Bakıda İslam Əməkdaşlıq Təşkilatının (İƏT) üzvü olan dövlətlərin Parlament İttifaqı Konfransının 20-ci sessiyası öz işinə başlayıb. 40-dan çox ölkənin parlament nümayəndə heyətinin, 10-dan çox ölkə spikerinin və 10 beynəlxalq təşkilatın nümayəndələrinin qatıldığı sessiyada "Parlament əməkdaşlığı vasitəsilə İƏT üzvü olan dövlətlərdə dayanıqlı və inklüziv iqtisadi inkişafın təşviqi" mövzusunda müzakirələr aparılır. Tədbirdə 400-dən artıq nümayəndə iştirak edir.
Milli Məclisin deputatı Vüqar RƏHİMZADƏ qəzetimizə açıqlamasında deyib ki, İƏT-in üzvü olan dövlətlərin Parlament İttifaqı Konfransının 20-ci sessiyası Azərbaycanın beynəlxalq nüfuzunun və etibarlı tərəfdaş imicinin növbəti təsdiqidir: "Azərbaycanın son illər ardıcıl şəkildə böyük beynəlxalq tədbirlərə evsahibliyi etməsi təsadüfi deyil. Ölkəmiz artan qlobal nüfuzu, siyasi sabitliyi, təhlükəsizlik mühiti, müasir infrastruktur imkanları ilə müxtəlif beynəlxalq platformalar üçün cəlbedici mərkəzə çevrilib. Bu, Azərbaycanın müxtəlif dövlətlər və beynəlxalq təşkilatlar arasında dialoq qurmaq qabiliyyətinə olan etimadın da göstəricisidir. Xüsusilə son dövrlər Azərbaycanın qlobal və regional əhəmiyyətli tədbirlərin keçirilməsi üçün seçilməsi ölkəmizin dünyada diplomatik çəkisinin artdığını göstərir. Bu fonda demək olar ki, Azərbaycan artıq təkcə regional deyil, həm də daha geniş coğrafiyada əməkdaşlıq və dialoq platforması kimi nüfuz qazanıb".
Deputat qeyd edib ki, Bakı müxtəlif mövqelərə malik ölkələri eyni masa ətrafında toplamaq, qarşılıqlı anlaşmanı təşviq etmək və praktiki əməkdaşlıq gündəmini irəli aparmaq baxımından mühüm mərkəz statusunu möhkəmləndirir. İƏT Parlament İttifaqının sessiyasının Bakıda keçirilməsi də məhz bu etimadın və beynəlxalq nüfuzun növbəti təzahürüdür. "İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci sessiyasının Bakıda keçirilməsi həm də Azərbaycanın islam dünyası ilə əlaqələrinin inkişafına verdiyi önəmi, islam həmrəyliyinin möhkəmləndirilməsi istiqamətindəki təşəbbüslərini və təşkilat daxilində artan nüfuzunu əks etdirir. Tədbirdə onlarca ölkədən parlament nümayəndə heyətlərinin iştirakı ölkəmizin beynəlxalq əməkdaşlıq üçün etibarlı tərəfdaş kimi qəbul edildiyini bir daha təsdiqləyir", - deyə o əlavə edib.
Ötən həftə Bakının İslam İnkişaf Bankı Qrupunun 2026-cı il üzrə İllik Toplantılarına uğurla evsahibliyi etdiyini xatırladan V.Rəhimzadə bildirib ki, belə nüfuzlu tədbirlərin məhz Azərbaycana həvalə edilməsi ölkəmizin beynəlxalq təşkilatlar və tərəfdaş dövlətlər tərəfindən etimad göstərilən platforma kimi qəbul olunduğunu nümayiş etdirməklə yanaşı, qlobal dialoq məkanı kimi mövqeyini daha da gücləndirir. "Bu cür tədbirlər, eyni zamanda, Azərbaycanın mövqeyinin beynəlxalq ictimaiyyətə daha geniş şəkildə çatdırılması və yeni əməkdaşlıq imkanlarının formalaşması baxımından da mühüm əhəmiyyət daşıyır".
Ə.QARDAŞXANOVA,
"Azərbaycan"
