Fransa vətəndaşlarının 70 faizindən çoxu hesab edir ki, ölkə prezidenti Emmanuel Makron Mişel Barnyeni baş nazir təyin etməklə  parlament seçkilərinin nəticələrinə məhəl qoymayıb. Bunu Elabe sosioloji təşkilatının BFMTV telekanalı üçün keçirdiyi sorğu göstərib.
Telekanal xəbər verir  ki, dörd fransalıdan üçünün fikrincə (74%), Emmanuel Makron parlament seçkilərinin nəticələrini nəzərə almayaraq Mişel Barnyeni baş nazir təyin edib.
Respondentlərin 50 faizi həm də hesab edir ki, yeni hökumət başçısı etimadsızlıq votumundan  qaça bilməyəcək.
Sorğu sentyabrın 5-6-da yaşı 18-dən yuxarı olan 1007 fransız arasında reprezentativ  seçmə nümunəsi üzərində aparılıb. Növbədənkənar parlament seçkilərinin bitməsindən 60 gün sonra, sentyabrın 5-də Makron 73 yaşlı Barnyeni yeni hökumət başçısı təyin edib. O, Beşinci Respublikanın ən gənc baş naziri, 35 yaşlı Qabriel Attalı əvəz edən, bu vəzifədə ən yaşlı siyasətçidir.
Barnye qapalı və mühafizəkar siyasətçi kimi tanınır və bəzən hətta ifrat sağçı baxışların tərəfdarı hesab edilir. O, dəfələrlə Avropaya miqrasiyanın məhdudlaşdırılmasının tərəfdarı olub və hətta sığınacaq axtaran bütün miqrantlar üçün Aİ-yə girişə üç ildən beş ilədək moratorium qoyulmasını təklif edib. Barnye pensiya yaşının  qaldırılmasının və iş gününün uzadılmasının tərəfdarı olub. 
2021-ci ildə o, 2022-ci il seçkilərində prezidentliyə namizədliyini irəli sürmək niyyətində olduğunu açıqlasa da, Respublikaçılar Partiyası Konqresinin nəticələrinə görə, Erik Syotti və Valeri Pekresdən sonra yalnız üçüncü olub.
Mişel Barnyer baş nazir kimi ilk çıxışında Fransa cəmiyyətindəki narazılığı aradan qaldıracağına söz verib. Sələfi Qabriel Attalın səlahiyyətlərinin qəbulu mərasimində çıxış edən yeni hökumət başçısı bildirib ki, onun işinin prioriteti fransız seçicilərinin narazılığına səbəb olan problemlərin həllidir: "Məqsəd çağırışlara, qəzəblərə, iztirablara, tərk edilmə hissinə, şəhər və kəndlərimizdə həddindən artıq çox olan ədalətsizliyə tam cavab verməkdir".
Fransada hazırkı Milli Assambleya üç bloka bölünüb: parlamentin aşağı palatasında ən çox yerə sahib olan, lakin mütləq çoxluğa malik olmayan solçu Yeni Xalq Cəbhəsi (NFP) koalisiyası, Makronun mərkəzçi qrupu və ifrat sağçı "Milli Birlik" Partiyası.
Həm solçular, həm də millətçilər Barnyenin təyinatından narazıdırlar.
Politoloq Dominik Mouazi deyir ki, Mişel Barnyenin baş nazir olması ilə prezident, şübhəsiz ki, hakimiyyətini saxlamağa çalışır. Yeni baş nazir ona meydan oxumur. Onun siyasətinin həddindən artıq mülayimliyi və çıxışlarının barışdırıcı olması prezidentə sərf edir, lakin bu, solçulara səs verən və özünü satılmış hiss edən fransızları qane edə bilməz.
İndi Barnye Milli Assambleyada etimad səsverməsini keçməlidir. Əgər o bundan keçərsə, ondan sonra parçalanmış parlamentlə işləməli olacaq.
Fransa hökumət xərclərinin azaldılması ilə bağlı təkliflərini sentyabrın 20-dək Brüsselə təqdim etməlidir. Lakin bu müddət oktyabr ayına qədər uzadıla bilər. Aİ qaydalarına görə, ölkə 2025-ci ildə büdcəsini 30 milyard avro azaltmalıdır.
Qanun layihəsi oktyabrın 1-də parlamentə təqdim edilməlidir.

Rizvan CƏFƏROV,
"Azərbaycan"