"Bəs onda Fransa hansı təhlükəylə bağlı narahatlıqdan danışır?"

"Təəssüflə qeyd etmək lazımdır ki, Fransanın Azərbaycana qarşı təxribatları, qərəzli yanaşması, qarayaxma kampaniyaları hələ də davam edir. Amma Paris ölkəmizə qarşı hansı addımlar atsa da, hansı siyasət yürütsə də, Azərbaycanın qarşısında uduzur".
VI çağırış Milli Məclisin deputatı Ceyhun Məmmədov "Azərbaycan" qəzetinə açıqlamasında deyib ki, Fransa bu yanlış siyasəti ilə heç bir məqsədinə nail ola bilmir və buna görə də tez-tez qərəzli açıqlamalarının şahidi oluruq: "Niyə heç bir ölkə deyil, məhz Fransa Azərbaycana qarşı bu cür təxribat dolu addımlar atır sualına cavab tapmaq lazımdır. Bu gün Azərbaycanın İtaliya, bir çox Avropa ölkələri ilə yaxşı münasibətləri var, amma Fransa ilə əlaqələrdə gərginlik müşahidə olunur. Bunun əsas səbəbkarı Fransa, onun həyata keçirdiyi yanlış siyasətdir. Bu, yalnız qərəzdir. Əgər Fransanın bəyanatında qeyd olunduğu kimi, Azərbaycanda hər hansı təhlükə olardısa,  təkcə o deyil, digər dövlətlər də vətəndaşlarına xəbərdarlıq edərdilər. Bunu yalnız Fransa edirsə, bu, onun Azərbaycana qarşı təxribatının növbəti təzahürüdür", - deyə müsahibimiz əlavə edib.
C.Məmmədov qeyd edib ki, Azərbaycan əksər ölkələrlə yaxşı əlaqələrə malikdir, amma özünü Fransa prezidentindən daha çox Ermənistan prezidenti kimi aparan Makronun siyasəti nəticəsində hazırda bu iki ölkənin münasibətləri ən kritik, mürəkkəb dövrünə yetişib. Fransa Azərbaycana qarşı qərəzlərinə son qoymalı və normal münasibətlərin yaranması üçün real addımlar atmalıdır. Təəssüf ki, Parisin siyasətində hələlik bunu görə bilmirik. 
O vurğulayıb ki, bu gün Azərbaycanda hansısa təhlükədən söhbət gedə bilməz: "Ölkəmiz dünyada "təhlükəsizlik adası"dır. Dünya dövlətləri Azərbaycanda təhlükəsizliyin ən yüksək səviyyədə olmasından bəhs edirlər. Belə olan halda Fransa hansı təhlükəylə bağlı narahatlığını ifadə edir? Bu, çoxlu suallar doğurur. Fransa Azərbaycana qarşı siyasətini dəyişməli, təxribatlara son qoymalı, düzgün, ədalətli siyasət həyata keçirməlidir. Paris yalnız siyasətini dəyişəndən sonra münasibətlərdə irəliləyiş gözlənilə bilər".

Əsmər QARDAŞXANOVA,
"Azərbaycan"