Bakı Mühəndislik Universitetində (BMU) təhsilin keyfiyyətinin yüksəldilməsi, elmi fəaliyyətin genişləndirilməsi və tələbələrin praktiki bilik və bacarıqlarının inkişaf etdirilməsi məqsədilə laboratoriya infrastrukturunun müasirləşdirilməsi istiqamətində ardıcıl tədbirlər həyata keçirilir.
Universitetdən AZƏRTAC-a bildirilib ki, laboratoriyaların maddi-texniki bazasının gücləndirilməsi tələbələrin müasir texnologiyalar əsasında təhsil almasına, praktiki vərdişlər qazanmasına və gələcək peşə fəaliyyətinə yüksək hazırlıq səviyyəsi ilə başlamasına imkan yaradır.
Son illərdə görülən işlər çərçivəsində universitetdə Kibertəhlükəsizlik, Biotexnologiya, Kompüter, Süni intellekt və data elmləri, Şəbəkə və sistem təhlükəsizliyi, Yusif Məmmədəliyev adına Üzvi sintez və materialşünaslıq, Aqrokimyəvi analizlər, Materialşünaslıq və digər yeni laboratoriyalar yaradılıb.
Hazırda BMU-da elm və mühəndisliyin müxtəlif istiqamətlərini əhatə edən 20-dən çox müasir laboratoriya fəaliyyət göstərir. Bunlara kompüter, mexanika mühəndisliyi, elektronika və informasiya-kommunikasiya texnologiyaları, kimya və kimya mühəndisliyi, biotexnologiya, mikroskopik tədqiqatlar, mikrobiologiya, fizika və digər ixtisaslaşmış laboratoriyalar daxildir. Müasir avadanlıqla təchiz olunan bu laboratoriyalar tədris prosesinin praktiki komponentinin gücləndirilməsinə, elmi tədqiqatların keyfiyyətinin artırılmasına və innovativ layihələrin həyata keçirilməsinə şərait yaradır.
Universitetdə son iki il ərzində mexanika mühəndisliyi laboratoriyaları da müasir tələblərə uyğun yenidən qurulub, mövcud avadanlıqlar bərpa edilərək funksional vəziyyətə gətirilib. Bu istiqamətdə Avtomatik nəzarət, Mexanizmlər və maşın dinamikası, Daxili yanma mühərrikləri və avtomobil, Mexaniki vibrasiya və səsə nəzarət, Dağıdıcı olmayan sınaq üsulları, Layihələndirmə və uyğun modelləşdirmə, Emal üsulları, Material və metalloqrafiya, Materiallar müqaviməti, Aerodinamika və maye mexanikası, İstilik elmləri və istilik keçiriciliyi, eləcə də Bərpa olunan enerjilər laboratoriyaları fəaliyyət göstərir. Bu infrastruktur tələbələrin layihəəsaslı təhsil almasına, müasir mühəndislik avadanlıqları ilə işləməsinə və elmi-tədqiqat fəaliyyətində fəal iştirakına imkan verir.
BMU-da laboratoriya infrastrukturunun davamlı şəkildə modernləşdirilməsi universitetin strateji inkişaf prioritetlərindən biri kimi həyata keçirilir. Bu istiqamətdə görülən işlər əmək bazarının tələblərinə cavab verən yüksəkixtisaslı mütəxəssislərin hazırlanmasına, tələbələrin elmi-tədqiqat fəaliyyətinə cəlb olunmasına, beynəlxalq standartlara uyğun peşə kompetensiyalarının formalaşdırılmasına, eləcə də innovativ layihələrin həyata keçirilməsi və sənaye ilə əməkdaşlığın genişləndirilməsinə töhfə verir.
