Şəhərin ərazisində aşkar edilən tarixi abidə bölgəyə marağı daha da artıracaq

AMEA-nın Arxeologiya və Etnoqrafiya İnstitutunun Naftalan arxeoloji ekspedisiyasının rəhbəri, tarix üzrə fəlsəfə doktoru, dosent Müzəffər Hüseynov deyir ki, Qalaboynu tarixi  abidənin yerləşdiyi təpənin hündürlüyü 10 metrdən, sahəsi 3 hektardan çoxdur. 
"Yaşayış yeri hələ 2020-ci ildə qeydə alınaraq ilkin arxeoloji tədqiqatlar aparılıb. Bu il avqustun 1-dən aparılan tədqiqatlar zamanı ərazidə möhtəşəm quruluşlu, böyük ölçülü çiy kərpicdən inşa edilmiş binanın divar qalıqları aşkarlanıb. Bina divarının eni 1,8-1,9 metrdir. Divarın tikintisində 37x37 santimetr ölçüdə, 9-10 santimetr qalınlığında, tərkibinə xırda doğranmış saman qalıqları qatılmış çiy kərpiclərdən istifadə edilmişdir. Divar qalıqları ilə yanaşı, binanın daxilində ağ rəngli, möhkəm tərkibli daşlardan ibarət lövhələr də aşkarlanıb ki, onun da qalınlığı 15-30 santimetrdir", - deyə arxeoloq bildirib. 
Ekspedisiya rəhbərinin dediyinə görə, aşkar edilmiş divar qalıqları, sütun altlıqları və saxsı məmulatlarına əsasən, buranın Əhəmənilər dövrünə aid saray kompleksi olduğu ehtimal olunur.
Qeyd edək ki, yaşayış yeri ölkəmizdə sayca bu tip 3-cü abidədir və ehtimal olunur ki, bu ərazidə Orta əsrlərdə qısamüddətli yaşayış olub. Lakin ərazidə aşkarlanmış Orta əsrlərə aid təsərrüfat quyuları, ocaq yerləri abidənin divarlarını zədələyib. Buna baxmayaraq, aşkar edilən tapıntılar böyük tarixi və elmi marağa səbəb olub.
Belə bir abidənin müalicəvi turizm mərkəzi olan Naftalan ərazisində aşkar edilməsinin əhəmiyyəti və gələcəkdə buranın turizm marşrutu kimi fəaliyyət göstərməsinə, həmçinin regionda arxeo turizmin inkişafına öz töhfəsini verəcək.