Ortaq strategiya və baxış bucağı

Azərbaycan Cənubi Qafqazın əsas siyasi və iqtisadi güc mərkəzidir

Prezident İlham Əliyevin həyata keçirdiyi uğurlu xarici siyasət nəticəsində Azərbaycan beynəlxalq münasibətlər sistemində etibarlı tərəfdaş, söz sahibi olan dövlət kimi mövqeyini daha da gücləndirib. Ölkəmiz Cənubi Qafqaz regionunun da əsas siyasi və iqtisadi güc mərkəzinə çevrilib. Bakının balanslaşdırılmış və milli maraqlara əsaslanan xarici siyasəti nəticəsində region ölkələri ilə qarşılıqlı faydalı əməkdaşlıq qurulub. 

Bölgəmizdə siyasi sabitliyin, iqtisadi inkişafın və regional əməkdaşlığın təmin olunmasında Azərbaycan-Gürcüstan münasibətlərinin xüsusi yeri var. İkitərəfli münasibətlər uzun illərdir qarşılıqlı etimad, ortaq maraqlar və strateji tərəfdaşlıq prinsipləri əsasında inkişaf edir. Bu səbəbdən Bakı ilə Tbilisi arasında formalaşmış əməkdaşlıq modeli region üçün ən uğurlu nümunələrdən biri hesab olunur. 

Gürcüstanın Baş naziri İrakli Kobaxidzenin Ümumdünya Şəhərsalma Forumunun 13-cü sessiyasında (WUF13) iştirak etmək məqsədilə Bakıya səfəri çərçivəsində Azərbaycan və Gürcüstan ikitərəfli əməkdaşlığın genişləndirilməsinə dair sənədlərin imzalanması ilə strateji tərəfdaşlıqlarını bir daha təsdiqləyiblər. İmzalanma mərasimi mayın 18-də Bakıda Azərbaycan Prezidenti İlham Əliyev və Gürcüstanın Baş naziri İrakli Kobaxidzenin iştirakı ilə baş tutub. Liderlər imzalanmış sənədlərin əməkdaşlığın genişləndirilməsi baxımından əhəmiyyətini, xüsusən Azərbaycan və Gürcüstanın bir çox ölkə üçün bağlantı habı kimi mühüm rolunu vurğulayıblar. 

Görüşdə dövlətimizin başçısının bu ilin aprelində Gürcüstana dövlət səfəri məmnunluqla xatırlanıb, bu səfərin münasibətlərimizin möhkəmlənməsinə töhfəsi qeyd edilib.

Ölkələrimiz arasında siyasi, iqtisadi-ticari, enerji, nəqliyyat, logistika, sərmayələr və digər sahələrdə əməkdaşlığın genişləndirilməsi üçün böyük potensialın olduğu bildirilib. 

Prezident İlham Əliyevin Gürcüstanın Baş naziri İrakli Kobaxidze ilə görüşü iki dost və qonşu ölkə arasında münasibətlərin strateji xarakterini bir daha nümayiş etdirdi. Bu görüş eyni zamanda Azərbaycanın regionda enerji və nəqliyyat bağlantıları baxımından artan rolunun təsdiqidir. Bakı və Tbilisi təkcə ikitərəfli layihələr üzərində işləmir, həm də Şərqlə Qərb arasında mühüm tranzit körpüsü rolunu oynamaq üçün ortaq strategiya yürüdür. Görüşdə siyasi, ticari, enerji və sərmayə sahələrində böyük potensialın olmasının vurğulanması tərəflərin gələcəkdə daha iri layihələrə imza atmaq niyyətində olduğunu göstərir. 

İki ölkə arasında imzalanmış sənədlərə Azərbaycan Respublikası Hökuməti ilə Gürcüstan Hökuməti arasında təbii qazın Gürcüstana təchizatı barədə Saziş, Azərbaycan Respublikası Hökuməti ilə Gürcüstan Hökuməti arasında Gürcüstana elektrik enerjisinin təchizatı və elektrik enerjisinin Gürcüstan ərazisi vasitəsilə tranziti barədə Saziş və "Bakı-Tbilisi-Qars" yeni dəmir yolu xətti layihəsinin həyata keçirilməsi çərçivəsində Marabda-Türkiyə Respublikası sərhədinə qədər (Kartsaxi) dəmir yolu sahəsinin reabilitasiyası, rekonstruksiyası, inşası üzrə Koordinasiya Şurasının 41-ci iclasının Protokolu daxildir. Sənədlərin tərkibi göstərir ki, tərəflər daha çox iqtisadiyyatın onurğa sütununu təşkil edən sahələrə diqqət ayırırlar. 

Gürcüstan ərazisindən elektrik enerjisinin tranzitinə dair saziş hər iki ölkənin "yaşıl enerji" və alternativ dəhlizlər yaratmaq planları ilə üst-üstə düşür. Bu addım enerji bazarında mövqeyimizi daha da şaxələndirir. Bakı-Tbilisi-Qars dəmir yolu ilə bağlı sənəd də xüsusi əhəmiyyət kəsb edir. Çünki bu marşrut Çindən Avropaya qədər uzanan Orta dəhlizin ən mühüm halqasıdır. 

Gürcüstanın Baş naziri İrakli Kobaxidze "İmedi LIVE" verilişinə müsahibəsində Azərbaycanda imzalanan sənədlərin misilsiz əhəmiyyətə malik olduğunu deyib. Qaz və nəqliyyat sazişlərinə toxunan hökumət başçısı bildirib ki, bu məsələ elektrik enerjisinin idxalı və tranzitinə, eləcə də son 3 ildə dayandırılmış Bakı-Tbilisi-Supsa boru kəmərinə aiddir: "Ölkə ildə on milyonlarla lari məbləğində potensial gəlir itirirdi. Bu boru kəmərinin fəaliyyəti bərpa olunacaq və bunun üçün də yaxşı şərait var". Kobaxidze Gürcüstanla Azərbaycan arasında sərnişin dəmir yolu nəqliyyatının bərpa olunduğunu da vurğulayıb: "Bütün bu razılaşmalar ölkəmizin iqtisadi cəhətdən möhkəmlənməsi, enerji təhlükəsizliyi və tranzit funksiyamızın gücləndirilməsi üçün fundamental əhəmiyyət kəsb edir. Bir daha Azərbaycan tərəfinə dost münasibətinə və müvafiq razılaşmaya görə təşəkkür etmək istəyirəm". 

Baş nazir İrakli Kobaxidzenin imzalanan razılaşmaları yüksək qiymətləndirməsi rəsmi Tbilisinin inkişaf modelini birbaşa Azərbaycanla müttəfiqlikdə gördüyünün rəsmi bəyanı, Bakı ilə münasibətlərə verdiyi önəmin təzahürüdür. Baş nazirin Azərbaycana xüsusi təşəkkürünü ifadə etməsi Bakının çətin iqtisadi və geosiyasi şəraitdə regional tərəfdaşlarına tərəddüdsüz dəstəyindən qaynaqlanır. 

Hökumət başçısının dilə gətirdiyi ən mühüm fakt son 3 ildə fəaliyyəti dayandırılmış Bakı-Tbilisi-Supsa neft boru kəmərinin yenidən işə salınması planıdır. Kəmərin fəaliyyətinin bərpa edilməsi həm Gürcüstanın itirilmiş gəlirlərini geri qaytarır, həm də Azərbaycanın neft ixracı marşrutlarının şaxələndirilməsinə kömək edir. Gürcüstanla Azərbaycan arasında sərnişin dəmir yolu nəqliyyatının bərpa edilməsi isə sosial və turizm baxımından böyük sıçrayış deməkdir. Bu işgüzar və humanitar əlaqələr daha da stimullaşdırılacaqdır. 

Nəticə etibarilə Bakıda imzalanan tarixi sazişlər və bərpaolunan nəqliyyat-enerji xətləri Azərbaycan-Gürcüstan strateji tərəfdaşlığının növbəti nümayişidir. Ortaq və uzaqgörən strategiya bütövlükdə Cənubi Qafqazda uzunmüddətli sabitliyin və təhlükəsizliyin təminatçısı rolunda çıxış edir.

İsmayıl QOCAYEV,

"Azərbaycan"