Yaxın gələcəkdə Naxçıvanın tranzit, logistika və ticarət potensialı əhəmiyyətli dərəcədə artacaq.
Bu sözləri AZƏRTAC-a açıqlamasında iqtisad elmləri doktoru, professor Ağarza Rüstəmov Prezident İlham Əliyevin Naxçıvana səfərini şərh edərkən deyib.
O bildirib ki, özəl sektorun inkişafına dövlətin dəstək verməsi çox vacibdir: “Özəl sektor iqtisadiyyatın elə bir sahəsidir ki, burada hər kəs bizneslə, istehsal prosesi ilə məşğul olmaq imkanı əldə edir. Dövlətin qayğısı ilə yaradılan istehsal və emal müəssisəsi yeni iş yerləri yaratmaqla yanaşı, iqtisadi hərəkətlənməyə səbəb olur. Naxçıvanda biznesin inkişafı üçün böyük potensial var. İstehsalçı yerli bazarın tələbini ödəməklə xarici bazarlara da çıxa bilər. Zəngəzur dəhlizi yerli istehsal mallarının ixracına imkan yaradacaq. Hər hansı bir istehsal müəssisəsi fəaliyyətə başlamaqla digər sahələri də hərəkətə gətirir. Malların daşınması və digər xidmətlər üçün nəqliyyat vasitələri lazım olur ki, bu da nəqliyyat sahəsinin, istehsal olunan malların satılması üçün yerli bazarda satış mərkəzlərinin yaradılması zərurətini meydana çıxır, bu da ticarət sahəsinin inkişafına və məşğulluğun artmasına gətirib çıxarır. Prezident İlham Əliyevin həyata keçirdiyi iqtisadi siyasətin və islahatların məqsədi də elə bundan ibarətdir. Bu məqsədi reallaşdırmaq üçün Prezident Naxçıvana səfəri zamanı sənaye parkı və digər obyektlərin təməlini qoydu. Bu obyektlər muxtar respublikanın ixrac potensialının da formalaşması üçün münbit şərait yaradır. Naxçıvan iki böyük dövlətlə sərhədə malikdir. İş adamları və biznes təşkilatları bu ölkələrin - Türkiyə və İranın bazarını öyrənərək, tələb olunan kənd təsərrüfatı, sənaye və emal məhsulları istehsal edən müəssisələr qura bilərlər”.
“Yeri gəlmişkən, qeyd etmək lazımdır ki, istehsal olunan məhsulun keyfiyyətindən asılı olaraq, Naxçıvandan qlobal bazarlara da Zəngəzur dəhlizi vasitəsilə çıxış mümkündür. Əlaqələr inkişaf etdikcə, Avropa ilə muxtar respublika arasında idxal-ixrac əməliyyatları da aparıla bilər.
Naxçıvanın dünya iqtisadiyyatına inteqrasiyası üçün olduqca səmərəli sənədlər imzalanıb. Azərbaycan Prezidentinin imzaladığı Sərəncamlarla “Naxçıvan Muxtar Respublikasında su ehtiyatlarından səmərəli istifadənin təmin edilməsinə dair 2026–2030-cu illər üçün Tədbirlər Planı” və “Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” təsdiq edilib. Bu Tədbirlər Planı və Dövlət Proqramı təkcə yeni iş yerlərinin yaradılmasından ibarət deyil. Bunların həyata keçirilməsi muxtar respublikanın region dövlətləri və Avropaya çıxışını təmin edir. Zəngəzur dəhlizi çərçivəsində Naxçıvana dəmir yolu bağlantısının bərpası, Türkiyə ərazisində isə Qars–İğdır–Naxçıvan dəmir yolunun tikintisi onu deməyə əsas verir ki, çox yaxın gələcəkdə Naxçıvanın tranzit, logistika və ticarət potensialı əhəmiyyətli dərəcədə artacaq və muxtar respublika beynəlxalq ticarət, tranzit və logistika mərkəzinə çevriləcək”, - deyə o əlavə edib.
