Bitki Mühafizə və Texniki Bitkilər Elmi-Tədqiqat İnstitutunda  Əməkdar elm xadimi, biologiya elmləri doktoru, akademik Siddiqə Məmmədovanın anadan olmasının 100 illiyi münasibətilə tədbir keçirilmişdir.

Tədbir iştirakçıları əvvəlcə akademikin məzarını ziyarət etmiş, tədbirin keçirildiyi akt salonunun önündə görkəmli alimin həyatı, onun Azərbaycan və dünya elminə göstərdiyi xidmətlərdən bəhs edən sərgi ilə tanış olmuşlar.

AMEA-nın vitse-prezidenti, Molekulyar Biologiya və Biotexnologiyalar İnstitutunun baş direktoru akademik İradə Hüseynova çıxış edərək Siddiqə Məmmədovanın elmi və ictimai fəaliyyətindən söz açmış, alimin gələcək nəsillər üçün örnək olduğunu diqqətə çatdırmışdır. 

Sonra Bitki Mühafizə və Texniki Bitkilər Elmi-Tədqiqat İnstitutunun direktoru, AMEA-nın müxbir üzvü, professor İbrahim Cəfərov akademikin keçdiyi həyat yolundan, elmi fəaliyyətindən bəhs edən məruzə ilə çıxış etmişdir. Bildirmişdir ki, ömrünün 60 ildən çoxunu Azərbaycan elminin inkişafına həsr edən alimin rəhbərliyi ilə institutda 5 elmlər doktoru, 70-dən çox elmlər namizədi hazırlanmışdır. 

AMEA-nın Gəncə bölməsinin sədri akademik Fuad Əliyev isə Siddiqə xanımın zəngin irsinin, apardığı tədqiqatların Azərbaycan aqrar elminin inkişafındakı müstəsna rolundan danışmış, görkəmli alimin bütün uğur və nailiyyətlərinin bünövrəsində daim gərgin zəhmətin, aqrar elmin inkişafı yolundakı səmərəli fəaliyyətin və möhtəşəm xidmətlərin durduğunu vurğulamışdır.

Azərbaycan Dövlət Aqrar Universitetinin rektoru dosent Zəfər Qurbanov çıxışında qeyd etmişdir ki, görkəmli ictimai xadim, yaradıcı və fədakar alim, bitki mühafizəsi sahəsi üzrə keçmiş SSRİ məkanında tanınmış entomoloq, kamil pedaqoq Siddiqə Məmmədova Azərbaycanın böyük elm xadimlərindən biri olmuşdur.

Milli Məclisin deputatı Naqif Həmzəyev, Kənd Təsərrüfatı İşçilərinin Həmkarlar İttifaqı Birliyinin sədri Fuad Məmmədov, YAP Gəncə şəhər təşkilatının sədri Bayram Aslanov, Genetik Ehtiyatlar İnstitutunun direktoru Zeynal Əkbərov, Gəncə Dövlət Universitetinin kafedra müdiri Vaqif Novruzov, Torpaqşünaslıq və Aqrokimya İnstitutunun direktoru Əlövsət Quliyev, Əkinçilik Elmi-Tədqiqat İnstitutunun direktoru Faiq Xudayev, Şərur rayon Veteranlar Şurasının sədri Vidadi Süleymanov, Şərur rayon Şəhriyar kənd tam orta məktəbinin tədris hissə müdiri Sevda Seyidova, eləcə də akademikin tələbələri çıxış edərək Siddiqə Məmmədovanın entomoloq alim kimi fəaliyyətindən danışmış, onun yüksək insani keyfiyyətlərə malik olduğunu diqqətə çatdırmışlar.

Sonda akademik Siddiqə Məmmədovanın ailə üzvləri adından oğlu, Dövlət İmtahan Mərkəzinin İdarə Heyəti sədrinin müavini Bəhram Xəlilov çıxış edərək tədbirin təşkilatçılarına və iştirakçılarına minnətdarlığını bildirmişdir.

Sabir ƏLİYEV,

"Azərbaycan"