- Hər gün səhər buraya idman etməyə gəlirəm. Bu gün isə vacib işlərim olduğundan gəlişim günorta saatlarına düşüb. Elə bil sizi gözləyirmişəm...
Əgər fikir vermisinizsə, son illərdə Bakıda salınan əksər parklarda idman qurğuları quraşdırılır. Bu, mənim kimi idmansevərlər üçün çox yaxşı haldır. Təbii ki, zalda da idman edirəm. Amma havalar isinəndə açıq havada, yaşıllıq olan yerlərdə məşq etmək daha yaxşı təsir edir insana...
Bakı sakini Samir Qurbanovla həmsöhbət olduğumuz məkan paytaxtımızda Türkiyə Cümhuriyyətinin banisi Mustafa Kamal Paşanın adını daşıyan Atatürk parkıdır.  
Burada müşahidə apardığımızı və fotolar çəkdiyimizi görən Samir Qurbanovun bizi görüb yaxınlaşaraq söhbətə başlaması ilə fərqinə varırıq ki, gəzə-gəzə parkın idman qurğularının quraşdırıldığı əraziyə gəlib çıxmışıq. 
Sevindirici hal isə o idi ki, uşaqdan-yaşlıya hər kəs bu qurğularda idman edirdi. Elə paytaxt sakini ağsaqqal Cavad dayı da söhbətə qoşularaq "yaşıma baxmayın, mən də tez-tez burada idman etməyə gəlirəm. Nəvələrimlə parka gəzməyə çıxanda fürsətdən istifadə edib sağlamlığımın qeydinə qalıram" deyir.

Sakinlərin də, qonaqların da razılıq etdiyi istirahət mərkəzi

Sakinlərin razılıq etdiyi, Bakının növbəti "yaşıl məkan"ı olan Atatürk parkı "Gənclik" metrostansiyasının yaxınlığından başlayıb Atatürk prospekti boyunca uzanır. Bura paytaxtın ən çox ziyarət edilən məkanlarından biridir. 
Nərimanov rayonunda yerləşən bu parkda əsaslı yenidənqurma işləri 2019-cu ildə həyata keçirilib. Həmin vaxta qədər parkdakı şərait ərazidə yaşayanları, burada istirahət edənləri qane etmirdi. Sakinlər asudə vaxtlarını keçirmək üçün başqa ərazilərdə yerləşən yaşıllıq sahələrinə üz tutmalı olurdular. Odur ki, Prezidentin tapşırığı ilə Atatürk parkının tam şəkildə yenidən qurulması, abadlaşdırılması ilə əlaqədar layihə sənədləri hazırlandı. Həmin layihə əsasında park ən müasir standartlara uyğun yenidən qurularaq sakinlərin, qonaqların istifadəsinə verildi.  
Onu da qeyd edək ki, Bakının dünyanın ən gözəl şəhərlərindən birinə çevrilməsi üçün paytaxtda görülən abadlıq işləri, yeni parkların, meşə massivlərinin, xiyabanların salınması, yenidən qurulması istiqamətində görülən işlər Prezident İlham Əliyevin birbaşa nəzarətindədir. Dövlət başçısının təşəbbüsü ilə yaradılan və ya onun tapşırıqlarına əsasən əsaslı təmir olunan sosial obyektlərin, ictimai yerlərin, bağların, parkların açılışlarında şəxsən iştirakı, təmir-bərpa işlərindən sonra yeni vəziyyətlə yerində tanış olması bunun bariz nümunəsidir. 
Xatırladaq ki, Prezident İlham Əliyev və birinci xanım Mehriban Əliyeva 2019-cu il oktyabrın 1-də Atatürk parkındakı əsaslı yenidənqurmadan sonra yaradılan şəraitlə tanış olmuşdular.
Yenidənqurma işləri nəticəsində parkın landşaft dizaynı yenilənib. Parkı gəzdikcə hər yaş qrupuna uyğun müvafiq işlər görüldüyünü müşahidə edirik. Bu, çox vacib məqamdır. Elə bu baxımdan park kiçikdən-böyüyə hər kəsin istirahət etmək üçün sevərək üz tutduğu "yaşıl məkan"lardan biridir. 

Tutuquşuların "yaşıl məkan"ı

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə şəhər mühitinə aid olan heyvan növlərinin mühafizəsi istiqamətində geniş tədbirlər həyata keçirilir. Əsaslı təmirdən sonra Atatürk parkına tutuquşular da buraxılıb. IDEA-nın "Urban Ecology" ("Şəhər ekologiyası") layihəsi çərçivəsində parkda məskunlaşdırılmış 10 yaxalıqlı tutuquşu da Bakı şəhərinin iqlim şəraitində yaşaya və çoxala bilən növdür.
"Urban Ecology" layihəsi çərçivəsində Bakı və onun ətrafındakı ictimai yerlər şəhər mühitində rahat yaşayıb çoxala bilən heyvan və quş növləri ilə zənginləşdirilir, eləcə də bu növlərin qorunub saxlanması istiqamətində ardıcıl tədbirlər həyata keçirilir.
Təbii ki, bu parkın da ən rəngarəng yeri gülüş səslərinin eşidildiyi balaca sakinlər üçün nəzərdə tutulan guşədir. Uşaq əyləncə hissəsində valideynləri, nənə-babaları ilə parka gələn  uşaqların sevincinin həddi-hüdudu yoxdur. 
Nəvəsi ilə parkda istirahət edən Sənubər nənə də burada yaradılan şəraitdən razılıq edir. Bildirir ki, yaşayış yerlərinə yaxın ərazilərdə belə istirahət yerlərinin, bağların olması çox yaxşı haldır. Şəhərdə ağaclığın, yaşıllığın olması vacibdir. Görürsüz, bu saatlarda belə evdə dinc qalmayan dəcəllərlə çölə çıxanda kölgəlik tapıb sərinlənə bilirik".
Parkda olduğumuz müddətdə müşahidələrimiz əsasında asudə vaxt keçirənlərin məmnun olduqlarını hiss edirik. Elə biz də ziyarətçilərdən biri olaraq buradakı halımızdan məmnun idik.

7 mindən çox bitkinin yer aldığı park

Parka ziyarətçi axınını təmin edən əsas məqam isə təbii ki, buradakı yaşıllıqlardır. Gündən-günə gözəlləşən, "yaşıl şəhər"ə çevrilən Bakının "yaşıl məkan"larından olan 6,5 hektar sahəyə malik parkda 7 mindən çox həm xarici, həm də yerli mənşəli bitki var ki, onlar da günəşin qızmar şüalarından parka üz tutanları qoruyur və insanların kölgəlikdə istirahətini təmin edir. 
Ağacların, bitkilərin qorunması üçün yenidənqurma işləri zamanı yaşıllıqların vaxtlı-vaxtında suvarılması məqsədilə su təminatı da unudulmayıb. Belə ki, parkın su təchizatını təmin etmək üçün 4 subartezian quyusu qazılıb, 3 yerdə yeraltı çən qoyularaq suvarma üçün nasos məntəqələri tikilib. Əsaslı təmir işləri nəticəsində park yeni avtomatik suvarma sistemi ilə təchiz edilib.
Parkda həmçinin xüsusi günlərdə bayram tədbirlərinin təşkili, konsertlərin keçirilməsi də nəzərə alınaraq ayrıca meydança salınıb. 
Qeyd edək ki, paytaxt Bakının beynəlxalq əhəmiyyətli COP29-a evsahibliyi edəcəyi ərəfədə şəhərdəki digər parklar və bağlardakı kimi burada da ehtiyac yaranan bəzi təmir-bərpa, abadlıq işləri görülür. 
Bakının "yaşıl məkan"ları ilə bir-bir yaxından tanış olduqca görürük ki, paytaxtımız həqiqətən də bağlar və parklar şəhərinə çevrilir. Prezident İlham Əliyevin tapşırıq və göstərişlərinə əsasən, icra olunan layihələr nəticəsində Bakı daha da abadlaşır, müasirləşir və yenilənərək gözəlləşir. Bütün bunlar paytaxtın gözəlliyi, abadlığı ilə yanaşı, həm də vətəndaşların rahatlığı üçündür. Ölkə rəhbərinin də qeyd etdiyi kimi, Bakının hər bir guşəsi abad, gözəl olmalıdır. Vətəndaşlar üçün çox gözəl imkanlar yaradılmalıdır. 
Biz isə parkın əvvəlki vəziyyətini gözlərimiz önündə canlandırıb bugünkü vəziyyəti  ilə müqayisə etməyə çalışırıq. Getdiyimiz daha neçə-neçə "yaşıl məkan"ları bir daha xatırlayırıq. 
Elə bu əsnada Prezidentin Atatürk parkında görülən işlərlə tanış olduğu vaxtda sakinlərlə görüşündə onlardan birinin görülən işlərin onda yaratdığı təəssüratla bağlı işlətdiyi bənzətməni artıq başa düşürük - Bakı dünyanın gözmuncuğudur...

Əsmər QARDAŞXANOVA,
İlham BABAYEV (foto),
"Azərbaycan"