Qətər şirkətlərin davamlılıqla bağlı son qərarlardan narahatlığını Avropa İttifaqının diqqətinə çatdırır.
AZƏRTAC xəbər verir ki, bunu Qətərin energetika naziri Səad əl-Kəabi bildirib.
Qeyd olunur ki, Avropa İttifaqının “Şirkətlərin davamlılığı üzrə məsuliyyətlilik təlimatı” (CSDDD) adlanan qanunvericilik aktı iri enerji müəssisələrinin fəaliyyətinə mənfi təsir göstərəcək və ətraf mühitə təsirləri barədə davamlılıq hesabatlarının hazırlanması, onların açıqlanması kimi tələblərə əməl etməyənlər cərimələnəcək. Şirkətlərin dünya üzrə gəlirlərinin 5 faizi həcmində cərimə oluna biləcəkləri gözlənilir.
Dünyada təbii qaza olan tələbin artmaqda olduğunu diqqətə çatdıran qətərli nazir süni intellektin inkişafını buna səbəb kimi göstərib. Qeyd edib ki, süni intellektin enerji sərfiyyatı durmadan artır və bunun üçün 2035-ci ilə qədər ildə 600-700 milyon ton maye qaza ehtiyac yaranacaq.
Nazir əlavə edib ki, ölkəsi gələcəkdə qaza olan tələbin artmasından qətiyyən narahat deyil. Ölkəsinin geniş imkanlarından danışan Qətər rəsmisi bildirib ki, Şimal Qaz yatağının genişləndirilməsi layihəsi çərçivəsində 2027-ci ilədək ildə 126 milyon ton maye qazın istehsalı proqnozlaşdırılıb. Bu, Qətərin ildə 77 milyon tona çatan hazırkı enerji istehsalı həcminin 85 faiz artımı deməkdir.
Eyni zamanda, vurğulanıb ki, Qətərin Texasda “Exxon Mobil” şirkəti ilə birgə layihəsi olan “Golden Pass” sahəsində maye qaz istehsalı qurğusu 2026-cı ilin birinci rübündə işə düşəcək.
“Attaqa.net” saytının məlumatına görə, ötən oktyabr ayında Qətər və ABŞ Avropa İttifaqı dövlətlərini CSDDD qanun aktına yenidən baxmağa çağırıb. Qətər adıçəkilən sənədin qüvvəyə minəcəyi təqdirdə, Avropa İttifaqına qaz təchizatını dayandıracağı ilə bağlı bu ilin iyul ayında Belçika Hökumətinə xəbərdarlıq edib.
Saytın bildirdiyinə görə, bu körfəz ərəb dövləti 2022-ci ildə Ukrayna müharibəsi başlayandan bəri Avropanın maye qaza olan tələbatının 12-14 faizini ödəyir.
19 (1)jpg_1771885865.jpg)
