Prezident İlham Əliyevin doğma yurdlarında Xocavənd sakinləri ilə görüşü duyğulu anlarla yadda qaldı
"Əminəm ki, bütün Azərbaycan xalqı, siz də hər zaman inanırdınız ki, bu gün gələcək və bu torpaqları biz azad edəcəyik, ədaləti bərpa edəcəyik, düşməni torpaqlarımızdan qovacağıq. Bildiyiniz kimi, vaxtilə işğal edilmiş torpaqların böyük hissəsi beş il bundan əvvəl Vətən müharibəsi zamanı azad olunsa da, Xocavənd hələ də işğal altında qalmışdı və xocavəndlilər də hesab edirdilər ki, nə vaxtsa vəziyyət dəyişəcək. Əminəm, cəmiyyətdə inam var idi ki, bir qarış torpaq da düşmənin tapdağı altında qalmayacaq və biz buna da nail olduq".
Fevralın 25-də Xocavənd sakinləri ilə görüşüb söhbət edən zaman Prezident İlham Əliyevin söylədiyi kimi, böyük Zəfər sayəsində torpaqlarımız işğaldan azad edildi. 2023-cü ildə keçirilən antiterror tədbirləri sayəsində dövlət suverenliyimiz təmin olundu. Qalib sərkərdə İlham Əliyevin Xocalıda, Xocavənddə, Əsgəranda, Ağdərədə, Xankəndidə ucaltdığı dövlət bayrağımız bu yurdların əzəli və əbədi Azərbaycan torpağı olduğunu bir daha dünyaya bəyan etdi.
Zəfər salnaməsinin qayıdış səhifəsi
Qarabağ Zəfəri Azərbaycan tarixində yeni və parlaq era açıb. İşğaldan azad edilən ərazilərə Böyük qayıdış isə bu qürurlu salnamənin ən yaddaqalan səhifələrindəndir. Bu gün keçmiş məcburi köçkünlərin qayıdış köçləri ilə el-obalarına dönmələri dirçəliş dastanı kimi tarixə həkk olunur.
Düz üç onillik boyu yurdlarından ayrı qalan bu insanlar ürəklərində vətən nisgili daşıdılar, maddi-mənəvi məhrumiyyətlərə düçar oldular, çadırlarda, vaqonlarda, yataqxanalarda acınacaqlı şəraitlərdə yaşadılar. Lakin heç zaman dədə-baba torpaqlarına dönəcəkləri ümidlərini itirmədilər. Bildilər ki, bir gün mütləq yenidən Şuşaya, Laçına, Ağdama, Kəlbəcərə, Xocalıya, Xankəndiyə... qayıdacaqlar...
Budur, artıq o tarixi an yetişib. İndi keçmiş məcburi köçkünlər bir zamanlar böyük əzablarla ağlaya-ağlaya tərk etdikləri yurdlarına gülə-gülə qayıdırlar. Sevinclə qədəm qoyduqları yeni evlərində xoşbəxt həyata başlayırlar.
Tarixi torpaqlarımızın azadlığa qovuşmasından sonra mütəmadi olaraq Qarabağ və Şərqi Zəngəzura səfərlər edən Prezident İlham Əliyev həm burada həyata keçirilən quruculuq və bərpa işləri ilə tanış olur, açılışlar edir, yeni təməllər qoyur, həm də el-obalarına dönən keçmiş məcburi köçkünlərlə evlərində görüşür, onların yurd sevinclərini bölüşür. Dövlət başçısı sakinlərlə səmimi söhbət edərək onların hazırkı yaşayış şəraiti ilə yaxından maraqlanır, qayıdış sevinclərinə şərik olur. Prezidentin keçmiş məcburi köçkünlərlə sadə, səmimi ünsiyyəti illərlə çəkilən əzabların unudulmadığını, bu, vətəndaşlarımızın hər birinin rifahının daim dövlətimizin, şəxsən cənab İlham Əliyevin diqqətində olduğunu göstərir.
Xocavəndə dönüş sevinci
Bu günlərdə xocavəndlilər də yurda qayıdış sevinci içərisindədirlər. Fevralın 20-də Xocavənd şəhəri və Xocavənd kəndi ilk köç karvanını qarşılayıb. İlkin mərhələdə Xocavənd şəhərinə 50 ailə - 194 nəfər, Xocavənd kəndinə isə 20 ailə - 94 nəfər köçürülüb. Fevralın 25-də Xocavənd şəhər və Xocavənd kənd sakinləri Prezident İlham Əliyevin, birinci xanım Mehriban Əliyevanın və qızları Arzu Əliyevanın timsalında doğma evlərində əziz qonaqlarını qarşıladılar.
Prezident İlham Əliyevin Xocavənddə sakinlərlə görüşü zamanı yaşanan o səmimi anlar, sadəcə bir dövlət tədbiri deyil, bütöv bir xalqın qürur və sevinc dolu qayıdış tablosu kimi yaddaşlara həkk olundu.
Ölkəmizin rəhbəri sakinlərlə görüşü zamanı dedi: "Uzun illər əzab-əziyyət içində yaşamısınız. Köçkün həyatı ağır həyatdır, həm mənəvi əzablar, həm fiziki çətinliklər, öz doğma torpağını tərk edib başqa yerə, hətta Azərbaycanın içində olsa belə getmək və əzab-əziyyət içində yaşamaq böyük sınaqdır. Siz bu sınaqdan şərəflə çıxmısınız".
"Artıq iki ildən çoxdur ki, bütün əraziyə - Azərbaycan dövlətinin suveren ərazisinə biz nəzarət edirik. Düşmənin sonuncu yuvasını da dağıtmışıq, separatçıları da qovmuşuq, onları da məhkəmə qarşısında cavab verməyə məcbur etmişik və ədaləti tam bərpa etmişik. Ona görə artıq o ağır dövr geridə qaldı, arxada qaldı, bir daha qayıtmayacaq. Bu gün dövlətimiz güclüdür, ordumuz güclüdür və xalqımız bu illər ərzində artıq bütün dünyaya öz böyüklüyünü göstərmişdir", - deyə dövlətimizin başçısı vurğuladı.
Xocavənddə səmimi dialoqlarla yaddaşlara yazılan bu görüş zamanı qürur, sevinc və duyğu dolu anlar yaşandı. Cənab İlham Əliyevi böyük sevgi ilə qarşılayan xocavəndlilərin gözlərindəki sevinc parıltısı illərdir həsrətini çəkdikləri torpağa qovuşmağın, öz evlərində təhlükəsiz və azad yaşamağın verdiyi daxili rahatlıq idi. Dövlət başçısının hər bir sakinə göstərdiyi diqqət və "Siz artıq öz evinizdəsiniz" mesajı bu sevincin təcəssümü oldu.
Sakinlərin Prezidentə xitabən səsləndirdikləri "Cənab Prezident, neçə illər arzusunda olduğumuz, həsrətini çəkdiyimiz Xocavənd torpağında salamlayıram Sizi. Elimizə-obamıza, dədə-baba yurdumuza xoş gəlmisiniz!", "Sizin sayənizdə alınan bu torpaqlara xoş gəlmisiniz, biz də xoş gəlmişik!", "Ən böyük xoşbəxtlikdir ki, Siz rəhmətlik atanızın vəsiyyətini yerinə yetirdiniz", "Çox sağ olun, şəhidlərimizin canı bahasına, qazilərimizin, hərbçilərimizin qanı bahasına, Sizin sayənizdə, siyasətiniz sayəsində torpaqlarımız azad olub, bu gün biz burada yaşayırıq" fikirləri bu insanların Prezident İlham Əliyevə olan böyük etimadının, sevgisinin təzahürüdür.
Yaxud "Bu günümüzə şükür. Həmişə yığıncaqlarımız olanda deyirdim ki, belə yığıncaqlarımız Qarabağda olsun. Bu gün arzumuza çatmışıq. Özümüzü o qədər xoşbəxt hiss edirik ki, biz öz torpağımıza, Vətənimizə gəlmişik. Beş gündür burada yaşayırıq. Vallah, heç acmırıq, təmiz oksigenlə nəfəs alırıq", "Bura Qarabağdır, cənnətdir", "Azərbaycan torpağı nə qədər varsa, Siz də, ailəniz də o torpağın üstündə var olasınız. Allah Sizi Azərbaycan xalqının başı üstündən əskik etməsin, amin!" demələri onların Prezident İlham Əliyevi özlərinin doğması saymalarının göstəricisidir. Bu, həm də keçmiş məcburi köçkünlərin torpaq həsrətlərinə son qoyan müzəffər liderə duyduqları minnətdarlıq hisslərinin təzahürüdür.
Bəli, on illərin həsrəti artıq tarixə qovuşub. Xocavənddə yaşanan qayıdış sevinci də elə Qarabağ və Şərqi Zəngəzurda davam edən dirçəlişin bir parçasıdır. İndi bu torpaqlardan yalnız sevinc, qürur nidaları ucalır və bu, hər bir sakinin simasında doğma yurduna qovuşmağın verdiyi daxili rahatlığın və Azərbaycanın qüdrətinə olan sonsuz inamın təntənəsidir.
Yasəmən MUSAYEVA,
"Azərbaycan"
jpeg_1772961927.jpeg)
