Prezidentin muxtar respublikaya səfəri regionun inkişaf istiqamətlərini müəyyənləşdirdi

Prezident İlham Əliyevin Naxçıvan Muxtar Respublikasına budəfəki səfəri regionun gələcək inkişaf istiqamətlərinin müəyyənləşdirilməsi baxımından mühüm siyasi və strateji əhəmiyyət daşıyır. Səfər çərçivəsində istifadəyə verilən sosial obyektlər və Prezidentin Azərbaycan Televiziyasına müsahibəsində verdiyi mesajlar Naxçıvanın təhlükəsizlik, enerji, nəqliyyat, sənaye, kənd təsərrüfatı, turizm və sosial inkişaf baxımından yeni mərhələyə qədəm qoyduğunu göstərir.

Milli Məclisin deputatı Nigar MƏMMƏDOVA qəzetimizə açıqlamasında deyib ki, Prezidentin Naxçıvana 17-ci səfəri çərçivəsində verdiyi mesajların əsas qayəsini muxtar respublikanın dayanıqlı və hərtərəfli inkişafının təmin olunması təşkil edir. Dövlət başçısı vurğulayıb ki, Naxçıvanın inkişafı daha geniş coğrafiyanın iqtisadi və nəqliyyat imkanlarına təsir göstərən strateji prosesdir. “Naxçıvanın hərtərəfli inkişafı sistemli xarakter daşıyır və müxtəlif istiqamətlərdə atılan addımlar vahid inkişaf strategiyasının tərkib hissəsidir. Naxçıvanın strateji coğrafi mövqeyi onun təhlükəsizlik məsələlərinə xüsusi diqqət yetirilməsini zəruri edir. Cənab Prezidentin də söylədiyi kimi,  Naxçıvanın müdafiə potensialının gücləndirilməsi prioritet istiqamətlərdən biridir: “Azərbaycan Silahlı Qüvvələri bölgədə söz sahibidir. O cümlədən Naxçıvanda hərbi potensial gündən-günə gücləndirilir və gücləndiriləcək”. Bu mesaj Azərbaycanın Naxçıvanın təhlükəsizliyinə verdiyi strateji əhəmiyyətin göstəricisidir. Müasir hərbi texnika, yeni komando qüvvələri və Əlahiddə Ordunun imkanlarının gücləndirilməsi Naxçıvanın müdafiə qabiliyyətinin davamlı şəkildə artırılmasına xidmət edir”, – deyə o bildirib.

Naxçıvanın həm də sənaye və enerji mərkəzinə çevrildiyini söyləyən deputat qeyd edib ki, burada Sənaye Parkının təməlinin qoyulması regionda istehsal imkanlarının genişləndirilməsi, yeni iş yerlərinin açılması və iqtisadi fəallığın artırılması baxımından mühüm addımdır. Bununla yanaşı, sənaye parkının tərkibində 300 meqavat gücündə istilik elektrik stansiyasının inşası nəzərdə tutulur. Naxçıvan həm də Günəş enerjisi potensialının yüksək olması ilə fərqlənir. 600 hektardan artıq ərazidə yüzlərlə meqavat gücündə Günəş elektrik stansiyalarının yaradılması planlaşdırılır. Prezident Naxçıvanda Günəş enerjisi istehsalının gələcəkdə ən azı 500 meqavat, potensial olaraq isə 1000 meqavata çata biləcəyini bəyan etdi. Beləliklə, Naxçıvan gələcəkdə enerji ixrac edən mühüm mərkəzlərdən birinə çevriləcək.

N.Məmmədova bildirib ki, Zəngəzur dəhlizi də Naxçıvanın strateji əhəmiyyətini artırır: “Prezident bu xüsusda qeyd etdi ki, bu layihə Azərbaycanın əsas hissəsi ilə Naxçıvanı birləşdirən strateji nəqliyyat bağlantısı olmaqla yanaşı, daha geniş regional nəqliyyat sisteminin mühüm hissəsinə çevriləcək. Dövlət başçımızın açıqlamalarından aydın olur ki, Azərbaycanın əsas hissəsində Horadiz-Ağbənd istiqamətində həm avtomobil, həm də dəmir yolu layihələri sürətlə həyata keçirilir. Naxçıvan istiqamətində dəmir yolu infrastrukturunun bərpası üzrə işlər davam etdirilir. Xüsusilə diqqətçəkən məqamlardan biri Naxçıvan dəmir yolunun gələcəkdə 15 milyon ton yükdaşıma qabiliyyətinə çatdırılması planıdır. Bu isə Naxçıvanın regional tranzit qovşağına çevrilməsi üçün ciddi iqtisadi potensial yaradır. Bu baxımdan Zəngəzur dəhlizi Şərq-Qərb və Şimal-Cənub nəqliyyat marşrutlarının inkişafı baxımından da böyük əhəmiyyət daşıyır. Naxçıvanın bu dəhlizlərin kəsişməsində yerləşməsi onun regional iqtisadi çəkisini əhəmiyyətli dərəcədə artırır”.

Deputat vurğulayıb ki, Prezidentin müsahibəsində diqqətçəkən digər məqam Zəngəzur dəhlizi üzrə gələcəkdə elektrik xətlərinin, fiber-optik kabellərin, zərurət yaranacağı təqdirdə isə digər enerji infrastrukturlarının yaradılması imkanlarının nəzərdən keçirilməsidir. Bu isə o deməkdir ki, Zəngəzur dəhlizi daha geniş geoiqtisadi layihəyə çevrilir. Səfər zamanı Naxçıvanın tarixi-mədəni irsinə də xüsusi diqqət yetirilib. Möminə Xatun məqbərəsinin bərpası ilə bağlı görülən işlər dövlətin tarixi abidələrin qorunmasına münasibətinin göstəricisidir. Dövlət başçımızın da söylədiyi kimi, “bütün görülən işlərin təməlində bizim milli kimliyimiz dayanır, milli ruhumuz dayanır, mədəniyyətimiz, dilimiz, ədəbiyyatımız, tariximiz dayanır”. Yəni, tarixi irsin qorunması, milli-mədəni dəyərlərin gələcək nəsillərə ötürülməsi də dövlət siyasətinin mühüm istiqamətlərindən biridir.

N.Məmmədova qeyd edib ki, Naxçıvanın inkişaf strategiyasında sosial məsələlər də əsas prioritetlər sırasındadır: “Səfər zamanı DOST Mərkəzinin açılışı, “ASAN xidmət” sisteminin fəaliyyəti, yeni elektrik avtobuslarının təqdimatı, şəhərlərarası və rayonlararası nəqliyyatın yaxşılaşdırılması ilə bağlı qərarlar bu istiqamətdə atılan addımlar sırasındadır. Bu layihələr birbaşa insanların gündəlik həyatına təsir edən məsələlərin həllinə yönəlib. Cənab Prezidentin verdiyi əsas mesajlardan biri də Naxçıvanın Qarabağ və Şərqi Zəngəzurla vahid inkişaf konsepsiyası çərçivəsində nəzərdən keçirilməsidir. Dövlət başçımızın da söylədiyi kimi, Naxçıvan, azad olunmuş ərazilər – Şərqi Zəngəzur, Qarabağ vahid konsepsiya əsasında inkişaf etməlidir. Bu yanaşma üç region arasında iqtisadi, nəqliyyat, enerji və sosial əlaqələrin gələcəkdə daha da gücləndirilməsini nəzərdə tutur. Xüsusilə Zəngilanla Ordubad arasındakı coğrafi yaxınlıq bu ərazilərin regional inkişaf baxımından bir-birini tamamlayan məkanlara çevrilməsi üçün imkan yaradır.Eyni zamanda, Qarabağ və Şərqi Zəngəzurla bərabər Naxçıvanın da yaşıl enerji zonası kimi inkişaf etdirilməsi nəzərdə tutulur. Batareya saxlanc qurğularının yaradılması isə bərpaolunan enerji mənbələrindən daha səmərəli istifadə imkanlarını genişləndirəcək”.

Deputat bildirib ki, Qarabağ və Şərqi Zəngəzurda tətbiq edilən idarəetmə modelinin Naxçıvanda da tətbiqi dövlət idarəçiliyinin çevikliyinin artırılmasına yönəlib. Burada əsas məqsəd muxtar respublikanın statusunu qorumaqla idarəetmənin daha səmərəli qurulması, kadr və struktur islahatlarının inkişaf məqsədlərinə uyğunlaşdırılmasıdır. Ən əsas məsələ isə budur ki, dövlət başçısının da söylədiyi kimi, planlar böyükdür və bu planların icrası ilə bağlı heç bir şübhə yoxdur.

Əsmər QARDAŞXANOVA,

“Azərbaycan”