Bir il gələcəyin nəqliyyat sisteminin qurulmasında mühüm mərhələ oldu
Bəri başdan deyək ki, Beynəlxalq Nəqliyyat Forumu (BNF) qlobal əməkdaşlığın, təcrübə mübadiləsinin və innovativ strategiyaların müzakirə olunduğu platformadır. Tədbir ölkələr arasında nəqliyyat siyasətinin koordinasiyasını gücləndirir, təhlükəsiz, davamlı və səmərəli nəqliyyat sistemlərinin yaradılmasına yol açır. Bundan başqa, statistik məlumatları toplayır və təhlil edir, eləcə də ölkələr arasında təcrübə mübadiləsinə imkan verir.
Məlumat üçün onu da bildirək ki, BNF 2006-cı ildə yaradılıb və Baş qərargahı Parisdədir. Forumun fəaliyyəti əsasən 70-dən çox üzv dövlətin nəqliyyat sahəsindəki siyasətlərini əlaqələndirmək və təkmilləşdirmək üzərində qurulub. Hər il təşkil olunan konfrans və toplantılar fikir mübadiləsi və strateji qərarların formalaşmasına zəmin yaradır. Forumun iş prinsipləri hərtərəfli və davamlıdır. Avtomobil, dəmir yolu, hava və su nəqliyyatı sahələrində hazırlanan tövsiyələr ictimaiyyət və dövlət qurumları üçün yol göstərən bir mənbədir. BNF hər il keçirilir və ən böyük tədbiri "İllik forum" adlanır. Bu forum adətən mayın sonunda və ya iyunun əvvəlində təşkil olunur. Bir neçə gün davam edən tədbirin gündəmində əsasən qlobal nəqliyyat siyasəti, təhlükəsizlik, ekoloji davamlılıq və texnoloji inkişaf mövzuları yer alır.
Forum bu il Azərbaycanın prezidentliyi ilə mayın 6-8-də Almaniyanın Leypsiq şəhərində keçirilib. Azərbaycanın prestijli bir tədbirə rəhbərlik etməsi ölkəmizin regional və beynəlxalq nəqliyyat sahəsində strateji mövqeyini gücləndirir. Leypsiqdə toplaşan nazir və ekspertlər qlobal miqyasda əhəmiyyətli qərarlar və tövsiyələr üzərində fikir mübadiləsi apararaq, gələcəyin nəqliyyat siyasətinin əsas istiqamətlərini müəyyənləşdiriblər. Tədbir "Dayanıqlı nəqliyyatın maliyyələşdirilməsi" mövzusunda keçirilən sammitlə yekunlaşıb. Qeyd edək ki, ötənilki sammitdə 2025 - 2026-cı illər üzrə BNF-yə prezidentlik Çilidən Azərbaycana ötürülüb. Azərbaycan bu vəzifəyə 2023-cü ildə üzv dövlətlərin yekdil qərarı ilə seçilib və prezidentlik missiyasını üzərinə götürüb.
Azərbaycanın rəhbərliyi dövründə qazanılan uğurlar forum iştirakçılarının diqqət mərkəzində olub. Nəqliyyat Nazirləri Şurasının 18-ci iclasında isə iki əsas siyasət tövsiyəsi qəbul edilib: beynəlxalq yükdaşımaların rəqəmsallaşdırılması və şəhər nəqliyyatının inkişafı. Bu təşəbbüslər beynəlxalq nəqliyyatın sürətli, şəffaf və dayanıqlı olması, eləcə də inklüziv və davamlı şəhərlərin formalaşmasına xidmət edir. "İnkişafın sütunları - idarəetmə, innovasiya və əməkdaşlıq" mövzusunda keçirilən açıq görüş də səmərəli olub. Ölkəmizin təşəbbüsü ilə ilk dəfə təşkil olunan prezidentliyin brifinqində Azərbaycan nümayəndə heyəti həyata keçirilən işlər barədə beynəlxalq mediaya məlumat verib. Unutmadan onu da deyək ki, Qana, Panama və Peru təşkilata yeni üzv kimi qoşulublar.
BNF-yə prezidentlik dövrü başa çatan ölkəmiz həmin mərhələni yüksək nəticələrlə yekunlaşdırıb. Azərbaycanın bu etimada layiq görülməsi, əlbəttə ki, təsadüfi deyil. Onun beynəlxalq əməkdaşlıqda fəal rolunun, nəqliyyat sahəsində artan nüfuzunun və etibarlı tərəfdaş kimi qəbul olunmasının təbii nəticəsidir. Rəhbərlik dövründə Azərbaycanın təşəbbüsü ilə bir sıra mühüm beynəlxalq tədbirlər təşkil edilib və qlobal nəqliyyata fayda verən strategiyalar irəli sürülüb. Özəlliklə də "Beynəlxalq yükdaşımaların rəqəmsallaşdırılması" və "Şəhər nəqliyyatının təkmilləşdirilməsi" kimi siyasət tövsiyələri üzv dövlətlər tərəfindən məmnunluqla qəbul edilib. Eyni zamanda ölkəmizin "Şərq-Qərb", "Şimal-Cənub" nəqliyyat dəhlizlərində həyata keçirdiyi strateji layihələr və islahatlar yüksək qiymətləndirilib, Azərbaycanın bu dəhlizlərdə açar ölkə rolu vurğulanıb.
Prezidentlik dövründə Azərbaycan rəqəmsallaşma, dayanıqlı və "ağıllı nəqliyyat" sistemlərinin tətbiqini, eləcə də geniş coğrafiyada əməkdaşlıq və investisiya imkanlarını artırıb, ölkəmizin Avrasiyada strateji mövqeyini bir qədər də möhkəmləndirib. Forum çərçivəsində müəyyən edilmiş beş əsas prioritet ön planda yer alıb: beynəlxalq nəqliyyat əlaqələrinin rəqəmsallaşdırılması, şəhər nəqliyyatının optimallaşdırılması, yeni üzvlərin cəlb olunması, beynəlxalq yükdaşımalar üçün icazələrin genişləndirilməsi və bilik mübadiləsi.
Bütün bunlar göstərir ki, Azərbaycanın BNF-yə uğurlu rəhbərliyi onu qlobal nəqliyyat sahəsində daha fəal və nüfuzlu mövqeyə çıxarıb. Qlobal miqyasda səmərəli, təhlükəsiz və ekoloji cəhətdən davamlı nəqliyyat sistemlərinin yaradılmasına yönəlmiş strateji missiyasını uğurla həyata keçirib. Bu da ona dəlalət edir ki, topladığı təcrübə gələcəkdə Azərbaycanın beynəlxalq platformalarda yeni təşəbbüslərlə çıxış etməsinə zəmin yaradacaq.
Züleyxa ƏLİYEVA,
"Azərbaycan"
