Bu gün Azərbaycan dünyanın hər yerindən görünən, bəşəriyyəti narahat edən problemlərin, istər bu, təbii kataklizmlər olsun, istərsə də siyasi böhranlar həllində fəal rol oynayan aktor ölkəyə çevrilib.
Dörd il ərzində, dünyada BMT Baş Assambleyasından sonra ən böyük beynəlxalq təsisat olan Qoşulmama Hərəkatına uğurlu sədrliyi, iştirakçı sayına görə dünyanın ən nəhəng tədbirlərindən olan COP29 kimi beynəlxalq iqlim sammitinə müvəffəqiyyətlə evsahibliyi etməsi, bu qlobal tədbirdə bəşəriyyət adına mühüm qərarların qəbul olunması və sair kimi tarixi əhəmiyyətli nailiyyətlər də buna nümunədir. Eyni zamanda Azərbaycanın, şəxsən Prezident İlham Əliyevin qlobal barışdırıcılıq missiyası, İsrail ilə Türkiyənin timsalında da bu aydın görünür, dünyadakı siyasi qütblər arasındakı gərginliklərin aradan qaldırılmasında fəal iştirakı ölkəmizin nüfuzunun göstəricisidir.
Bütün bunlar, həm də illər boyu Qərb dairələrinin apardığı anti-Azərbaycan fəaliyyətlərin fiaskoya uğradılmasının, ölkəmiz əleyhinə həyata keçirilən qarayaxma kampaniyasının heç bir işə yaramadığının təzahürüdür.
Qərb QHT-lərinin çirkin məqsədlə göndərdiyi pullar
Faktdır ki, Azərbaycana qarşı hər zaman qərəz nümayiş etdirən Qərb dairələri hələ 2000-ci illərin əvvəllərində ölkəmizi daxildə pulla ələ aldıqları Qeyri-Hökumət Təşkilatları və media qurumları vasitəsilə parçalanmaya, xaosa, vətəndaş qarşıdurmasına, bir sözlə, məhvə sürükləməyə çalışıblar. Eyni zamanda Qərb mediasında sistemli şəkildə anti-Azərbaycan təbliğatı təşkil olunub. Həmçinin Azərbaycanda bərqərar olan demokratik sistemi dağıtmaq üçün seçkilərə də hər zaman müdaxilə etmək istəyində olublar.
Aprelin 9-da ADA Universitetində keçirilən "Yeni dünya nizamına doğru" mövzusunda beynəlxalq forumda iştirakçıların suallarını cavablandırarkən Prezident İlham Əliyev söylədi ki, əvvəlki illərdə seçkilərimizə müdaxilə müxtəlif sadə alətlər vasitəsilə edilirdi: "Birincisi, Qərbin qeyri-hökumət təşkilatlarının Azərbaycana göndərdiyi pullar idi. İkincisi, Qərb mediasında anti-Azərbaycan təbliğatı, Prezident Trampın saxta xəbərlər mənbəyi adlandırdığı "Washington Post", "New York Times" kimi nəşrləri, təbii ki, Fransanın hökumətyönlü "Figaro" və "Le Monde" kimi saxta mediaları elə bir ab-hava yaratmaq istəyirdilər ki, guya Azərbaycanda diktaturadır, demokratik təcrübə yoxdur, insan haqları vəhşicəsinə pozulur, müxalifət mələkdir, hakimiyyət isə şeytandır".
Prezident bildirdi ki, həmin vaxtda dövlət faktiki olaraq bu maliyyə vəsaitlərinin axınına tam nəzarət etmirdi: "Bu səbəbdən, Milli Demokratiya İnstitutu kimi bədnam qurumların, əslində, burada hökuməti devirmək planı hazırlamasının səbəbi də bu idi. Bunu aşkar etdik. Beləliklə, biz bank hesabından bir milyon ABŞ dollarından çox vəsaitin nağdlaşdırıldığını aşkar etdik. Sonra biz o pulun bir hissəsini, müxalifətyönlü fəalların kirayələdikləri mənzillərində "Molotov kokteylləri"ni və hökumət binalarına, polislərə necə hücum etmək təlimatlarını tapdıq".
Müxtəlif ölkələrdə rəngli inqilablar adı altında dağıdıcı fəaliyyət göstərən Qərb dairələri bu çirkin təcrübələrini 2005-ci ildə Azərbaycanda da həyata keçirmək üçün cəhdlər etmişdilər. Həmin il ölkəmizdə narıncı inqilab cəhdləri ABŞ Dövlət Departamenti tərəfindən təşkil olunmuşdu.
"Qərb təşkilatları hələ çox "yaradıcıdırlar""
Ancaq dövlətimizin yürütdüyü demokratik siyasət, Azərbaycan xalqının dövlətə etimadının tam olması və iqtidar ətrafında sıx birləşməsi ölkəmizdə xarici mənfur qüvvələrin planlaşdırdıqları bütün planları suya saldı.
"İndi bunu etmək daha çətindir. Çünki birincisi, biz maliyyə sisteminə tam nəzarət edirik. İkincisi, yerli QHT-lərə, əslində, müxalifətin qollarına verilən bütün qrant adlanan vəsaitlər indi qeydiyyatdan keçməlidir. Burada pul qaçaqmalçılığı çox çətindir", - deyə adıçəkilən forumda Prezident İlham Əliyev vurğuladı.
Ancaq o da reallıqdır ki, bu mənfur qüvvələr ölkəmizin daxili işlərinə burun soxmaq, ara qarışdırmaq, böhran yaratmaq üçün hələ də ağlagəlməz yollara əl atırlar. "Yeni dünya nizamına doğru" mövzusunda beynəlxalq forumda ölkəmizin rəhbəri təəssüflə qeyd etdi ki, bəzi Qərb təşkilatları hələ çox "yaradıcıdırlar". Onlar müxtəlif kuryerlər vasitəsilə buraya pul daşımağın yeni yollarını tapıblar. Onlar bu pulu, əsasən, Gürcüstan vasitəsilə gətirirdilər: "Gürcüstan deyəndə, pulun Gürcüstan tərəfindən ayrıldığını söyləmək istəmirəm. Bu, Gürcüstanda hələ də fəaliyyət göstərən Qərb qeyri-hökumət təşkilatlarındandır - xaricilərin nəzarətində olan Gürcüstan bankları vasitəsilə. Adsız kredit kartları və nağd pullar vəziyyətin sabitliyini pozmaq üçün buraya gətirilir".
Lakin Qərb dairələrinin Azərbaycanda siyasi sabitliyi pozmaq kimi məkrli niyyətləri mənasızdır. Çünki ötən dövrdə olduğu kimi, bundan sonra da onların bütün dağıdıcı cəhdlərinin qarşısı qətiyyətlə alınacaq. Dövlətimiz xalqımızın milli maraqlarını təhlükəyə atan heç bir qüvvənin ölkəmizin daxilində əl-qol açmasına imkan verməyəcək. Buna görə də Qərb dairələrinin anti-Azərbaycan fəaliyyətləri başından fiaskoya məhkumdur.
Yasəmən MUSAYEVA,
"Azərbaycan"
jpg_1766048684.jpg)
