Təbiətin, torpağın oyanışı kənd yerlərində, təsərrüfat sahələrində daha çox hiss olunur. İndi həm də kənd təsərrüfatında əkin işlərinin qızğın çağıdır. Sanki əkinçi torpaqdan ötrü darıxıbmış kimi ona elə sarılıb ki, günəşin doğub-batmasından da xəbəri olmur. 

Amma bol məhsul əldə etməyin əsas yolu suvarma işlərinin vaxtında həyata keçirilməsindən asılıdır. Çünki suvarma vaxtında, lazımi qaydada və qədərdə aparılmasa, əkinin heç bir faydası olmaz. Bu baxımdan indi melioratorların üzərinə böyük məsuliyyət düşür. Həmin məsuliyyəti dərk edən Göygöl Su Meliorasiya Sistemlərinin İstismarı İdarəsinin kollektivi işini tələb olunan səviyyədə qurmaq üçün tapşırılan işə məsuliyyətlə yanaşır. 

Kollektiv əvvəlki illərdə olduğu kimi, keçən il də nəzərdə tutulan bütün işləri yüksək səviyyədə həyata keçirmiş, dövlət təsərrüfatlarının, fermerlərin və digər sudan istifadə edən qurumların suvarma suyuna olan tələbatını təmin etmək üçün mövcud imkanlardan maksimum yararlanmışdır. Nəticədə 14831 hektar sahənin suvarılması vaxtında təmin edilmişdir. 

İdarənin rəisi İsmayıl Əvəzovla söhbətdən məlum oldu ki, melioratorlar işlərin daha keyfiyyətli və sürətlə aparılması üçün avadanlıqların işlək vəziyyətdə olmasına diqqətlə yanaşmışlar. Bunun üçün cari təmir işlərinə xüsusi diqqət yetirilmişdir. Məhz bunun nəticəsidir ki, suvarma suyundan itkisiz və səmərəli istifadə edilməsi üçün idarənin balansında olan bütün kanallar texniki vasitələrlə lildən təmizlənmiş, eləcə də 50 hidrotexniki qurğu, 30 hidropost cari təmir olunmuşdur. Qapalı boru kəmərlərinin 6 kilometr hissəsində qaynaq işləri, beton kanalların isə 3 kilometrlik hissəsində təmir işləri aparılmışdır. 

Rayon ərazisində sel sularından mühafizə tədbirlərinin görülməsi üçün də tədbirlər həyata keçirilmiş, o cümlədən Gəncə çayı, Kürəkçay, Qoşqarçayın mühafizə zolaqlarında mövcud olan bəndlərdə bərkitmə işləri görülmüşdür. Bunlardan əlavə, balansda olan 302 subartezian quyusundan 256-da nasos aqreqatları təmir edilmişdir ki, nəticədə subartezian quyularının iş rejimləri bərpa olunmuşdur. Subartezian quyularında təmirə yaramayan 18 nasos aqreqatları isə yenisi ilə əvəzlənmişdir. Həmçinin 34 subartezian quyusunun mühafizə şitlərinin elektrik avadanlıqları cari təmir olunmuş, təmirə yaramayan 9 idarəetmə şiti yenisi ilə əvəz edilmişdir. Paralel olaraq Xasabağ, Hacıməlik, Xaqani, Nadil, Balçılı, Quşqara kəndlərində və Gəncə şəhər Park Xiyabanı ərazisində ümumilikdə 10 subartezian quyusu əsaslı təmir olunmuşdur. Yeri gəlmişkən, Göygöl Su Meliorasiya Sistemlərinin İstismarı İdarəsinin balansında 302 subartezian quyusu var. Onlardan 224-ü Göygöl rayonu, 84-ü Gəncə şəhəri və 2-si Samux rayonu ərazisində yerləşir. Balansda olan subartezian quyularından kommunal-məişət üçün 175, suvarma üçün 126 və içməli su üçün 1 subartezian quyusu istifadə edilir. 

İdarənin kollektivi rayonun kənddaxili su təminatını da həmişə diqqət mərkəzində saxlayır. İl ərzində Zod kəndində müxtəlif ölçüdə magistral su xətləri yenisi ilə əvəz olunmuşdur. Topalhəsənli kəndinin nasosxanasında isə 132 kilovoltluq nasos aqreqatı quraşdırılmışdır ki, bu da əhalinin su təminatını xeyli yaxşılaşdırmışdır. Bundan başqa, Bənövşəli, Göyçəkənd, Çaykənd və Turşsu kəndlərində su xətləri yenilənmişdir. 

 Sabir ƏLİYEV,

 "Azərbaycan"