İşləri məhkəməyə göndərilən ünsürlər layiqli cəzalarını alacaqlar
2023-cü ilin sentyabrında keçirilmiş antiterror tədbirlərinin nəticəsində Qarabağdakı erməni separatçılığına, qondarma respublikanın mövcudluğuna birdəfəlik son qoyuldu.
Bu tarixi zəfər bir daha Prezident İlham Əliyevin qətiyyətinin, güclü siyasi iradəsinin təntənəsinə çevrildi və bununla Azərbaycanın ərazi bütövlüyü təmin edildi. Ermənistanın və dünya erməniliyinin torpaqlarımızda ikinci erməni dövləti yaratmaq xülyası tarixin zibilliyinə atıldı.
1389 cinayət işi
Azərbaycan dövləti yalnız torpaqlarımızın azadlığı və ərazi bütövlüyümüzün bərpası ilə kifayətlənmədi. Antiterror əməliyyatlarının nəticəsi olaraq həm də onilliklər boyu torpaqlarımızda separatçılıqla məşğul olanlar, milli kimliyimizə düşmən kəsilərək xalqımıza qarşı kütləvi qətliamlar, soyqırımları, müharibə cinayətləri törədən erməni cəlladları da həbs edildilər, əlləri qandallanaraq Bakıya gətirildilər.
Azərbaycan Respublikası Baş Prokurorluğunun ötən ay yaydığı məlumata əsasən, Ermənistan silahlı qüvvələri tərəfindən işğal olunmuş Azərbaycan ərazilərində yaradılmış qondarma "Dağlıq Qarabağ Respublikası" və onun qanunsuz silahlı birləşmələri tərəfindən respublikamıza qarşı törədilmiş qanunsuz əməllərə dair cinayət işi məhkəməyə göndərilib.
Qeyd edək ki, Azərbaycan Respublikasının baş prokurorunun qərarı ilə 1987-ci ilin oktyabr ayından 22 aprel 2024-cü ilədək törədilmiş cinayətlərin bir qismi ilə bağlı Baş Prokurorluq və respublikamızın ayrı-ayrı istintaq qurumlarında istintaq edilən 1389 cinayət işi bir icraatda birləşdirilib və Azərbaycan Respublikası Baş Prokurorluğunun rəhbərlik etdiyi, Dövlət Təhlükəsizliyi Xidməti, Daxili İşlər Nazirliyi, Dövlət Gömrük Komitəsi və Hərbi Prokurorluğun müstəntiqlərindən ibarət tərkibdə istintaq olunub.
16 təqsirləndirilən şəxs
Toplanmış mötəbər sübutlar əsasında ümumilikdə 2548 epizod üzrə Ermənistan silahlı qüvvələri və qanunsuz silahlı birləşmələr tərəfindən törədilən cinayətlərdə ittiham olunan 15 nəfər - Arkadi Qukasyan, Arayik Harutyunyan, Bako Sahakyan, Davit İşxanyan, Davit Babayan, Lyova Mnatsakanyan, Davit Manukyan, Qarik Martirosyan, Melikset Paşayan, Davit Allahverdiyan, Qurqen Stepanyan, Levon Balayan, Madat Babayan, Vasili Beqlaryan və Erik Qazaryan cinayətkar birlikdə iştirak etdiyi dövrlərə uyğun olaraq Azərbaycan Cinayət Məcəlləsinin bir sıra maddələri ilə təqsirləndirilirlər.
Azərbaycan Respublikasının Dövlət Təhlükəsizliyi Xidmətinin və Baş Prokurorluğunun ötən il dekabrın 28-də yaydıqları birgə məlumata əsasən isə Rusiya vətəndaşı olmuş, hazırda Ermənistan vətəndaşı olan, Rusiyada "Troyka Dialoq" şirkətinin təsisçisi və rəhbəri Ruben Vardanyanın da cinayət işi məhkəməyə göndərilib. Qeyd edək ki, bir vaxtlar Azərbaycanın Qarabağ bölgəsində at oynadan, respublikamızı təhdid edən Ruben Vardanyan antiterror əməliyyatlarından bir neçə gün sonra Ermənistana qaçmaq istəyərkən saxlanılıb. Toplanmış sübutlar əsasında ona Azərbaycanın işğal olunmuş ərazilərində yaradılmış qondarma "Dağlıq Qarabağ respublikası" və qanunsuz silahlı birləşmələri əhatə edən cinayətkar birlikdə, qanunsuz silahlı birləşmələrin və qrupların yaradılmasında və fəaliyyətinin təşkilində iştirak etdiyinə görə Azərbaycan Cinayət Məcəlləsinin müvafiq maddələrinə əsasən yekun ittiham elan olunub.
Bu həmin Ruben Vardanyandır ki, Xankəndidə oturub terrorçuluğu maliyyələşdirir, Azərbaycana qarşı hədyanlar söyləyirdi. Arayik Harutyunyan isə 2000-ci ildə qondarma respublikanın "prezidenti" kimi "andiçməsini" Şuşada keçirmiş, "vəzifəsinə" başladığı ilk gündən bizi başqa torpaqlarımızın da işğal edilməsi ilə hədələmişdi. Vətən müharibəsində isə bu cani Gəncənin raket atəşinə tutulması üçün əmr verdiyi ilə qürurlanırdı.
Ayrı-ayrı vaxtlarda separatçı rejimə rəhbərlik etmiş Arkadi Qukasyan və Bako Sahakyan da əlləri xalqımızın qanına bulaşmış cəlladlardır. Onlar yəqin ki, nə vaxtsa həbs olunacaqlarına inanmaq istəməzdilər. Lakin bu baş verdi və bir vaxtlar torpaqlarımızı işğal etmələri ilə qürurlanan, Azərbaycanı yeni ərazilərin işğalı ilə təhdid edən, Şuşada yallı gedən bu ünsürlər indi məhkəmələrini gözləyirlər. Onları mühakimə edən isə güclü və qalib Azərbaycan dövlətidir.
Rəşad CƏFƏRLİ,
"Azərbaycan"
