilat çərçivəsində əməkdaşlığın dərinləşdirilməsinə xüsusi önəm verdiyini diqqətə çatdırıb.

İƏT-in Baş katibinin müavini isə çıxışında üzv dövlətlər arasında həmrəyliyin və əməkdaşlığın gücləndirilməsinin, korrupsiyaya qarşı mübarizədə ortaq yanaşmaların təşviqinin və müvafiq qurumlar arasında institusional əlaqələrin inkişafının əhəmiyyətini vurğulayıb. O, beynəlxalq təcrübə mübadiləsinin, qabaqcıl metodların tətbiqinin və dövlətlər arasında əlaqələndirilmiş fəaliyyətin genişləndirilməsinin bu sahədə səmərəli nəticələrin əldə olunmasına xidmət etdiyini qeyd edib.

İclasda müxtəlif üzv dövlətlərin nümayəndələri mövzu ilə bağlı çıxış edərək, ölkələrinin təcrübəsini, mövcud yanaşmaları və gələcək əməkdaşlığın inkişafına dair təkliflərini bölüşüblər.

Belə ki, Səudiyyə Ərəbistanı, Mərakeş, Qətər, Qırğız Respublikası, Liviya, Livan, Sudan, İordaniya və digər iştirakçı dövlətlərin nümayəndə heyətləri sessiyanın yüksək səviyyədə təşkilinə görə təşəkkürlərini bildirib, həmçinin Nazirlər Görüşündə qəbul edilməsi nəzərdə tutulan qətnamə layihələri üzərində aparılan işləri yüksək qiymətləndirərək, bu istiqamətdə əməkdaşlığa sadiqliklərini ifadə ediblər.

Bundan başqa, tədbir zamanı iştirakçılar arasında aparılan geniş fikir mübadiləsi və müzakirələr korrupsiyanın ölçülməsi metodologiyalarının təkmilləşdirilməsi, bu sahədə vahid yanaşmaların təşviqi, milli təcrübələrin qarşılıqlı öyrənilməsi və beynəlxalq əməkdaşlığın daha da gücləndirilməsi baxımından əhəmiyyət kəsb edib.

Aparılmış konstruktiv müzakirələr nəticəsində iştirakçı dövlətlər qətnamə layihələri ilə bağlı bir sıra məsələlər üzrə konsensusa nail olunub.

Bakıda keçirilən İslam Əməkdaşlıq Təşkilatına üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü yüksəksəviyyəli görüşü çərçivəsində Azərbaycanın Baş prokuroru Kamran Əliyev BMT-nin Terrorçuluqla Mübarizə İdarəsində Baş katibin müavini vəzifəsini icra edən Aleksandr Zuyevlə görüşüb.

Bu barədə AZƏRTAC-a Baş Prokurorluğun mətbuat xidmətindən məlumat verilib.

Bildirilib ki, Baş prokuror Azərbaycan ilə BMT arasında formalaşmış səmərəli tərəfdaşlığı vurğulayıb. Baş Prokurorluq ilə BMT-nin müvafiq qurumları arasında əməkdaşlığın inkişaf etdirilməsinin əhəmiyyətini qeyd edib.

Görüşdə Azərbaycan ilə BMT-nin Terrorçuluqla Mübarizə İdarəsi arasında əməkdaşlığın mövcud vəziyyəti və inkişaf perspektivləri, terrorçuluğa qarşı mübarizə sahəsində beynəlxalq səylərin əlaqələndirilməsi, hüquq-mühafizə orqanlarının institusional potensialının gücləndirilməsi və qarşılıqlı təcrübə mübadiləsinin genişləndirilməsi məsələləri müzakirə olunub.

Əvvəlki təmaslara toxunularaq, 2024-cü ilin noyabrında COP29 çərçivəsində Baş Prokurorluğun, BMT-nin Narkotiklər və Cinayətkarlıq üzrə İdarəsinin və Birləşmiş Ərəb Əmirliklərinin Daxili İşlər Nazirliyinin birgə təşkilatçılığı ilə keçirilmiş hüquq-mühafizə orqanlarının iqlim dəyişmələri ilə mübarizədə roluna həsr olunmuş yüksəksəviyyəli tədbirin əhəmiyyəti vurğulanıb. Həmçinin əvvəlki illərdə keçirilmiş ikitərəfli görüşlər xatırlanaraq, mövcud əməkdaşlığın konkret təşəbbüslər vasitəsilə daha da inkişaf etdirilməsinin vacibliyi qeyd olunub.

Baş prokuror Azərbaycanın prokurorluq orqanlarının BMT-nin müvafiq strukturları ilə əlaqələrin genişləndirilməsinə, beynəlxalq təcrübənin öyrənilməsinə və birgə praktiki təşəbbüslərin həyata keçirilməsinə hazır olduğunu bildirib.

Aleksandr Zuyev səmimi qəbula görə təşəkkürünü bildirərək, Azərbaycan ilə BMT qurumları arasında əməkdaşlığın inkişaf etdirilməsinin, hüquq-mühafizə orqanlarının potensialının gücləndirilməsinin və beynəlxalq təcrübə mübadiləsinin əhəmiyyətini vurğulayıb.

Görüşün sonunda tərəflər terrorçuluğa qarşı mübarizə sahəsində beynəlxalq əməkdaşlığın genişləndirilməsi və BMT-nin müvafiq strukturları ilə qarşılıqlı fəaliyyətin gücləndirilməsi istiqamətində əməkdaşlığın davam etdirilməsinə qarşılıqlı maraq ifadə ediblər.

Baş Prokurorluğun mətbuat xidmətindən AZƏRTAC-a verilən məlumata görə, görüşdə Azərbaycan ilə Qətər arasında dostluq münasibətlərinin və siyasi dialoqun yüksək səviyyəsi vurğulanıb. Prezident İlham Əliyevin müxtəlif illərdə Qətərə rəsmi səfərləri, Qətərin Əmiri Şeyx Tamim bin Hamad Al Taninin isə ölkəmizə rəsmi səfərinin ikitərəfli əlaqələrin inkişafına verdiyi töhfələr qeyd olunub. Həmçinin Qətərin Əmiri Şeyx Tamim bin Hamad Al Taninin bu il oktyabrın 14-ü və 15-i AQEM-in VII Zirvə Görüşündə iştirak etmək məqsədilə Azərbaycana səfəri, səfər çərçivəsində Prezident İlham Əliyev ilə görüşü və ikitərəfli əməkdaşlığın perspektivlərinin müzakirəsi Azərbaycan-Qətər münasibətlərinin inkişafına verilən qarşılıqlı önəmin göstəricisi kimi vurğulanıb.

Baş prokuror Qətərin müvafiq qurumu ilə Azərbaycanın prokurorluq orqanları, o cümlədən Baş prokuror yanında Korrupsiyaya qarşı Mübarizə Baş İdarəsi arasında əməkdaşlığın genişləndirilməsinin, qarşılıqlı təcrübə mübadiləsinin və beynəlxalq platformalarda birgə fəaliyyətin əhəmiyyətini qeyd edib. O, Qətərin BMT-nin Korrupsiyaya qarşı Konvensiyası çərçivəsində fəaliyyətini vurğulayaraq, qarşıdakı beynəlxalq tədbirlərdə əməkdaşlığın və dəstəyin davam etdirilməsinə ümidvar olduğunu bildirib.

Hamad Al-Misnad ikitərəfli əməkdaşlığın inkişafının və korrupsiyaya qarşı mübarizə sahəsində beynəlxalq səylərin əlaqələndirilməsinin vacibliyini vurğulayıb.

Görüşdə əməkdaşlığın dərinləşdirilməsi, qabaqcıl təcrübə mübadiləsinin genişləndirilməsi və beynəlxalq təşəbbüslər çərçivəsində birgə fəaliyyətin gücləndirilməsi ilə bağlı fikir mübadiləsi aparılıb.

Göstərilən səmərəli əməkdaşlığa və Azərbaycanın prokurorluq orqanları ilə əlaqələrin inkişafına verdiyi töhfələrə görə Qətərin İnzibati Nəzarət və Şəffaflıq Orqanının prezidenti Hamad bin Nasser bin Rashid Al-Misnad Azərbaycanın Baş prokuroru Kamran Əliyev tərəfindən “Azərbaycan Prokurorluğunun 100 illiyi (1918–2018)” Azərbaycan Respublikasının yubiley medalı ilə təltif olunub.

Barselonadakı hadisələrdən sonra, indi də Bilbao küçələrində iğtişaşlar baş qaldırıb. Nəqliyyat vasitələri və zibil qabları yandırılıb, mağazalara hücum edilib. Polis müdaxilə edib və 20-dən çox şəxs saxlanılıb.

İspaniyanın Barselona şəhərində 24 oktyabr axşamı baş verən küçə zorakılıqları artıq Bilbao şəhərinə də sıçrayıb. Basklar Ölkəsinin iri şəhərlərindən biri olan Bilbaoda, təxribatçı hərəkətləri ilə tanınan ifrat sağçı sosial media fenomeninin təşkil etdiyi tədbirə etiraz etmək üçün toplaşan kütlə, tədbirin ləğv olunmasına baxmayaraq, şəhər mərkəzində zorakı əməllərə əl atıb. Çoxsaylı nəqliyyat vasitələrini və zibil qablarını yandıran, həmçinin bir neçə mağazanı qarət etməyə cəhd göstərən qrupa qarşı polis müdaxilə edib. 

“Azərbaycan”

ABŞ-də noyabrın 3-də keçiriləcək Konqresə aralıq seçkiləri ərəfəsində ölkə üzrə keçirilən rəy sorğularının nəticələri bəlli olmağa başlayıb. Seçkilərdə 435 yerlik Nümayəndələr Palatasının bütün tərkibi və 100 yerlik Senatın 35 yeri uğrunda mübarizə aparılacaq. Sorğuların ortalama nəticələrinə əsasən Demokratlar hər iki palatada üstün mövqedə görünürlər, lakin yekun nəticəni baş-başa mübarizənin getdiyi ciddi seçki dairələri müəyyən edəcək. 

“Real Clear Politics” platformasının məlumatına görə, Senatda Demokratların 46, Respublikaçıların isə 44 yer qazanacağı gözlənilir, 10 ştatda isə namizədlər arasında rəqabət davam edir. Əgər Respublikaçılar bu ştatların yarıdan çoxunda qalib gələrsə, yerlərin sayı 50-nin 50-yə nisbətində bərabərləşə bilər və bu halda vitse-prezident Cey Di Vensin həlledici səsi sayəsində Respublikaçılar Senatda çoxluğu əldə edə bilərlər. Nümayəndələr Palatasında çoxluğu əldə etmək üçün 218 yer tələb olunur və hazırkı sorğular Respublikaçıların 182, Demokratların isə 227 yer qazanacağını göstərir. Hazırda Senatda Respublikaçıların 53, Demokratların 45 yeri var, Nümayəndələr Palatasında isə Respublikaçılar 218, Demokratlar 214 yerə sahibdirlər.

Təhminə VERDİYEVA,

“Azərbaycan”

Birləşmiş Millətlər Təşkilatı (BMT) qlobal istiləşmə nəticəsində dəniz səviyyəsinin sürətlə qalxdığını və bunun dünya miqyasında ciddi fəsadlara yol açdığını bildirib. Dəniz sularının yüksəlmə sürəti son onillikdə iki dəfədən çox artıb. 2050-ci ilə qədər dəniz səviyyəsinin orta hesabla 15-30 santimetr artacağı gözlənilir. Bu dəyişiklik sahil zonasında yerləşən şəhərlər, kiçik adalar və kənd təsərrüfatı torpaqları üçün böyük risk yaradır.

BMT-nin məlumatına görə, 2050-ci ilə qədər dəniz səviyyəsinin qalxması səbəbindən 1,2 milyarda yaxın insan evini dəyişmək məcburiyyətində qala bilər. Okean suyunun quruya dolması içməli su mənbələrini duzlaşdırır. Bu da həm içməli su qıtlığına, həm də kənd təsərrüfatına ciddi ziyan vurur. BMT dəniz səviyyəsinin qalxması ilə bağlı yeni bəyannamə qəbul edib. Sənədə əsasən, təhlükədə olan ada ölkələrinə maliyyə yardımı ediləcək və sahil bölgələrində yaşayan insanlar qorunacaq. 

BMT-nin Baş Katibi Antonio Quterreş vurğulayıb ki, dəniz suları millimetrlərlə qalxsa da, onun ziyanı milyonlarla insanın məhv olan həyatı ilə ölçülür.

Təhminə VERDİYEVA,

“Azərbaycan”

Cərrahi üsulla şiş götürüldükdən sonra fərdiləşdirilmiş melanoma peyvəndi immunoterapiya ilə birlikdə xəstəliyin qayıtması və ya ölüm riskini 42 faiz azaldıb. Alimlər bu qənaətə Avropa Tibbi Onkologiya Cəmiyyətinin konqresində (ESMO 2026) təqdim edilən beynəlxalq üçüncü faza klinik tədqiqatının nəticələrinə əsasən gəliblər. 

Əvvəllər şişləri çıxarılmış yüksək riskli 1137 melanoma pasiyentinin qatıldığı sınaqlar dünya üzrə 157 tibb mərkəzində həyata keçirilib.

İştirakçılar iki qrupa bölünüb: bir qrup standart pembrolizumab immunoterapiyası, digər qrup isə həmin preparatla yanaşı eksperimental intismeran peyvəndi ilə müalicə alıb.

Peyvəndin özəlliyi onun hər bir pasiyent üçün şişin genetik xüsusiyyətlərinə əsasən fərdi şəkildə hazırlanmasıdır - mRNT texnologiyasının köməyi ilə immun sistemə qalan xərçəng hüceyrələrini tanımaq və məhv etmək öyrədilir.

Məlum olub ki, peyvəndin əlavə olunması melanoma residivi və ya ölüm riskini yalnız pembrolizumabın tətbiqi ilə müqayisədə 42 faiz azaldıb. Xəstəliyin müalicənin ilk altı ayında qayıtmadığı pasiyentlərdə isə riskin azalması 58 faizə çatıb. Eyni zamanda peyvənd pembrolizumabın əlavə təsirlərinin tezliyini artırmayıb. Arzuolunmaz reaksiyalar sırasında sadəcə inyeksiya yerində müvəqqəti ağrı, baş ağrısı və üşütmə qeydə alınıb.

Alimlər hesab edirlər ki, fərdiləşdirilmiş peyvəndlər melanomanın və potensial olaraq digər xərçəng növlərinin müalicəsində yeni yanaşmaya çevrilə bilər.

Yasəmən MUSAYEVA, 

“Azərbaycan”

AZƏRTAC xəbər verir ki, bunu Rusiya Prezidenti Vladimir Putin Qaz İxrac edən Ölkələr Forumunun 8-ci sammitində iştirak edənlərin çıxışlarını şərh edərkən deyib.

“Azərbaycan bir çox sahələrdə, o cümlədən energetika sahəsində sabit və etibarlı tərəfdaşımızdır”, – deyə o vurğulayıb.

Rusiya liderinin sözlərinə görə, Moskva və Bakı enerji sahəsində qarşılıqlı əməkdaşlığın genişləndirilməsi imkanlarını müzakirə edirlər və birgə fəaliyyət üçün yaxşı perspektivlər mövcuddur.

Rusiyadan Türkiyəyə qaz tədarükündən danışan V.Putin bu həcmin 30 milyard kubmetrə çatdığını bildirib. Bununla yanaşı, o vurğulayıb ki, Rusiya Azərbaycanı Türkiyənin qaz bazarında rəqib hesab etmir.

“Bu, əlbəttə ki, Azərbaycanın tədarük etdiyi həcmdən xeyli çoxdur. Lakin biz bir-birimizi rəqib hesab etmirik. Əksinə, əməkdaşlığa hazırıq”, – deyə V.Putin bildirib.

Bakıda keçirilən İslam Əməkdaşlıq Təşkilatına üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü yüksəksəviyyəli görüşü çərçivəsində Azərbaycanın Baş prokuroru Kamran Əliyev İndoneziyanın Korrupsiyaya Qarşı Mübarizə Komissiyasının baş katibi Cahya Hardianto Harefa və Uqandanın dövlət ittihamı direktoru Lino Anguzunun rəhbərlik etdiyi nümayəndə heyəti ilə ayrı-ayrılıqda görüşlər keçirib.

Baş Prokurorluğun mətbuat xidmətindən AZƏRTAC-a verilən məlumata görə, görüşlərdə Baş prokuror Prezident İlham Əliyevin rəhbərliyi ilə korrupsiyaya qarşı mübarizənin gücləndirilməsi, dövlət idarəçiliyində şəffaflığın və hesabatlılığın artırılması, korrupsiya risklərinin qarşısının alınması, dövlət xidmətlərinin təkmilləşdirilməsi və elektronlaşdırılması istiqamətində həyata keçirilən hüquqi və institusional islahatlar barədə məlumat verib. Bu sahədə dövlət siyasətinin ardıcıl həyata keçirilməsinin, qabaqlayıcı tədbirlərin genişləndirilməsinin və səmərəli antikorrupsiya mexanizmlərinin tətbiqinin əhəmiyyəti vurğulanıb.

İndoneziyanın Korrupsiyaya Qarşı Mübarizə Komissiyasının baş katibi ilə görüşdə Azərbaycan-İndoneziya münasibətlərinin dostluq və qarşılıqlı hörmətə əsaslandığı qeyd olunub, Birləşmiş Millətlər Təşkilatı, Qoşulmama Hərəkatı və İslam Əməkdaşlıq Təşkilatı çərçivəsində əməkdaşlığın əhəmiyyəti vurğulanıb.

Habelə İndoneziyanın Azərbaycanın suverenliyinə və ərazi bütövlüyünə beynəlxalq səviyyədə göstərdiyi dəstəyin əhəmiyyəti diqqətə çatdırılıb.

Baş prokuror, həmçinin İndoneziyanın Baş prokuroru Sanitiar Burhanuddin ilə mövcud əlaqələrə və rəsmi yazışmalara toxunaraq, iki ölkənin prokurorluq orqanları arasında əməkdaşlığın inkişaf etdirilməsinin vacibliyini bildirib.

Cahya Hardianto Harefa korrupsiyaya qarşı mübarizə sahəsində əməkdaşlığın genişləndirilməsinin və qabaqcıl təcrübə mübadiləsinin əhəmiyyətini vurğulayıb.

Görüşdə Azərbaycanın Baş Prokurorluğu, o cümlədən Baş prokuror yanında Korrupsiyaya qarşı Mübarizə Baş İdarəsi ilə İndoneziyanın Korrupsiyaya Qarşı Mübarizə Komissiyası arasında əməkdaşlığın inkişafı, korrupsiya hüquqpozmalarının qarşısının alınması və aşkar edilməsi sahəsində təcrübə mübadiləsi, habelə beynəlxalq və regional platformalarda qarşılıqlı fəaliyyətin gücləndirilməsi məsələləri müzakirə olunub.

Uqandanın dövlət ittihamı direktorunun rəhbərlik etdiyi nümayəndə heyəti ilə görüşdə Azərbaycan-Uqanda əlaqələrinin inkişafı, xüsusilə hüquq-mühafizə sahəsində əməkdaşlığın genişləndirilməsi və təcrübə mübadiləsi məsələləri müzakirə olunub.

Baş prokuror korrupsiyanın transmilli xarakterini nəzərə çatdıraraq, bu qəbildən olan hüquqpozmalarla səmərəli mübarizədə operativ məlumat mübadiləsinin və hüquq-mühafizə orqanlarının əlaqələndirilmiş fəaliyyətinin əhəmiyyətini qeyd edib.

Lino Anguzu səmimi qəbula görə təşəkkürünü bildirərək, iki ölkənin prokurorluq orqanları arasında peşəkar əlaqələrin inkişaf etdirilməsinin vacibliyini vurğulayıb.

Görüşdə qarşılıqlı səfərlərin, təcrübə mübadiləsinin və beynəlxalq platformalar çərçivəsində əməkdaşlığın genişləndirilməsi perspektivləri ətrafında fikir mübadiləsi aparılıb.

Milli Məclisin növbəti iclasının gündəliyi açıqlanıb.

AZƏRTAC xəbər verir ki, oktyabrın 30-da keçiriləcək iclasda 11 məsələyə müzakirəyə çıxarılacaq.

1. “Azərbaycan Respublikasının Mərkəzi Bankı haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş);

2. “Ədliyyə orqanlarında qulluq keçmə haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş);

3. Azərbaycan Respublikasının Əmək Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş);

4. “Hərbi xidmətkeçmə haqqında” Əsasnamənin təsdiq edilməsi barədə” və “Hərbi vəzifə və hərbi xidmət haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (ikinci oxunuş);

5. “Telekommunikasiya haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (ikinci oxunuş);

6. Azərbaycan Respublikasının Mülki Prosessual Məcəlləsində, Azərbaycan Respublikasının Vergi Məcəlləsində, Azərbaycan Respublikasının Cinayət-Prosessual Məcəlləsində, “Sosial sığorta haqqında”, “Tibbi sığorta haqqında”, “Məhkəmə ekspertizası fəaliyyəti haqqında”, “İnzibati icraat haqqında”, “Lisenziyalar və icazələr haqqında” və “Məşğulluq haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (birinci oxunuş).

7. “Pulsuz hüquqi yardım haqqında” Azərbaycan Respublikası qanununun layihəsi (birinci oxunuş);

8. Azərbaycan Respublikasının Mülki Prosessual Məcəlləsində, Azərbaycan Respublikasının Cinayət-Prosessual Məcəlləsində, Azərbaycan Respublikasının Cəzaların İcrası Məcəlləsində, “Şəhid adının əbədiləşdirilməsi və şəhid ailələrinə edilən güzəştlər haqqında”, “Veteranlar haqqında”, “Qaçqınların və məcburi köçkünlərin (ölkə daxilində köçürülmüş şəxslərin) statusu haqqında”, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında”, “Vəkillər və vəkillik fəaliyyəti haqqında”, “Yetkinlik yaşına çatmayanların baxımsızlığının və hüquq pozuntularının profilaktikası haqqında”, “İnsan alverinə qarşı mübarizə haqqında”, “Ünvanlı dövlət sosial yardımı haqqında”, “Məişət zorakılığının qarşısının alınması haqqında”, “Əlilliyi olan şəxslərin hüquqları haqqında” və “Uşaq hüquqları haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (birinci oxunuş);

9. “Korrupsiya ilə əlaqədar hüquqpozmalarla bağlı məlumat verən şəxslərin həvəsləndirilməsi və müdafiəsi haqqında” Azərbaycan Respublikası qanununun layihəsi (birinci oxunuş);

10. Azərbaycan Respublikasının Əmək Məcəlləsində, Azərbaycan Respublikasının Vergi Məcəlləsində, Azərbaycan Respublikasının Cinayət-Prosessual Məcəlləsində, “Cinayət prosesində iştirak edən şəxslərin dövlət müdafiəsi haqqında”, “Vəkillər və vəkillik fəaliyyəti haqqında”, “Korrupsiyaya qarşı mübarizə haqqında”, “İnformasiya əldə etmək haqqında”, “Fərdi məlumatlar haqqında” və “Vətəndaşların müraciətləri haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (birinci oxunuş);

11. Azərbaycan Respublikasının Cinayət Məcəlləsində və Azərbaycan Respublikasının İnzibati Xətalar Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş).

VII Ümumdünya Mədəniyyətlərarası Dialoq Forumunda qeyd olunan məsələlər əvvəlki forumlarda Azərbaycan tərəfindən təklif olunan, məhz mədəni irsin bərpasına yönəlmiş xüsusi yanaşmadır. Bu, 7 mərhələdən ibarət yanaşmadır. Bu forumda artıq o barədə daha praktiki danışa bilərik, çünki işğaldan azad olunmuş ərazilərdə bunun konkret nümunələri var. Artıq bir sıra mədəni-tarixi abidələrimizi və mədəni irs nümunələrimizi bərpa etmişik. Bəzi obyektdə xüsusi yanaşmalar tətbiq olunub və bu təcrübə digər ölkələr üçün də maraqlı ola bilər.

AZƏRTAC xəbər verir ki, bunu Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov jurnalistlərə açıqlamasında deyib.

Bugünkü təqdimatda Ağdam, Füzuli və Xocavənd rayonlarında aparılan bərpa-quruculuq işləri barədə danışdığını diqqətə çatdıran Prezidentin xüsusi nümayəndəsi deyib: “Buraya həm Pənahəli xanın İmarət kompleksi, Ağdam şəhərindəki Cümə məscidi, həm də bu yaxınlarda qoruq statusu almış bir sıra ərazilərimiz – Tuğ kəndi, Azıx və Tağlar mağaraları daxildir. Təqdimatda bu mədəni irs nümunələrinin necə bərpa olunması və həyata qaytarılması haqqında ətraflı danışıldı”.

Emin Hüseynov vurğulayıb ki, hər bir mədəni irs obyekti fərdi yanaşma tələb edir və bərpa zamanı müxtəlif metodlardan istifadə oluna bilər. Bura həm konservasiya, həm obyekti əvvəlki vəziyyətinə gətirmə, həm də onun özünəməxsus xüsusiyyətlərini saxlamaqla yeni elementlər əsasında bərpası daxildir.

“Bizdə bu yanaşmaların hər birinə dair konkret nümunələr mövcuddur. Lakin hansı halda hansı metoddan istifadə olunacağı hər bir obyekt üçün xüsusi təhlil olunur və prosesə həssaslıqla yanaşılır. Bu işin əhəmiyyətini bizə izah etməyə ehtiyac yoxdur, çünki 30 illik işğal dövründə bundan ən çox əziyyət çəkən və ziyan görən məhz Azərbaycan xalqı olub. Mədəni irsimizin bir çox nümunəsi ya təhqir olunub, ya da tamamilə dağıdılıb. Bu səbəbdən, ərazilərimiz azad edildikdən dərhal sonra dövlət başçımızın tapşırığı ilə ilk növbədə, mədəni irs obyektlərimizin bərpasına yönəlmiş tədbirlər həyata keçirilməyə başlandı. Bu proses "Böyük Qayıdış"ın özü qədər vacibdir. Çünki bu, təkcə insanların öz yurd-yuvalarına qayıtması deyil, eyni zamanda, sosial və mədəni komponentlərin də nə qədər əhəmiyyətli olduğunu göstərir”, - deyə o əlavə edib.

Qəbulu aparan şəxs

Qəbul günü

Azərbaycan Respublikası Prezidentinin köməkçisi –

Azərbaycan Respublikası Prezidenti Administrasiyasının

İqtisadi siyasət və sənaye məsələləri şöbəsinin müdiri

  Əmirov Natiq Ərziman oğlu

2

Azərbaycan Respublikası Prezidentinin köməkçisi –

Azərbaycan Respublikası Prezidenti Administrasiyasının

Ərazi-təşkilat məsələləri şöbəsinin müdiri

Nağdəliyev Zeynal Səfər oğlu 

3

Azərbaycan Respublikası Prezidentinin köməkçisi – 

Azərbaycan Respublikası Prezidenti Administrasiyasının

Hüquq mühafizə orqanları ilə iş şöbəsinin müdiri

Ələsgərov Fuad  Murtuz oğlu

4,18

Azərbaycan Respublikası Prezidenti Administrasiyasının

Vətəndaşların müraciətləri ilə iş şöbəsinin müdiri                                            

İsmayılov  Süleyman Abbas oğlu

5

Azərbaycan Respublikası Birinci vitse-prezidentinin Katibliyinin rəisi

Həsənov Altay Tofiq oğlu 

6,13,27

Azərbaycan Respublikası Prezidentinin köməkçisi –

Azərbaycan Respublikası Prezidenti Administrasiyasının

Dövlət nəzarəti məsələləri şöbəsinin müdiri                  

Həsənov Kərəm Əvəz oğlu

6

Azərbaycan Respublikası Prezidenti Administrasiyasının

Hərbi məsələlər şöbəsinin müdiri

Seyidov Fərid Mirmufid oğlu                               

11

Azərbaycan Respublikası Prezidentinin köməkçisi –

Azərbaycan Respublikası Prezidenti Administrasiyasının

İqtisadi məsələlər və innovativ inkişaf siyasəti şöbəsinin müdiri

 Mövsümov Şahmar Arif oğlu

12

Azərbaycan Respublikası Prezidentinin köməkçisi – 

Azərbaycan Respublikası Prezidenti Administrasiyasının

Xarici siyasət məsələləri şöbəsinin müdiri

Hacıyev Hikmət Fərhad oğlu

13

Azərbaycan Respublikası Prezidenti Administrasiyasının

Dövlət qulluğu və kadr məsələləri şöbəsinin müdiri  

Məcidov Tələt Tahir oğlu

16

Azərbaycan Respublikası Prezidenti Administrasiyasının

Gənclər siyasəti və idman məsələləri şöbəsinin müdiri 

Məmmədəliyev  Yusuf  Ülfət oğlu

16

Azərbaycan Respublikası Prezidentinin Mətbuat katibi

Səttarov Orxan Rəcəb oğlu

17

Azərbaycan Respublikası Prezidenti Administrasiyasının  

Qeyri-hökumət təşkilatları ilə iş və kommunikasiya şöbəsi

17

Azərbaycan Respublikası Prezidenti Administrasiyasının

Hüquq mühafizə orqanları ilə iş şöbəsinin Əfv məsələləri sektoru

17

Ağdam, Füzuli və Xocavənd rayonlarında Azərbaycan Respublikası Prezidentinin

xüsusi nümayəndəsi

Hüseynov Emin Zamin oğlu

19

Şuşa rayonunda Azərbaycan Respublikası Prezidentinin xüsusi nümayəndəsi

Kərimov Aydın Zöhrab oğlu

20

Laçın rayonunda Azərbaycan Respublikası Prezidentinin xüsusi nümayəndəsi

Məmmədov Məsim Əhməd oğlu

20

Kəlbəcər rayonunda Azərbaycan Respublikası Prezidentinin xüsusi nümayəndəsi

Hacıyev Bəşir Qüdrət oğlu

23

Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyi

24

Azərbaycan Respublikası Prezidenti Administrasiyasının

Siyasi partiyalar və qanunvericilik hakimiyyəti ilə əlaqələr şöbəsinin müdiri       

Vəliyev Ədalət Məqsəd oğlu

25

Azərbaycan Respublikası Prezidenti Administrasiyasının

Humanitar siyasət, diaspor, multikulturalizm və dini məsələlər şöbəsinin müdiri

Əliyeva Fərəh Şirməmməd qızı

26

Azərbaycan Respublikası Prezidenti Administrasiyasının

Qanunvericilik və hüquq siyasəti şöbəsinin müdiri                                          

Kərimov Gündüz Hacı oğlu

27

Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəsi

Hacıyev Vahid Rasim oğlu

27

                                               * * *

Azərbaycan Respublikasının Təhlükəsizlik Şurası

Azərbaycan Respublikası Təhlükəsizlik Şurasının katibi

Usubov Ramil İdris oğlu

30

Qeyd: Vətəndaşlar Azərbaycan Respublikası Prezidenti

Administrasiyasının Vətəndaş Qəbulu Mərkəzində qəbul olunurlar.

Ünvan: Bakı şəhəri, Nərimanov rayonu, Zaur Nudirəliyev,79.

Qəbula yazılış qəbul gününə ən geci 1 iş günü qalmış dayandırılır. 

Qəbul saat 14:00-dan başlayır.

Əlaqə üçün: Çağrı Mərkəzi – 1111.

Avropa Komissiyası Çin şirkətinə məxsus onlayn pərakəndə satış platforması “Temu”nun Avropa İttifaqının (Aİ) Rəqəmsal Xidmətlər Qanununu pozması ilə bağlı təqdim etdiyi fəaliyyət planını bəyəndiyini açıqlayıb.

“Temu” platformada qanunsuz və təhlükəli məhsulların satışının qarşısını almaq üçün risk analizi aparmağı və təhlükəsizlik tədbirlərini gücləndirməyi öhdəsinə götürüb. Həmçinin tövsiyə alqoritmlərinin qanunsuz məhsulların yayılmasına necə təsir etdiyini nəzərdən keçirəcək. Bu qərar may ayında platformada təhlükəli uşaq oyuncaqları və qüsurlu enerji doldurma cihazları kimi qanunsuz məhsulların satışına şərait yaratdığı üçün Aİ tərəfindən “Temu”ya kəsilən 200 milyon avro cərimədən sonra verilib.

Şirkət Avropa Komissiyası ilə qurulan konstruktiv dialoqu yüksək qiymətləndirdiyini və Aİ istifadəçiləri üçün təhlükəsiz alış-veriş mühiti yaratmaqda qərarlı olduğunu bildirib. Aİ üzvü olan 27 ölkədə 130 milyon istifadəçisi olan “Temu” regionun ən böyük elektron ticarət platformalarından biridir. İyul ayından etibarən tətbiq edilən yeni qaydalara əsasən, 150 avrodan aşağı bağlamalar üçün də 3 avroluq rüsum tətbiq olunur ki, bu da Çindən gələn idxalın 30-40 faiz azalmasına səbəb olub.

Təhminə VERDİYEVA,

“Azərbaycan”

Bakıda keçirilən İslam Əməkdaşlıq Təşkilatına üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü yüksəksəviyyəli görüşü çərçivəsində Azərbaycanın Baş prokuroru Kamran Əliyev Mərakeşin Dürüstlük, Korrupsiyanın Qarşısının Alınması və Ona Qarşı Mübarizə üzrə Milli Orqanının prezidenti Məhəmməd Benalilu və İraqın Federal Dürüstlük Komissiyasının komissarı doktor Məhəmməd Əli əl-Lami ilə ayrı-ayrılıqda görüşlər keçirib.

Baş Prokurorluğun mətbuat xidmətindən AZƏRTAC-a verilən məlumata görə, görüşlərdə Baş prokuror Prezident İlham Əliyevin rəhbərliyi ilə korrupsiyaya qarşı mübarizə sahəsində həyata keçirilən hüquqi və institusional islahatlar barədə məlumat verib. Dövlətimizin başçısının 2022–2026-cı illər üçün Milli Fəaliyyət Planını təsdiq etməsi ilə bu sahədə sistemli tədbirlərin həyata keçirilməsi, dövlət idarəçiliyində şəffaflığın və hesabatlılığın artırılması, korrupsiya risklərinin qarşısının alınması, dövlət xidmətlərinin keyfiyyətinin yüksəldilməsi və elektronlaşdırılması istiqamətində müəyyən edilmiş prioritetlər diqqətə çatdırılıb.

Mərakeşin Dürüstlük, Korrupsiyanın Qarşısının Alınması və Ona Qarşı Mübarizə üzrə Milli Orqanının prezidenti ilə görüşdə Azərbaycan-Mərakeş münasibətlərinin inkişafı və qarşılıqlı əməkdaşlığın genişləndirilməsi məsələləri diqqət mərkəzində olub.

Baş prokuror 2026-cı ilin aprelində Mərakeşə işgüzar səfərini və ölkənin dövlət rəsmiləri ilə keçirdiyi görüşləri xatırladaraq, həmin təmasların ikitərəfli əlaqələrin möhkəmləndirilməsinə verdiyi töhfəni vurğulayıb.

Məhəmməd Benalilu səmimi qəbula görə təşəkkürünü bildirərək, korrupsiyaya qarşı mübarizə sahəsində təcrübə və informasiya mübadiləsinin genişləndirilməsinin, habelə müvafiq qurumlar arasında institusional əlaqələrin gücləndirilməsinin əhəmiyyətini qeyd edib.

Tərəflər Azərbaycanın Baş Prokurorluğu ilə Mərakeşin müvafiq qurumu arasında əməkdaşlığın inkişaf perspektivlərini, qabaqcıl təcrübənin öyrənilməsini və beynəlxalq və regional platformalarda qarşılıqlı fəaliyyətin genişləndirilməsini müzakirə ediblər.

Görüşün yekununda Azərbaycanın Baş Prokurorluğu ilə Mərakeşin Dürüstlük, Korrupsiyanın Qarşısının Alınması və Ona Qarşı Mübarizə üzrə Milli Orqanı arasında əməkdaşlıq haqqında Anlaşma Memorandumu imzalanıb.

İraqın Federal Dürüstlük Komissiyasının komissarı ilə görüşdə Azərbaycan-İraq münasibətlərinin siyasi, iqtisadi və mədəni sahələrdə inkişafı müsbət qiymətləndirilib, İraqın Azərbaycanın suverenliyinə və ərazi bütövlüyünə beynəlxalq platformalarda göstərdiyi dəstəyin əhəmiyyəti vurğulanıb.

Baş prokuror 2024-cü ilin noyabrında Qətərdə keçirilmiş İslam Əməkdaşlıq Təşkilatına üzv dövlətlərin hüquq-mühafizə orqanları rəhbərlərinin ikinci yüksəksəviyyəli görüşü çərçivəsində Məhəmməd Əli əl-Lami ilə, habelə 2024-2025-ci illərdə İraqın məhkəmə və prokurorluq orqanlarının rəhbərləri ilə keçirdiyi görüşləri xatırladaraq, bu təmasların hüquqi əməkdaşlığın inkişafı baxımından əhəmiyyətini qeyd edib.

Məhəmməd Əli əl-Lami korrupsiyaya qarşı mübarizə sahəsində əməkdaşlığın genişləndirilməsinin və qarşılıqlı təcrübə mübadiləsinin vacibliyini vurğulayıb.

Görüşdə iki qurum arasında əməkdaşlığın inkişaf perspektivləri, qabaqcıl təcrübə və informasiya mübadiləsinin genişləndirilməsi, eləcə də birgə fəaliyyətin gücləndirilməsi məsələləri müzakirə olunub.

Görüşün yekununda Azərbaycanın Baş Prokurorluğu ilə İraqın Federal Dürüstlük Komissiyası arasında əməkdaşlıq haqqında Anlaşma Memorandumu imzalanıb.

Kənd təsərrüfatı naziri Məcnun Məmmədov oktyabrın 27-də İmişli Dövlət Aqrar İnkişaf Mərkəzinin binasında İmişli, Beyləqan, Saatlı və Sabirabad rayonlarından olan vətəndaşlarla görüşüb, onların müraciətlərini dinləyib, ərizə və şikayətlərinə baxıb.

Nazirliyin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, əvvəlcə nazir Məcnun Məmmədov Ümummilli Lider Heydər Əliyevin abidəsini ziyarət edərək, əziz xatirəsini dərin hörmət və ehtiramla anıb.

Nazirliyin idarə və tabeli qurumlarının rəhbərlərinin iştirakı ilə keçirilən qəbulda vətəndaşların müraciətləri əsasən işlə təmin olunma, subsidiyaların verilməsi, təsərrüfatların qurulmasına və genişlənməsinə dəstək, işğaldan azad edilmiş ərazilərdə torpaq sahəsinin ayrılması, aqrar sığorta və digər məsələlərlə bağlı olub.

Məcnun Məmmədov hər bir vətəndaşın müraciətini diqqətlə dinləyib, qaldırılan məsələlərin hərtərəfli öyrənilməsi və qanunvericiliyin tələblərinə uyğun olaraq qısa müddətdə həll edilməsi üçün müvafiq tapşırıqlar verib. Vətəndaşların müraciətlərinin bir qismi yerində həllini tapıb, qaldırılan bəzi məsələlər isə araşdırılması üçün nəzarətə götürülüb. Nazirliyin fəaliyyət dairəsinə aid olmayan müraciətlər müvafiq qurumlara çatdırılması üçün qeydiyyata alınıb.

Vətəndaşlarla görüş zamanı “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın əsas məqsəd və prioritetləri, aqrar sahədə nəzərdə tutulan yeni dəstək mexanizmləri, su və torpaq ehtiyatlarından səmərəli istifadə, aqrar emal və logistika infrastrukturunun inkişafı, eləcə də fermerlərin müasir aqrar xidmətlərə çıxışının genişləndirilməsi, bu istiqamətdə dövlət dəstəyi tədbirləri barədə geniş məlumat verilib. Dövlət başçısının kənd təsərrüfatının inkişafı ilə bağlı imzaladığı sərəncamların kənd təsərrüfatı istehsalçılarının rifah halının yaxşılaşdırılmasına və ölkəmizdə bu sahənin inkişafına təkan verdiyi vurğulanıb.

İsveçdə dövlət qulluqçularına məlumat təhlükəsizliyi və məxfilik riskləri səbəbindən iş kompüterlərində brauzer vasitəsilə “OpenAI”nin “ChatGPT” və “Anthropic”in “Claude” süni intellekt alətlərindən istifadə etmək qadağan edilib.

“Euronews” telekanalının məlumatına görə, məhdudiyyət oktyabrın 26-dan tətbiq olunmağa başlayıb. Yoxlamalar göstərib ki, rəsmi müqavilə olmadan bu platformalara daxil edilən məxfi dövlət məlumatları modellərin təlimi üçün saxlanıla və sızma riski yarada bilər. 

İsveç Hökumət Ofisinin rəqəmsallaşma direktoru Mikael Vetterkrants bildirib ki, tənzimlənməyən platformaların istifadəsi informasiya təhlükəsizliyinə ciddi təhdiddir. Dövlət əməkdaşlarına alternativ olaraq təhlükəsizlik yoxlamasından keçmiş və rəsmi müqaviləsi olan “Microsoft Copilot” təklif olunur. Məhdud sayda əməkdaş “ChatGPT” və “Claude”dan istifadəni davam etdirə biləcək, lakin bu, yalnız İsveç hakimiyyəti tərəfindən hazırlanmış xüsusi və qapalı süni intellekt platforması vasitəsilə mümkün olacaq.

Təhminə VERDİYEVA,

“Azərbaycan”

Oktyabrın 27-də Azərbaycanın xarici işlər naziri Ceyhun Bayramov İslam Dünyası Təhsil, Elm və Mədəniyyət Təşkilatının (ICESCO) ölkəmizdə səfərdə olan Baş direktoru Səlim bin Məhəmməd əl-Malik ilə görüşüb.

Xarici İşlər Nazirliyinin Mətbuat xidməti idarəsindən AZƏRTAC-a verilən məlumata görə, görüş zamanı Azərbaycan ilə ICESCO arasında əməkdaşlığın cari vəziyyəti və inkişaf perspektivləri, habelə təhsil, elm, mədəniyyət və mədəni irsin qorunması sahələrində birgə fəaliyyətin genişləndirilməsi imkanları müzakirə olunub.

Nazir Ceyhun Bayramov Azərbaycanın ICESCO ilə əməkdaşlığa xüsusi əhəmiyyət verdiyini, ölkəmizin mədəniyyətlərarası və dinlərarası dialoqun təşviqi, multikulturalizm və tolerantlıq dəyərlərinin təşviqi istiqamətində beynəlxalq səylərə fəal töhfə verdiyini diqqətə çatdırıb.

ICESCO regional ofisinin Bakıda yerləşməsinin Azərbaycanın ICESCO çərçivəsində əməkdaşlığın genişləndirilməsi baxımından əhəmiyyəti vurğulanıb.

Görüşdə, həmçinin Bakıda keçirilən VII Ümumdünya Mədəniyyətlərarası Dialoq Forumunun beynəlxalq ictimaiyyətin diqqətini qlobal çağırışlara yönəltmək, dialoq və əməkdaşlıq imkanlarını genişləndirmək baxımından əhəmiyyəti qeyd edilib.

Azərbaycanın zəngin mədəni və dini irsinin qorunması, işğaldan azad edilmiş ərazilərdə mədəni və dini abidələrin bərpası istiqamətində görülən işlər barədə qarşı tərəfə məlumat verilib. ICESCO-nun işğaldan azad edilmiş ərazilərə həyata keçirdiyi missiyanın, habelə Şuşa şəhərinin 2024-cü il üçün İslam Dünyasının Mədəniyyət Paytaxtı elan edilməsinin tarixi əhəmiyyəti xatırlanıb.

Nazir, həmçinin 2027-ci ildə ölkəmizin ev sahibliyi edəcəyi İslam Əməkdaşlıq Təşkilatının Sammitinə və bu çərçivədə keçiriləcək tədbirlərə hazırlıq məsələləri, ölkəmizin İƏT sədrliyinin prioritetləri barədə qarşı tərəfə məlumat verib.

ICESCO-nun Baş direktoru Səlim bin Məhəmməd əl-Malik təşkilatın Azərbaycanla əməkdaşlığın daha da inkişaf etdirilməsində maraqlı olduğunu bildirib və ölkəmizin mədəniyyətlərarası dialoqun təşviqinə verdiyi töhfələri qeyd edib.

Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.

Ağdam memorial kompleksinin bərpasından sonra tarixi irsinin beynəlxalq səviyyədə tanınması və turizm marşrutuna daxil edilməsi istiqamətində addımlardan biri bu gün atıldı. Tədbirdən öncə ICESCO-nun Baş direktoru Səlim bin Məhəmməd əl-Malik tərəfindən bərpadan sonra açılmış Ağdam “İmarət” Tarix-Memarlıq Muzey Kompleksinə xüsusi sertifikat verildi.

AZƏRTAC xəbər verir ki, bunu Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov jurnalistlərə açıqlamasında deyib.

Onun sözlərinə görə, bu, Azərbaycan dövlətinin işğaldan azad olunmuş ərazilərdə apardığı bərpaya göstərdiyi xüsusi diqqətin təzahürüdür və bu yerlərin beynəlxalq səviyyədə tanınması deməkdir.

Xüsusi nümayəndə qeyd edib ki, təkcə Ağdamda deyil, işğaldan azad olunmuş bütün ərazilərdə - Şuşada, Laçında və digər yerlərdə mədəni irsin bərpasına, dirçəldilməsinə və yenidən həyata qaytarılmasına çox həssaslıqla yanaşılır. Bunun üçün ən qabaqcıl mütəxəssislər cəlb olunur.

Emin Hüseynov diqqətə çatdırıb ki, Ağdamdakı “İmarət” Kompleksi artıq qoruqdur və ora çoxsaylı turistlər gəlir. Sözsüz ki, yaradılması nəzərdə tutulan digər mədəniyyət layihələri də belə olacaq.

Gənclər və idman naziri Fərid Qayıbov UNESCO-nun İdmanda Dopinqə Qarşı Beynəlxalq Konvensiyasına Tərəf Dövlətlərin Onuncu Konfransı (COP10) Bürosunun sədri kimi Hindistana səfər edib.

Gənclər və İdman Nazirliyindən AZƏRTAC-a bildirilib ki, səfər zamanı nazir Hindistanın Yeni Dehli şəhərində keçirilən COP10 Bürosunun üçüncü iclasına sədrlik edib və COP10 Təsdiq Komitəsinin IV rəsmi iclasında iştirak edib.

İclas çərçivəsində Fərid Qayıbov Hindistanın gənclər işləri, idman, əmək və məşğulluq naziri Mansuk Mandaviya ilə ikitərəfli görüş keçirib. Görüş zamanı iki ölkə arasında gənclər və idman sahələrində əməkdaşlıq perspektivləri müzakirə olunub.

Oktyabrın 27-də Azərbaycanın xarici işlər naziri Ceyhun Bayramov BMT-nin Terrorçuluqla Mübarizə İdarəsi (UNOCT) üzrə Baş katibin müavini vəzifəsini icra edən Aleksandr Zuyevlə görüşüb.

Xarici İşlər Nazirliyinin Mətbuat xidməti idarəsindən AZƏRTAC-a verilən məlumata görə, görüş zamanı Azərbaycan ilə BMT-nin Terrorçuluqla Mübarizə İdarəsi arasında əməkdaşlığın cari vəziyyəti və perspektivləri müzakirə olunub.

Görüşdə, həmçinin Bakıda keçirilən VII Ümumdünya Mədəniyyətlərarası Dialoq Forumunun əhəmiyyəti qeyd olunub. Forumun müasir dövrün qlobal çağırışlarının müzakirəsi, mədəniyyətlər və dinlər arasında qarşılıqlı anlaşmanın təşviqi, eləcə də sülh və təhlükəsizliyin möhkəmləndirilməsi baxımından əhəmiyyətli beynəlxalq platforma olduğu vurğulanıb.

Bununla yanaşı, ölkəmizdə keçirilən Bakı Təhlükəsizlik Forumunun beynəlxalq terrorçuluqla mübarizə sahəsində əməkdaşlığın inkişaf etdirilməsi, təhlükəsizlik sahəsində etimadın möhkəmləndirilməsi, təcrübə və məlumat mübadiləsinin genişləndirilməsi baxımından əhəmiyyəti diqqətə çatdırılıb.

Görüş zamanı BMT-nin Terrorçuluqla Mübarizə İdarəsinin ölkəmizdə təmsilçiliyinin genişləndirilməsi planları ətrafında da fikir mübadiləsi aparılıb. Bunun Azərbaycan ilə UNOCT arasında əməkdaşlığın institusional əsaslarının möhkəmləndirilməsinə, terrorçuluqla mübarizə sahəsində beynəlxalq təşəbbüslərin dəstəklənməsinə töhfə verə biləcəyi vurğulanıb.

Azərbaycanın beynəlxalq terrorçuluğa qarşı mübarizəyə verdiyi töhfələr, bu sahədə BMT və onun ixtisaslaşmış qurumları ilə əməkdaşlığın inkişaf etdirilməsinə verdiyi önəm diqqətə çatdırılıb.

Aleksandr Zuyev BMT-nin Terrorçuluqla Mübarizə İdarəsinin fəaliyyəti, terrorçuluğa qarşı qlobal səylərin əlaqələndirilməsi və üzv dövlətlərlə əməkdaşlığın əsas istiqamətləri barədə məlumat verib.

Görüşdə, həmçinin qarşılıqlı maraq doğuran digər məsələlər müzakirə olunub.

Azərbaycanın yunan-Roma güləşçisi Nihat Məmmədli Qazaxıstanın paytaxtı Astanada keçirilən dünya çempionatında gümüş medal qazanıb.

AZƏRTAC-ın müxbiri xəbər verir ki, 63 kiloqram çəki dərəcəsində mübarizə aparan idmançı final görüşündə Ermənistan təmsilçisi Karen Aslanyana 4:8 hesabı ilə məğlub olub.

Beləliklə, Nihat Məmmədli dünya çempionatını ikinci pillədə başa vurub.

Bu gün, həmçinin Azərbaycanın digər yunan-Roma güləşçisi Həsrət Cəfərov (67 kiloqram) bürünc medal görüşünə çıxacaq.

Qeyd edək ki, hazırda Azərbaycan millisinin hesabında 2 qızıl medal var. Yunan-Roma güləşçiləri Eldəniz Əzizli (55 kiloqram) və Sənan Süleymanov (77 kiloqram) dünya çempionu olublar.

Mundiala noyabrın 1-də yekun vurulacaq.

Cənubi Afrika dünyanın ən zəngin qayaüstü sənət nümunələrinə malik bölgələrindən biridir. Burada qaçan antilop sürülərini, rəqs edən insanları və buynuzlu, qanadlı insanabənzər varlıqları təsvir edən qədim rəsmlər tapılıb. Lakin indiyədək bu təsvirlər arasında trafaret üsulu ilə yaradılmış nümunələr məlum deyildi.

Vits Universitetindən qayaüstü sənət üzrə tədqiqatçı Devid Pirs və Kembric Universitetinin arxeoloqu Kiya Conson Cənubi Afrikanın Mpumalanqa əyalətindəki La Roşel qaya sığınacağında belə təsvirlər aşkarlayıblar. “South African Archaeological Bulletin” jurnalında dərc olunan araşdırmaya görə, təxminən 9 santimetr hündürlüyündə olan insanabənzər fiqurlar əvvəlcədən hazırlanmış trafaret vasitəsilə yaradılıb.

Bu üsulda rəssam əvvəlcə ayrıca qəlib hazırlayır, onu qayanın səthinə tutaraq üzərinə boya üfürür və ya sıçradır. Qəlibin arı mumundan, gildən və ya ağacdan hazırlanmış olması mümkündür. Hazır əşyaların trafaret kimi istifadəsi dünyada məlum olsa da, xüsusi olaraq bu məqsədlə hazırlanmış qəliblər olduqca nadirdir.

Maraqlıdır ki, qaya sığınacağı 1995-ci və 2020-ci illərdə tədqiq edilsə də, qeyri-adi təsvirlər uzun müddət diqqətdən kənarda qalıb. Tədqiqatçılar onların kim tərəfindən, nə vaxt və hansı məqsədlə yaradıldığını hələ müəyyənləşdirə bilməyiblər. Alimlər həmçinin yağış və küləyin təsiri ilə oxşar rəsmlərin zamanla silinmiş ola biləcəyini istisna etmirlər.

Yeni tapıntı Cənubi Afrikanın qədim sənət ənənələrinin düşünüldüyündən daha müxtəlif və mürəkkəb olduğunu göstərir. Tədqiqatçılar gələcək araşdırmalar zamanı bölgədə başqa trafaret təsvirlərinin də aşkarlana biləcəyini düşünürlər.

Ülkər XASPOLADOVA,

“Azərbaycan”

ABŞ-nin texnologiya nəhəngi “Microsoft” dünya üzrə bəzi əməkdaşlarına şirkətdən könüllü ayrılmaları müqabilində maliyyə dəstəyi təklif edən proqram hazırlayıb. 

Anadolu Agentliyinin məlumatına görə, təklif ABŞ, Kanada, Hindistan və Böyük Britaniyadakı müəyyən komandalarda fəaliyyət göstərən təxminən 60 min əməkdaşı əhatə edir. Proqramın məqsədi işçilərə karyeralarının növbəti mərhələsini formalaşdırmaq üçün imkan yaradacağı qeyd edilib. Könüllülük əsasında həyata keçirilən proqrama uyğun gələn şəxslərə maliyyə dəstəyi və karyera planlaşdırma resursları təqdim olunacaq. Uyğun əməkdaşlara şəxsi təklif bağlantısının e-poçt vasitəsilə göndəriləcəyi bildirilib. Bu addım süni intellekt dövrünün təsirləri səbəbindən şirkətin fəaliyyət sahələrini yenidən formalaşdırmaq və xərcləri azaltmaq səylərinin bir hissəsidir.

Xatırladaq ki, Microsoft iyul ayında da təxminən 4800 vəzifəni ləğv etmiş, həmçinin bu il bəzi əməkdaşlarına erkən təqaüd seçimi təqdim etmişdi.

Təhminə VERDİYEVA,

“Azərbaycan”

Oktyabrın 27-də Heydər Əliyev Fondunun vitse-prezidenti Leyla Əliyeva Müsəlman Ağsaqqalları Şurasının Baş katibi Məhəmməd Əbdülsalam ilə görüşüb.

AZƏRTAC xəbər verir ki, söhbət zamanı ölkəmizin İslam həmrəyliyinin möhkəmləndirilməsinə verdiyi töhfələr yüksək qiymətləndirilib. Azərbaycan Ağsaqqallar Şurası ilə Müsəlman Ağsaqqalları Şurası arasında əməkdaşlığın daha da inkişaf etdirilməsi ilə bağlı məsələlərə toxunulub.

Görüşdə Azərbaycanın qlobal müstəvidə İslam mədəniyyətini və onun fundamental dəyərlərini fəal şəkildə təbliğ etdiyi, bu sahəyə davamlı töhfələr verdiyi diqqətə çatdırılıb.

Vurğulanıb ki, 2027-ci ildə ölkəmizdə keçiriləcək İslam Əməkdaşlıq Təşkilatının Sammitində mühüm məsələlər müzakirə olunacaq.

Rusiya Prezidenti Vladimir Putin təbii qaz ixrac edən ölkələrlə qlobal enerji bazarının sabitliyi, risklərin qiymətləndirilməsi və enerji təchizatına yanaşmaların əlaqələndirilməsi ilə bağlı məsləhətləşmələrin genişləndirilməsini təklif edib.

AZƏRTAC xəbər verir ki, o, bu açıqlamanı Moskvada keçirilən Qaz İxrac Edən Ölkələr Forumunun (GECF) dövlət və hökumət başçılarının 8-ci sammitində çıxışı zamanı verib.

Putin, həmçinin enerji sektorunda beynəlxalq əməkdaşlığın gücləndirilməsinin vacibliyini vurğulayaraq təbii qaz nəqli marşrutlarının optimallaşdırılması yollarını birgə araşdırmağı təklif edib.

Qlobal qaz bazarının perspektivlərindən danışan Rusiya Prezidenti qeyd edib ki, dünyada enerji sektorunda təbii qazın rolu durmadan artacaq. Onun sözlərinə görə, bu enerji resursu hazırda qlobal enerji balansının təxminən dörddəbirini təşkil edir.

Rusiya lideri bildirib ki, ötən il qlobal təbii qaz istehlakı 1,2 faiz artaraq 4,2 trilyon kubmetrə çatıb. Proqnozlara görə, gələcəkdə tələbat ildə 5,5 trilyon kubmetrə qədər arta bilər.

Vladimir Putin vurğulayıb: “Bu səbəbdən təbii qazın qlobal enerji, sənaye və kənd təsərrüfatı sektorunun, eləcə də beynəlxalq ticarət sisteminin sütunu kimi rolu durmadan güclənəcək”.

Rusiya Prezidenti, həmçinin üzvlərinin dünya təbii qaz ehtiyatlarının təxminən 70 faizinə sahib olduğu və qlobal qaz ixracının təxminən 40 faizini təşkil etdiyi GECF-in əhəmiyyətini qeyd edib.

Vladimir Putin qiymətləndirmə vəziyyəti ilə bağlı qlobal qaz qiymətlərinin kəskin şəkildə artdığını, lakin azalmanın da istisna edilmədiyini qeyd edib.

Bundan əlavə, Rusiya lideri Moskva və Vaşinqtonun enerji ehtiyatlarının işlənməsi də daxil olmaqla Arktikada birgə iş imkanlarının araşdırıldığını açıqlayıb.

Azərbaycan 2015-ci ildən GECF-də müşahidəçi qismində iştirak edir.

Azərbaycan Respublikasının Baş naziri Əli Əsədov oktyabrın 27-də İslam Əməkdaşlıq Təşkilatının (İƏT) Baş katibi İsmayıl Ould Şeyx Əhməd ilə görüşüb.

Nazirlər Kabinetindən AZƏRTAC-a bildirilib ki, görüşdə Bakıda keçirilən VII Ümumdünya Mədəniyyətlərarası Dialoq Forumunun mədəniyyətlər arasında dialoqun təşviqi, qarşılıqlı etimadın və anlaşmanın möhkəmləndirilməsi baxımından əhəmiyyəti vurğulanıb, İƏT Baş katibinin tədbirdə iştirakı yüksək qiymətləndirilib.

Eyni zamanda, İslam Əməkdaşlıq Təşkilatına üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü Yüksəksəviyyəli Bakı Görüşü korrupsiyaya qarşı mübarizədə əməkdaşlığın genişləndirilməsi və qabaqcıl təcrübə mübadiləsi üçün mühüm platforma kimi dəyərləndirilib.

Azərbaycanın İƏT ilə əməkdaşlığa xüsusi əhəmiyyət verdiyi vurğulanıb, təşkilata üzv olduğu 35 illik dövr ərzində ölkəmizin İƏT-in beynəlxalq nüfuzunun və institusional imkanlarının artırılmasına mühüm töhfələr verdiyi qeyd edilib.

İƏT-in Azərbaycanın suverenliyinə və ərazi bütövlüyünə ardıcıl və prinsipial dəstəyi yüksək qiymətləndirilib.

Görüşdə Azərbaycanın 2027-ci ildə İslam Zirvə Konfransının 16-cı sessiyasına ev sahibliyi və İƏT-ə sədrliyi ilə bağlı məsələlərə toxunulub, ölkəmizlə təşkilat arasında əməkdaşlığın daha da genişləndirilməsi perspektivləri müzakirə olunub.

Heydər Əliyev Fondunun vitse-prezidenti Leyla Əliyeva oktyabrın 27-də Dünya Turizm Təşkilatının Baş katibi xanım Şeyxa Əl Nuveysi ilə görüşüb.

AZƏRTAC xəbər verir ki, qonaq Bakının möhtəşəm memarlığı və Zəfər muzeyi ilə bağlı təəssüratlarını bölüşüb.

Söhbət zamanı Azərbaycan ilə Dünya Turizm Təşkilatı arasında mövcud səmərəli əməkdaşlığın səviyyəsi müsbət dəyərləndirilib.

Həmçinin ölkəmizdə turizm sektorunun inkişafına dövlət səviyyəsində göstərilən xüsusi diqqət və qayğı qeyd olunub, paytaxtla yanaşı, regionlarda da müasir turizm infrastrukturunun yaradıldığı bildirilib.

Görüşdə qarşılıqlı maraq doğuran məsələlər ətrafında da fikir mübadiləsi aparılıb.

Oktyabrın 28-i əsasən şərq rayonlarında, 29-u və 30-u isə bəzi yerlərdə fasilələrlə yağış yağacağı gözlənilir.

AZƏRTAC xəbər verir ki, bu barədə Milli Hidrometeorologiya Xidmətinin yaydığı xəbərdarlıqda bildirilib.

Qeyd edilib ki, ayrı-ayrı yerlərdə yağışın qısamüddətli leysan xarakterli intensiv olacağı, şimşək çaxacağı, dolu düşəcəyi, yüksək dağlıq ərazilərdə qar yağacağı ehtimalı var.

Çaylarda sululuğun artacağı, bəzi dağ çaylarından qısamüddətli daşqın və sel keçəcəyi ehtimal edilir.

Xorvatiya və Azərbaycan eyni ildə müstəqillik qazanıblar. Hər iki ölkənin Dubrovnik və Qarabağ bölgələrinin başına gələn hadisələr də bənzərdir.

AZƏRTAC xəbər verir ki, bunu Xorvatiyanın sabiq Prezidenti və Nizami Gəncəvi Beynəlxalq Mərkəzinin üzvü İvo Yosipoviç VII Ümumdünya Mədəniyyətlərarası Dialoq Forumu çərçivəsində keçirilən “Mədəniyyət mərkəzdə: “SECURE” ilə ortaq gələcəyə etibarlı yollar” mövzusunda plenar iclasda deyib.

O qeyd edib ki, müharibələr səbəbindən dağıntlara məruz qalan hər iki bölgə hazırda yenidən çiçəklənir.

“Xorvatiyada bərpa prosesinin uğurla həyata keçirilməsi üçün bir sıra mühüm tədbirlər gördük. İlk növbədə, mədəni irsin dəyərini qəbul etdik. Daha sonra Konstitusiyadan başlayaraq konkret qanunvericilik aktlarınadək geniş hüquqi baza formalaşdırdıq”,-deyə sabiq Prezident vurğulayıb.

İvo Yosipoviç Forum iştirakçılarını hər iki bölgəni ziyarət edərək, oradakı inkişafla tanış olmağa çağırıb.

Prezident İlham Əliyevin forumda çıxışı Azərbaycanın milli həmrəyliyini, ideoloji təhlükəsizliyini və artan beynəlxalq nüfuzunu bir daha dünyaya nümayiş etdirdi 

Dünyada münaqişələrin, qütbləşmənin və dini qarşıdurmaların dərinləşdiyi bir dövrdə mədəniyyətlərarası dialoqun əhəmiyyəti daha çox ön plana çıxır. Məhz belə bir şəraitdə Azərbaycanın evsahibliyi etdiyi Ümumdünya Mədəniyyətlərarası Dialoq Forumu müxtəlif xalqların, dinlərin və sivilizasiyaların nümayəndələrini bir araya gətirən beynəlxalq platforma kimi xüsusi əhəmiyyət daşıyır. Azərbaycanın bu sahədəki təcrübəsi əsrlər boyu formalaşmış tolerantlıq ənənələrinə, dini və mədəni müxtəlifliyə hörmətə əsaslanır. Ölkəmizdə müxtəlif dini icmaların dinc şəraitdə birgə yaşaması multikultural dəyərlərin cəmiyyət həyatındakı rolunu nümayiş etdirir. Dünyəvi dövlət quruluşu və müxtəlif mədəniyyətlərə açıq münasibət Azərbaycanın beynəlxalq dialoq təşəbbüslərinə də möhkəm zəmin yaradır. 

2008-ci ildən əsası qoyulan “Bakı Prosesi” və onun mühüm tərkib hissəsi olan Ümumdünya Mədəniyyətlərarası Dialoq Forumu Azərbaycanın qlobal miqyasda dialoq mədəniyyətinin təşviqinə verdiyi töhfənin göstəricisidir. VII Ümumdünya Mədəniyyətlərarası Dialoq Forumunda çıxış edən Prezident İlham Əliyev bu təşəbbüsün beynəlxalq aləmdəki yüksək statusunu xüsusi vurğulayıb: “Ötən 15 il ərzində Ümumdünya Mədəniyyətlərarası Dialoq Forumu mədəniyyətlərarası münasibətləri və digər əlaqədar məsələləri həll etmək üçün olduqca səmərəli və əhatəli platformalardan birinə çevrilmişdir”.

Azərbaycanın bu istiqamətdə formalaşdırdığı beynəlxalq platforma göstərir ki, dialoq mövcud problemlərin həlli üçün zəruri olan anlaşma mühiti yaradır. Bakı Forumuna qatılan nümayəndələr də birmənalı bəyan edirlər ki, mədəniyyətlər və sivilizasiyalararası dialoq hər zamankından daha zəruridir. Dövlətimizin başçısı çıxışında ölkəmizin bu tarixi missiyasını da diqqətə çatdırıb: “Əlbəttə, mədəniyyətlərarası və dinlərarası münasibətlərə aid məsələlər gündəliyimizdə birinci yer tutur. Azərbaycan tarixən hər zaman mədəniyyətlərin çox olduğu ölkə olub. Biz Avropa ilə Asiya arasında yerləşirik. Əsrlər boyu Azərbaycan Asiya ilə Avropa arasında mədəniyyət körpüsü olub. Multikulturalizm ənənələri, dini və etnik dözümlülük xalqımızın əsrlər boyu yaşatdığı meyarlar olub və biz onları yüksək dəyərləndiririk”.

Şərqlə Qərbin kəsişməsində yerləşən ölkəmiz əsrlərdən bəri fərqli inancların dinc yanaşı yaşadığı unikal bir məkandır. Prezident İlham Əliyev xalqımızın malik olduğu bu zəngin dəyərlər sisteminə toxunaraq xüsusi qeyd edib: “Multikulturalizm, dini və etnik tolerantlıq ənənələri bizim xalqlarımızın əsrlər boyu daşıdığı bir irsdir və biz bunu yüksək dəyərləndiririk”. Məhz bu zəngin irs və mənəvi təməl müasir Azərbaycan cəmiyyətində sarsılmaz həmrəyliyin və milli ideologiyamız ətrafında sıx birliyin formalaşmasını şərtləndirir. Ölkəmizdəki daxili sabitlik, xalq-hakimiyyət birliyi və etnik-dini baxımdan mövcud olan harmoniya Azərbaycanın inkişafının əsas hərəkətverici qüvvəsidir. Dövlətimizin başçısı vurğulayıb ki, uğurlu inkişafın, Azərbaycanın sabit inkişafının əsas səbəblərindən biri bizim cəmiyyətdə olan ahəngdarlıqdır: “Bütün etnik qrupların, dinlərin nümayəndələrinin Konstitusiyamıza uyğun olaraq, nəinki bərabər hüquqları var, onlar, həmçinin bir ailə kimi yaşayırlar”.

Milli həmrəylik və daxili ahəngdarlıq həm də ölkəmizin ideoloji təhlükəsizliyinin zəmanətidir. Azərbaycanda daxili risklərin olmaması xalqımızın milli ideologiya ətrafında birliyindən qaynaqlanır. Ölkəmiz üçün potensial təhlükələr daxildən deyil, məhz xaricdən formalaşır və bu təhlükələr daha çox ideoloji xarakter daşıyır. Dövlətimiz ideoloji təhlükəsizliyi fiziki təhlükəsizlik qədər vacib hesab edir. Əgər yaxın vaxtlara qədər suverenlik və təhlükəsizlik üçün əsas təhdid fiziki müdaxilə idisə, müasir dövrdə ideoloji müdaxilələr, xaricdən idarə olunan təbliğat maşınları da ciddi təhlükə kəsb etməyə başlayıb. Prezident İlham Əliyev də bu məqama diqqət yönəldib: “İdeoloji risklər isə fiziki risklər qədər təhlükəlidir. Buna görə biz hər zaman ayıq-sayıq olmalıyıq, özünəməxsusluğumuzun, dövlətçiliyimizin, müstəqilliyimizin və həyat tərzimizin qorunmasına çox sadiq olmalıyıq”.  

Xüsusilə müstəqil xarici siyasət yürüdən, öz milli maraqlarını qətiyyətlə qoruyan ölkələrin daxili işlərinə qarışmaq cəhdləri qətiyyən yolverilməzdir. Heç bir kənar güc və qüvvə Azərbaycana dərs keçə, yol göstərə, mühazirə oxuya bilməz. Başqa ölkələrə necə yaşamaq, hansı siyasi və ya sosial yolu seçmək barədə mühazirə oxumağa çalışanlar ilk növbədə özlərinə nəzər salmalı, daxili ziddiyyətlərini və problemlərini həll etməlidirlər. Qərbdə və digər mərkəzlərdə boy göstərən ikili standartlar, başqalarını mühakimə etmək cəhdləri riyakarlıqdan başqa bir şey deyil. Dövlətimizin başçısı bəzi xarici dairələrin məqsədli ideoloji hücumlarına və daxili işlərə qarışma cəhdlərinə də kəskin cavab verib: “İkili standart həm də kiminsə sənə necə yaşamağı öyrətmək istəməsidir. Halbuki bunu etməzdən əvvəl güzgüyə baxıb özündən soruşmalısan: sənin kiməsə ağıl öyrətməyə, müstəqil bir ölkəyə necə yaşamalı olduğunu, nə etməli və nə etməməli olduğunu diktə etməyə mənəvi haqqın varmı?”. 

Azərbaycan öz suverenliyini və ərazi bütövlüyünü bərpa edərək regional və qlobal miqyasda yeni reallıqlar yaradıb. Vətən müharibəsində böyük Zəfər qazanan dövlətimiz qalib gəldikdən sonra humanist və sülhpərvər mövqe nümayiş etdirib. Ölkəmizin ortaya qoyduğu bu presedent qlobal münaqişələrin tənzimlənməsi üçün nümunəvi modeldir. Prezident İlham Əliyev çıxışı zamanı bu məqamı xüsusi qeyd edib: “Biz müharibədən qalib çıxdıq və bizim mübarizəmiz düzgün idi. Düşmən kapitulyasiya etdikdən sonra biz bundan o tərəfə getmədik, dayandıq və sülh təklif etdik”. Bu təcrübəyə nəzər salınmalı olduğunu və müharibə tərəflərinin bunu tədqiq etməli olduqlarını deyən dövlətimizin başçısı vurğulayıb ki, bu nümunə bəzi münaqişələrin aradan qaldırılmasına da xidmət edə bilər. 

Azərbaycan bu gün yalnız regional deyil, qlobal enerji, nəqliyyat-logistika və diplomatik təşəbbüslərin mərkəzində durur. Ölkəmiz münaqişələrlə əhatə olunmuş mürəkkəb coğrafiyada sabitlik adası kimi çıxış edir. Prezident İlham Əliyev Azərbaycanın qlobal rolunun artmasını və beynəlxalq nüfuzunu bu cür diqqətə çatdırıb: “Bu gün Azərbaycanın xarici siyasətinə, iqtisadi göstəricilərinə, qlobal enerji və nəqliyyat bazarlarındakı roluna nəzər salsanız, ölkəmizin rolunun son dərəcə sürətlə artdığını görərsiniz. Bir çox hallarda Azərbaycan qeyri-sabit regionda sabitliyin dayağı kimi qəbul edilir”. 

Azərbaycanın beynəlxalq müstəvidə artan çəkisi və nüfuzu onun xarici siyasətində qazandığı tarixi uğurlarla bilavasitə bağlıdır. Ölkəmizin müstəqil və milli maraqlara söykənən diplomatik xətti dünyada təkcə regional güc kimi deyil, həm də qlobal miqyasda etibarlı tərəfdaş kimi qəbul olunmasını təmin edib. Bu uğurlu diplomatik strategiyanın nəticəsi olaraq Azərbaycan qlobal güc mərkəzləri ilə münasibətlərini strateji tərəfdaşlıq səviyyəsinə qaldırmağa müvəffəq olub. Prezident İlham Əliyev bu böyük diplomatik nailiyyəti diqqətə çatdıraraq vurğulayıb: “2025-ci ildə Azərbaycan və Çin arasında hərtərəfli strateji tərəfdaşlıq Bəyannaməsi imzalanmışdır. Çinlə bəyannamə aprel ayında imzalanmışdır, eyni zamanda, 2025-ci ilin avqustunda Amerika Birləşmiş Ştatları ilə Strateji Xartiya imzalanmışdır. Beləliklə Azərbaycanın iki super güclə strateji tərəfdaşlıq formatı var. Avropa İttifaqının 10 üzv dövləti ilə bizim strateji tərəfdaşlıq bəyannaməmiz və ya sazişimiz var”. Bu həqiqətdir ki, qlobal güclərlə strateji tərəfdaşlıq münasibətləri qurmaq diplomatik uğurdur. 

Azərbaycanın yürütdüyü müstəqil və prinsipial siyasət qlobal güc mərkəzləri tərəfindən yüksək qiymətləndirilir, ölkəmizin beynəlxalq arenadakı mövqeyini daha da möhkəmləndirir. Bütün bunlar bir daha göstərir ki, güclü ideoloji təhlükəsizliyi, milli həmrəyliyi və müstəqil xarici siyasəti ilə seçilən Azərbaycan qlobal sülhə, dialoqa və əməkdaşlığa töhfə verən nüfuzlu dövlətdir.

İsmayıl QOCAYEV, 

“Azərbaycan”

Azərbaycan rəhbərliyi və Mədəniyyət Nazirliyi “Mədəniyyət naminə sülh” adlı ilk təşəbbüsü irəli sürüb. Bu, innovativ bir konsepsiya idi.

AZƏRTAC xəbər verir ki, bunu BMT Baş katibinin müavini, Sivilizasiyalar Alyansının ali nümayəndəsi, BMT-nin İslamofobiya ilə mübarizə üzrə xüsusi elçisi Migel Anxel Moratinos VII Ümumdünya Mədəniyyətlərarası Dialoq Forumu çərçivəsində keçirilən “Mədəniyyət mərkəzdə: “SECURE” ilə ortaq gələcəyə etibarlı yollar” mövzusunda plenar iclasda deyib.

O bildirib ki, BMT sistemi baxımından bu, bir növ çağırış olmasa da, böyük bir yenilik idi. Çünki BMT və UNESCO çox gözəl bir konsepsiya yaratmışdılar - “Sülh üçün mədəniyyət”.

“Müharibənin qarşısını almaq üçün sülh mədəniyyəti yaratmaq lazımdır”, - deyə Migel Anxel Moratinos əlavə edib.

NASA “Swift” kosmik teleskopunun missiyasını onun orbitini yüksəltməklə xilas etmək cəhdi uğursuz olduqdan sonra rəsmən başa çatdırıb. Arizona ştatında yerləşən “Katalyst Space Technologies” şirkətinin hazırladığı “LINK” adlı kosmik aparat teleskopu tutaraq daha yüksək orbitə qaldırmalı idi. Lakin aparatın hərəkət sistemində yaranan nasazlıqlar bu əməliyyata mane olub.

2004-cü ilin noyabrında orbitə buraxılan “Swift”in əsas vəzifəsi kainatdakı ən güclü partlayışlardan sayılan qamma-şüa partlayışlarını araşdırmaq idi. İki il fəaliyyət göstərməsi planlaşdırılan teleskop iyirmi ildən artıq müddətdə mühüm elmi kəşflərə töhfə verib.

NASA 2025-ci ildə teleskopu xilas etmək üçün “Katalyst” şirkəti ilə 30 milyon dollarlıq müqavilə bağlamışdı. İyulun 3-də orbitə buraxılan “LINK” teleskopa 12-15 kilometrədək yaxınlaşaraq onun fotosunu çəksə də, nasazlıqlar səbəbindən xilasetmə əməliyyatını tamamlaya bilməyib. NASA-nın oktyabrın 23-də yaydığı məlumata görə, “Swift”in yaxın bir neçə həftə ərzində Yer atmosferinə daxil olması gözlənilir.

Ülkər XASPOLADOVA,

“Azərbaycan”

Azərbaycan Respublikasının Prezidenti İlham Əliyev, birinci xanım Mehriban Əliyeva, qızları Leyla Əliyeva və Arzu Əliyeva oktyabrın 27-də Azərbaycan Milli İncəsənət Muzeyində görkəmli rəssam, Azərbaycan Rəssamlar İttifaqının sədri, Xalq rəssamı Fərhad Xəlilovun 80 illik yubileyinə həsr edilmiş “Mənim Abşeronum: Üstə gəl” adlı retrospektiv sərgi ilə tanış olublar.

AZƏRTAC xəbər verir ki, Mədəniyyət Nazirliyi, Azərbaycan Milli İncəsənət Muzeyi və Azərbaycan Rəssamlar İttifaqının birgə təşkilatçılığı ilə keçirilən sərgidə Xalq rəssamının şəxsi kolleksiyasından seçilmiş, 1960-cı illərdən bu günədək yaratdığı 90-dan çox əsər, o cümlədən monumental rəngkarlıq tablolarından kiçikformatlı qrafik işlərədək müxtəlif sənət nümunələri nümayiş olunur.

Azərbaycan təsviri sənətinin görkəmli nümayəndələrindən olan Fərhad Xəlilov zəngin yaradıcılığı, özünəməxsus bədii üslubu və fərqli dəst-xəti ilə seçilir. Rəssam dəzgah rəngkarlığının müxtəlif janrlarında çalışaraq realizmdən avanqard və mücərrəd sənətə qədər fərqli bədii yanaşmaları yaradıcılığında birləşdirib. Onun əsərlərində bədii ifadə vasitələrinin rəngarəngliyi, rəng və kolorit həllinin özünəməxsusluğu, həmçinin təsvir olunan məkanın emosional təsir gücü diqqəti cəlb edir.

Sənətkarın yaradıcılığında mənzərə janrı, xüsusilə də Abşeron mövzusu mühüm yer tutur. Rəssamın şəxsi müşahidələri və təəssüratları əsasında yaratdığı əsərlərdə Abşeronun təbiəti, sahil mənzərələri, kəndləri, dəyişkən hava şəraiti və özünəməxsus ab-havası fərdi bədii interpretasiya ilə rəng, işıq və kolorit vasitəsilə öz ifadəsini tapıb.

Abşeron onun yaradıcılığında yalnız təsvir obyekti deyil, həm də rəssamın duyğularını, düşüncələrini və dünyaya baxışını ifadə edən əsas mövzulardan biridir. Rəssamın əsərlərində məkanın vizual xüsusiyyətləri ilə yanaşı, onun doğurduğu emosional hisslər də var.

Xalq rəssamının yaradıcılığında rəngkarlıqla yanaşı, qrafika da xüsusi yer tutur. Müxtəlif formatlarda və fərqli bədii yanaşmalarla ərsəyə gətirilmiş qrafik əsərlər sənətkarın yaradıcılıq diapazonunun genişliyini, forma və kompozisiya axtarışlarını nümayiş etdirir. Sərgi Abşeron mövzusunun rəssamın yaradıcılığında zamanla necə inkişaf etdiyini və onun fərdi sənət dilində kəsb etdiyi mənanı üzə çıxarır.