Bu gün Parisdə XVII Paralimpiya Oyunları başa çatır. Planetin ən güclü idmançılarının yarışdığı turnirdə gərgin idman mübarizəsinin şahidi olduq. 
Azərbaycanda da hamı Parisdən medal xəbəri eşitmək ümidi ilə yarışları böyük həyəcanla izlədi.  Bundan əvvəl iştirak etdikləri 7 paralimpiadada qazandıqları medallarla xalqımızı sevindirən Paralimpiya yığmamızın hesabında 11 medal var. Bunlardan 4-ü qızıl, 2-si gümüş və 5-i isə bürünc medaldır.
Dünən daha 6 paralimpiyaçımız medal uğrunda görüşlər keçiriblər.  Ölkəmizin hesabına 4-cü qızıl medalı Orxan Aslanov yazdırıb. İdmançımız T13 kateqoriyasında uzunluğa tullanma yarışında fəxri kürsünün ən yüksək pilləsinə qalxıb. O, 7.29 metr göstərici ilə hamıdan güclü olub. Bu paralimpiya oyunlarında Orxanın 2-ci qızıl medalı olub. 29 yaşlı idmançımız "Tokio-2020"də də qızıl medal qazanmışdı.
Bir neçə gün bundan əvvəl "Paris-2024"də hesabına qızıl medal yazdıran  paraatletimiz Lamiyə Vəliyeva növbəti finalında çıxış edib. Təmsilçimiz T13 kateqoriyasında 400 m məsafədə növbəti medalını qazanıb. Braziliyalı Rayane Silva 1-ci olub. Lamiyə Vəliyeva 55.09 saniyəlik göstərici ilə gümüş medal qazanıb.
Paraüzgüçümüz Raman Saley (S12 kateqoriyası) növbəti medal uğrunda mübarizəyə qoşulub.
O, 100 metr məsafəyə "butterfly" (kəpənək) üsulla üzmədə bürünc qazanıb. 58,13 saniyəlik nəticə göstərən paraüzgüçümüz finiş xəttinə üçüncü çatıb. Bu, onun yarışlarda 3-cü medalı olub.
Qeyd edək ki, Raman Saley bunadək Parisdə 1 gümüş və 1 bürünc medal qazanmışdı. Dünən 3 paracüdoçumuz da tatamiyə çıxıb.
Qadınların yarışında J1 kateqoriyasında Xatirə İsmiyeva (+70 kq), J2 kateqoriyasında Dürsədəf Kərimova (+70 kq) və kişilərin mübarizəsində Azərbaycanın əfsanə paracüdoçularından olan İlham Zəkiyev (+90 kq) J1 kateqoriyasında medallar uğrunda yarışıb.
Qadınların (+70 kq) mübarizəsində J1 kateqoriyasında yarışan Xatirə İsmiyeva ilk görüşdə Maryam Aldhanhaniyə (BƏƏ) "ipponla" qalib gəlib. O 1/4 finalda Nazan Günəşə (Türkiyə) məğlub olub. İsmiyeva bürünc uğrunda təsəlliverici görüşdə venesuelalı Sanabriya Alkala ilə güləşməli olsa da, rəqib tatamiyə çıxmayıb. Nəticədə texniki qələbə qazanan Xatirə bürünc uğrunda görüşdə amerikalı Qarsiya Kristellaya uduzub.
Bu çəkidə J2 kateqoriyasında mübarizə aparan Dürsədəf Kərimovanın 1/4 finalda Rebeka de Souza Silvaya (Braziliya) uduzub. Dürsədəf bürünc uğrunda təsəlliverici görüşdə yerli idmançı Preskiliya Lezzini məğlub edib. Kərimovanın bürünc uğrunda görüşdə rəqibi çinli Vanq Honqyu olub. Məğlub olan paracüdoçumuz yarışı medalsız başa vurub.
Kişilərin +90 kq çəki dərəcəsində J1 kateqoriyasında çıxış edən İlham Zəkiyev 1/4 finalda yerli idmançı Ceyson Qrandraya uduzub. O bürünc uğrunda təsəlliverici görüşdə iştirak edib. Niderlandlı Daniel Kneqtə qalib gələn Zəkiyev bürünc uğrunda həlledici görüşdə iştirak hüququ qazanıb. İdmançımız rəqibi monqolustanlı Qanbat Dashtserenə vaza-ari ilə qalib gəlib.

Elçin CƏFƏROV,
"Azərbaycan"