Bakının qətiyyəti və sərt mövqeyi Tehranın geri çəkilməsi ilə nəticələndi
İranın Naxçıvan istiqamətində pilotsuz uçuş aparatları ilə həyata keçirdiyi terror, sadəcə, hərbi təxribat deyil, həm də bölgədə uzun müddətdir saxlanılan həssas müvazinətin və dostluq bəyanatlarının darmadağın edilməsidir. Azərbaycanın müstəqil xarici kurs izləməsi və öz torpaqlarından heç bir ölkəyə, o cümlədən İrana qarşı istifadəyə icazə verməməsi rəsmi Bakının sərgilədiyi ali ləyaqət göstəricisidir.
Lakin İranın bu etibardan sui-istifadə edərək Naxçıvanı hədəf seçməsi regiondakı bütün mənəvi və siyasi bağları qoparan strateji yanlışlıqdır. Bu aqressiv həmlə Azərbaycanın dövlət müstəqilliyinə qarşı aşkar hədə olmaqla bərabər, illərlə gizli saxlanılan mənfur planların da üzə çıxması deməkdir. Təbii ki, dövlətimiz bu qədirbilməzliyi yaddaşından silməyəcək. Azərbaycan öz ərazisinin hər qarışını müdafiə etmək naminə istər diplomatiya müstəvisində, istərsə də döyüş meydanında ən kəskin və qətiyyətli addımları atmaq gücünə sahibdir.
Prezident İlham Əliyevin martın 5-də Təhlükəsizlik Şurasındakı çıxışı Azərbaycanın dövlət maraqlarının qorunmasında güzəştsiz olduğunu və milli qürur məsələlərində geri addım atmayacağını göstərən tarixi bir bəyanatdır. Dövlət başçısının hadisələrə verdiyi operativ və kəskin reaksiyası, Azərbaycanın öz suverenliyini qorumaq əzmini bütün dünyaya nümayiş etdirdi. Prezident bu mənfur hadisəni törədənləri sərt şəkildə qınadı və günahkarların cəzalandırılmasını, rəsmi Tehranın üzr istəməsini tələb etdi: "Azərbaycan dövləti bu çirkin terror aktını qətiyyətlə pisləyir, bunu törədənlər dərhal məsuliyyətə cəlb edilməlidir. Azərbaycan tərəfinə İran rəsmiləri tərəfindən izahat verilməlidir, üzr istənilməlidir və bu terror aktını törədənlər cinayət məsuliyyətinə cəlb edilməlidir".
Dövlət başçısı hadisəni birbaşa çirkin terror aktı adlandırmaqla məsələnin mahiyyətini beynəlxalq hüquq müstəvisinə çıxartdı. Tehranın Azərbaycandan rəsmi şəkildə üzr istəməsi tələbi ölkəmizin regional güc mərkəzi kimi özünə qarşı hörmətsizliyə dözməyəcəyinin nümayişidir. Bu, təkcə cinayətkarın deyil, həm də belə bir aktın arxasında duran siyasi iradənin məsuliyyət daşıdığını vurğulayan kəskin mövqedir.
İranın Azərbaycana qarşı dəfələrlə təxribatlara əl atdığını deyən Prezidentimiz 2023-cü il yanvarın 27-də Tehrandakı səfirliyimizə terror hücumunu və İranın teraktdan sonra sərgilədiyi ikiüzlü yanaşmanı yenidən xatırlatdı: "Birinci dəfə deyil ki, İran dövləti Azərbaycana və azərbaycanlılara qarşı terror aktları həyata keçirir. Hamımız yaxşı xatırlayırıq ki, bir müddət bundan əvvəl Azərbaycanın Tehrandakı səfirliyi terror aktına məruz qalmışdır".
Dövlətimizin başçısı 2023-cü ildə ölkəmizin səfirliyinə hücumu xatırlatmaqla İranın siyasətindəki sistemli xəyanəti ifşa etdi. "İkiüzlü yanaşma" ifadəsi İranın diplomatik ritorikası ilə real əməlləri arasındakı uçurumu göstərir. Bu, həm də beynəlxalq birliyə verilən bir mesajdır: İran tərəfi etibarlı tərəfdaş deyil və törətdiyi əməllərə görə bəhanələrin arxasında gizlənə bilməz. Prezident terrorçunun edam edilməsi nümunəsini çəkməklə İranın yalnız güc dilindən anladığını və Azərbaycanın bu dili ən yüksək səviyyədə tətbiq etməyə hazır olduğunu xatırlatdı.
Prezidentimiz diqqətə çatdırdı ki, törədilən terror aktı böyük nankorluqdur: "Son hadisələr baş verən kimi biz onlara xəbər göndərdik, başsağlığı verdik. Xarici işlər naziri mənim göstərişimlə həmkarı ilə danışdı. Mən onların səfirliyinə gedib başsağlığı vermək üçün öz mövqeyimi bildirdim. Halbuki məndən başqa heç bir dövlət başçısı İranın heç bir səfirliyinə getməyib. Yəni bunu qiymətləndirməmək, bunu yerə vurmaq, özlərini alçaq, nankorlar kimi aparmaq heç kimə şərəf gətirmir. Bu şərəfsizlər, bizə qarşı bu terror aktını törədənlər peşman olacaqlar. Bizim gücümüzü sınamasınlar. Bizim gücümüzü sınamaq istəyənlərin başı "dəmir yumruq" vasitəsilə yarıldı. Bugünkü hadisə də eyni nəticəni hasil edəcək". Ölkəmizin rəhbərinin "bizim gücümüzü sınamasınlar" xəbərdarlığı kulminasiya nöqtəsidir. Azərbaycan sülh tərəfdarıdır, lakin səbrimizi zəiflik kimi qiymətləndirənlərin aqibəti çox ağır olacaq.
Prezident İlham Əliyevin Təhlükəsizlik Şurasındakı kəskin çıxışı Tehranın "hədə-qorxu" siyasətini bir neçə saatın içində iflasa uğratdı. İran tərəfi əvvəlcə aqressiv və inkarçı mövqe nümayiş etdirsə də, Azərbaycanın Silahlı Qüvvələri tam hazır vəziyyətə gətirməsi və sərhədləri bağlaması vəziyyəti kökündən dəyişdi. Azərbaycanın geri addım atmayan mövqeyi qarşısında İran tərəfi ritorikasını yumşaltmağa məcbur oldu və məsələnin araşdırılacağı ilə bağlı bəyanatlar verməklə geri çəkilməsini nümayiş etdirdi. İranın xarici işlər naziri Seyid Abbas Əraqçi Azərbaycanın xarici işlər naziri Ceyhun Bayramova zəng vuraraq hadisənin araşdırılacağını dedi. C.Bayramov İran tərəfindən hücumla bağlı üzr istənilməsini, araşdırmaların nəticələrinə dair qısa müddət ərzində izahat verilməsini, bu kimi halların gələcəkdə təkrarlanmaması üçün zəruri tədbirlər görülməsini gözlədiyimizi qarşı tərəfin diqqətinə çatdırdı. Bu zəng, sadəcə, diplomatik protokol deyil, rəsmi Tehranın Azərbaycanın iradəsi qarşısında aciz qaldığının etirafı idi.
Naxçıvana dron hücumundan sonra dünya liderləri də Prezident İlham Əliyevə telefon zəngləri edərək İranın çirkin hərəkətlərini sərt formada pislədilər. Bu hücum təkcə Azərbaycanın deyil, regionun təhlükəsizliyinə təhdid kimi qiymətləndirildi. Dünya liderlərinin telefon zəngləri Bakıya olan etimadın və İranın izolyasiyasının göstəricisidir. Eyni zamanda Azərbaycanın beynəlxalq arenada tam dəstəkləndiyinin, güclü mövqeyə və müttəfiqlərə sahib olduğunun təzahürüdür.
Bu hadisə sübut etdi ki, İranın təxribatçı addımları onu beynəlxalq aləmdə daha da tənha qoyur. Dünya birliyi Azərbaycanın suverenliyinə olan hücumu qlobal sabitliyə hücum kimi qəbul etdi. Nəticə etibarilə İranın geri çəkilməsi Azərbaycanın "dəmir yumruq" siyasətinin həm meydanda, həm də masada işlədiyini sübut etdi. Naxçıvana olan hücüm Tehran üçün strateji məğlubiyyətlə nəticələndi: onlar həm hərbi məqsədlərinə nail ola bilmədilər, həm də nüfuzlarını tamamilə itirdilər.
İsmayıl QOCAYEV,
"Azərbaycan"
jpg_1775472819.jpg)
