Azərbaycanın ən qədim mədəniyyət və sivilizasiya diyarlarından biri olan Naxçıvan bugün həm də turizm məkanlarından biri kimi tanınır. Bölgə zəngin tarixi-mədəni irsi, özünəməxsus təbiəti və təbii sərvətləri ilə diqqət çəkir. Naxçıvanın turizm imkanlarını fərqləndirən əsas xüsusiyyət turizmin bir neçə istiqamətinin eyni məkanda birləşməsidir. Muxtar respublikada qədim memarlıq nümunələri, dağ mənzərəsi, yaylaqlar, mineral və müalicəvi sular, mağaralar, təbiət qoruqları, ziyarət məkanları vəhdət təşkil edərək, bura üz tutan turistlər üçün bir çox imkanlar vəd edir. Bu baxımdan Naxçıvanda, mədəni, dağ, ekoturizm, kənd, macəra, sağlamlıq kimi fərqli turizm təcrübələrini bir səfərdə yaşamaq mümkündür.
Möminə Xatun türbəsi, Əlincə qalası, Qarabağlar Memarlıq Kompleksi, Gəmiqaya tarixin yaddaşından, Batabat, Şahbuzun dağlıq əraziləri və Ordubadın səfalı yerləri əsrarəngiz təbiətdən, Duzdağ, Darıdağ və mineral su mənbələri isə zəngin şəfa ocağından xəbər verir.
Beləliklə, Naxçıvanın turizm potensialı yalnız tarixi və təbii məkanlarla deyil, bu imkanların müasir turizm tələblərinə uyğun şəkildə təqdim edilməsi və vahid turizm konsepsiyasında birləşdirilməsi ilə ölçülür. Qədim irslə müasir turizm imkanlarının vəhdəti Naxçıvanın gələcəkdə Azərbaycanın əsas turizm istiqamətlərindən birinə çevrilməsi üçün mühüm zəmin yaradır.
Naxçıvanın böyük turizm potensialı olduğunu deyən Milli Məclisin deputatı Göydəniz Qəhrəmanov qəzetimizə açıqlamasında bildirib ki, muxtar respublikanın qədim tarixi, mədəni abidələri, zəngin mətbəxi, qonaqpərvər insanları bu bölgəni turistlər üçün cəlbedici edir: “Xüsusi olara qeyd etmək istəyirəm ki, Naxçıvanın sağlamlıq turizm imkanları daha genişdir. Burada yerləşən Duzdağ mağarası bir çox ölkələrdən insanları müalicə almaq üçün Naxçıvana gətirir. Bu baxımdan tibbi turizm imkanları yüksəkdir”.
Deputat Prezident İlham Əliyevin Naxçıvan Muxtar Respublikasına səfəri çərçivəsində yeni beşulduzlu hotelin təməlini qoyduğunu xatırladaraq əlavə edib ki, dövlət başçısının diqqəti, daimi dəstəyi bölgədə turizm sahəsinin prioritet istiqamət olaraq mövqeyini gücləndirdiyini göstərir. Bu, ilk növbədə yeni iş yerlərinin açılmasına geniş imkanlar açır, eyni zamanda, ölkəmizə gələn turistlərin rahat şəkildə istirahət etməsinə şərait yaradır. “Azərbaycanın regionda turizm sahəsində liderliyini daim qoruması üçün çox geniş imkanlar var. Dövlət tərəfindən bu istiqamətdə bir çox ardıcıl işlər həyata keçirilir. Təhlükəsizlik məsələləri ən yüksək səviyyədədir. Həmçinin Azərbaycanda 9 beynəlxalq hava limanı mövcudur, logistik imkanlar genişləndirilir. Zəngəzur dəhlizinin açılışından sonra isə Naxçıvan turizm bölgəsi olaraq daha cəlbedici olacaq və imkanlarını genişləndirəcək. Beləliklə, gələcəkdə bu bölgədə turistlərin kəskin artımı müşahidə olunacaq”, – deyə G.Qəhrəmanov əlavə edib.
Əsmər QARDAŞXANOVA,
“Azərbaycan”
