Bu layihə həm də inşaat şirkətləri üçün nümunə ola bilər
Müasir şəhərsalma konsepsiyasında yaşayış binalarının keyfiyyəti yalnız mənzillərin planlaşdırılması ilə deyil, həm də ətraf mühitin, həyətlərin və ictimai məkanların vəziyyəti ilə qiymətləndirilir. Bu baxımdan IDEA İctimai Birliyinin həyata keçirdiyi "Abad həyət" layihəsi uğurlu sosial-ekoloji təşəbbüs kimi diqqət çəkir.
"Abad həyət" layihəsinin əsas məqsədi köhnə və baxımsız həyətlərin abadlaşdırılması, yaşıllıqların bərpası, sakinlər üçün təhlükəsiz və rahat yaşayış mühitinin yaradılması, eləcə də sağlam həyat tərzinin təşviq edilməsidir. Layihə çərçivəsində müxtəlif rayonlarda həyətlər yenidən qurulur, uşaqlar üçün oyun meydançaları, gənclər üçün idman sahələri, velosiped yolları, söhbətgahlar, istirahət guşələri yaradılır, əlilliyi olan şəxslərin rahat hərəkəti üçün xüsusi şərait təmin edilir.
Layihənin uğurunun əsas səbəblərindən biri sakinlərin ehtiyaclarının nəzərə alınmasıdır. Abadlaşdırılan həyətlər yalnız estetik görünüş qazanmaqla kifayətlənmir, həm də müxtəlif yaş qruplarının sosial ünsiyyəti, istirahəti və fiziki aktivliyi üçün funksional məkanlara çevrilir. Bu yanaşma nəticəsində həyətlər xüsusən yay aylarında insanların bir-biri ilə daha sıx əlaqə qurduğu, uşaqların təhlükəsiz şəraitdə oynadığı və ailələrin səmərəli vaxt keçirdikləri sosial mərkəz rolunu oynayır.
Bu təcrübə yeni yaşayış kompleksləri ucaldan mənzil tikinti kooperativləri üçün mühüm nümunə ola bilər. Son illər sakinlər arasında həyətlərin kiçik olması, yaşıllıq sahələrinin azlığı, avtomobillərin həyətləri zəbt etməsi və ictimai məkan çatışmazlığı ilə bağlı narazılıqlar tez-tez səsləndirilir. Şəhərsalma ilə bağlı ictimai müzakirələrdə də geniş həyətlər, yeraltı parkinqlər, piyada zonaları və yaşıllıq sahələrinin artırılması kimi tələblər ön plana çıxır.
Məhz buna görə MTK-lar "Abad həyət" modelindən faydalanaraq öz layihələrində geniş, yaşıllıqla zəngin həyətlərin yaradılması, uşaq və idman meydançalarının salınması, çoxmərtəbəli yeraltı parkinqlərin tikilməsi və bu kimi prinsipləri tətbiq edə bilərlər. Bu yanaşma yalnız yaşayış komplekslərinin estetik görünüşünü yaxşılaşdırmır, həm də onların maddi və mənəvi dəyərini də artırır. Yeni binalarda mənzil almaq istəyənlər də həmçinin rahat, təhlükəsiz və abad həyətlər axtarırlar. Buna görə də həyət infrastrukturuna investisiya qoyan MTK-lar yuxarıda qeyd etdiyimiz prinsipləri tətbiq etməklə rəqabət üstünlüyü əldə etmiş olurlar.
Nəticə etibarilə IDEA İctimai Birliyinin "Abad həyət" uğurlu şəhərsalma və sosial məsuliyyət nümunəsidir. Layihənin təcrübəsi göstərir ki, keyfiyyətli yaşayış mühiti yaratmaq üçün insanların rahatlığı, təhlükəsizliyi və sosial ehtiyacları əsas olaraq nəzərə alınmalıdır. Bu səbəbdən "Abad həyət" layihəsi yeni yaşayış kompleksləri inşa edən şirkətlər üçün nümunəvi model qəbul və tətbiq oluna bilər.
Nərminə ƏSGƏROVA,
İlham BABAYEV (foto),
"Azərbaycan"
jpg_1781177334.jpg)
