Ursula fon der Lyayenin COP29-a qatılmayacağını bəyan etməsi göstərir ki, onun təmsil etdiyi qurum iqlim dəyişikliyi problemlərinə laqeyd yanaşır

Bir neçə gündən sonra Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) öz işinə başlayacaq. Ona görə qarşıdakı günlərdə beynəlxalq ictimaiyyətin diqqəti bir daha Azərbaycana yönələcək. Bu tədbir iqlim problemlərinə həsr edilsə də, eyni zamanda respublikamızın mükəmməl təqdimatı olacaq.

Amma görünən odur ki, respublikamızın növbəti beynəlxalq uğur ərəfəsində olması Qərbdə mənzillənmiş anti-azərbaycançı şəbəkəni narahat edir. Bu həmin siyasi mərkəzlərdir ki, Azərbaycanın Vətən müharibəsindəki qələbəsini həzm edə bilməyərək, ölkəmizə qarşı uzun müddətdir ki, böhtan və qarayaxma kampaniyası aparmaqla məşğuldurlar.

COP29 ərəfəsində isə onlar bir qədər də fəallaşıblar. Təkcə oktyabr ayında Azərbaycanla bağlı atılan qərəzli addımlar, başladılan total qarayaxma kampaniyası bir daha bu siyasi mərkəzlərin riyakarlığını ortaya qoyur. ABŞ Konqresinin 60 ermənipərəst konqresmeninin Azərbaycana növbəti sanksiyalar tətbiq etmək üçün hökumətə müraciəti, Avropa Parlamentinin oktyabrın 24-də Azərbaycana qarşı növbəti dəfə qərəzli qətnamə qəbul etməsi, habelə Avropa Parlamentində müzakirələr zamanı iş yerləri və sosial hüquqlar üzrə Avropa komissarı Nikolas Şmitin Azərbaycan əleyhinə qəbuledilməz və böhtançı bəyanat səsləndirməsi, Litvanın xarici işlər naziri Qabrielius Landsberqisin AŞPA iclasında Azərbaycana qarşı səsləndirdiyi əsassız fikirlər, Niderland parlamentinin nümayəndələr palatasının Azərbaycan əleyhinə iki qətnamə qəbul etməsi, Niderlandın xarici işlər naziri Kaspar Veldkampın çıxışı zamanı bu riyakarlığı dəstəkləməsi bunu təsdiq edir.

 Ermənistanın Azərbaycan torpaqlarını 30 ilə yaxın işğal altında saxlamasına, Fransanın müstəmləkəçilik siyasətinə, bəzi Avropa ölkələrində insan haqları sahəsindəki problemlərə, islamofobiyaya heç vaxt münasibət bildirməyən, onlara göz yuman siyasi dairələrin Azərbaycana böhtan atması onların mənəviyyatsızlığından xəbər verir. Lakin onların nə deməsinin, nə qəbul etməsinin isə qalib Azərbaycan üçün zərrə qədər əhəmiyyəti yoxdur. Azərbaycan bundan sonra da öz yüksəlişi və uğurları ilə onların bütün qarayaxma kampaniyalarını iflasa uğradacaq.

Qeyd etmək lazımdır ki, iqlim dəyişmələrinin yaratdığı problemlər uzun illərdir ki, dünyanın diqqət mərkəzindədir. O cümlədən Avropa İttifaqı (Aİ) da bu problemə daim həssas münasibət nümayiş etdirdiyini, "yaşıl enerji"yə keçidi dəstəklədiyini bildirib. 2022-ci il dekabrın 17-də Buxarestdə "Azərbaycan Respublikası, Gürcüstan, Rumıniya və Macarıstan hökumətləri arasında "yaşıl enerji"nin inkişafı və ötürülməsi sahəsində strateji tərəfdaşlıq haqqında Saziş" imzalanması mərasimində Avropa Komissiyasının sədri Ursula fon der Lyayen də iştirak etmiş və bərpaolunan enerjiyə keçid baxımından Rumıniya, Gürcüstan və Azərbaycan arasında Qara dənizdən çəkiləcək elektrik xəttinin çəkilişinin olduqca vacib olduğunu bildirmişdi.

Lakin Ursula fon der Lyayenin bu günlərdə COP29-a qatılmayacağını bildirməsi Aİ-nın bəyan etdiyi prinsiplərlə bağlı tamamilə fərqli və ziddiyyətli davranış ortaya qoyur. Ursula fon der Lyayenin COP29-a qatılmayacağını deməsi həm də onu göstərir ki, beynəlxalq ictimai rəy, qlobal problemlər, iqlim dəyişikliyi kimi bütün bəşəriyyətə fəlakət gətirə biləcək məsələ nə onu, nə də rəhbərlik etdiyi Avropa Komissiyasını, ümumiyyətlə, narahat etmir. 

Görünən odur ki, beynəlxalq ictimaiyyət planeti ən çox çirkləndirən Avropa İttifaqından yeni iqlim maliyyəsi gözlədiyi halda, Aİ məsuliyyətdən yayınmaq üçün COP-a gəlmir. Aİ faktiki olaraq məsuliyyətdən qaçır. Digər tərəfdən, Ursula fon der Lyayenin bu qərarı onun özünün də antiazərbaycançı mövqeyindən və anti-azərbaycançı şəbəkənin təsiri altında olmasından xəbər verir.

Rəşad CƏFƏRLİ,

"Azərbaycan"