20 Noyabr 2026 08:00
137
SİYASƏT
A- A+
Ədalətin Zəfər təntənəsi

Ədalətin Zəfər təntənəsi


"İkinci Qarabağ müharibəsi və antiterror əməliyyatı imkan verdi ki, Azərbaycan nəinki beynəlxalq hüququ bərpa etdi, nəinki öz milli  qürurunu bərpa etdi, bütün  dünyaya nümayiş etdirdi ki, ədalətsizlik əbədi davam edə bilməz".

İlham ƏLİYEV


"Təbii ki, peşəkarlıq, qəhrəmanlıq, texniki təchizat - bütün bunlar da vacib amillərdir. Ancaq mənəvi üstünlük olmasa,  milli düşüncə olmasa, heç bir ən güclü ordu heç vaxt bir qələbə qazana bilməz".

İlham  ƏLİYEV



Dünyada ədalət adlı bir  gerçəklik var!

İnsanlar, xüsusən zəiflər daim  onu seviblər, ona inanıblar!

Gözlədikləri ədalətə çata bilməyənlər isə üzlərini Tanrıya  tutublar, ondan  İlahi ədalətin bərpasını istəyiblər.

LAKİN...

Tarixi təcrübə və həyatda baş verənlər göstərir ki, ədalətə təkcə onu arzulamaqla, özünün səni tapacağını gözləməklə çatmaq  həmişə mümkün olmur!

Ədaləti  təkcə arzulamaq,  istəmək, tələb etmək azdır!

Onun  uğrunda yorulmadan mübarizə  aparmalısan, çarpışmalısan!

Xüsusən də ədalətsizləri güclülər müdafiə edəndə!

Ədalətin bərpasına qoluzorlular mane olanda!

Tanrı da ədaləti sevəndir!

Odur ki, hərdən ədaləti ilahiləşdiririk!

İlahi ədalət isə gec-tez öz yerini tapır!

Ancaq oturub onu gözləməklə iş bitmir.

Ədaləti təmin etmək üçün daim mübarizə aparmalısan, daim güclənməlisən!

Tanrı ədalət uğrunda belə mübarizləri sevir və onlara arxa duraraq ilahi  ədalətin bərpasına yardım göstərir.

Qarabağ ədalətinin  öz yerini almasında da belə oldu!

***

Azərbaycanın əlverişli  geosiyasi mövqeyi, zəngin  yeraltı və yerüstü sərvətləri təkcə ona  faydalar gətirməyib.

Həm də düşmənlər qazandırıb.

Lakin həmin düşmənlər özlərini "dost" kimi təqdim edərək  daim hiyləyə və məkrə üstünlük veriblər.

Necə deyərlər, üzdə gülüb, içlərində isə bədxahlıqlarından heç zaman qalmayıblar.

Biri özünü "böyük qardaş" kimi təqdim edib.

"Xilaskar"  adı ilə ölkəmizi zəbt edərək uzun illər  boyu  neft-qaz sərvətlərimizi daşıyıb aparıb.

Torpaqlarımız  hesabına əlaltısına, forpostuna dövlət yaradıb.

Zəif olduğumuz üçün müqavimət göstərə bilməmişik, məcburən tabe olmuşuq.

Lakin nankor millət verilənlərlə kifayətlənmək istəməyib.

Daha artığını qamarlamağa çalışıb.

Biz tək qaldığımız halda onun müdafiəçiləri, havadarları xeyli olub...

* Dünya erməniliyi daim sözünü deyib.

* Erməni diasporları  korrupsiya yolu ilə  müxtəlif dövlətlərin siyasətçilərini və parlament üzvlərini ələ alaraq onları öz müdafiəçilərinə çeviriblər.

* İkili standartlarla işləyən beynəlxalq qurum və  təşkilatlar haqqı qoyub, nahaqqı  dəstəkləyiblər.

* Beynəlxalq hüquq  rüşvət  qarşısında məğlub  olaraq ayaqlar altında qalıb.

* Verilən vədlər boşa çıxıb, qəbul olunan qərar və sənədlər  mənasız kağız parçasına çevrilib.

Bəli, erməniyə torpağımızda  özünə dövlət yaratmağa imkan verdik, qədim  İrəvan  xanlığını özlərinə paytaxt  etmələrinə şərait yaratdıq.

Bütün bunları az hesab elədilər, qudurdular, daha artığına nail  olmağa çalışdılar.

Həm də təkcə çalışmadılar, zorakılıqlara, silaha əl atdılar.

Müdafiəçiləri arxalarında durdular, torpaqlarımızın daha 20 faizini ələ keçirmələrinə  hərbi-siyasi vasitələrlə yardım göstərdilər.

Biz isə rəhbərimizdən ayrı düşdüyümüzə, ən çətin və sınaqlı dövrlərdə ölkəmizə maymaqlar, qorxaqlar, təcrübəsizlər,  səriştəsizlər və xəyanətkarlar başçılıq etdiklərindən min bir bəlalara düçar olduq:

* Soyqırımlarına məruz qaldıq;

* Əsir götürülərək işgəncələrlə üzləşdik, hətta  bizi  öldürdükdən sonra  kütləvi məzarlıqlarımızı belə gizli saxladılar;

*  Evlərimizi talan edib dağıtdılar, tikinti materiallarına çevirərək satıb pul-para  qazandılar;

* Meşələrimizi, bağlarımızı qırıb yandırdılar;

* Yeraltı sərvətlərimizi çıxararaq  daşıyıb apardılar;

* Mədəni-tarixi abidələrimizi məhv etdilər;

* Məscidlərimizdə  mal-qara, donuz saxladılar;

* Qəbiristanlıqlarımızı yerlə  yeksan  etdilər;

* Özümüzü yurd-yuvalarımızdan didərgin salaraq məcburi köçkünə çevirdilər.

"Ədalətli dünya", insan hüquqlarını müdafiə edən təşkilatlar bütün bunları  "görmədilər", kar, kor, lal oldular.

Görənləri isə...

BMT-nin Təhlükəsizlik Şurası Ermənistanın Azərbaycan torpaqlarının  işğalı ilə bağlı dörd qətnamə qəbul etdi.

Hərdən qəbul etdiyi qərarların mürəkkəbi qurumamış onları icra edən BMT Azərbaycana gələndə otuz il ağzına su  alaraq durdu.

Nə öz nüfuzunu düşündü, nə də Azərbaycanın düşdüyü ağır durumu.

Azərbaycan Prezidenti cənab İlham Əliyev sonuncu dəfə "ŞƏT plyus" forumunun Qırğızıstanda keçirilən görüşdəki çıxışında yenidən bu məsələyə toxunaraq dedi:

"BMT Təhlükəsizlik Şurasının 1993-cü ildə qəbul edilmiş dörd qətnaməsi 30 ildən sonra, üç il əvvəl icra edildi. Azərbaycan artıq Ermənistana neft  məhsulları tədarük edir və  üçüncü ölkələrin  yüklərinin tranzitini təmin edir. Ermənistanla birlikdə  qarşılıqlı ticarətin həcminin artırılması, onun nomenklaturasının  genişləndirilməsi və yeni yerüstü nəqliyyat  kommunikasiyalarının yaradılması üzərində çalışırıq. Lakin təəssüf ki, BMT bu  qətnamələrin icrasında  heç bir rol oynamayıb. Azərbaycan öz suverenliyini və ərazi bütövlüyünü tamamilə özü bərpa edib. BMT Təhlükəsizlik Şurasının qətnamələrinin qısa müddətdə icrası üçün müvafiq mexanizmlərin hazırlanması tələb olunur. Bu, həyata keçirilərsə,  BMT-nin nüfuzunun  və təşkilatın münaqişələrin  nizamlanmasındakı  rolunun artmasına xidmət  edər".

BMT-dən heç bir əməli kömək görməyən Azərbaycan digər beynəlxalq  təşkilatlara - AŞPA-ya, Avropa İttifaqı Parlament Assambleyasına müraciət etdi.

Dəfələrlə korrupsiya qalmaqalları baş verən, deputatları rüşvətxorluqda ittiham olunan, hətta cəzalandırılan bu qurumlar açıq-aşkar ermənipərəst mövqe nümayiş etdirdilər.

Azərbaycanın haqq işini müdafiə etmək əvəzinə bizim gözümüzdə "tük axtarmağa" başladılar, "söz azadlığı", "demokratiya" ilə bağlı "nöqsanlar tapdılar", əleyhimizə qətnamələr çıxardılar.

Hətta bu gün də eyni ədalətsiz mövqedədirlər...

Bizə çatanda beynəlxalq hüquq da gücsüz oldu.

Ərazilərimizin Ermənistan tərəfindən  işğalını görmədilər:

* Bir milyondan çox azərbaycanlının  qaçqına  və məcburi köçkünə çevrilməsinə heç bir reaksiya vermədilər;

* İşğal olunmuş yaşayış məntəqələrinin yandırılıb dağıdılmasına, "ruhlar şəhəri"nə çevrilməsinə əhəmiyyət  vermədilər;

* Tarixi, mədəni, dini abidələrimizin dağıdılmasına, təhqir edilməsinə göz yumdular;

* Yüz minlərlə insanın yaşamaq, seçdiyi məkanda  ömür sürmək, yerli seçkilərdə iştirak etmək, sevdiyi peşəsi  ilə məşğul olmaq hüququnun pozulduğuna əhəmiyyət vermədilər;

* Azərbaycan vətəndaşlarının kütləvi şəkildə mülkiyyət hüququnun pozulmasına da göz yumdular.

***

Avropanın daha bir qurumu saxta, riyakar, dişsiz fəaliyyəti ilə "məşhurlaşdı". 

Söhbət Ermənistan-Azərbaycan Dağlıq Qarabağ  münaqişəsinin sülh yolu ilə  həlli məqsədilə məxsusi şəkildə yaradılan ATƏT-in Minsk qrupundan gedir.

Münaqişənin sülh yolu ilə həlli məqsədilə 1992-ci ildə ATƏT-in Minsk qrupu yaradıldı.

Bununla da BMT bu məsələni ATƏT-in  himayəsinə vermiş oldu.

ATƏT də Minsk qrupu və Minsk konfransı yaratdı.

Əvvəlcə iki həmsədr dövlətin olması nəzərdə tutulurdu.

Lakin ABŞ və Fransa arasında seçimdə mübahisə yarandığına görə üç dövlətin həmsədrliyi təsdiq edildi:

Rusiya, ABŞ və Fransa.

Bununla da görüşlər, uzun-uzadı danışıqlar, mənasız, turist səfərlərinə bənzər  gediş-gəlişlər başlandı.

Heç nəyə yaramayan, tərəflərin hər ikisini qane etməyən təkliflər də verildi:

* Əvvəlcə problemin "paket həlli";

* Sonra "mərhələli  həll" variantı;

* Daha sonra "ümumi dövlət" anlayışı meydana gəldi.

Ermənistan həmsədr dövlətlər tərəfindən müdafiə olunduğundan ipə-sapa yatmır, Qarabağa "müstəqil respublika" statusunu almağa çalışırdı.

Azərbaycan isə bununla qəti razılaşmırdı!

Çünki Ermənistanın məqsədi "müstəqil respublika" statusundan sonra "dqr"i özünə birləşdirmək və bununla da işğalı əbədiləşdirmək idi!

Ulu Öndər Heydər Əliyevin və Prezident İlham Əliyevin prinsipial, qətiyyətli və dəyişməz mövqeləri sayəsində Ermənistanın  müdafiəçiləri və havadarlarının  ATƏT-in "sülh danışıqları" yolu ilə Azərbaycandan ərazi qopararaq Ermənistana  bağışlamaq niyyəti baş tutmadı.

44 günlük Zəfər müharibəsindən sonra isə Müzəffər Ali Baş Komandan İlham Əliyevin diplomatik fəaliyyəti sayəsində üzərinə qoyulan vəzifənin öhdəsindən gələ bilməyən bu fərsiz qurum  tarixin qaranlıq arxivinə verildi!

Bu münasibətlə mətbuata verilən  məlumatda deyilirdi:

"Azərbaycanın və Ermənistanın ATƏT-in Finlandiya sədrliyinə birgə müraciətindən sonra təşkilat Nazirlər Şurasının 2025-ci il sentyabrın 1-də qəbul edilmiş qərarına uyğun olaraq, 2025-ci il noyabrın 30-da saat 23:59-da Minsk prosesi və onun əlaqədar strukturlarının bağlanmasını yekunlaşdırdı.

Bu barədə ATƏT-in bəyanatında bildirilib. Qeyd edilib ki, bütün zəruri inzibati prosedurların başa çatdırılması bağlanma prosesinin başa çatması deməkdir. Bu proses 2025-ci il avqustun 8-də Vaşinqtonda Azərbaycan Prezidenti İlham Əliyevin və Ermənistanın baş naziri Nikol Paşinyanın imzaladığı və ABŞ Prezidenti Donald Trampın da şahidi olduğu tarixi Birgə Bəyannamənin ardınca ATƏT-in bütün 57 iştirakçı dövlətinin 1 sentyabr tarixli konsensus qərarını həyata keçirdi".

Nə BMT, nə  ATƏT, nə beynəlxalq  təşkilatlar, nə də  beynəlxalq  hüquq ədalətin bərpasında kara gəldi!

Tanrı da daim "səndən hərəkət, məndən bərəkət" prinsipi ilə kömək göstərir.

Azərbaycanın mövqeyi  işğalın ilk günlərindən qəti və aydın idi!

Həm Ulu Öndər Heydər Əliyev, həm də  möhtərəm Prezident İlham Əliyev dəfələrlə açıq şəkildə bəyan etmişdilər ki, Azərbaycan bir qarış torpağını belə  kimsəyə güzəştə getməyəcək və öz ərazisində ikinci erməni dövlətinin yaranmasına yol verməyəcəkdir!

Üstəlik, bu qətiyyətli mövqeni təkcə danışıqlar masasında ortaya qoyaraq müdafiə etmirdilər.

Ölkə iqtisadiyyatını dayanmadan gücləndirir, yeni ordu quruculuğu ilə ciddi şəkildə  məşğul  olurdular.

Ömür Ulu Öndər Heydər Əliyevə vəfa etmədi, cənab İlham Əliyev isə torpaqların  işğaldan azad  ediləcəyi və məcburi köçkünləri doğma torpaqlarına qaytaracağı barədə  vədinə sonadək sadiq qaldı.

İlk dəfə 2016-cı ildə baş verən dördgünlük Aprel döyüşlərində düşmənə ciddi qulaqburması verildi.

Lakin havadarlarına arxalanan düşmən  bundan  lazımi nəticə  çıxarmadı…

Münaqişənin birdəfəlik  və əbədi həlli üçün  hərbi variant qaçılmaz oldu!

Düşmənin Tovuz bölgəsində  təxribatçı əməllərinə son qoymaqdan ötrü "dəmir yumruq" işə düşdü!

Bu barədə Müzəffər Ali Baş Komandan İlham Əliyevin  müharibədən  sonrakı  dövrlərdə çıxışlarından bəzi  məqamlara diqqət çəkmək  istəyirik:

"İkinci Qarabağ müharibəsi və antiterror əməliyyatı  imkan verdi ki, Azərbaycan nəinki beynəlxalq  hüququ bərpa  etdi, bütün dünyaya nümayiş  etdirdi ki,  ədalətsizlik əbədi davam edə bilməz".

Müzəffər Ali Baş Komandan İlham Əliyevin sərkərdəliyi ilə 44 gün ərzində  Azərbaycan Ordusu əsl möcüzələr yaratdı:

"44 gün ərzində şanlı Ordumuz hər gün irəli gedirdi, hər gün yaşayış məntəqələri işğalçılardan azad edilirdi və bildiyimə görə, dünya hərb tarixində buna oxşar hərbi əməliyyatlar olmamışdır. Bir gün belə geriyə addım atmamışıq, hər gün bir neçə kənd, bir neçə qəsəbə, şəhər azad edilirdi. Bir nəfər olsun döyüş meydanını tərk etməmişdir. Amma Ermənistanın rəsmi nümayəndələrinin özlərinin etirafına görə, Ermənistan ordusunda 12 mindən çox fərari olmuşdur. Bu, nəyi göstərir? Əlbəttə ki, xalqımızın yüksək mənəvi keyfiyyətlərini göstərir. Bununla bərabər, onu göstərir ki, sinəsini qabağa verən gənclər o qədər vətənpərvərlik ruhunda tərbiyə olunmuşdur ki, onlar üçün Vətən torpaqlarını azad etmək ən şərəfli missiya olmuşdur".

Xalq  öz sevimli rəhbərinin arxasında  sonadək əzmlə dayandı!

Hərbi səfərbərlik xidməti qarşısında gecə-gündüz növbə gözləyən Azərbaycan  gənci  orduda döyüşmək  istəyini nümayiş etdirirdi.

Əsgər və zabitlərimiz kütləvi qəhrəmanlıqlar göstərir, hər gün bir neçə yaşayış məntəqəsini işğaldan  azad  edirdilər.

Müzəffər Ali Baş Komandan  İlham Əliyev  sistemli şəkildə  televiziya  vasitəsilə xalqa müraciət edərək azad olunan kənd, şəhər və qəsəbələr barədə  müjdələr verir, işğaldan qurtarılan yerlərdə üçrəngli bayrağımızı qürurla ucaldırdı!

Dünənədək lovğalıqla özünü "məğlubedilməz millət", ordularını "məğlubedilməz ordu" adlandıran haylar "dəmir yumruğ"un qarşısında  davam gətirməyərək silah-sursatlarını ataraq arxalarına baxmadan qaçırdılar.

Azərbaycan Ordusu torpaqları işğaldan azad  etməklə  bərabər ədaləti, beynəlxalq hüququ da təmin edirdi.

Müzəffər Ali Baş Komandan İlham Əliyevin qürurla söylədiyi kimi:

"Biz göstərdik ki, güclü iradə, peşəkarlıq, vətənpərvərlik, milli ruhda tərbiyə olunan gənc nəsil olarsa, heç bir qüvvə o xalqın qabağında dura bilməz - nə 6, 7, 8, 9, 10 müdafiə xətti, nə Ermənistan ordusunun coğrafi üstünlüyü, - çünki bütün təpələrdə onlar yerləşmişdi, - nə böyük dövlətlər, nə də Ermənistanı silahlandıran və onlara mənəvi və fiziki yardım göstərən dövlətlər. Bax, bütün bu amillər bir yerdə olanda, o xalqın qabağında heç kim dura bilməz". 

Otuzillik işğala hərbi yolla son qoymaq üçün  Azərbaycana cəmi 44 gün bəs etdi!

* 44 şərəfli döyüş günü!

* 44 qələbə və xoş müjdələr günü!

* 44 kütləvi qəhrəmanlıqlar günü!

* 44 ədalətin bərpası günü!

Müzəffər Ali Baş Komandan İlham Əliyev həmin 44 gündə "dəmir yumruğ"u ilə  düşmənin belini  qıraraq başını əzdi!

*  Müharibələr tarixində yeni bir səhifə açdı, müasir müharibə modeli yaratdı.

*  Ağdam, Laçın və Kəlbəcər rayonlarını bir  güllə belə  atmadan aldı.

*  Alınmaz qala  şəhəri Şuşanı  yalın əllə, əsgər  xəncəri və "lopatkası" vasitəsilə əlbəyaxa döyüşlərdə geri  qaytardı.

* İkiəsrlik Qarabağ müharibəsinə əbədi  yekun  vurdu!

* Beynəlxalq qurum və təşkilatların, güclü  dövlətlərin könüllü şəkildə  etmədiklərini "dəmir yumruq"la həll  etdi!

Təkcə beynəlxalq hüququ, ədaləti deyil, İlahi ədaləti də təmin etmiş oldu!

Ədaləti unudanlara, onu ayaq  altına  atanlara özünəməxsus formada dərs verdi!

Azərbaycan xalqına və onun dostlarına isə əsl ədalətin Zəfər təntənəsini yaşatdı.



Bəxtiyar  SADIQOV

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

Çoxvektorlu və strateji tərəfdaşlıq diplomatiyası

08:20
20 Noyabr

Paris anti-Azərbaycan ritorikasına yox, öz problemlərinə köklənməlidir

08:15
20 Noyabr

Milli iradənin və dövlətçilik ənənələrinin daşıyıcısı

08:10
20 Noyabr

Azərbaycan-Vyetnam: uzaq coğrafiya, yaxın münasibət

08:05
20 Noyabr

Ədalətin Zəfər təntənəsi

08:00
20 Noyabr

Qaradağ rayonunda Yeni Azərbaycan Partiyasının yaranmasının 34-cü ildönümü qeyd edilib  

23:50
19 Noyabr

Uzun fasilədən sonra Gürcüstan və Rusiya nümayəndələrinin görüşü olub  

23:16
19 Noyabr

Poniçaladakı partlayışdan 8 saat sonra 3 yaşlı uşaq dağıntılar altından sağ çıxarılıb 

23:00
19 Noyabr

Zelenski: Rusiya il ərzində bütün atəşkəs təkliflərini rədd edib

22:48
19 Noyabr

Azərbaycan Prezidentinin səfəri Vyetnam mediasının diqqət mərkəzindədir  

22:29
19 Noyabr

Beynəlxalq axtarışda olan şəxs Türkiyədə tutularaq Azərbaycana ekstradisiya edilib  

21:23
19 Noyabr

Prezidentin sosial media hesablarında Vyetnama rəsmi səfəri ilə bağlı videoçarx paylaşılıb  - VİDEO

21:15
19 Noyabr

Milli Məclisin sədri MDB PA-nın Şura iclasında iştirak edib  

20:31
19 Noyabr

Ali Radanın sədri: Ukraynanı və Azərbaycanı qarşılıqlı hörmət birləşdirir

19:58
19 Noyabr

“Eternity-2026” təlimi çərçivəsində Azərbaycan-Gürcüstan nümayəndələrinin görüşü keçirilib  

19:47
19 Noyabr

Mütəxəssislər mamontların və qılıncdişli pələnglərin “dirildilməsi” imkanlarını qiymətləndiriblər  

19:47
19 Noyabr

Azərbaycan səfiri etimadnaməsini Estoniya Prezidentinə təqdim edib  

19:39
19 Noyabr

ABŞ-nin büdcə kəsiri 2 trilyon dollara çata bilər - dövlət borcu artır  

19:28
19 Noyabr

Putin Ukrayna ilə danışıqların müddəti barədə danışıb  

19:23
19 Noyabr

Hərbi vəzifəlilərlə keçirilən təlim toplanışı başlayıb  

19:18
19 Noyabr

ABŞ-də ilk dəfə Ay torpağının tam analoqunda kartof yetişdirilib  

19:13
19 Noyabr

ÇOX OXUNANLAR

OXUCU MƏKTUBLARI

NƏŞRLƏRİMİZ

TƏQVİM / ARXİV

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!