- Vərəsəlik məsələsi ilə bağlı "ASAN xidmət"də notarius xidmətinə müraciət etdim. Doğum haqqında şəhadətnamələrin əsli ilə sistemdəki məlumatları tutuşduranda dedilər ki, sizin adınızda bir hərf fərqlidir (u-ü), bacınızın da soyadının sonuna uyğunsuz iki hərf yazılıb (Səlimli əvəzinə Səlimlitd gedib), bunları düzəltdirin. Sonra məni başqa xidmətə yönləndirdilər. Bu nə dərəcədə doğrudur? Sənədin əslini təqdim etdiyimiz halda kiminsə məsuliyyətsizliyi ucbatından sistemə hansısa məlumat düzgün yazılmayıbsa, bunun əziyyətini biz niyə çəkməliyik, buna görə əlavə vaxt itirməliyik? Hələ üstəlik kimin sənədində səhv gedibsə, sistemdə düzəliş üçün şəxsən özü müraciət etməlidir. Belədirsə, şəxsiyyət vəsiqələrimizi, doğum haqqında şəhadətnamələrin əslini bizdən nə üçün tələb edirlər? İstəyirəm öyrənim ki, bu məsələlər, əslində, necə yoluna qoyulmalıdır, qanun nə deyir? Axı o sənədlərə birinci dəfə deyildi ki, baxılırdı. Bu il nə dəyişib? 

Rufiz SƏLİMLİ,

Sulutəpə qəsəbəsi

- Azərbaycan Respublikası Ailə Məcəlləsinin 158.2-ci maddəsinə əsasən, doğum haqqında şəhadətnamə vətəndaşlıq vəziyyəti aktı hesab olunur. Sizin halınızda adınızda hərf dəyişikliyi ilə bağlı müraciətinizin təmin edilməsi öhdəliyi vətəndaşlıq vəziyyəti aktlarının qeydiyyatı orqanının üzərindədir. Belə ki, Ailə Məcəlləsinin 161.1-ci maddəsinə görə, vətəndaşlıq vəziyyəti aktı (doğum şəhadətnaməsi) qeydində sizin ərizəniz əsasında dəyişiklik edilməsi kifayət qədər əsaslar olduqda və aidiyyəti şəxslər arasında mübahisə olmadıqda sizin seçdiyiniz yer üzrə vətəndaşlıq vəziyyəti aktlarının qeydiyyatı orqanı tərəfindən həyata keçirilir. Əgər qeydiyyat orqanı hər hansı səbəbdən müvafiq dəyişikliyin edilməsindən imtina edərsə, məsələni mübahisələndirməklə qeydiyyat orqanının üzərinə dəyişiklik edilməsi öhdəliyi qoyulması barədə məhkəmə qərarının çıxarılmasına nail ola bilərsiniz.

Bacınızın şəhadətnaməsindəki yanlışlığa gəldikdə isə həmin sənəddəki çatışmazlıq maraqlarınıza toxunduğu üçün siz "İnzibati icraat haqqında" qanunun 20-ci maddəsini rəhbər tutmaqla qeydiyyat orqanına həmin dəyişikliyin edilməsi ilə bağlı müraciət edə bilərsiniz. Əgər müraciətinizlə dəyişiklik edilməsi təmin olunmasa, eyni qaydada məsələni mübahisələndirməklə qeydiyyat orqanının üzərinə dəyişiklik edilməsi öhdəliyi qoyulması barədə məhkəmə qərarının çıxarılmasına nail ola bilərsiniz.

- 57 yaşındayam. I qrup əlil övladım var, 29 yaşındadır. Ana-bala əlilliyə görə verilən pulla dolanırıq. On il əvvəl 6 ilə yaxın işləmişəm. Pensiyaya nə vaxt çıxacam?

Pakizə BƏKİROVA,

Şirvan şəhəri

- "Əmək pensiyaları haqqında" Azərbaycan Respublikası Qanununun 8.1-ci maddəsinə əsasən, əlilliyi müəyyən edilmiş uşağı olan qadınların yaş həddi 5 il azaldılmaqla yaşa görə əmək pensiyası hüququ vardır. Onu da qeyd edək ki, adıçəkilən qanunun 21.2.4-cü maddəsi ilə sizin sığorta stajınıza orqanizmin funksiyalarının 81-100 faiz pozulmasına görə əlilliyi müəyyən olunmuş  şəxsə qulluq edilməsi müddəti əlavə edilməlidir. 

Həmin qanunun 7-ci maddəsinin "qeyd" hissəsinə əsasən, qadınların yaş həddi 2017-ci il iyulun 1-dən başlayaraq 2027-ci il iyulun 1-dək hər il 6 ay artırıldığı və hazırda 57 yaşında olduğunz üçün sizin əlilliyi müəyyən edilmiş şəxsə qulluq etməyiniz də nəzərə alınaraq, yaşa görə əmək pensiyası hüququnuz 60 yaşınıza çatdıqda yaranacaqdır.

Sualları cavablandırdı:

Fərhad NƏCƏFOV,

Azərbaycan Respublikası Vəkillər Kollegiyasının üzvü