Dünyada hamının nədənsə rəğbət bəsləmədiyi dilsiz-ağızsız bir heyvan var.
Onu bir neçə adla çağırırlar.
Bu fağır uzunqulaq nə qədər işlək, yükgötürən və üzüyola olsa da, insanlar arasında hörmət qazana bilməyib ki, bilməyib.
Bu heyvanın "ağıllı" bir tərsliyi də var:
Nə illah eləsən də, bir dəfə palçığa batdığı yerə ikinci dəfə girmir.
Döyməyin, toqqaşdamağın, noxtasından tutub dartmağın da faydası olmur.
Dörd ayağını yerə dirəyərək sonacan tərslik edir.
Bu "hörmətsiz", amma "ağıllı" heyvanın düzgün hərəkətini anlamayanlar, doğru nəticə çıxarmayanlar, onun höcətliyindən öyrənməyənlər də mövcuddur.
Belələri bir dəfə palçığa batdıqları yerə ikinci dəfə girənlərdir.
Yaxud girməyə hazırlaşanlardır.
Bəli, söhbət məhz Ermənistandan gedir.
***
Ermənistan parlamentinin sədri Alen Simonyan bu yaxınlarda xarici səfərdə olarkən "Azadlıq" radiosunun erməni xidmətinə ("Azatutyun") müsahibəsində maraqlı fikirlər səsləndirib.
Onlardan biri də budur ki, "Azərbaycanın Qarabağdakı əməliyyatı legitim idi".
Bu fikrin arxasında böyük həqiqətlər, həm də hayların yol verdikləri böyük səhvlər, böyük ağılsızlıqlar dayanır.
Hələ də davam edən və belə gedərsə, davam edəcək ağılsızlıqlar...
Ermənistandakılar "Böyük Ermənistan" xülyasına uyaraq Azərbaycana məxsus Qarabağ torpaqlarına göz dikdilər.
O torpaqlara ki orada onsuz da geninə-boluna rahat yaşayırdılar.
Kimsə də onlara dəyib-dolaşmırdı.
Sonradan kimlərinsə feilinə düşərək qudurdular, cızıqlarından çıxdılar.
Əvvəlcə başladılar ki, Qarabağ iqtisadi cəhətdən Azərbaycanın digər bölgələrindən geri qalır.
Qorbaçov başlarını sığallayaraq Sov.İKP MK və SSRİ Nazirlər Soveti adından onlara bir "kömək qərarı" verdi.
Sonra dedilər ki, biz Azərbaycandan ayrılmaq istəyirik.
Bu dəfə Moskvadakılar "xüsusi idarəetmə komitəsi" yaradaraq keçmiş DQMV-ni ona tabe etdilər.
Əslində isə, separatizm yolu tutan bu qurumu Azərbaycanın tərkibindən çıxardılar.
Daha sonra lap quduraraq Qarabağı Ermənistana birləşdirəcəklərini bəyan etdilər.
Hətta qondarma parlamentlərində belə bir sarsaq qərar da çıxardılar.
Azərbaycan bütün bunlara etiraz edəndə isə qeyzə gələrək silahlandılar və "müstəqil respublika yaratmaq" uğrunda müharibəyə başladılar:
* Dinc azərbaycanlıları zorakılıqla doğma el-obalarından qovdular;
* Mülki azərbaycanlıları girov götürərək başlarına müsibətlər gətirdilər, öldürərək gizli yerlərdə kütləvi şəkildə basdırdılar;
* Xocalı, Qaradağlı, Başlıbel və digər soyqırımlarını törətdilər;
* Evlərimizi, kənd və şəhərlərimizi, mədəni və dini abidələrimizi, qəbiristanlıqlarımızı dağıtdılar, məscidlərimizdə mal-qara, donuz saxladılar;
* Meyvə bağlarını, meşələri qırdılar, təbii sərvətlərimizi oğurlayaraq daşıdılar, çaylarımızı, göllərimizi zəhərlədilər;
* Keçmiş DQMV ilə bərabər, daha yeddi rayonumuzu tutaraq "bunlar da bizimdir" dedilər.
Alen Simonyanın dilə gətirmədiyi digər həqiqətlər də var:
* Ermənistan otuz il sülhə gəlmədi, ATƏT-in Minsk qrupunun riyakarlığından istifadə edərək danışıqlar imitasiyası yaratdı;
* Azərbaycandan öz razılığı ilə yeni ərazilər qoparmaqdan ötrü bütün vasitələrə əl atdı;
* Daim bizə hədə-qorxu gəldilər, yeni müharibə başlayacağı halda yeni ərazilərə sahiblənəcəkləri ilə hədələdilər;
* Özlərinə yox, arxalarında duranlara, müdafiə edənlərə güvəndiklərindən ipə-sapa yatmadılar.
Bu ağılla da yeni müharibəyə başladılar.
Amma gözlədikləri və istədikləri kimi olmadı.
Heç kim əvvəlkitək köməklərinə gələrək onların yerinə döyüşmədi.
44 gün ərzində yerlə yeksan edilərək zəlil günə qoyuldular!
Bu dəfə özləri başladıqları müharibənin dayandırılması üçün ona-buna yalvarmağa, üstümüzə çoxsaylı minnətçilər və xahişçilər göndərməyə başladılar.
Müzəffər Ali Baş Komandan İlham Əliyev alicənablıq göstərərək onlara "qələt eləmişəm" dedirtdikdən sonra müharibəni dayandırdı.
Bütün şərt və tələblərimiz yazılan üçtərəfli Bəyanatı imzalatdırdı.
Müharibədən sonra tam ağıllanmayanları ağıla gətirmək üçün daha iki dəfə möhtəşəm əməliyyat keçirərək, xoşluqla etmək istəmədiklərini də "dəmir yumruğ"un gücü sayəsində etdirdik!
***
"Dəmir yumruğ"un ermənilərə çox böyük faydası da dəydi, onları bir qədər ağıllandırdı.
Əvvəla, başa düşdülər ki, Azərbaycan onlardan qat-qat güclüdür;
İkincisi, anladılar ki, daha Ermənistan pasportu ilə Azərbaycan ərazisində yaşamaq, separatçılıq etmək mümkün olmayacaq;
Ən əsası da bu oldu: baş nazir Paşinyan "mifik" Ermənistanla "real" Ermənistan" arasındakı fərqi "gördü" və bunları öz təbəələrinə də izah etdi.
Amma deyəsən tamam ağıllanmayıblar.
* Yenə də kimlərəsə arxalanırlar, təkrarən özgə ağzı ilə hürmək istəyirlər;
* Yenə sülh danışıqlarını uzadır, üçtərəfli Bəyanatın bütün bəndlərinə əməl etmirlər;
* Yenə də silahlanırlar, hərbi təlimlər keçərək yenidən müharibəyə hazırlaşırlar;
* Yenə də qisasçılıq hissi ilə yaşayır, kimlərinsə fitvasına gedirlər.
Bir dəfə palçığa batdıqları yerə təkrarən girmək istəyirlər.
Yalnız haylar kimi axmaqlar inanarlar ki:
* Yenidən müharibə edib Azərbaycana qalib gəlmək olar...
* Azərbaycan nədənsə çəkinərək indi Bakıda "çay içən" 23 separatçını, terrorçunu, cinayətkarı onlara qaytaracaq...
* Dövlətimizin başçısının irəli sürdüyü şərtlər yerinə yetirilməyənədək yarımçıq sülh müqaviləsi imzalanacaq...
* Yaxud ABŞ-dən, Fransadan, Avropa İttifaqından qorxaraq onlara güzəştə gedəcək və beləliklə, "Qarabağ problemi"nin yenidən dirçəldilməsinə imkan yaradacağıq!..
Amma bu yazıqlar hələ də anlamayıblar ki, Müzəffər Ali Baş Komandan İlham Əliyev təkcə bugünkü və sabahkı addımlarını deyil, on il, yüz il bundan sonra da edəcəklərini indidən dəqiq müəyyənləşdirib.
***
Möcüzə bir dəfə olur!
Onu da Baş Sərkərdəmiz göstərərək 44 gündə otuzillik işğala, ikiəsrlik münaqişəyə birdəfəlik son qoydu!
Cənablar, özünüzdən ağıllıdan öyrənsəniz yaxşıdır, yoxsa bir dəfə palçığa batdığınız yerə yenə də girsəniz, nə əhaliniz qalacaq, nə də dövlətiniz olacaq!
Bəxtiyar SADIQOV
