"Scandens Pharmaceutical Industries Ltd" MMC və "AZWOOL" mineral daş yunu zavodu yalnız bir həftədə açılan özəl müəssisələrdir
Azərbaycanda sahibkarlığın inkişafı ölkə iqtisadiyyatının modernləşməsi və rəqabət qabiliyyətinin artırılması baxımından strateji əhəmiyyət daşıyır. Həyata keçirilən islahatlar, təkmilləşən vergi sistemi, "bir pəncərə" və elektron xidmətlərin genişləndirilməsi, eləcə də Sahibkarlığın İnkişafı Fondunun (SİF) güzəştli kreditləri biznes mühitinin dinamik münbitləşməsinə şərait yaradır.
Kiçik və orta sahibkarlığın dəstəklənməsi məşğulluğun artırılmasına, regional inkişafın sürətlənməsinə və innovativ biznes modellərinin formalaşmasına da təkan verir. Baxmayaraq ki, hələ də maliyyə resurslarına çıxışın çətinliyi, infrastruktur problemləri və bəzi sahələrdə rəqabətin yetərincə formalaşmaması kimi maneələr mövcuddur, amma müsbət irəliləyişləri danmaq olmaz. Sahibkarlığın gələcək inkişaf perspektivləri üçün rəqəmsallaşmanın genişlənməsi, startap ekosisteminin güclənməsi və innovasiyaların tətbiqi ilə bağlı yeni imkanların açılması bunun təsdiqidir. Azərbaycanda sahibkarlığın inkişafına dövlət səviyyəsində verilən dəstəyin də rolunu diqqətdən qaçırmaq olmaz.
Prezident İlham Əliyev dəfələrlə vurğulayıb ki, güclü sahibkarlıq subyektinin formalaşdırılması ölkənin iqtisadi inkişaf strategiyasının əsas dayaqlarından biridir. Dövlət başçısının sahibkarlığın dəstəklənməsi ilə bağlı səsləndirdiyi fikirlər, qəbul etdiyi qərarlar və həyata keçirilən proqramlar bir daha göstərir ki, biznes mühitinin yaxşılaşdırılması, investisiya imkanlarının genişləndirilməsi və qeyri-neft sektorunun dayanıqlı inkişafı Azərbaycan siyasətinin prioritet istiqamətlərindəndir. Prezident səviyyəsində sahibkarlığın inkişafına verilən dəstək həm dövlət qurumlarının fəaliyyətində, həm də sahibkarlar üçün yaradılan geniş imkanlarda öz əksini tapır və bu sahənin davamlı inkişafına stimul verir. Qeyri-neft sektorunun şaxələndirilməsi və davamlı inkişafı istiqamətində aparılan tədbirlər nəticəsində ölkədə yeni istehsal sahələri yaradılır və bu sahələr yalnız iqtisadiyyatın müxtəlifliyini təmin etmir, eyni zamanda ölkənin iqtisadi inkişafında sahibkarlığın rolunu artırır.
Bunun real nəticəsini Prezidentin iki gün öncə AZWOOL mineral daş yunu zavodunun açılışında şəxsən iştirak etməsi təsdiq edir. Bakının Qaradağ rayonunda fəaliyyətə başlayan AZWOOL mineral daş yunu zavodu "Matanat-A" şirkətinə məxsudur. Ərazisi 10 hektar olan zavodda ABŞ, Almaniya və Türkiyədən gətirilmiş müasir avadanlıqlar quraşdırılıb. Müəssisənin illik istehsal gücü 1,5 milyon kubmetr mineral daş yunudur və məhsullar, əsasən, yerli xammaldan hazırlanır. Layihənin investisiya dəyəri 43 milyon manatdır. Onun reallaşdırılması üçün İqtisadiyyat Nazirliyinin tabeliyindəki Sahibkarlığın İnkişafı Fondu tərəfindən 10 milyon manat həcmində güzəştli kredit ayrılıb. Bundan əlavə, zavod investisiya təşviqi sənədi vasitəsilə texnika və texnoloji avadanlıqların idxalı zamanı təxminən 4 milyon manat güzəşt əldə edib. Hazırda müəssisədə 180 iş yeri yaradılıb.
Özəl sektora aid müəssisələrin açılışlarında Prezident İlham Əliyevin iştirakı sahibkarlığın iqtisadi inkişafdakı əhəmiyyətini və dövlət tərəfindən ona verilən yüksək dəyəri göstərir. Üstəlik də sahibkarlar üçün motivasiya rolunu oynayır, iş adamlarını gələcək layihələrə sərmayə qoymağı təşviq edir və ölkədə rəqabətqabiliyyətli, modern sahibkarlıq mühitinin möhkəmlənməsinə stimul verir və innovativ istehsalın genişləndirilməsi sahəsində atılan addımların əhəmiyyətini üzə çıxarır. Bu, yalnız dövlətin biznes subyektlərinə dəstəyini nümayiş etdirmir, həm də ölkədə sahibkarların sahibsiz olmadıqlarını təsdiqləyir. Bunun sayəsindədir ki, məsələn, AZWOOL zavodunda quraşdırılan müasir avadanlıqlar, illik yüksək istehsal gücü və yaradılan yeni iş yerləri, eləcə də investisiya təşviqi mexanizmlərindən istifadə edilməsi sahibkarlığın dayanıqlı inkişafına və innovativ texnologiyaların tətbiqinə imkan verib.
Yeri gəlmişkən, bir həftə əvvəl Prezident İlham Əliyev Abşeron rayonunun Hökməli qəsəbəsində "Scandens Pharmaceutical Industries Ltd" MMC-nin dərman preparatları istehsalı müəssisəsinin də açılış lentini kəsmişdir. Beynəlxalq standartlara uyğun layihələndirilən bu müəssisə Almaniya, İsveçrə və İtaliyanın qabaqcıl texnologiya və avadanlıqları ilə təchiz olunub. İl ərzində müəssisədə antibiotiklər, diabetologiya, hepatologiya, kardiologiya, andrologiya, allerqologiya və qastroenterologiya sahələrinə aid təxminən 800 milyon ədəd tablet və kapsul dərman preparatı istehsal olunacaq. İstehsal olunan məhsullar həm daxili bazara çıxarılacaq, həm də ixrac ediləcək. Müəssisədə 120 iş yeri yaradılıb.
Dəyəri 74 milyon manat olan bu layihə də özəl investisiya hesabına həyata keçirilib. Şirkət İqtisadiyyat Nazirliyi tərəfindən verilmiş investisiya təşviqi sənədi hesabına idxal olunan avadanlıqlara görə 6,5 milyon manat güzəşt əldə edib. Bu o deməkdir ki, dövlət sahibkarların biznes mühitinin daha da əlverişli olmasına şərait yaradır. Belə yanaşma yeni iş yerlərinin yaradılmasına, müasir texnologiyaların tətbiqinə və ölkənin ixrac potensialının gücləndirilməsinə imkan verir. Eyni zamanda sahibkarların risklərini azaltmaqla, investisiyaların cəlb edilməsini sürətləndirir və iqtisadiyyatın şaxələndirilməsinə yol açır.
Müasir texnologiyalar əsasında qurulan müəssisələr, yaradılan yeni iş yerləri və innovativ istehsal imkanları sahibkarların təşəbbüsləri ilə əhalinin məşğulluğunu artırır və ölkənin rəqabət qabiliyyətini gücləndirir. "Scandens Pharmaceutical Industries Ltd" MMC və AZWOOL mineral daş yunu zavodu yalnız son bir həftədə açılan müəssisələrdir. Amma təbii ki, onlar nə birincidir, nə də sonuncu.
Züleyxa ƏLİYEVA,
"Azərbaycan"
jpg_1768850033.jpg)
