Könüllərə fərəh gətirən işıq, qəlblərə sevinc ələyən nur dünya yaranandan daim ahənrüba kimi insanları özünə çəkib. Bəşər övladları həmişə ürəkləri sıxan, onları zülmətdə saxlayan qaranlıqlardan işığa, aydınlığa çıxmağa can atıblar. Bu yolda əzablara, əziyyətlərə qatlaşıblar. Qaranlıqdan işıqlığa asanlıqla çıxmayıblar. İstəklərinə çatmaq üçün ucsuz-bucaqsız çöllərdən keçiblər, dağları, dərələrı aşıblar. Çaylardan, bulaqlardan su içiblər. İşığa doğru uzun-uzadı yol gəliblər, qaranlıq dünyaları dolaşıblar. Məqsədlərinə çatmaq üçün yorulmadan, dayanmadan çalışıblar.
Bütün qaranlıq yollar sonda insanları işığa qovuşdurub, nura qərq edib. İşığı görən insanların coşub-daşan sevincindən, fərəhindən qaranlıq dünyalar aydınlığa çıxıb. Bu işıqdan Yer üzündə həyat canlanıb. Daim vahimə yaradan, qorxu hissləri aşılayan qaranlıqlar lənətlənib, zülmətlər pislənib. Lənətlənən, pislənən qaranlıqları heç kim sevmir, ona tərəf kimsə getmir.
İnsanlar daim ürəkləri sıxan, qəlblərdə qorxu oyadan qaranlıqdan, zülmətdən xilas olmaq üçün yollar axtarıblar. Böyük çətinliklə zülmətlərin bağrını yarıb işığa doğru cığır açıblar. Uzun axtarışlardan sonra istəklərinə qovuşublar, arzularına çatıblar. Hədəflərinə çatanda isə rahatlaşıblar, arxayınlaşıblar. Çünki məqsədlərinə yetişiblər, qaranlıqlardan işığa doğru gedən yolları tapıblar.
İşığa çıxmaq, nura qovuşmaq yeni həyatın doğuluşudur, yeni günün başlanğıcıdır. Sabaha, gələcəyə atılan kövrək addımlardır. Hər şey mayasını, qayəsini işıqdan götürür, nurdan alır. Bundan sonra yeni həyat başlayır, ömrün yeni illəri yaşanır. Ürəklərdə coşub-daşan arzular, istəklər əbədi məşəl kimi şölələnir. Dünya işıqla dolub nura boyanır.
Həmişə uzaq yola çıxanda əzizlərimiz, doğmalarımız arzularını dilə gətirirlər, bizə ürəkdən gələn ən xoş sözlər söyləyirlər. Hər şeydən əvvəl işləriniz avand, yollarınız işıqlı olsun deyirlər. Bu xoş anlarda sanki onlar sevincdən don geyinirlər.
İşığa qovuşandan sonra əhvali-ruhiyyəmiz yüksəlir, bundan çox sevinirik. Elə sevinə-sevinə də deyirik ki, işıqlarımız getdikcə gur yansın, qəlbimizdə nurlu fikirlər oyansın. Qoy narahatlıqlar içində çırpınan dünyamız nura boyansın, başımızın üzərində ədalət məşəli yansın. Yer üzünün bütün insanları özlərini xoşbəxt sansın. Ana təbiət günəşdən güc alsın, bütün qaranlıqlar, zülmətlər işıqlansın. İnsanlar gur işıqdan ruhlansın, həyat eşqləri artsın. Pisliklər unudulsun, yalnız yaxşılıqlar yadda qalsın. Qoy silahlar deyil, ağıldan, zəkadan güc alan sülh zəfər çalsın.
Həmişə qaranlıqlardan işığa çıxaq, çətinlikləri arxada qoyaq, insanlara zülmətləri yaşadanların gözlərini tutaq. Yubanmadan, ləngimədən işıqlı məqsədlərə, nurlu amallara doğru addımlayaq. Ətrafımızdakı insanlara yalnız xoş sözlər deyək. Belə olarsa, həyatımızda uğurlar qazanarıq, reallaşmış arzularımızın sevincini yaşayarıq. Qarşımızda daim zəfər işıqları yanar, bundan dünya nura boyanar. Yer üzünün insanlarını məhvə sürükləyən müharibələr, qırğınlar dayanar. İnsanlar səhərlər silahların səsinə deyil, quşların cəh-cəhinə, şirin nəğməsinə yuxudan oyanar.
Artıq neçə gündür yeni ilə qədəm qoymuşuq. Yeni günlər yeni ilin qapısını yenicə açıb. Köhnə il bizimlə vidalaşıb. Yeni ilin yeni yollarına yeni niyyətlə, yeni amalla çıxmışıq. Ömür yollarımıza yeni arzulardan, yeni istəklərdən qanad taxmışıq. Gəlin yeni ilin yeni günlərində hamımız bir-birimizə işləriniz avand, yollarınız açıq və işıqlı olsun deyək. Həmişə uğurlu işlərimizi, xeyirxah əməllərimizi dəyərli, qiymətli sözlərlə ifadə edək.
Yeni ilin ilk günlərini yaşayırıq. Yaşadığımız bu soyuq qış günlərində ürəyimizdən gələn isti, ilıq sözlər sevinc içində qulağımıza tez-tez bu sözləri pıçıldayır: "İlimiz uğurlu, yollarımız işıqlı, çöhrəmiz nurlu, baxışlarımız qürurlu, qamətimiz dağlar kimi vüqarlı olsun! Qəlbimizdən ürəyimizə nur ələnsin, gur tökülsün, çətinliklərimiz asanlıqla çözülsün, uğurlarımız ard-arda düzülsün. Üzümüz gülsün, gözlərdən çöhrələrə tükənməyəcək sevinc süzülsün".
Vahid MƏHƏRRƏMOV,
"Azərbaycan"
