Tarixdə elə şəxsiyyətlər olur ki, onların fəaliyyəti yalnız müəyyən bir dövrü deyil, bütöv bir xalqın gələcəyini müəyyən edir. Heydər Əliyev məhz belə dövlət xadimi idi. Danılmaz faktdır ki, Azərbaycanın müasir dövlətçiliyi məhz Heydər Əliyevin adı ilə qırılmaz şəkildə bağlıdır.
Heydər Əliyev hələ sovetlər dönəmində SSRİ kimi nəhəng bir dövlətin ali rəhbərliyində, Siyasi Büro üzvü və Nazirlər Soveti sədrinin birinci müavini kimi yüksək post tutmaqla həm Azərbaycan Respublikasının potensialını ittifaq miqyasında reallaşdırmış, həm də respublikanın irəliyə doğru inkişaf etməsi üçün əlindən gələni əsirgəməmişdir.
Tarixi faktlar göstərir ki, Heydər Əliyevin siyasi nüfuzu həm də regionda sabitliyin ən böyük qarantı olub. Heydər Əliyev hakimiyyətdə olduğu dövrdə erməni separatizmi baş qaldıra bilmirdi, belə təhdidlərin qarşısı qətiyyətlə alınırdı. Onun gedişi isə regionda geosiyasi boşluğun yaranmasına və mürəkkəb münaqişələrin başlanmasına rəvac verdi.
1993-cü ildə Heydər Əliyevin xalqın təkidli tələbi ilə hakimiyyətə qayıdışı Azərbaycanı dövlət kimi süqut etmək təhlükəsindən xilas etdi. Ölkəmiz xaos və vətəndaş qarşıdurması təhlükəsi ilə üz-üzə qaldığı bir zamanda məhz Heydər Əliyevin qətiyyəti, siyasi iradəsi və müdrikliyi Azərbaycan dövlətini məhv olmaqdan xilas etdi. Onun rəhbərliyi altında qısa müddətdə ölkədə sabitlik bərpa olundu, dövlət institutları möhkəmləndirildi, dövlət quruculuğunda yeni mərhələnin əsası qoyuldu, qanunsuz silahlı birləşmələr zərərsizləşdirildi və paralel olaraq Azərbaycanın gələcək inkişaf strategiyası müəyyənləşdirildi.
1995-ci ildə qəbul edilmiş ilk milli Konstitusiya ilə hakimiyyət bölgüsü və mərkəzləşmiş prezident idarəetmə modeli təsbit olundu, cəmiyyət üçün hüquqi idarəçilik müəyyən edildi. Azərbaycanı iqtisadi qüdrətə yüksəldən "Əsrin müqaviləsi"nin imzalanması ilə isə ölkə qlobal iqtisadi sistemə inteqrasiya olundu. Bununla Azərbaycanın həm maliyyə müstəqilliyi, həm də beynəlxalq təhlükəsizlik təminatı gücləndirildi.
Xarici siyasətdə "geosiyasi balanslaşdırma" kursu seçilərək, Azərbaycan böyük güclərin rəqabət meydanı olaraq deyil, bərabərhüquqlu tərəfdaş kimi təqdim edildi. Beləliklə, Heydər Əliyevin uzaqgörən siyasəti XXI əsrin qüdrətli və suveren Azərbaycan dövlətinin fundamental bazasının yaradılması strategiyasının əsasını qoydu. Mövcud tarixi gerçəkliklər sübut edir ki, Heydər Əliyevin 1993-cü ildə Azərbaycan rəhbərliyinə qayıdışı dövlətçiliyimizin xilası idi.
Bu gün Azərbaycan Respublikasının Prezidenti İlham Əliyev tərəfindən Heydər Əliyevin siyasi kursu uğurla davam etdirilir. Güclü dövlət, qüdrətli ordu, qalib Azərbaycan reallığı Heydər Əliyev ideyalarının təntənəsidir. Xüsusilə də ərazi bütövlüyümüzün və suverenliyimizin tam bərpa olunması Heydər Əliyevin xalqımıza miras qoyduğu dövlətçilik fəlsəfəsinin ən böyük zəfərlərindən biridir.
Heydər Əliyev yalnız böyük siyasətçi deyildi, həm də milli-mənəvi dəyərlərimizin qoruyucusu idi. O, azərbaycançılıq məfkurəsini dövlət ideologiyası səviyyəsinə yüksəldərək milli birliyimizin əsas sütununu formalaşdırdı. Təsadüfi deyil ki, Heydər Əliyevin "Mən həmişə fəxr etmişəm, bu gün də fəxr edirəm ki, mən azərbaycanlıyam" kəlamı hər bir vətəndaş üçün qürur və vətənpərvərlik nümunəsinə çevrilib.
Arzuxan ƏLİZADƏ,
Milli Məclisin deputatı,
Azərbaycan Milli İstiqlal Partiyasının sədri
