33 illik şərəfli yol

Cənubi Qafqazın ən böyük siyasi təşkilatı olan YAP zəfər partiyasına çevrilib

Tarix 21 noyabr 1992-ci il. 

Müstəqil Azərbaycanın ictimai-siyasi fikir tarixinin ən əlamətdar, ən şərəfli səhifələrindən biri...

Məhz həmin gün, Ümummilli Lider Heydər Əliyevin rəhbərliyi ilə müstəqil ölkəmizin inkişafında müstəsna xidmətləri olan Yeni Azərbaycan Partiyasının yarandığı gündür.

Müasir Azərbaycan dövlətçiliyinin qurulması, möhkəmləndirilməsi və inkişafı Ümummilli Lider Heydər Əliyevin adı ilə bağlıdır. Bu dahi şəxsiyyət Azərbaycan dövlətçiliyini xaos və böhran məngənəsindən çıxaran, vətəndaş müharibəsinin qarşısını alan, döyüş cəbhəsində məğlubiyyətlər seriyasına son qoyan və atəşkəs rejiminin tətbiqinə nail olan fenomenal liderdir. Xalqımızın taleyində xilaskarlıq missiyasını şərəflə yerinə yetirən Ulu Öndər Azərbaycanda siyasi plüralizm, siyasi mədəniyyət və siyasi sistemin yaranmasının əsasını qoyan nadir şəxsiyyətdir. 

Ümummilli Lider Heydər Əliyevin yaratdığı Yeni Azərbaycan Partiyası bu gün sıralarında 744 334 nəfəri birləşdirməklə Cənubi Qafqazın ən böyük siyasi təşkilatıdır. 

Ümummilli Lider Heydər Əliyevin müəllifi olduğu Yeni Azərbaycan Partiyası 33 ildir ki, respublikamızın ictimai-siyasi həyatında fəal iştirak edir, xalqın sevgisini və dəstəyini qazanır, ölkədə sabitliyin təminatında avanqard rolunu davam etdirir. Yeni Azərbaycan Partiyası öz fəaliyyəti ilə sübuta yetirib ki, o məhz yeni, müstəqil Azərbaycanı qurmağa, onu zirvələrə, parlaq gələcəyə daşımağa qadir partiyadır.

Yeni Azərbaycan Partiyası Azərbaycanın tarixinin ən mürəkkəb və keşməkeşli dövründə yaranıb. 1990-cı ilin əvvəllərində bir-birini əvəz edən siyasi şəristəsi olmayan hakimiyyətlər tərəfindən Azərbaycanın dövlətçiliyinin, müstəqilliyi və suverenliyinin fəlakətə sürükləndiyi situasiyada xalqımız əmin idi ki, ölkəni bu ağır bəlalardan yalnız Ulu Öndər Heydər Əliyev dühası xilas edə bilər.

Xalqın gündən-günə Ümummilli Lider Heydər Əliyev şəxsiyyətinə olan inamı daha da artaraq ümumxalq məhəbbətinə çevrilmişdi. Belə bir vaxtda bir qrup Azərbaycan ziyalısı Naxçıvana gedərək ölkəmizi bu bəladan qurtara biləcək yeni bir partiya yaratmaq arzusu ilə Heydər Əliyevə müraciət etdi və Ulu Öndər yeni yaradılacaq partiyaya rəhbərlik etməyə razılıq verdi.

Beləliklə, 1992-ci il noyabrın 21-də 550 nəfərdən ibarət təşəbbüs qrupunun iştirakı, Ümummilli Lider Heydər Əliyevin sədrliyi ilə təsis konfransının yalnız Naxçıvanda keçirilməsi mümkün oldu. Bu, müstəqil Azərbaycan tarixində yeni bir səhifənin başlanğıcı idi. Beləliklə, 1992-ci ilin noyabrından etibarən Yeni Azərbaycan Partiyası (YAP) Azərbaycan tarixinin əsas hərəkətverici qüvvəsinə çevrildi.

Ümummilli Liderin müxalifət partiyası olaraq yaratdığı YAP hakimiyyətə sivil yolla gəlməyin əsl "yol xəritəsi"ni ortaya qoydu. Bununla da siyasi mədəniyyət və siyasi əxlaq nümunəsi yaratdı. Bu nümunə özündə sağlam, obyektiv, şəffaf və demokratik mübarizə mədəniyyətini ehtiva edir və qələbə təminatına görə unikaldır.

YAP-ın yaranmasından sonrakı illərdə partiya Azərbaycan Respublikasının ən güclü siyasi qüvvələrindən biri halına gəldi. 1993-cü ildən etibarən Heydər Əliyevin siyasi kursu Azərbaycanın xarici və daxili siyasətini əsaslı şəkildə dəyişdirdi. Ulu Öndərin prezidentliyi dövründə Azərbaycan iqtisadiyyatında mühüm islahatlar həyata keçirildi və Azərbaycan Qərblə Şərq arasında balanslı xarici siyasət kursu reallaşdırmağa başladı.

Bu gün cənab Prezident İlham Əliyevin rəhbərliyi ilə YAP yeni inkişaf mərhələsini yaşayır. 

Yeni Azərbaycan Partiyası Ulu Öndərin rəhbərliyi altında yarandığı gündən ölkəmizin inkişafı naminə çox mühüm layihələr reallaşdırıb, Heydər Əliyev ideyalarına sadiqlik nümayiş etdirib. Yeni Azərbaycan Partiyası və onun numayəndələri bütün seçki kampaniyalarında iştirak etmiş  və böyük üstünlüklə qələbə qazanaraq bütün siyasi partiyaları arxada qoymuşdur. 

Yeni Azərbaycan Partiyası Azərbaycanın müstəqil, demokratik, sivil dövlət kimi möhkəmləndirilməsində, vətəndaş cəmiyyəti quruculuğunda ən fəal, qabaqcıl siyasi rol oynamaqla bu istiqamətdə mühüm tarixi əhəmiyyətli işlər görmüşdür. 

Xalqımız əsası Ulu Öndər Heydər Əliyev tərəfindən qoyulan və Prezident İlham Əliyevin uğurla davam etdirdiyi siyasətin dəstəkçisidir. Yeni Azərbaycan Partiyası Ümummilli Liderin ideyaları əsasında və Müzəffər Ali Baş Komandan İlham Əliyevin rəhbərliyi ilə tarixi uğurlara imza ataraq şərəfli inkişaf yolu keçmişdir.

Prezident İlham Əliyev Heydər Əliyev siyasi kursunun layiqli davamçısı kimi Azərbaycan tarixinə qurucu dövlət başçısı olaraq adını yazdırdı, ölkəmizi Cənubi Qafqazın ən güclü, müasir və modern dövlətinə çevirməyi bacaran lider və torpaqlarımızı işğaldan azad edərək Müzəffər Ali Baş Komandan kimi hər bir Azərbaycan vətəndaşının Prezidenti olduğunu sübuta yetirdi.

Prezident İlham Əliyevin ölkəmizə rəhbərliyi dövründə Yeni Azərbaycan Partiyasının gücləndirilməsi və inkişafı istiqamətində atılan addımlar çox mühüm əhəmiyyət kəsb etdi. Dövlət başçısının qarşıya qoyduğu vəzifələrin icrasına nail olunması, siyasi sistemin və ictimai-siyasi münasibətlərin inkişafına, demokratik dəyərlər və ənənələrin gücləndirilməsinə, bütövlükdə isə ölkəmizin tərəqqisinə yeni təkan və töhfə oldu.

44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə möhtəşəm tarixi qələbə qazanaraq ərazi bütövlüyümüzün və tarixi ədalətin bərpa edilməsinə müvəffəq olmağımız isə çoxəsrlik dövlətçilik tariximizin  zirvə hadisəsi və şanlı qürur səhifəsidir. İkinci Qarabağ müharibəsinin məntiqi davamı olaraq 19 sentyabr 2023-cü ildə Azərbaycan Respublikası Silahlı Qüvvələrinin Ali Baş Komandanı İlham Əliyevin rəhbərliyi ilə cəmi 24 saata yaxın müddət ərzində həyata keçirilmiş antiterror tədbirləri nəticəsində isə qeyri-qanuni erməni hərbi birləşmələrinə ciddi zərbələr endirildi və düşmən ağ bayraq qaldıraraq təslim oldu. Bununla da Qarabağda olan qanunsuz hərbi birləşmələrin tərk-silah edilməsi prosesinə başlanıldı və bu qısamüddətli antiterror tədbirləri Azərbaycanın həm hərbi, həm də diplomatik sahədə əldə etdiyi növbəti tarixi Zəfər salnaməsinə çevrildi. 

Yeni Azərbaycan Partiyasının 33 illik yubileyi yalnız partiyanın tarixini deyil, həm də müstəqil Azərbaycanın keçdiyi tarixi yolu simvollaşdırır. YAP-ın fəaliyyəti Azərbaycanın inkişafında, ərazi bütövlüyü və müstəqilliyinin qorunmasında əvəzsiz rol oynayıb. Partiya gələcəkdə də ölkənin inkişafını sürətləndirmək və dünya arenasında daha güclü mövqe tutmaq üçün önəmli addımlar atmağa davam edəcək.

Rəşad BAXŞƏLİYEV,

"Azərbaycan"