Regional gərginliklərin azaldılmasına hədəflənən addımlar ölkəmizin xarici siyasət kursunda başlıca yerlərdən birini tutur. O da danılmaz faktdır ki, dünyada sabitliyin ən mühüm şərti münaqişələrin dialoq yolu ilə həllidir. Bu baxımdan Amerika Birləşmiş Ştatları və qonşu İran İslam Respublikası arasında elan olunmuş atəşkəs razılaşması Azərbaycan tərəfindən yüksək qiymətləndirilir və alqışlanır. Ölkəmiz əldə olunmuş bu atəşkəsi gərginliyin azalması ilə yanaşı, regionun hərtərəfli inkişafı üçün yeni mərhələ kimi dəyərləndirir.
Atəşkəs alqışlanıb
Aprelin 8-də Prezident İlham Əliyev ilə İran Prezidenti Məsud Pezeşkian arasında baş tutan telefon danışığı ölkəmizin mehriban qonşuluq siyasətinə sadiqliyinin bariz nümunəsidir. Dövlətimizin başçısı İran İslam Respublikası və Amerika Birləşmiş Ştatları arasında elan edilmiş atəşkəslə bağlı təbriklərini çatdırıb. Məsud Pezeşkian bu təbriklərə və ölkəmizin İrana göstərdiyi humanitar yardıma görə dövlətimizin başçısına minnətdarlığını bildirib. Telefon söhbəti zamanı ikitərəfli əməkdaşlığa dair məsələlər barədə fikir mübadiləsi aparılıb.
ABŞ-İran arasında sülh gündəminin detalları eyni gündə xarici işlər nazirləri səviyyəsində də müzakirə olunub. Belə ki, Azərbaycanın xarici işlər naziri Ceyhun Bayramov ilə İranın xarici işlər naziri Seyid Abbas Əraqçi arasında telefon danışığı baş tutub. Telefon danışığı zamanı tərəflər regionda mövcud təhlükəsizlik vəziyyəti və əldə olunmuş atəşkəs barədə fikir mübadiləsi aparıblar.
Ceyhun Bayramov elan olunmuş atəşkəsi alqışlayıb. Atəşkəsin təmin olunmasının gərginliyin azaldılması, danışıqların uğurla nəticələnməsi və sabitliyin bərqərar olunması baxımından əhəmiyyəti vurğulanıb. Atəşkəsin əldə olunmasında vasitəçi ölkələrin, xüsusilə də dost və qardaş Pakistanın rolu təqdir olunub.
C.Bayramov atəşkəs rejiminə riayət olunmasının vacibliyini qeyd edərək, vəziyyətin diplomatik yollarla həllinin önəmini diqqətə çatdırıb, İslamabadda aparılacaq danışıqların nəticəyönümlü və məhsuldar olacağına ümidini bildirib.
Azərbaycanın hər zaman regionda davamlı sülhün, təhlükəsizliyin və əməkdaşlığın möhkəmləndirilməsinə yönəlmiş təşəbbüsləri dəstəkləməyə hazır olduğu Ceyhun Bayramov tərəfindən vurğulanıb.
Ərazilərinin işğalına son qoyulmasından sonra ölkəmizin regionda yaratdığı yeni reallıq qarşılıqlı hörmət və dinc yanaşı yaşama prinsipləri üzərində qurulub. Azərbaycanın irəli sürdüyü sülh gündəmi Cənubi Qafqazla yanaşı, geniş coğrafiyada sabitliyin bərqərar olmasına xidmət edir. Beynəlxalq münasibətlər sistemində hər zaman sülhün və ədalətin tərəfdarı kimi çıxış edən ölkəmiz yürütdüyü müstəqil və balanslaşdırılmış siyasəti ilə diqqət çəkir. Təsadüfi deyil ki, Azərbaycan Donald Trampın təsis etdiyi Sülh Şurasının təsisçi üzvlərindən biridir. Bu isə onun qlobal barışa xidmət etməsinə ən bariz nümunələrdəndir. Qonşu İranda cərəyan edən hadisələrin sülh yolu ilə həllinə tərəfdar olduğunu bəyan etməsi, tərəfləri daim dialoqa səsləməsi də buna nümunədir.
Rifah və dialoqun tərəfdarı
Ümumiyyyətlə, rəsmi Bakı hər zaman gərginliyin, qarşıdurmanın deyil, dialoqun, rifahın tərəfdarı olaraq çıxış edir. Qonşuları ilə münasibətlərdə suverenliyə hörmət və daxili işlərə qarışmama prinsiplərinə sadiqlik göstərir.
Onu da vurğulayaq ki, İranla mehriban qonşuluq əlaqələrinə malik Azərbaycan ABŞ ilə səmimi dostluğa dayanan strateji tərəfdaşlıq qurub. Buna görə də adıçəkilən ölkələr arasında hərbi qarşıdurma Bakı üçün arzuolunan deyil və tərəflərin ortaq məxrəcə gəlmələri istiqamətində daim səylər nümayiş etdirilib. Hətta bu prosesdə Azərbaycanın uğurlu vasitəçiliyi də təklif olunub.
Cari il yanvarın 31-də Prezident İlham Əliyev İran Prezidenti Məsud Pezeşkiana zəng edən zaman dövlətimizin başçısı bölgədə yaranmış vəziyyətin narahatlıq doğurduğunu ifadə edərək Azərbaycanın gərginliyin aradan qaldırılmasına töhfə verməyə hazır olduğunu bildirib və ölkəmizin bu kimi məsələlərin danışıqlar və qarşılıqlı anlaşma yolu ilə həllinin tərəfdarı olduğunu vurğulayıb.
Həmçinin bu il martın 1-də Prezident İlham Əliyevin İran Prezidenti Məsud Pezeşkiana ünvanladığı məktubda dost İran xalqının üzüntüsü dərindən paylaşılıb. Ölkəmizin rəhbəri vurğulayıb ki, bu çətin gündə dost və qardaş İran xalqına sülh, sabitlik və əmin-amanlıq arzulayırıq. Bu məktub ölkəmizin gərginliyin deyil, rifahın tərəfdarı olduğunun növbəti təsdiqidir.
Bu gün Azərbaycan regionda əsl "təhlükəsizlik adası"na çevrilib. İranda yaranmış mürəkkəb vəziyyətlə əlaqədar xarici ölkə vətəndaşlarının təxliyə üçün məhz Azərbaycanı seçməsi təsadüfi deyildi. Çünki həmin əcnəbi vətəndaşlar əmin idilər ki, humanizm dəyərlərinin yüksək şəkildə təşəkkül tapdığı Azərbaycan təxliyə üçün ən təhlükəsiz ölkədir. Azərbaycan dövləti humanitar prinsipləri rəhbər tutaraq həmin şəxslərin təxliyəsi üçün lazımi şərait yaratdı. Əksər dövlətlər vətəndaşlarının rahat təxliyəsi üçün şərait yaradıldığına, ölkəmizdə onlara göstərilən həssas diqqət və qayğıya görə Azərbaycana səmimi minnətdarlıqlarını çatdırdılar.
Azərbaycanın xarici siyasət kursu həm də dərin humanizm prinsiplərinə əsaslanır. Ölkəmiz çətin günlərdə dost və qonşu xalqlara yardım etməyi, humanitar dəstək göstərməyi özünün mənəvi borcu sayır.
Ölkəmiz İrana da çətin gündə yardım əlini uzadan ilk dövlətlərdən biri oldu. Təkcə bu ayın 4-də qonşu və dost İran xalqının hazırkı ehtiyaclarının təmin edilməsi məqsədilə bu ölkəyə növbəti humanitar yardım yola salınıb. Göndərilən yardıma ümumi həcmi 200 ton olan müxtəlif adda ərzaq məhsulları, dərman vasitələri və tibbi ləvazimatlar daxildir. Bu addım Azərbaycanın regionda sülh, mehriban qonşuluq və humanitar həmrəylik tərəfdarı olduğunu bir daha nümayiş etdirir.
Azərbaycan bütün dövlətlərlə normal və bərabərhüquqlu əlaqələrin qurulmasının tərəfdarıdır. Bu istiqamətdə də xarici siyasətimiz uğurla davam etdirilir. Hər zaman bu prinsipə sadiqlik göstərən ölkəmiz məhz bunun sayəsində dünyada etibarlı tərəfdaş kimi tanınır. İranla da mehriban qonşuluq siyasətinin qarşılıqlı olaraq davam etdirilməsi hər iki dövlətin maraqlarına cavab verir. Bu həm də bütövlükdə regionun hərtərəfli inkişafı üçün faydalıdır.
Göründüyü kimi, Azərbaycan sabitliyin və təhlükəsizliyin qarantını qarşıdurmada deyil, sabitlik və sülhdə görür.
Yasəmən MUSAYEVA,
"Azərbaycan"
jpg_1777640773.jpg)
