Sülh müqaviləsinin imzalanması üçün Ermənistan ölkəmizə qarşı ərazi iddialarından əl çəkməlidir
Hazırda Cənubi Qafqazda mövcud olan ümumi sabitlik və davamlı sülh üçün formalaşan münbit şərait Azərbaycanın yaratdığı yeni reallıqlara görə mümkün olub. Vətən müharibəsi sayəsində üç onillik boyu sürən münaqişəyə son qoyan ölkəmiz Ermənistana təkmil sülh modeli təklif edib və bu istiqamətdə əməli işlər gerçəkləşdirib. İki ölkə arasında sərhədlərin demarkasiya və delimitasiyasına başlanılması, Qazaxın dörd kəndinin azad edilməsi, sülh sazişi layihəsi ilə bağlı danışıqlar prosesinin yekunlaşması rəsmi Bakının davamlı səylərinin müsbət nəticələridir.
Aprelin 2-də Almaniya Prezidenti Frank-Valter Ştaynmayerlə birgə mətbuata bəyanatla çıxışı zamanı jurnalistlərin suallarını cavablandıran Prezident İlham Əliyev də məhz bu məqama xüsusi vurğu etdi: "...İkinci Qarabağ müharibəsi başa çatandan sonra məhz Azərbaycan və şəxsən mən sülh danışıqlarının başlanmasının təşəbbüskarı olmuşam. O vaxt nə Ermənistan, nə də ki, o vaxt hələ fəaliyyət göstərən ATƏT-in Minsk qrupu belə bir təklif irəli sürməmişdir. Bu təklifi Azərbaycan tərəfi vermişdir. Bu, özlüyündə onu göstərir ki, biz sülh müqaviləsinin bağlanmasında nə qədər maraqlıyıq".
Dövlətimizin başçısı əlavə etdi ki, Ermənistandan hər hansı bir cavab gəlmədiyi üçün biz mümkün olan bu müqavilənin əsas prinsiplərini də ortaya qoyduq: "Yadımdadır, 5 əsas prinsip irəli sürülmüşdü və bu prinsiplər əsasında müzakirələrə start verildi".
İrəvan sülh müqaviləsini imzalamaq istəyirsə...
44 günlük Vətən müharibəsinin üzərindən beş ilə yaxın müddət keçməsinə baxmayaraq, hələ də iki ölkə arasında sülh müqaviləsi imzalanmayıb. Bunun əsas səbəbi isə Ermənistanın ölkəmizə qarşı ərazi iddiasından əl çəkmək istəməməsidir. Ermənistan konstitusiyasının preambula hissəsində müstəqillik bəyannaməsinə istinadən yer alan ərazi iddiaları bunu aydın göstərir. Eyni zamanda İrəvan ATƏT-in keçmiş Minsk qrupunun ləğvi üçün ölkəmizlə birgə müraciət etməkdən yayınır. Halbuki Azərbaycan öz gücünə BMT Təhlükəsizlik Şurasının qətnamələrini yerinə yetirərək hərbi yolla torpaqlarını işğaldan azad edib. Bu minvalla onilliklər boyu adıçəkilən qrupun danışıqlar yolu ilə həll edə bilmədiyi (yaxud həll etmək istəmədiyi) münaqişəyə son qoyub. Yəni faktiki olaraq bu yarıtmaz qrupun hüquqi olaraq da fəaliyyətinə son qoymağın vaxtı çoxdan çatıb.
Jurnalistlərin suallarını cavablandıran zaman dövlətimizin başçısı İlham Əliyev məlumat verdi ki, sülh müqaviləsinin 17 paraqrafdan ibarət mətni tam razılaşdırılıb. Azərbaycan burada hər hansı bir əlavə şərt irəli sürməyib.
Ölkəmizin rəhbəri vurğulayıb ki, bizim şərtlərimiz Ermənistan üçün bəllidir, yenilik deyil. Bu şərtləri uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq: "Nədən ibarətdir bu? Birincisi, ATƏT-in Minsk qrupu ləğv edilməlidir...
...Ermənistanın buna razı olmaması haqlı olaraq şübhələr doğurur. Görəsən, nə üçün? Bəlkə Ermənistan bizə qarşı yenə də ərazi iddiası ilə çıxış etmək istəyir? Onların sürətli silahlanması, öldürücü silahlar əldə etməsi, bu sahədə əsas yardımçıları olan Fransanın onları yeni təxribatlara təhrik etməsi bu şübhələri təbii olaraq artırır".
Prezident İlham Əliyev söylədi ki, Ermənistan konstitusiyasında müstəqillik aktına istinad var. O, konstitusiyanın tərkib hissəsidir. Orada isə Azərbaycanın hüquqi, tarixi ərazisinin Ermənistanla birləşməsi haqqında müddəa var və bu, bizə qarşı açıq ərazi iddiası sayılır: "Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin ediləndən sonra sülh müqaviləsini imzalamaq üçün heç bir maneə olmayacaq. Necə deyərlər, top Ermənistanın tərəfindədir. Əgər doğrudan da Ermənistan sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir".
"Sülh göyərçini" Ermənistanın müharibə hazırlığı
Fransa yenidən Cənubi Qafqaza yerləşmək üçün regionda davamlı münaqişənin olmasında birbaşa maraqlıdır. Bir müddət əvvəl "Caliber.az" nəşrinin yazdığı məlumatda da göstərilir ki, son iki ildə Ermənistan hərbi alışlarını kəskin şəkildə artıraraq, Fransa və Hindistandan silah almağa milyardlarla dollar xərcləyib. Fransadan Ermənistana müasir "CAESAR 155" mm-lik özüyeriyən artilleriya qurğuları və onların komplekt hissələri, həmçinin tank əleyhinə raket sistemləri və hava-hava tipli raketlər tədarük edilib. Ermənistan ordusu R511 və R530 hava-hava raketləri, 30 ədəd ERYX tank əleyhinə raket kompleksi, Almaniya istehsalı olan DM32 ("bunkerfaust") qumbaraatanları və "Panzerfaust 3" tank əleyhinə sistemləri də əldə edib. Bundan əlavə, Ermənistana Fransanın Apilas tipli 500 ədəd birdəfəlik reaktiv qumbaraatanı və ABŞ istehsalı olan 50 ədəd BGM-71 TOW tank əleyhinə raket kompleksi tədarük olunub.
Özünü beynəlxalq ictimaiyyətə "sülh göyərçini" kimi təqdim edən Ermənistan Fransanın əli ilə sürətlə silahlanır və müharibəyə hazırlaşır. Bütün bunlara görədir ki, İrəvan və hamisi Paris Azərbaycanın bu iki şərti qəbul edilmədən sülh müqaviləsinin imzalanmasına çalışır. Təbii ki, bu halda gələcəkdə yenidən Azərbaycana torpaq iddiası irəli sürməsi üçün özünə əlyeri qoyur.
Eyni zamanda Ermənistanı revanşa qızışdıran müstəmləkəçi ölkə Azərbaycan əleyhinə qarayaxma kampaniyasını dayandırmır.
Aprelin 2-də Fransanın Avropa və xarici işlər naziri Jan Noel Baronun Milli Assambleyanın Xarici İşlər Komissiyasındakı çıxışı zamanı Azərbaycan-Ermənistan sülh prosesi və erməniəsilli şəxslərin məhkəmə işi ilə bağlı səsləndirdiyi əsassız iddialar da Parisin riyakar planlarının tərkib hissəsidir. Belə ki, neokolonial siyasət yürüdən bu ölkənin xarici işlər naziri Azərbaycan ərazilərinə qarşı iddiaların mövcud olduğu Ermənistan konstitusiyasının dəyişdirilməsi kimi qanuni tələbi sual altına alaraq bunu yeni şərt kimi təqdim edib. Ancaq Prezident İlham Əliyevin də vurğuladığı kimi, Azərbaycan hər hansı əlavə şərt irəli sürməyib.
Buna görə də, təcavüzkar Ermənistanı silahlandıraraq onu yeni müharibəyə, yəni məhvə sürükləyən Qərb himaydarları anlamalıdırlar ki, Azərbaycanın şərtləri prinsipial və dəyişməzdir. Sülh müqaviləsinin imzalanması üçün Ermənistan ölkəmizə qarşı ərazi iddialarından əl çəkməlidir. Əks təqdirdə sülh müqaviləsinin bağlanması onlar üçün arzu olaraq qalacaq.
Yasəmən MUSAYEVA,
"Azərbaycan"
