Tarixə ölümlə, qanla yazılan 1941-1945-ci il müharibəsindən 81 il ötür. İkinci Dünya müharibəsi adlandırdığımız o savaşda elə bir ailə, elə bir ev olmamışdır ki, öz əzizini itirməsin. Onların fədakarlığı, qəhrəmanlığı Azərbaycanın silinməyən tarixidir.
Əslən Ağsu rayonundan olan və sonralar həyatını Sumqayıtla bağlayan Rübabə Əzizovanın atası Səfər Şıxəliyev İkinci Dünya müharibəsinin odlu yollarını keçib. O, 1920-ci il noyabrın 20-də Şamaxı qəzasında - Ağsunun Rəhimağalı kəndində doğulub. Boy-buxunlu və cüssəli idi. 1942-ci ilin yanvarında cəbhəyə gedib və 1945-ci ilin mart ayınadək döyüşlərdə iştirak edib. Səfər Şıxəliyevin ağır döyüş yolu Kaluqa, Tula, Smolenski, Belarusdan keçib.
1943-cü ilin payızında baş serjant Səfər Şıxəliyevin döyüşdüyü 1320-ci atıcı alayına Belarusdakı Pin bataqlığını düşməndən azad etmək əmri verilmişdi. Hücuma gecəyarı başlandı, avtomatlar işə düşdü. Faşistlərin fişənglərindən ətraf aydın görünürdü. Səfər Ərəbuşağılı kəndindən Əziz və İlxıçılı kəndindən Xankişi ilə bir yerdə döyüşürdü. Həmin döyüşdə düşmənin 5 tankı elə yerindəcə susduruldu.
Sovet qoşunları Qərbi Belarusa tərəf irəliləyirdi. Səfər Şıxəliyevin atıcı alayı Qomel şəhəri yaxınlığındakı çayı düşməndən azad etmək, sahildəki kiçik təpədə istehkam yaratmış düşmənə ağır zərbə endirmək barədə əmr almışdı. Amma 3 gün idi ki, çaya yaxın düşmək mümkün deyildi. Üçüncü gecə səhər üzü alay hücuma keçdi. Gözlənilməz hücumdan qorxuya düşən faşistlər müqavimət göstərsələr də, bunun mənasız olduğunu bilib sahili tərk etdilər. Həmin döyüşdə faşistlərin xeyli döyüş ləvazimatı ələ keçirildi.
Göstərdiyi şücaətə görə həmyerlimiz Səfər Şıxəliyev "İgidliyə görə" medalına layiq görüldü. "Şöhrət" ordeni isə Qərbi Belarus uğrundakı igidliklərinin yadigarıdır. Ona ordeni cəbhə komandanı şəxsən təqdim etmişdi.
Sonralar yaralanan Səfər Ryazandakı hospitalda müalicə olunur. 1945-ci il iyun ayının 5-dək müalicəsini başa vurub vətənə dönmüşdür.
Müharibədən sonra indiki Bakı Dövlət Universitetinin Tarix fakültəsində təhsil alan Səfər Ağsu rayonunun bir neçə kəndində, o cümlədən Çaparlı kənd səkkizillik məktəbində çalışmış, uzun illər məktəb direktoru olmuşdur. Səfər müəllim tarix və coğrafiya fənlərini tədris etməklə yanaşı, yetirmələrinin vətənpərvər ruhda böyümələri üçün səmərəli iş aparmışdır.
O, həm də el ağsaqqalı, tanınmış ziyalı idi. El-obada hamı bir işə başlayanda onunla məsləhətləşərdi, hər hansı bir iş Səfər müəllimin xeyir-duası ilə baş tutardı. Nümunəvi ailə başçısı olan S.Şıxəliyev həm də Ağsudan yeganə döyüşçü olmuşdur ki, "Şöhrət" ordeni ilə təltif edilmişdi. Gənclərə örnək olan Səfər müəllim 1997-ci ildə dünyasını dəyişmişdir.
Sübhan QULİYEV,
"Sumqayıt" qəzetinin baş redaktoru
677jpg_1781134810.jpg)
