Fransada işsizlik səviyyəsi 8,3 faizə yüksələrək 2020-ci ilin payızından bəri ən yüksək həddə çatıb. İşsizliyin artması Baş nazir Sebastyən Lökornü ilə sabiq Baş nazir və prezidentliyə namizəd Eduard Filip arasında siyasi mübahisəyə də səbəb olub.
AZƏRTAC xəbər verir ki, son iki ildə Fransada işsizlik göstəricisi demək olar, fasiləsiz artıb. Baş nazir Sebastyən Lökornü işsizliyin yüksəlməsini inkar etməyin mümkün olmadığını, lakin vəziyyəti şişirtməyin də düzgün olmadığını bildirib. Onun sözlərinə görə, 2017-ci ildən ölkədə 2 milyondan çox yeni iş yeri yaradılıb.
Hökumət işsizliyin artımını əsasən iki amillə izah edir. Bunlardan biri “tam məşğulluq” haqqında qanunun əvvəllər işsiz kimi qeydə alınmayan şəxslərin də statistikaya daxil edilməsidir. Digər amil isə iqtisadi vəziyyətin pisləşməsi, o cümlədən Hörmüz boğazındakı gərginliklərin yaratdığı çətinliklərdir.
Sabiq baş nazir Eduard Filip isə son işsizlik göstəricilərinin qənaətbəxş olmadığını bildirib. O, işsizliyin azaldılması üçün 2017–2020-ci illərdə tətbiq olunan, biznesin və peşə təhsilinin, xüsusilə peşə proqramlarının dəstəklənməsinə əsaslanan siyasətin davam etdirilməsini təklif edir.
Bununla belə, vəziyyət xüsusilə əmək bazarına yeni daxil olan gənclər üçün ciddi narahatlıq doğurur. Şirkətlərdə ixtisarların artması, sifarişlərin azalması və müddətli əmək müqavilələrinin yenilənməməsi yeni iş yerlərinin yaradılmasını məhdudlaşdırır. Gənclər arasında işsizlik səviyyəsi artıq 21 faizdən xeyli yüksəkdir.
İqtisadçıların fikrincə, əvvəlki illərdə işsizliyin azalmasına nail olmaq dövlətin şirkətlərə və peşə təhsili proqramlarına ayırdığı böyük maliyyə vəsaiti hesabına mümkün olub. Dövlət büdcəsi üçün bu siyasətin yüksək maliyyə yükü səbəbindən hökumət 2024-cü ildən etibarən həmin dəstəyi azaltmağa başlayıb.
Beləliklə, Fransada işsizliyin artması yalnız siyasi mübahisə deyil, həm də dövlət maliyyəsi, biznesin vəziyyəti və xüsusilə gənclərin əmək bazarına çıxışı ilə bağlı ciddi problemləri gündəmə gətirir.
