Gərgin beynəlxalq şərait fonunda Fransa hökuməti müdafiə xərclərini əhəmiyyətli dərəcədə artırmaq niyyətindədir. Fransa Silahlı Qüvvələr naziri Katrin Votren 2035-ci ilədək ölkənin illik müdafiə büdcəsinin 100 milyard avroya çatdırılacağını bəyan edib. Hazırda qəbul olunması gözlənilən 2026-cı il büdcəsinə əsasən, müdafiə xərcləri 57,1 milyard avro təşkil etməlidir ki, bu da qarşıdakı illərdə büdcənin demək olar 2 dəfə artırılacağını göstərir.
AZƏRTAC xəbər verir ki, “BFM Business”ə müsahibəsində Ketrin Votren Fransa ordusunun təchizatının gücləndirilməsinin prioritet olaraq qaldığını və bu istiqamətdə daha da irəli getməyin lazım olduğunu bildirib. Onun sözlərinə görə, uzunmüddətli maliyyə səyləri həm hərbi texnikanın yenilənməsinə, həm də şəxsi heyətin sayının artırılmasına yönəldiləcək.
Nazir vurğulayıb ki, müasir və yüksək texnoloji silahlanma insan resursları olmadan səmərəsizdir. Bu baxımdan, canlı qüvvənin gücləndirilməsi müdafiə siyasətinin əsas sütunlarından biri kimi təqdim olunur.
Ketrin Votren həmçinin, Fransanın müdafiə məhsulları ixracı sahəsində əldə etdiyi nəticələri müsbət qiymətləndirib. Onun sözlərinə görə, 2025-ci il üzrə hərbi ixracın həcmi 20 milyard avro səviyyəsində gözlənilir ki, bu da ölkə tarixində üçüncü ən yüksək göstərici olacaq.
Nazir müdafiə sənayesinin – Müdafiə Sənaye və Texnoloji Bazasının (BIDT) fəaliyyətinin stimullaşdırılmasının vacibliyini də qeyd edib. Yanvarın 22-də Tulonda yerləşən DGA Dəniz Texnikaları mərkəzinə səfəri zamanı o, əməliyyat ehtiyaclarının müəyyən edilməsi ilə konkret imkanların istifadəyə verilməsi arasındakı prosesin sürətləndirilməsinin zəruriliyini vurğulayıb.
Ketrin Votrenin fikrincə, Fransa müdafiə strategiyasında ciddi planlaşdırmaya əsaslanan modeldən daha çevik və uyğunlaşmaya yönəlmiş yanaşmaya keçməlidir. Bu dəyişikliklərin məqsədi sürətlə dəyişən təhlükəsizlik mühitinə daha effektiv cavab vermək və Fransa ordusunun uzunmüddətli dövrdə döyüş qabiliyyətini qorumaqdır.
