Azərbaycan Prezidenti İlham Əliyevin Qırğızıstana dövlət səfəri və müttəfiqlik münasibətləri haqqında Müqavilənin imzalanması iki ölkənin tərəfdaşlıqdan müttəfiqlik münasibətlərinə keçməsi prosesinə töhfə verib.
Bu fikri AZƏRTAC ilə politoloq və Qərbi Kaspi Universitetinin professoru Fikrət Sadıxov bölüşüb.
Müqavilənin geniş məsələləri əhatə etdiyini qeyd edən ekspert bildirib: “Xarici siyasət, regionlararası qarşılıqlı fəaliyyət və humanitar məsələlərdə əməkdaşlıq gücləndiriləcək. Beynəlxalq təşkilatlar çərçivəsində bir sıra xarici siyasət məsələləri üzrə vahid mövqe formalaşdırılacaq. Bu, həm Azərbaycanın, həm də Qırğızıstanın maraqlarına uyğundur. İqtisadi münasibətlər möhkəmlənir və daha da inkişaf edərək ən yüksək səviyyəyə çatacaq”.
Azərbaycan-Qırğızıstan Birgə İnvestisiya Fondunun nizamnamə kapitalının artırılmasından danışan politoloq bu qərarı iki ölkə arasında münasibətlərin möhkəmləndirilməsi baxımından çox vacib addım adlandırıb.
“Humanitar komponent də az əhəmiyyət kəsb etmir. Çünki rəsmi, siyasi və diplomatik səviyyələrdə həyata keçiriləcək münasibətlər mədəni mübadilə ilə möhkəmlənəcək ki, bu da şübhəsiz ki, həm mədəniyyət, həm də təhsil sahəsində xalqlar arasında əlaqələrin möhkəmləndirilməsinə töhfə verəcək”, - deyə o əlavə edib.
Fikrət Sadıxov şübhə etmir ki, bu münasibətlər təkcə dünyanın müxtəlif hissələrində yerləşən iki dövlətin deyil, həm də Bakı və Bişkek arasında imzalanan müqavilələr, xarici siyasətlə bağlı bir sıra məsələlərdə ortaq mövqelər çərçivəsində iki regionun maraqlarına tam cavab verəcək.
jpg_1787697443.jpg)
