Prezident Frank-Valter Ştaynmayerin ölkəmizə rəsmi  səfəri əlaqələrin inkişafına mühüm təkan verəcək

Dünyanın siyasi arenasında yerini və çəkisini möhkəmləndirən Azərbaycan xarici dövlətlərlə münasibətlərini inkişaf etdirməkdədir. Tam müstəqil xarici siyasət həyata keçirən Prezident İlham Əliyevin uğurlu diplomatiyası ilə Azərbaycan əksər dövlətlərin Cənubi Qafqaz regionundakı ən etibarlı tərəfdaşı hesab olunur. Azərbaycanın bir çox dövlətlə strateji tərəfdaşlq, səmimi dostluq-qardaşlıq münasibətləri mövcuddur. 

Azərbaycan həmçinin Mərkəzi və Şərqi Avropa ölkələri ilə fəal əməkdaşlıq edir. Onlardan biri də Almaniyadır. Bu ölkə ilə ikitərəfli və çoxtərəfli əməkdaşlığın inkişafı Azərbaycanın xarici siyasətinin vacib istiqamətlərindəndir.

Almaniya Federativ Respublikasının Prezidenti Frank-Valter Ştaynmayerin aprelin 2-də ölkəmizə rəsmi səfəri isə iki ölkə arasındakı əlaqələrin inkişafına təkan verərək gələcək yaxın əməkdaşlıq üçün əlverişli imkanlar yaratdı.

Səfərin məqsədi ölkələrimiz arasında olan əlaqələrin daha da inkişafına və qarşılıqlı maraq doğuran sahələrdə əməkdaşlığın gücləndirilməsinə töhfə verməkdir. İki ölkənin prezidentləri arasında keçirilən görüşlərdə müzakirə edilən məsələlər münasibətlərin daha da gücləndirilməsinə müsbət impuls verdi.

Onu da vurğulamalıyıq ki, ikitərəfli münasibətlərin tarixində bu, Almaniya Prezidentinin Azərbaycana birinci rəsmi səfəri kimi yadda qaldı. 

Azərbaycan-Almaniya münasibətlərinin əsası 1992-ci il yanvarın 12- də qoyulub. Həmin vaxt Almaniya Azərbaycanın müstəqilliyini tanıyıb və bir ay sonra iki ölkə arasında diplomatik münasibətlər qurulub. Hər iki ölkədə səfirliklər fəaliyyətə başladıqdan sonra Azərbaycan və Almaniya arasında davamlı siyasi dialoq, iqtisadiyyat və humanitar sahələrdə geniş əməkdaşlıq həyata keçirilib. Dövlət başçılarının qarşılıqlı səfərləri bu əməkdaşlığı daha da möhkəmləndirib. 

Bu əməkdaşlıq hökumət və parlament başçılarının qarşılıqlı səfərləri zamanı daha da inkişaf edib. İki ölkə arasında indiyə qədər 77 sənədin imzalanması ikitərəfli əməkdaşlığın dinamik inkişafından xəbər verir. Azərbaycan-Almaniya parlamentlərarası əlaqələr üzrə işçi qrupu, Almaniya Bundestaqında isə Azərbaycanı da əhatə edən Almaniya-Cənubi Qafqaz parlament qrupu fəaliyyət göstərir. 

Almaniya Prezidentinin bu səfəri iki ölkə arasında münasibətlərin daha da yaxşılaşacağından xəbər verir. Bunu Azərbaycan Prezidenti İlham Əliyev mətbuata verdiyi bəyanatında da diqqətə çatdırdı: "Həm təkbətək görüşdə söhbət əsnasında, həm də nümayəndə heyətlərinin iştirakı ilə apardığımız danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Mən tam əminəm ki, bu səfər bizim əlaqələrimizə yeni müsbət təkan verəcəkdir".

Azərbaycan Prezidenti iki ölkə arasındakı iqtisadi əlaqələri dəyərləndirərək bildirdi ki, iqtisadi sahədə əldə edilmiş nəticələr hər iki tərəfi ruhlandırır. Çünki bu ilin yanvar-fevral aylarında ticarət dövriyyəsi təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olub. Ona görə Azərbaycan hesab edir ki, gələcək illərdə ticarət dövriyyəsinin şaxələndirilməsi ilə bağlı daha fəal addımlar atılmalıdır. Bu, xüsusilə bərpaolunan enerji sahəsində də reallaşmalıdır. Çünki bu sahədə Almaniya şirkətlərinin çox böyük təcrübəsi var, Azərbaycanın da çox böyük proqramı, planları mövcuddur: "Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir".

Almaniya Prezidenti Frank-Valter Ştaynmayer isə Azərbaycanın əlverişli coğrafi mövqeyini dəyərləndirərək ölkəmizin böyük potensiala sahib olduğunu vurğuladı. Onun fikrincə, Azərbaycan inkişaf edərək mühüm məkana çevrilib və buradan olduqca vacib ticarət yolları keçir, öz növbəsində həmin amil dünyanın birləşməsinə əsas ola bilər. Yalnız Mərkəzi Asiya ilə deyil, həm də Uzaq Şərqlə, o cümlədən Cənub-Qərbi Asiya və Çinlə Almaniyanın ticarət əlaqələrində Azərbaycanın rolu var. 

"Bilirik ki, hazırkı mövcud yolların imkanları məhduddur. Ölkənizdən keçən yollar, həmçinin Orta dəhlizin rolu alman iqtisadiyyatı üçün vacibdir, yaxşı perspektivdir və bu, daha maraqlı olacaq. Son illərdə cərəyan etmiş hadisələrdən sonra Cənubi Qafqaz regionunuz daha sabit bölgəyə çevriləcək", - deyə Almaniya Prezidenti vurğulayıb. 

Prezident Frank-Valter Ştaynmayer Azərbaycana təşəkkürünü də çatdırdı. Bunun səbəbi Rusiya-Ukrayna müharibəsi zamanı baş vermiş gərginlikdə Almaniyanın qaz təchizatında yaranmış problemin həllidir. Belə ki, 2022-ci ildə Almaniyanın qaz təchizatında problem baş verib: "Rusiyadan aldığımız qaz təchizatında dayanma baş verdiyi zaman Azərbaycan üzərinə böyük məsuliyyət götürdü və mən buna görə Sizə çox təşəkkür edirəm. Sizin sözlərinizdən elə başa düşdüm ki, burada qaz ilə yanaşı, infrastrukturun genişləndirilməsinə də ehtiyac var. 

Beləliklə, infrastrukturun yaxşılaşdırılması üzərində Avropada işləməliyik. Çünki o, hələ də kifayət həcmdə deyil. Bir sözlə, bu görüşlərdən sonra yeni ev tapşırıqlarımız da var".

Göründüyü kimi, aparılan danışıqlar, verilən tapşırıqlar, gəlinən ümumi razılıqlar onu deməyə əsas verir ki, Azərbaycan-Almaniya siyasi-iqtisadi münasibətlərində yeni uğurlu mərhələ başlayır. 

Rəşad BAXŞƏLİYEV,

"Azərbaycan"