Jan-Lük Melanşon: "Xalq üsyan edir, fasilə, barışıq olmayacaq"

Dünən Fransanın bir çox şəhər və qəsəbələrində prezident  Emmanuel Makronun qərarlarına qarşı etiraz aksiyaları başlayıb. Nümayişçilərin yekdil fikrinə əsasən, ölkə lideri xalqın səsinə, seçkilərin nəticələrinə hörmət etmir.
Yerli medianın xəbərinə görə, Fransanın 150-dən çox şəhər və qəsəbəsində təşkil olunan etiraz nümayişləri "Emmanuel Makronun çevrilişi və demokratiya uğrunda yürüş" təşəbbüsü ilə Tələbə və Lisey Həmkarlar İttifaqları tərəfindən keçirilir. Solçu partiyaların rəhbərləri də nümayişçilərə qoşulublar.
BFMTV  telekanalı şəhər prefekturasına istinadən xəbər verir ki, Parisdə Fransa prezidenti Emmanuel Makronun istefası tələbi ilə keçirilən nümayişdə 26 min nəfər iştirak edib.
Eyni zamanda "Yeniməz Fransa" Partiyasının parlament fraksiyasının rəhbəri Matilda Pano bildirib ki, Parisdəki etiraz aksiyasına 160 min, Fransa üzrə isə 300 min adam gəlib. Etirazçılar ölkə prezidentini "zorakı çevriliş"də və demokratiya prinsiplərini pozmaqda ittiham edirlər. 
Buna səbəb Makronun növbədənkənar parlament seçkilərində qalib gələn solçu "Yeni Xalq Cəbhəsi" alyansının təklif etdiyi Lüsi Kasteni ölkənin baş naziri təyin etməkdən imtinası olub.
Aksiya iştirakçıları həm də sağ mərkəzçi Respublikaçılar Partiyasının nümayəndəsi Mişel Barnyenin bu vəzifəyə təyin olunmasından narazıdırlar, çünki bunun millətçi  "Milli Birlik" Partiyasının güçlənməsinə daha çox təsir edəcəyinə inanırlar. Məlumdur  ki, ötən ayın sonunda "Yenilməz Fransa"nın deputatları Makronun impiçmenti barədə qətnamə irəli sürüblər. Solçular yeni baş nazir və onun hökumətinə etimadsızlıq səsverməsi keçirəcəklərini açıqlayıblar.
Fransa paytaxtından verilən məlumata görə, Parisdə Bastiliya meydanına toplaşmış nümayişçilər Nation meydanına doğru irəliləyiblər. Nümayişlərin uzunmüddətli olacağı bildirilir. "Fransız xalqı üsyan edir, onlar inqilaba başladılar", - deyən "Yenilməz Fransa" Partiyasının rəhbəri Jan-Lük Melanşon vurğulayıb ki, fasilə, barışıq olmayacaq…
Fransızları döyüş və uzunmüddətli mübarizəyə çağıran partiya lideri deyib: "Mən sizi uzunmüddətli döyüşə və mübarizəyə çağırıram. Vətəndaşlara hörmət edilməlidir".
Nümayişin təşkilatçıları olan qəzəbli tələbələr isə Makronun rəhbərliyi altında daha bir semestr keçirmək istəmədiklərini bildiriblər.
Nümayişçilər əllərində "İstefa, ya da inqilab", "Makron, istefa", "Qərb diktaturasına STOP", "Makrona qarşı müharibədəyik", " Makron demokratiyanı məhv edib" kimi şüarlar səsləndiriblər.
Daxili İşlər Nazirliyinin məlumatına görə, ölkə üzrə nümayişçilərin sayı 110 min nəfər təşkil edib.

R. HİLALOĞLU,
"Azərbaycan"