Azərbaycan-ABŞ münasibətləri regional və qlobal proseslər fonunda mühüm inkişaf mərhələsindən keçir. Qarşılıqlı maraqlara, siyasi dialoqa və strateji əməkdaşlığa əsaslanan bu münasibətlər təhlükəsizlik, enerji, iqtisadiyyat və sülhün təşviqi kimi bir sıra vacib sahələri əhatə edir.
Yanvarın 22-də Davosda Prezident İlham Əliyev ilə Amerika Birləşmiş Ştatlarının Prezidenti Donald Tramp arasında baş tutan görüş ikitərəfli əlaqələrin mövcud vəziyyətinin qiymətləndirilməsi və gələcək inkişaf istiqamətlərinin müəyyənləşdirilməsi baxımından xüsusi əhəmiyyət daşıyır. Bu görüş eyni zamanda Azərbaycan-ABŞ münasibətlərinin yeni mərhələyə qədəm qoyduğunu və strateji əməkdaşlığın daha geniş müstəvidə inkişaf etməkdə olduğunu göstərir.
Milli Məclisin deputatı Kamran Bayramov "Azərbaycan" qəzetinə açıqlamasında bildirib ki, görüşdə Donald Trampın yenidən prezident seçilməsindən sonra Azərbaycan-ABŞ münasibətlərinin müxtəlif istiqamətlər üzrə inkişafından məmnunluq ifadə edilib: "Tərəflər siyasi dialoqun daha da fəallaşdırılması, əməkdaşlığın yeni sahələrdə genişləndirilməsi perspektivlərini müzakirə ediblər. Bununla yanaşı, regional və qlobal gündəmdə duran məsələlər ətrafında fikir mübadiləsi aparılıb, sülhün və sabitliyin möhkəmləndirilməsi üçün birgə fəaliyyətin vacibliyi qeyd olunub. Görüş zamanı ötən il avqustun 8-də Vaşinqtonda Azərbaycan və Ermənistan arasında sülh prosesinin irəlilədilməsi istiqamətində əldə edilən razılaşmalar da xatırlanıb və bu prosesdə Prezident Donald Trampın mühüm və tarixi rol oynadığı xüsusi vurğulanıb".
Deputat qeyd edib ki, Prezident İlham Əliyev görüşdə Azərbaycan ilə Ermənistan arasında münasibətlərin normallaşdırılması istiqamətində atılan addımların artıq real nəticələr verdiyini diqqətə çatdırıb. Dövləti başçısı bildirib ki, regionda formalaşan sülh mühiti təkcə siyasi dialoqla məhdudlaşmır, eyni zamanda iqtisadi əməkdaşlıq müstəvisində də öz əksini tapır. İki ölkə arasında ticarət əlaqələrinin yaranması sülh gündəliyinin praktik mərhələyə keçdiyini və qarşılıqlı etimadın formalaşmağa başladığını göstərir. "Azərbaycandan Ermənistana neft məhsullarının ixracı, habelə idxal olunan taxılın Azərbaycan ərazisi vasitəsilə tranzit keçərək Ermənistana çatdırılması regionda iqtisadi münasibətlərin yeni məzmun kəsb etdiyini göstərir. Bu kontekstdə dövlətimizin başçısı regional bağlantıların genişləndirilməsinin strateji əhəmiyyətini önə çəkərək, Zəngəzur dəhlizi və TRIPP layihəsinin nəqliyyat-kommunikasiya əlaqələrinin inkişafında mühüm rol oynadığını qeyd edib. Azərbaycanın təşəbbüsü ilə reallaşan bu layihələrin uzunmüddətli sülhə və dayanıqlı əməkdaşlığa xidmət etdiyi vurğulanıb", - deyə deputat bildirib.
K.Bayramov vurğulayıb ki, görüşün davamında tərəflər qlobal təhlükəsizlik və sülh gündəliyində duran məsələlər ətrafında da ətraflı fikir mübadiləsi aparıblar: "Bu kontekstdə ABŞ Prezidentinin sədrliyi ilə təsis edilən Sülh Şurasının rolu xüsusi diqqət mərkəzində olub. Bu qurum Yaxın Şərqdə sülhün möhkəmləndirilməsinə, eyni zamanda qlobal miqyasda mövcud münaqişələrin həllinə töhfə vermək baxımından mühüm beynəlxalq platforma kimi çıxış edir. Müzakirələr zamanı Azərbaycanın Sülh Şurasına təsisçi üzv dövlət qismində dəvət olunması Azərbaycan-ABŞ strateji tərəfdaşlığının yüksək səviyyəsinin göstəricisi kimi dəyərləndirilib. Bu addım eyni zamanda Azərbaycanın beynəlxalq müstəvidə sülhün, təhlükəsizliyin və sabitliyin təşviqində artan rolunu bir daha nümayiş etdirir".
Deputat bildirib ki, ümumilikdə aparılan müzakirələr Azərbaycan-ABŞ münasibətlərinin qarşılıqlı etimada, siyasi iradəyə və açıq dialoqa söykənən sağlam əsaslar üzərində inkişaf etdiyini deməyə əsas verir. Yüksəksəviyyəli görüşlər, müntəzəm təmaslar və ortaq maraqlara əsaslanan əməkdaşlıq formatları bu münasibətlərin daha da dərinləşməsinə şərait yaradır. Mövcud siyasi dinamika göstərir ki, tərəflər həm ikitərəfli əlaqələrin genişləndirilməsində, həm də regional və qlobal miqyasda sülh, təhlükəsizlik və sabitliyin möhkəmləndirilməsində birgə fəaliyyət göstərməkdə maraqlıdırlar. Bu isə Azərbaycan-ABŞ tərəfdaşlığının uzunmüddətli və strateji xarakter daşıdığını bir daha təsdiqləyir.
Əsmər QARDAŞXANOVA,
"Azərbaycan"
jpg_1769465364.jpg)
