Ölkəmiz hər zaman türk dövlətlərinin birləşməsinə böyük önəm verib
Ulu Öndər Heydər Əliyevin "bir millət, iki dövlət" kimi xarakterizə etdiyi Azərbaycan-Türkiyə münasibətləri tarixindəki ən yüksək zirvəyə ucalıb. Təməl gücünü ortaq tarixi köklərimizdən, dil, din birliyimizdən alan qardaş ölkələrin ikitərəfli əlaqələri gündən-günə inkişaf edərək yeni mərhələyə qədəm qoyub, strateji müttəfiqlik səviyyəsinə qalxıb.
Danılmaz gerçəklikdir ki, məhz Türkiyə-Azərbaycan birliyi ümumilikdə regionda sülh və təhlükəsizliyin bərqərar olmasına birbaşa təsir göstərən güc amilinə çevrilib. Müasir dünyanın geosiyasi gerçəklikləri fonunda da iki qardaş ölkənin, ümumilikdə türk dünyasının həmrəyliyinin vacib çağırış olması danılmaz həqiqətdir.
Azərbaycanla Türkiyə arasındakı qardaşlıq münasibətləri prezidentlər İlham Əliyev və Rəcəb Tayyib Ərdoğanın dostluqları və səyləri sayəsində daha da inkişaf edir.
Martın 5-də Ankarada İğdır-Naxçıvan qaz kəmərinin videobağlantı formatında açılış mərasimində çıxış edən Prezident İlham Əliyev də məhz bu məqama xüsusi vurğu etdi: "Türk dünyasının birləşməsi yolunda əziz Qardaşım, hörmətli Cümhurbaşqanının çox böyük rolu var. Onun liderliyi ilə həm Türkiyədə böyük uğurlar əldə edildi, həm türk dünyasının daha da sıx birləşməsi üçün yeni imkanlar yarandı. Azərbaycan da hər zaman türk dünyasının birləşməsinə çox böyük önəm verirdi və öz tərəfindən bu birliyi təmin etmək, bunu əbədi etmək və ortaq maraqlar və ortaq tarix üzərində əlaqələri qurmaq üçün səylərini əsirgəmirdi".
Güc birlikdədir
Azərbaycan və Türkiyə bütün beynəlxalq platformalarda bir-birilərinə dəstək verirlər, dövlətçiliyimizə, xalqlarımızın varlığına təhdidlərə qarşı birgə mübarizə aparırlar. 44 günlük Vətən müharibəsi zamanı Türkiyənin siyasi, mənəvi dəstəyini ən yüksək səviyyədə hiss etməsi Azərbaycana əlavə güc verdi. Bu, düşmənlərimizə Azərbaycanın tək olmadığını, onun Türkiyə kimi qardaşı olduğunu göstərdi.
2020-ci il dekabrın 10-da Azadlıq meydanında keçirilən Zəfər paradında qardaş ölkələrin prezidentləri - İlham Əliyev ilə Rəcəb Tayyib Ərdoğanın yan-yana dayanması da ölkələrimizin güc birliyinin təntənəli nümayişi idi.
2021-ci il iyunun 15-də - Milli Qurtuluş Günündə Türkiyə ilə Azərbaycan arasında tarixi Şuşa Bəyannaməsi imzalandı. Həmin əlamətdar gün Azərbaycan Prezidenti Türkiyə Prezidentini Qarabağda qarşıladı və mədəniyyət paytaxtımızda iki dövlət arasında müttəfiqlik münasibətlərinə dair Şuşa Bəyannaməsi imzalandı. Türk dünyasının qələbə simvoluna çevrilən Şuşa şəhərində imzalanan bu bəyannamə ilə iki ölkə arasında əlaqələr strateji müttəfiqlik səviyyəsinə yüksəldi.
Bəyannamədə təsbit olunub ki, bundan sonra da qardaş ölkələr çətin gündə, xoş gündə bir-birinin yanında olacaqlar. Şuşa Bəyannaməsinin vacib məqamlarından biri də sülh və əməkdaşlığı təşviq etməyə yönəlməsidir.
Eyni zamanda bu tarixi bəyannamə Azərbaycan və Türkiyənin güc mərkəzləri kimi mövqelərinin möhkəmlənməsinə birbaşa zəmin yaradıb. O da təsadüfi deyil ki, bu gün regionla bağlı istənilən layihə məhz Türkiyə və Azərbaycanla məsləhətləşdirilərək həyata keçirilir.
Dostluğun, qardaşlığın təzahürü
Martın 5-də Ankarada İğdır-Naxçıvan qaz kəmərinin videobağlantı formatında açılış mərasiminin keçirilməsi də Türkiyə-Azərbaycan tarixinə əlamətdar hadisə kimi yazıldı. Bir əsrdən çoxdur ki, qədim yurdumuz Naxçıvan Azərbaycanın əsas hissəsindən ayrı salınıb, Ermənistanın təcavüz və işğal siyasəti nəticəsində bu bölgəmiz hələ də blokada şəraitində yaşayır. Bu baxımdan İğdır-Naxçıvan qaz kəmərinin çəkilməsinin böyük əhəmiyyəti var və bunun sayəsində Naxçıvan qazla bağlı problemdən xilas olacaq.
Sözügedən açılış mərasimində dövlətimizin başçısı İlham Əliyev söylədi ki, bugünkü mərasim bir daha Türkiyə-Azərbaycan birliyini, dostluğunu, qardaşlığını göstərir, onun əyani təzahürüdür.
Türkiyə Prezidenti Rəcəb Tayyib Ərdoğan da öz növbəsində dedi ki, İğdır-Naxçıvan təbii qaz boru kəməri enerji sahəsində daha əvvəlki strateji təşəbbüslərimizi tamamlayacaq, həmçinin Naxçıvan ilə ortaq taleyimizin bir nişanəsi olacaq: "Beləliklə, Naxçıvanın enerji təhlükəsizliyini uzun illər təmin edəcək bir layihəni qardaşımla birlikdə ölkələrimizə qazandırmış oluruq".
Ümumiyyətlə, Türkiyə və Azərbaycan enerji, nəqliyyat sahələrində Bakı-Tbilisi-Ceyhan, Bakı-Tbilisi-Ərzurum, TANAP kimi neft-qaz boru xətləri, Bakı-Tbilisi-Qars dəmir yolu kimi nəhəng layihələr reallaşdırıblar. Bu isə xalqlarımızın, ölkələrimizin rifah halının yaxşılaşdırılmasına, inkişafına, tərəqqisinə birbaşa təsir göstərir. Həmçinin bu layihələr qlobal əhəmiyyətləri ilə diqqət çəkirlər.
Çərşənbə günü Ankarada videobağlantı formatında keçirilən açılış mərasimində çıxış edən Prezident İlham Əliyev də qeyd etdi ki, bu gün Türkiyəni Azərbaycanla birləşdirən Bakı-Tbilisi-Qars dəmir yolu çox gözəl üstünlüklər təmin edir, həm ölkələrimiz üçün, həm daha geniş coğrafiya üçün: "Xüsusilə türk dünyasını birləşdirmək üçün bu nəqliyyat bağlantısının çox böyük mənası, çox böyük faydası var və təbii olaraq, Türkiyə ilə Azərbaycan arasındakı birlik, qardaşlıq bütün türk dünyasına böyük bir töhfədir".
Göründüyü kimi, Türkiyə ilə Azərbaycan arasında əlaqələr hərtərəfli şəkildə inkişaf edir. Həmçinin iki ölkənin həmrəyliyi ümumilikdə türk dünyasının birgəliyinə, qlobal gücə çevrilməsinə böyük təkan verir. Çünki hazırda dünyada yaranan yeni siyasi, iqtisadi, hərbi qütbləşmələrin qarşısına türkdilli dövlətlərin birləşmiş gücü ilə çıxmağın qalibiyyətə aparan yol olduğu da danılmaz reallıqdır.
Yasəmən MUSAYEVA,
"Azərbaycan"
jpg_1766048684.jpg)
