Kəndlinin yay qayğıları bitib-tükənmək bilmir. Xüsusilə, ilin bu qora bişirən ayı kəndli və fermerlər üçün ən məsul dövrlərdən biridir. Onlar zəhmətlə yetişdirdikləri məhsulu vaxtında və itkisiz toplamaq üçün hər yanda səylə çalışırlar.
Üstəlik, məhsulu gecikmədən bazara çatdırmaq, yaxud qış üçün tədarük etmək lazımdır. Arpa-buğdasını biçən taxılçı məhsulunu xırmana daşımalı, tədarük məntəqələrinə göndərməlidir. Bostan və tərəvəz yetişdirənlər sahələrin suvarılmasını unutmamalı, bağbanlar dəymiş meyvələri vaxtında dərib satış məntəqələrinə göndərməli, yaxud soyuducu anbarlara yığmalıdırlar. Bir sözlə, qeyd etdiyimiz kimi, indi kəndlinin işi, necə deyərlər, başından aşır.
Bəs, statistik rəqəmlər bu il Azərbaycan kəndində gedən işlər barədə nə deyir?
Dövlət Statistika Komitəsindən aldığımız son məlumata görə, bu ilin yanvar-iyun ayları üzrə kənd təsərrüfatının ümumi məhsulunun faktiki qiymətlərlə dəyəri 7085,3 milyon manat təşkil etmişdir ki, onun da 3776 milyon manatı heyvandarlıq, 3309,3 milyon manatı isə bitkiçilik məhsullarının payına düşür.
2025-ci ilin yanvar-iyun ayları ilə müqayisədə kənd təsərrüfatının ümumi məhsulu real ifadədə 2,2 faiz, o cümlədən heyvandarlıq məhsulları istehsalı 2,5 faiz, bitkiçilik məhsulları istehsalı 1,8 faiz artmışdır.
Bitkiçilik sahəsi üzrə rəqəmlərə nəzər salaq. Ölkədə yazlıq kənd təsərrüfatı bitkilərinin əkini artıq başa çatmışdır. 2026-cı il iyulun 1-nə kimi 378,4 min hektar sahədə yazlıq bitkilər əkilmişdir.
Kənd təsərrüfatı məhsullarının yığımı davam edir və iyul ayının 1-nə kimi qarğıdalı da daxil olmaqla, tarlalardan 2058,7 min ton və ya keçən ilin müvafiq dövrünə nisbətən 3,1 faiz az dənli və dənli paxlalı bitkilər, 2311,3 min ton (0,7 faiz çox) yem bitkiləri, 822,5 min ton (0,2 faiz çox) tərəvəz, 394,5 min ton (7,5 faiz çox) kartof, 217,9 min ton (16,8 faiz çox) meyvə və giləmeyvə, 130,4 min ton (1 faiz çox) bostan məhsulları, 20,5 min ton (50,3 faiz çox) şəkər çuğunduru, 623,9 ton (3,8 faiz az) tütün, 599,6 ton (4,8 faiz çox) yaşıl çay yarpağı yığılmışdır.
Rəqəmlər ilin əvvəlindən heyvandarlıq sahəsindəki göstəriciləri isə belə əks etdirir. Cari ilin yanvar-iyun aylarında quş əti də daxil olmaqla, diri çəkidə 305,1 min ton ət, 1140,8 min ton süd, 1217,4 milyon ədəd yumurta, 13,1 min ton yun, 155 ton barama istehsal olunmuşdur. 2025-ci ilin yanvar-iyun ayları ilə müqayisədə ət istehsalı 4 faiz, süd istehsalı 0,3 faiz artmış, yumurta istehsalı eyni səviyyədə qalmış, yun istehsalı 2 faiz, barama istehsalı 16,8 fazi azalmışdır.
2026-cı ilin yanvar-iyun aylarında quşçuluq müəssisələrində diri çəkidə 53 min ton quş əti və 602,5 milyon ədəd yumurta istehsal olunmuşdur. Ümumilikdə bu müəssisələr üzrə 1 iyul tarixinə cəmi quşların sayı 13860,1 min baş olmuş, hər yumurtalayan toyuqdan orta hesabla 132 ədəd yumurta alınmışdır.
Flora SADIQLI,
"Azərbaycan"
