Prezident İlham Əliyevin xarici ölkələrə hər bir səfəri Azərbaycanın yüksək beynəlxalq nüfuzundan xəbər verir
Azərbaycanın beynəlxalq mövqeyi hər keçən gün daha da möhkəmlənir, qlobal proseslərdəki rolu və nüfuzu artır. Prezident İlham Əliyevin rəhbərliyi ilə həyata keçirilən uzaqgörən xarici siyasət kursu və çoxşaxəli diplomatiya sayəsində respublikamız regionun lider dövləti olmaqla yanaşı, həm də qlobal miqyasda söz sahibi olan, etibarlı tərəfdaş kimi qəbul edilir.
Dövlətimizin başçısının fərqli xarici ölkələrə intensiv səfərlər həyata keçirməsi Azərbaycan diplomatiyasının dinamikliyini, geniş coğrafiyanı əhatə etməsini və müxtəlif güc mərkəzləri ilə bərabərhüquqlu, qarşılıqlı faydalı əməkdaşlığa malik olduğunu aydın şəkildə nümayiş etdirir. Cari ilin yanvar ayından keçən dövr ərzində Prezident İlham Əliyev 10 xarici ölkəyə ümumilikdə 12 səfər edib. Bu statistik göstərici özlüyündə diplomatiyamızın nə qədər məhsuldar və çevik olmasının sübutudur. Dövlətimizin başçısı
8-9 ay ərzində İsveçrə, Birləşmiş Ərəb Əmirlikləri, Almaniya, Serbiya, Amerika Birləşmiş Ştatları, Gürcüstan, Türkiyə, Qazaxıstan, Qırğızıstan və Özbəkistana dövlət, rəsmi və işgüzar səfərlər edib. Almaniya və Qırğızıstanda isə il ərzində iki dəfə səfərdə olub.
Fərqli regionları və siyasi-iqtisadi sistemləri əhatə edən bu mühüm səfərlər sıradan diplomatik təmaslar olmayıb, hər biri Azərbaycanın milli maraqlarının təmin edilməsinə, strateji tərəfdaşlıqların dərinləşdirilməsinə və qlobal müstəvidə yeni imkanların açılmasına xidmət edən mühüm tarixi hadisələrə çevrilib. Dövlətimizin başçısının Avropanın aparıcı dövlətlərinə və siyasi mərkəzlərinə səfərləri xüsusi çəkisi ilə seçilir. Fevralın 14-də və iyulun 21-də Avropa İttifaqının aparıcı dövləti olan Almaniyaya, eləcə də yanvarın 22-də neytrallığı ilə tanınan İsveçrəyə və fevralın 16-da Cənub-Şərqi Avropadakı strateji müttəfiqimiz Serbiyaya səfərlər Azərbaycanın Avropanın enerji təhlükəsizliyində, nəqliyyat-logistika zəncirində və təhlükəsizlik arxitekturasındakı əvəzsiz rolunu bir daha təsdiqləyib.
Cənubi Qafqazda formalaşan yeni reallıqların müəllifi olan Azərbaycan enerji xəritəsinin yenidən cızılmasında mühüm rol oynayır. Bu, həm də ölkəmizin Şərq-Qərb arasında etibarlı körpü rolunu oynayan əsas aktorlardan biri olmasının təsdiqidir. İsveçrə və Almaniyaya səfərlər zamanı keçirilən yüksəksəviyyəli görüşlər, nəhəng şirkətlərin rəhbərləri ilə aparılan müzakirələr ölkəmizə xarici investisiyaların cəlb olunması, "yaşıl enerji"yə keçid layihələrinin reallaşdırılması və qeyri-neft sektorunun inkişafı baxımından da müstəsna əhəmiyyət daşıyır. Serbiyaya səfər iki ölkə arasında mövcud strateji tərəfdaşlığın daha da möhkəmlənməsinə, Avropanın cənub-şərqində Azərbaycanın siyasi və iqtisadi mövqeyinin dərinləşməsinə xidmət edir. Səfərlər çərçivəsində imzalanan mühüm sənədlər, bəyannamələr və anlaşma memorandumları ikitərəfli əlaqələri keyfiyyətcə yeni zirvəyə qaldırıb. Eyni zamanda Avropanın aparıcı dövlətlərinin Azərbaycana verdiyi yüksək dəyəri və ölkəmizlə uzunmüddətli tərəfdaşlığa bəslədikləri inamı nümayiş etdirib.
Dövlətimizin başçısının fevralın 20-də Amerika Birləşmiş Ştatlarına səfəri də qlobal siyasi arenada Azərbaycanın nüfuzunun artmasının, Vaşinqtonla Bakı arasında strateji dialoqun və qarşılıqlı maraqlara söykənən münasibətlərin inkişafının göstəricisidir. Qlobal təhlükəsizlik, regional sabitlik, enerji dəhlizlərinin təhlükəsizliyi və beynəlxalq nəqliyyat yollarının fəaliyyəti kimi strateji məsələlərin müzakirə olunduğu bu təmaslar Azərbaycanın beynəlxalq münasibətlər sistemində etibarlı tərəfdaş olduğunun təzahürüdür.
Həmçinin Birləşmiş Ərəb Əmirliklərinə edilən səfər Yaxın Şərq regionunun aparıcı dövlətləri ilə iqtisadi, ticarət və bərpaolunan enerji sahəsindəki əməkdaşlığı yeni pilləyə daşıyıb. Ərəb dünyasının nəhəng investisiya fondlarının Azərbaycandakı layihələrə cəlb olunması, xüsusən Qarabağ və Şərqi Zəngəzurun bərpası prosesində atılan birgə addımlar bu səfərin konkret və əməli nəticələridir.
Azərbaycanın xarici siyasətində qonşuluq münasibətləri və qardaş ölkələrlə strateji müttəfiqlik hər zaman prioritet təşkil edir. Bu xüsusda Mərkəzi Asiya dövlətləri - Qazaxıstan, Qırğızıstan və Özbəkistana həyata keçirilən səfərlər xüsusi əhəmiyyət kəsb edir. Həmin ölkələrin dövlət başçılarının xüsusi dəvəti ilə baş tutan bu səfərlər Mərkəzi Asiya liderlərinin Azərbaycan Prezidentinin şəxsi nüfuzuna, siyasi müdrikliyinə dərin hörmətinin, eləcə də ölkəmizin regiondakı həlledici roluna verilən yüksək dəyərin təcəssümüdür. Mərkəzi Asiya ölkələrinə səfərlərin müstəsna əhəmiyyəti həm də onunla şərtlənir ki, Azərbaycan bu regionu Avropa bazarları ilə birləşdirən strateji körpü, türk dünyasının inteqrasiyasının əsas mərkəzidir.
Türk Dövlətləri Təşkilatı çərçivəsində həmrəyliyi sürətləndirən bu təmaslar eyni zamanda Orta dəhlizin imkanlarının genişləndirilməsi, birgə sərmayə fondlarının yaradılması, sənaye kooperasiyası və energetika sahəsində nəhəng layihələrin icrası baxımından da tarixi dönüş nöqtəsidir. Qardaş Türkiyə ilə sarsılmaz müttəfiqlik münasibətləri və Gürcüstanla regional kommunikasiyaların inkişafı istiqamətində atılan addımlar da bu geostrateji xəttin tərkib hissəsidir. Dövlətimizin başçısının il ərzində Qırğızıstana iki dəfə səfər etməsi Mərkəzi Asiya istiqamətində diplomatik aktivliyin nə qədər yüksək dinamikaya malik olduğunu aydın göstərir.
Prezident İlham Əliyev xarici ölkələrdə keçirdiyi rəsmi görüşlərdə, qatıldığı mötəbər sammitlərdə və mətbuat konfranslarında hər zaman prinsipial siyasi mesajlar verir. Dövlətimizin başçısı bütün platformalardan istifadə edərək bəşəriyyəti narahat edən qlobal problemlərin həlli yollarını göstərir, beynəlxalq hüququn aliliyini, dövlətlərin suverenliyinə və ərazi bütövlüyünə hörmət olunmasının vacibliyini qətiyyətlə müdafiə edir. Cənubi Qafqazda davamlı sülhün və sabitliyin bərqərar olunması ilə bağlı Azərbaycan Prezidentinin səsləndirdiyi bəyanatlar, irəli sürdüyü konstruktiv təşəbbüslər beynəlxalq ictimaiyyət tərəfindən regionda sülhün əsas zəmanəti kimi qəbul edilir.
Azərbaycan Prezidentinin xarici ölkələrə intensiv səfərləri, o cümlədən, tərəfdaşlıq, enerji təhlükəsizliyi və nəqliyyat dəhlizlərinin inkişafı ilə bağlı verdiyi mesajlar göstərir ki, Azərbaycan geniş coğrafiyada sabitliyin, təhlükəsizliyin və tərəqqinin əsas təşəbbüskarı kimi çıxış edir. Yüksək tribunalardan səslənən qətiyyətli bəyanatlar dövlətimizin beynəlxalq nüfuzunu daha da artırır, Azərbaycanın qlobal siyasətin formalaşmasında oynadığı önəmli rolu dünyaya nümayiş etdirir. Məhz bu uğurlu diplomatiya nəticəsində əldə olunan tarixi nailiyyətlər ölkəmizin inkişafına, təhlükəsizliyinə və xalqımızın rifahına xidmət edir.
İsmayıl QOCAYEV,
"Azərbaycan"
jpg_1792672548.jpg)
