QAZAX
Ölkənin bütün bölgələrində olduğu kimi, Qazaxda da aqrar inkişafla bağlı yeni dövlət proqramında qarşıya qoyulan vəzifələr üçün tədbirlər görülür. Bu istiqamətdə rayon icra hakimiyyətində iş planı təsdiq edilmiş və həmin planın icrası ilə əlaqədar qərargah yaradılmşdır.
Bu günlər həmin qərargahın gördüyü işlərlə əlaqədar müşavirə keçirilmişdir. Müşavirədə 2026-2030-cu illərdə kənd təsərrüfatı məhsullarının istehsalı və emalı sahələrinin inkişafı ilə bağlı rayonda görüləcək işlər geniş təhlil edilmiş, qarşıda duran vəzifələr, istehsal olunan məhsulların həcminin artırılması, sahibkarlara göstərilən dövlət qayğısı, taxıl biçininin mövcud vəziyyəti, biçin zamanı, eləcə də biçindən sonra əkin sahələrinin yanğın təhlükəsizliyi qaydalarına ciddi riayət olunması heyvandarlığın inkişafı istiqamətində görüləcək işlər, əkin sahələrinin suvarılmasının təmin edilməsi və digər məsələlər ətrafında müzakirələr aparılmışdır.
Rayon icra hakimiyyətinin başçısı Rəcəb Babaşov çıxış edərək rayonda proqramda nəzərdə tutulan tədbirlərin icrasına məsuliyyətlə yanaşıldığını diqqətə çatdırmışdır. Bildirilmişdir ki, torpaq resurslarının qorunması və ondan səmərəli istifadə, müasir suvarma sisteminin inkişaf etdirilməsi, bitkiçilik sahəsi ilə bağlı tədbirlər, intensiv meyvə bağlarının salınması, buğdanın və kartofun məhsuldarlığnın, eləcə də heyvandarlıq məhsullarının istehsalının artırılması qarşıda duran vacib məsələlərdir. Həmçinin rayon ərazisində fəaliyyət göstərən aqroparkların və iri təsərrüfatların fəaliyyəti üçün ayrılmış torpaqlardan, əkinəyararlı digər sahələrdən istifadənin vəziyyətinin öyrənilməsi, aqroparkın əhatə edəcəyi torpaq sahələrinin ölçülərinin və qoyulacaq investisiyaların miqdarının müəyyən edilməsi, texnika parkının mütəmadi olaraq yenilənməsi də diqqət mərkəzində saxlanılan vəzifələrdir.
Sonra Qazax Dövlət Aqrar İnkişaf Mərkəzinin direktoru Elxan Vəkilov çıxış edərək dövlət proqramının vəzifələrin icrası ilə bağlı görülməsi nəzərdə tutulan işlərin əhəmiyyətindən danışmışdır.
Sahibkarlardan Vüqar Kərimov, Xəyyam Sanıyev, fermerlərdən Asif Yusifov və başqaları çıxış edərək ölkəmizdə sahibkarlara verilən dəstəkdən səmərəli istifadə yollarından söz açmışlar.
CƏLİLABAD
"Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"ndan irəli gələn tədbirlərin Cəlilabadda icrası ilə əlaqədar rayon icra hakimiyyətində yaradılmış qərargahın iclası keçirilib.
Rayon icra hakimiyyətinin başçısı Rafiq Cəlilov çıxış edərək bildirib ki, ölkə rəhbərliyi tərəfindən təsdiq edilən bu strateji dövlət proqramı regionlarda intensiv təsərrüfatçılığa keçidin sürətləndirilməsi, ərzaq təhlükəsizliyinin təmin olunması və aqrar sektorun inkişafı baxımından müstəsna əhəmiyyət kəsb edir. Rayon ərazisində əkinəyararlı torpaq sahələrinin uçotunun dəqiqləşdirməsi, kənd təsərrüfatına yararlı bütün torpaq sahələrində, o cümlədən iri fermer təsərrüfatlarında və aqroparklarda əkin işlərinin vaxtında və keyfiyyətlə aparılmasının vacibliyindən danışan R.Cəlilov taxıl, kartof, çiyələk və üzüm məhsulları üzrə məhsuldarlığın artırılması istiqamətində zəruri tədbirlərin görülməsinin əhəmiyyətindən söz açıb. Su itkilərinin azaldılması, suvarma suyundan səmərəli istifadənin təmin edilməsi və kənd təsərrüfatı bitkiləri üzrə məhsuldarlığın artırılması üçün müasir suvarma sistemlərinin tətbiqi istiqamətində tədbirlərin həyata keçirilməli olduğunu deyən natiq rayonda heyvandarlıq sahəsinin inkişaf etdirilməsi, mal, qoyun və quş əti, süd və yumurta istehsalının artırılması, habelə məhsuldarlığın yüksəldilməsi istiqamətində müvafiq tədbirlərin görüləcəyini diqqətə çatdırıb.
RİH başçısı həmçinin dövlət proqramından irəli gələn tədbirlərin vaxtında və keyfiyyətlə icrasının təmin edilməsi, aidiyyəti dövlət qurumları arasında fəaliyyətin əlaqələndirilməsi, dövlət-özəl tərəfdaşlığının genişləndirilməsi və sahibkarlıq subyektləri ilə qarşılıqlı əməkdaşlığın gücləndirilməsi istiqamətində aidiyyəti şəxslərə müvafiq tapşırıq və tövsiyələrini verib.
Tədbirdə digər çıxış edənlər də həyata keçirilməsi ilk növbədə vacib olan məsələlərdən söz açıb və fikir mübadiləsi aparıblar.
MASALLI
Rayonun Təzə Alvadı kəndində rayon icra hakimiyyətinin təşkilatçılığı ilə "Kartof və taxıl yığımının yekunu, növbəti əkin üçün qarşıda duran vəzifələr" mövzusunda rayon müşavirəsi keçirilib.
Tədbiri açan RİH-in başçısı Araz Əhmədov Prezidentin 25 may 2026-cı il tarixli sərəncamı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın ölkənin aqrar sektorunun inkişafında mühüm əhəmiyyət daşıdığını qeyd edib. A.Əhmədov dövlət başçısının kənd təsərrüfatının inkişafına göstərdiyi diqqət və qayğının aqrar sahədə əldə olunan uğurların əsasını təşkil etdiyini vurğulayaraq Masallıda da bu istiqamətdə mühüm nəticələrin əldə olunduğunu bildirib. Eyni zamanda mövcud çətinliklərin aradan qaldırılması istiqamətində aidiyyəti qurumlar tərəfindən zəruri tədbirlərin davam etdirildiyini diqqətə çatdırıb.
Masallı rayon DAİM-in direktoru Seymur Nuriyev məruzəsində qeyd edib ki, ölkədə regionların sosial-iqtisadi inkişafına dair qəbul olunmuş dövlət proqramları kənd təsərrüfatının ənənəvi sahələrinin inkişafına, kənd əhalisinin rifahının yüksəlməsinə və məşğulluğun artmasına mühüm töhfə verib. Bildirib ki, yeni dövlət proqramının əsas məqsədi aqrar sahənin dayanıqlı və rəqabətqabiliyyətli inkişafını təmin etməklə ərzaq təhlükəsizliyinin gücləndirilməsi, daxili istehsalın, məhsuldarlığın və ixrac potensialının artırılması, həmçinin balıqçılıq və akvakultura sahələrinin inkişafına nail olmaqdır.
Masallı Su Meliorasiya Sistemlərinin İstismarı İdarəsinin rəisi Akif Həmidov çıxışında cari ildə əkin sahələrinin suvarma suyu ilə təminatında ciddi problem yaşanmadığını bildirib. Qeyd olunub ki, Viləşçay su anbarının ikinci növbəsinin tikintisi başa çatdıqdan sonra rayonda su ehtiyatları iki dəfədən çox artacaq ki, bu da gələcəkdə əkin sahələrinin su təminatının daha da yaxşılaşdırılmasına imkan verəcək.
Fövqəladə Hallar Nazirliyi Cənub Regional Dövlət Yanğın Nəzarəti İdarəsinin nümayəndəsi, daxili xidmət mayoru Səməd Bağırov diqqətə çatdırıb ki, aparılan maarifləndirmə tədbirləri və yerli icra strukturları ilə səmərəli əməkdaşlıq nəticəsində cari ildə yanğın hadisələrinin sayı ötən illə müqayisədə 81 faiz azalıb, meşə yanğınları isə ümumiyyətlə qeydə alınmayıb.
"Aqrolizinq" ASC-nin Masallı-Yardımlı rayon bölməsinin rəhbəri Hikmət Xəlilov taxıl biçini mövsümünə hazırlıq tədbirlərindən başlamış bu günə qədər işlərin düzgün qurulduğunu nəzərə çatdırıb və bildirib ki, kombaynların vaxtında təmir və sazlanması, yanacaq, sürtkü materialları, ehtiyat hissələri və yanğınsöndürmə vasitələri ilə təmin edilməsi nəticəsində rayon üzrə taxıl yığımı təhlükəsizlik qaydalarına tam əməl olunmaqla itkisiz və vaxtında başa çatdırılıb.
Müşavirədə çıxış edən Təzə Alvadı kəndindən kartofçuluqla məşğul olan fermer Arif Bağırov, Qədirli kəndindən taxılçı fermer Nurulla Şükürov və digər fermerlər rayonda aqrar sahənin inkişafı üçün yaradılan şəraiti yüksək qiymətləndiriblər.
Sabir ƏLİYEV,
Seyran CAVADOV,
"Azərbaycan"
