Azərbaycanın öz suverenliyini bütün ölkə ərazisində bərpa etməsi bəzi dairələri hələ də narahat etməkdədir. Ölkəmizin Cənubi Qafqazda formalaşdırdığı yeni reallıqları həzm etməkdə çətinlik çəkən həmin qüvvələr, eləcə də onların nəzarətində olan media resursları köhnə ambisiyalarından əl çəkmirlər.
Münaqişə səhifəsinin qapanmasına, Azərbaycan-Ermənistan sülh prosesində əhəmiyyətli məsafə qət edilməsinə baxmayaraq, müəyyən mərkəzlər tərəfindən qondarma terminlərin və separatizmi təşviq edən ifadələrin gündəmə daşınmasını müşahidə edirik. Belə qərəzli yanaşmalar bəzən diplomatik bəyanatlarda, bəzən isə kütləvi informasiya vasitələrində özünü büruzə verir. Bunun ən son nümunəsi Rusiyanın dövlət mediasında qeydə alınıb. Mayın 6-da Rusiya dövlət televiziyası olan "1-ci" kanalın "Zaman göstərər" ("Vremya pokajet") verilişində Azərbaycan Respublikasının təhrif olunmuş xəritəsi nümayiş etdirilib. Xəritədə qondarma "Dağlıq Qarabağ" adlandırılan ərazi yerləşdirilib.
Rəsmi Bakı təxribata sərt etirazını bildirib. Xarici İşlər Nazirliyinin (XİN) mətbuat katibi Ayxan Hacızadə deyib ki, Rusiyanın dövlət kanalında təhrif olunmuş xəritənin nümayiş etdirilməsi, mövcud olmayan qondarma "Dağlıq Qarabağ" ifadəsinin yer alması ciddi təxribat və qəbuledilməz siyasi manipulyasiyadır. XİN rəsmisinin sözlərinə görə, Azərbaycanın suverenliyi və ərazi bütövlüyü tam şəkildə bərpa olunub və bu reallıq Rusiya Federasiyası daxil olmaqla beynəlxalq ictimaiyyət tərəfindən tanınır. Həmçinin qeyd olunub ki, bu cür saxta və separatizmi təşviq edən elementlərin tirajlanması Azərbaycan-Rusiya münasibətlərini də zədələyir: "Dövlətə məxsus media resurslarının məsuliyyətsiz və qərəzli yanaşması yolverilməzdir və qarşı tərəfdən bu məsələyə aydın izah verilməsi, eləcə də belə halların təkrarlanmaması üçün zəruri tədbirlərin görülməsi gözlənilir".
Xarici İşlər Nazirliyinin məsələyə kəskin reaksiyası rəsmi Bakının suverenlik məsələsində "qırmızı xətləri"nin dəyişməz olduğunu göstərir. Azərbaycan bu cür halların "səhvən" edildiyinə dair bəhanələri artıq qəbul etmir və bunu birbaşa siyasi manipulyasiya kimi görür. Təbii ki, Rusiyanın dövlət kanalında Azərbaycanın təhrif olunmuş xəritəsinin nümayişi sıradan bir jurnalist səhlənkarlığı kimi qiymətləndirilə bilməz. Rusiya Federasiyası rəsmi səviyyədə Azərbaycanın ərazi bütövlüyünü tanıdığını dəfələrlə bəyan etsə də, dövlət büdcəsindən maliyyələşən bir kanalda qondarma ifadənin yer alması ikili standartın nümunəsidir. Azərbaycanın rəsmi olaraq ləğv etdiyi bir inzibati vahidin adını çəkmək ölkəmizin daxili qanunvericiliyinə hörmətsizlikdir. Dövlət kanalının bu addımı 2022-ci ilin fevralında imzalanmış Müttəfiqlik Qarşılıqlı Fəaliyyəti haqqında Bəyannamənin ruhuna da ziddir.
Rusiyanın dövlət televiziyası və digər dairələr "məsələ hələ bitməyib" mesajını verməyə çalışsalar da, Qarabağ məsələsi çoxdan qapadılıb və artıq gündəmdə belə bir mövzu yoxdur. Çünki Azərbaycan bu məsələni hərbi, siyasi və hüquqi müstəvidə birdəfəlik həll edib. Moskva daxil olmaqla, BMT və digər beynəlxalq təşkilatlar hər zaman Qarabağı Azərbaycanın ayrılmaz hissəsi kimi tanıyıb. Ermənistan rəhbərliyi də müxtəlif beynəlxalq platformalarda Azərbaycanın ərazi bütövlüyünü tanıdığını rəsmən bəyan edib. Belə olan halda, kənar dairələrin xəritə manipulyasiyası xülyaların "reallıq" kimi qələmə verilməsi, revanşist qrupları ovundurmaq cəhdidir. Bu məkrli əməlin Ermənistanda keçiriləcək parlament seçkiləri ərəfəsində ortaya çıxması da təsadüfi sayılmamalıdır.
Qərəzli dairələr həqiqəti qəbul etməlidir. Bu cür manipulyasiyalar nə regiondakı hərbi-siyasi balansı dəyişmək, nə də Azərbaycanın mütləq suverenliyinə kölgə salmaq gücündədir. Reallıq hansısa televiziyada çəkilən xəritələrdə yox, Xankəndi, Şuşa və Xocalıda dalğalanan üçrəngli bayrağımızda, regionda aparılan nəhəng quruculuq işlərində öz təsdiqini tapıb.
İsmayıl QOCAYEV,
"Azərbaycan"
