İrəvanı silahlandıraraq bölgədə sülhü təhdid edən qüvvələrə qarşı seyrçi mövqedə qalmayacağıq
Azərbaycanın son dörd il ərzində qazandığı ardıcıl qələbələr Cənubi Qafqazı təsir dairəsinə salmaq istəyən Qərb təsisatlarının məkrli planlarını alt-üst etdiyi üçün onlar ölkəmizə qarşı dayanmadan siyasi hücumlar edirlər. Ötən ilin noyabrında Bakıda keçirilən COP29 isə, necə deyərlər, Azərbaycanın düşmənlərinin özlərini açıq şəkildə göstərdikləri daha bir platforma oldu. Hələ COP29 başlamamışdan ölkəmizlə bağlı Qərbdə başladılan anti-Azərbaycan təbliğatı bu qlobal tədbirin boykot edilməsinə yönəlmişdi. Amma bu dəfə də ermənipərəst qüvvələr Azərbaycanın qətiyyətli səyləri qarşısında məğlub duruma düşdülər.
Prezident İlham Əliyev yanvarın 7-də yerli televiziya kanallarına müsahibəsində məhz bu məqama xüsusi vurğu edərək bildirdi ki, COP29-u siyasi motivlər səbəbindən boykot etmək cəhdləri olduqca gözlənilməz idi: "Hesab edirəm ki, bu tədbirə evsahibliyi etmiş heç bir ölkə bu dərəcədə müqavimətə rast gəlməmişdir. Lakin biz bunun da öhdəsindən gələ bildik. Boykot uğursuz oldu".
Dövlətimizin başçısı söylədi ki, bəzi ölkələr, xüsusilə də Fransa əlindən gələni edirdi ki, tədbiri gözdən salsın: "Həmkarlarımdan aldığım məlumata görə, Fransa prezidenti şəxsən onlara zəng edərək Bakıya getməməyi tövsiyə edirmiş. Yəni liderlərin buraya səfər etmələrinin qarşısını almaq üçün hətta belə vasitəyə də əl atılmışdır. Lakin bu da uğursuz oldu. Səksən dövlət və hökumət başçısı Bakıya səfərə gəldi və bu, bir daha Azərbaycanın etibarlı tərəfdaş olduğunu nümayiş etdirdi".
Bəşəriyyətin taleyinin müzakirə olunacağı, mühüm qərarlar qəbul ediləcəyi bu qlobal iqlim tədbirində Avropa Komissiyasının Prezidentinin iştirak etməməsi də Azərbaycana qarşı birbaşa qərəzin göstəricisi idi.
Təbii ki, ermənipərəst Emmanuel Makron və Ursula fon der Lyayen kimi "siyasətçi"lərin sərgilədikləri insanlıq əleyhinə bu davranışlar COP29-un tarixi uğur qazanmasına, Bakı nailiyyətinə zərrə qədər xələl gətirmədi, əksinə, qərəzli Qərb siyasətçilərinin cılızlığını göstərdi.
Makronun maniyası və ya acizliyinin etirafı...
Azərbaycanın Qarabağ zəfəri Qərbdəki erməni havadarlarının yuxularına haram qatıb. Ələlxüsus da yarıtmaz siyasəti ilə Fransanın dünyadakı nüfuzunu yerlə bir edən Emmanuel Makron işğalçı və təcavüzkar Ermənistanın siyasi, diplomatik, hərbi müstəvidə darmadağın edilməsini özünə şəxsi dərd edib. Hətta Makron adlı bu siyasi məddahın Azərbaycana kini o həddədir ki, Xurşidbanu Natəvanın Fransadakı heykəlinə vandal hücum təşkil etməklə ölkəmizdən qisas almağa çalışıb. Sadəcə bu iyrəncliyin özü Makronun bir zamanlar dünyanın mədəniyyət mərkəzi sayılan Fransanı hansı acınacaqlı günə qoymasını gözlər önünə sərir. Vəziyyət o dərəcə tragikomik hala çatıb ki, Makron bu gün daxili və xarici siyasətindəki bütün uğursuzluqlarının günahını Azərbaycanda axtarır. O, elə bu günlərdə etdiyi çıxışında da ölkəmizə qarşı ittiham səsləndirməkdən özünü saxlaya bilməmişdi.
"Görünür ki, cənab Makron Azərbaycansız yaşaya bilmir. Onda hansısa belə bir maniya yaranıb və bütün günahlarını bizim üstümüzə atmaq istəyir", - deyə yuxarıda sözügedən müsahibəsində E.Makronun Azərbaycana qarşı sərgilədiyi qərəzli davranışa münasibət bildirən Prezident İlham Əliyev söylədi ki, əslində, bu açıqlama öz acizliyinin etirafıdır. Özlərini böyük dövlət adlandıran bir prezident, sən demə, uzaqda - Qafqaz bölgəsində yerləşən, 10 milyon əhalisi olan ölkənin əməllərindən əziyyət çəkir. Halbuki bizim bu Fransanın daxili işləri ilə bağlı heç bir işimiz yoxdur. Sadəcə olaraq, qeyri-normal yanaşma, qeyri-adekvat siyasət buna gətirib çıxarıb.
"Artıq Ermənistana göndərilmiş silahlar geri qayıtmalıdır"
Ermənistanın Qərb havadarları İkinci Qarabağ müharibəsindən sonra onu sürətlə silahlandırır. Əlbəttə ki, yenə də bu siyahıya Fransa başçılıq edir. Son günlərini yaşayan Bayden administrasiyası da ötən müddətdə ermənipərəstlik edərək ölkəmizə qərəz nümayiş etdirir, Ermənistanı müharibəyə qızışdırırdı. Hətta ortada ötən il aprelin 5-də Amerikanın dövlət katibi, Avropa Komissiyasının prezidenti və xarici işlər naziri, Ermənistan baş nazirinin bir araya gəldiyi Brüssel görüşünün hərbi komponentlər ehtiva etməsi faktı da var. Ancaq Azərbaycan Ermənistan üzərindən bölgəyə yerləşmək kimi çirkin planlar quran kollektiv Qərbə və müharibə eyforiyasına qapılan İrəvana qəti şəkildə xəbərdarlıq edir ki, bu bədnam əməllərini dayandırsınlar.
Yerli televiziya kanallarına müsahibəsində ölkəmizin rəhbəri bəyan edib: "Biz, sadəcə olaraq, müşahidəçi kimi buna tamaşa edəsi deyilik. Ermənistan silahlanmanı dərhal dayandırmalıdır. Ona silah verən Fransa və digər ölkələr o kontraktlara xitam verməlidir, ləğv etməlidir. Artıq Ermənistana göndərilmiş silahlar geri qayıtmalıdır. Bu, bizim şərtimizdir: "İndi kim bunu necə istəyir, elə də qəbul etsin. Mən sözümü deyirəm, onlar da bilirlər, onların arxasında duranlar da bilirlər ki, əgər biz nəyisə deyiriksə, deməli, artıq bu məsələyə çox ciddi yanaşırıq".
Bütün bunlar da göstərir ki, siyasi, hərbi, iqtisadi gücü durmadan artan Azərbaycanı Qərbin gözü götürmür. Buna görə də müxtəlif vasitələrlə ölkəmizə siyasi təzyiqlər göstərməyə çalışır, İrəvana hərbi dəstək verərək regionda yenidən münaqişə ocağı yaratmağa cəhd edir. Ancaq öz qüvvəsinə ərazi bütövlüyünü, suverenliyini tam təmin edən Cənubi Qafqazın lider ölkəsi Azərbaycan bundan sonra da milli maraqlarını təhdid edən istənilən gücü yerinə otuzdurmaq qüdrətindədir.
Yasəmən MUSAYEVA,
"Azərbaycan"
