ABŞ-nin İrəvanda keçirdiyi sosioloji sorğunun nəticəsi bunu deyir

Ermənistanla Azərbaycan arasında 30 il davam edən keçmiş Qarabağ münaqişəsinə son qoyulsa da, hələ də tərəflər arasında sülh müqaviləsinin imzalanmaması regionda sabitliyin təmin olunmasına rəvac vermir. Bunun da yeganə səbəbi 44 günə Azərbaycan qarşısında diz çöküb savaşın dayandırılmasını xahiş edən İrəvanın cəfəng iddiaları, bəhanələridir.

Ermənistan rəhbərliyi bütün reallıqları etiraf edirsə və çıxış yolunu Azərbaycanla münasibətlərin normallaşmasında görürsə, niyə sülh müqaviləsinin imzalanması uzanır?  Belə çıxır ki, bir tərəfdən sülh müqaviləsinin imzalanmasını qurtuluş yolu hesab edən Nikol Paşinyan iqtidarı, digər tərəfdən revanşist qüvvələrə, yəni öz ordusunun tör-töküntüsünə rəhbərlik edə bilmir. Bunu "əsaslandıran" baş nazir orduda 5-ci kolonun olduğunu iddia edir. 

Bu isə o deməkdir ki, sülh müqaviləsi bağlanmayana və tam delimitasiya, demarkasiya prosesi getməyənə qədər sülh müqaviləsinin imzalanması prosesi uzanacaq, Ermənistanın təxribatları davam edəcək. Yəni sülh müqaviləsinin imzalanmaması birbaşa Ermənistan rəhbərliyinin siyasi iradəsizliyindən irəli gəlir. Görünən budur ki, Paşinyan hökuməti 4 ildə xalqı sülhə qətiyyən hazırlaya bilməyib. Sual yaranır: Ermənistan cəmiyyəti müharibəmi istəyir? 

ABŞ-nin sorğu mərkəzi GALLUP Ermənistanda sorğu keçirib. Sorğunun nəticələri Ermənistan cəmiyyətinin xəstə təfəkkürdən xilas ola bilmədiyini bir daha nümayiş etdirib. Ermənistan vətəndaşları faktiki olaraq antisülh düşüncəsindədirlər. Sorğuda iştirak edənlərin yarısı ilin sonuna qədər sülh müqaviləsinin mümkünlüyünə inanmadığını bildirib. "Sizcə, ilin sonuna qədər "sülh müqaviləsi" bağlamaq mümkündürmü" sorğusunda iştirak edən vətəndaşların yalnız 8,3 faizi "əlbəttə, bəli" deyib. "Bəlkə də" cavabını 17,5 faiz, "xeyr"  cavabını 23,4 faiz, "qətiyyən yox"u isə 41,2 faiz verib. Respondentlərin 9,6 faizi suala cavab verməkdə çətinlik çəkib.

"Ermənistan Azərbaycan və Türkiyə ilə daha sıx əlaqələr qurmaq üçün yeni güzəştlərə getməlidirmi" sualına 7 faiz "bəli, alternativimiz yoxdur", 90 faiz isə "xeyr, daha güzəştə getmək üçün heç nə yoxdur" cavabını verib, 3 faiz isə cavab verməkdə çətinlik çəkib.

"Konstitusiya Məhkəməsinin Müstəqillik Bəyannaməsində Qarabağın adının heç bir hüquqi qüvvəyə malik olmadığını hesab etməsinə münasibətiniz necədir?" sualına 5 faiz "tamamilə müsbət", 9,8 faiz "kifayət qədər müsbət", 21,3 faiz "olduqca mənfi", 51,5 faiz "ümumiyyətlə, mənfi" reaksiyasını göstərib. 12,4 faiz isə qərarsız qalıb. "Gələn bazar günü parlament seçkiləri keçirilsə, hansı partiyaya və ya bloka səs verərdiniz?" sualına 16,5 faiz "Mülki müqavilə" partiyasına, 6,4 faiz "Ermənistan" blokuna, 30,1 faiz səs verməyəcəyini bildirib. 17,1 faiz cavab verməkdə çətinlik çəkdiyini, 11,5 faiz cavab verməkdən imtina etdiyini, 4,6 faiz heç kimi seçməyəcəyini bildirib.

"Sizcə, Ermənistanda ən mühüm problem nədir?", - sualına 1100 respondentin 76,2 faizi təhlükəsizlik və sərhəd məsələlərini qeyd edib. 19,4 faiz siyasi sabitliyin, 16,4 faiz iqtisadi inkişafın, 9,6 faiz məşğulluq və sosial məsələlərin adını çəkib.

Göründüyü kimi,  sorğuların nəticələri Ermənistan tərəfdən nə qədər təhlükənin olduğunu göstərir. Belə halda Nikol Paşinyan hakimiyyəti qarşıda gözlənilən acı nəticələrin məsuliyyətini üzərinə götürməlidir. Çünki  İrəvanın təcrid vəziyyətdə qalaraq inkişaf etməsi mümkünsüzdür və ötən zaman bunu çox aydın göstərib. 

Elçin CƏFƏROV,

"Azərbaycan"