2024-cü ildən başlayaraq Azərbaycan Respublikasının Elm və Təhsil Nazirliyinin Elm və ali təhsil siyasəti şöbəsi tərəfindən mütəmadi olaraq yeni qəbul olunmuş qaydalar və normativ hüquqi sənədlər ilə bağlı təlimlər keçirilir.

2023/2024-cü tədris ili üzrə sonuncu təlim 16 iyul 2024-cü il tarixində Azərbaycan Texniki Universitetində ali və orta ixtisas təhsili müəssisələrinin rəhbər heyəti və məsul şəxslər üçün təşkil olunmuşdur. Təlimdə Elm və ali təhsil siyasəti şöbəsinin müdiri Turxan Süleyman şöbənin fəaliyyət istiqamətləri, təlimin məqsədi və Elm və Təhsil Nazirliyinin Kollegiyasının qərarına aid ümumi müddəaları barədə iştirakçılara məlumat verib.

Şöbə müdiri həmçinin elm sahəsində dövlət siyasətinin və tənzimlənmənin həyata keçirilməsi, elmi müəssisə və təşkilatların elmi fəaliyyətininəlaqələndirilməsi və istiqamətləndirilməsi ilə bağlı səlahiyyətlərin dövlət başçısı İlham Əliyevin "Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında" Fərmanı ilə Elm və Təhsil Nazirliyinə həvalə oldunduğunu xatırladıb və "Təhsil haqqında" Azərbaycan Respublikası Qanununun 29.0.37-3-cü maddəsinə əsasən ali və orta ixtisas təhsili müəssisələri tələbələrinin ixtisas üzrə təcrübə keçməsinin müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada hazırlanmasını təmin etmək ali təhsil  sahəsində dövlətin vəzifələrindən biri olduğunu vurğulayıb.

Daha sonra Elm və ali təhsil siyasəti şöbəsinin baş məsləhətçisi Vüsalə Qurbanova "Ali və orta ixtisas təhsili müəssisələri tələbələrinin ixtisas üzrə təcrübə keçmə Qaydası" ilə bağlı müvafiq təlimatları təlim iştirakçılarına çatdırıb.

Tədbirdə 300 nəfərdən çox əməkdaşa Azərbaycan Respublikası Nazirlər Kabinetinin 2023-cü il 30 dekabr tarixli 489 nömrəli Qərarı ilə təsdiq edilmiş "Ali və orta ixtisas təhsili müəssisələri tələbələrinin ixtisas üzrə təcrübə keçmə Qaydası" barədə müvafiq məlumat verilmiş, iştirakçıların sualları cavablandırılmış, müxtəlif rəy və təklifləri dinlənilmişdir.